Ra Xuua Nxixyą bi manda dí änni toꞌo a ra Jesús
11
Nuꞌbʉ mi gua a man ra Jesús bʉya, bi mbɛngähe dí ꞌdɛꞌmayohogähe. Nɛ nꞌdanni bi mbasɛ ra Jesús bʉya. Bi mba bin xänbate bʉ miꞌda yʉ hnini bʉ ra häi Galilea.2 Nɛ mi ofädi ra Xuua Nxixyą, nɛ bi sifi ꞌbɛꞌa gätho bi ꞌyøtꞌa ra Cristo, janangueꞌa bi mbɛnꞌndʉ yoho yʉ́ xädi a ra Xuua. Nɛ nuꞌbʉ mi zøm bʉ ꞌbʉh ra Jesús, 3 bi ꞌyänni:
―Ha gueꞌe gra Cristo, gra Thahni i Oją, ngue mi hma ba ɛ̨hɛ, uague ga thoqui ga tømhbʉ, bi ꞌyɛ̨nꞌʉ yʉ́ xädi ra Xuua.
4-5 Nu ra Jesús bʉya bi ꞌyɛ̨mpꞌʉ yʉ́ xädi ra Xuua:
―Ni mbɛ bʉ, gui xihmi a ra Xuua ꞌbɛꞌa gätho guí øhmi, bi ꞌyɛ̨mbi. Dami xihmi ꞌbɛꞌa guín nuui, ngue nu yʉ xädä bin zø yʉ́ dä ya, nɛꞌʉ yʉ dogua i ꞌyo, nɛꞌʉ mi hɛ̨mb ra tꞌaxcaꞌya ya bi yąn ʉ, nɛꞌʉ yʉ gogu ya i øhnahyą ya, nɛꞌʉ ꞌda xøn du i pa nsotsꞌi, nɛ yʉ hyoya i si a ram hma ngue ꞌbɛpʉ dím pø ʉ. 6 Mająpi ʉ toꞌo hin di ʉꞌtꞌ yʉ́ mbʉi nanguecä, bi ꞌyɛ̨nꞌa ra Jesús ꞌbʉ mi ꞌyɛ̨mpꞌʉ yʉ́ xädi ra Xuua.
7 Nɛ nuꞌbʉ mi mbencꞌʉ yʉ́ xädi ra Xuua, nu ra Jesús bi xih yʉ jąꞌi ꞌbɛꞌa øtꞌ ra Xuua, nɛ bi ꞌyɛ̨mbi:
―ꞌBɛꞌa guí mbähä guin nuhʉ bʉ ja ra dąpo ꞌbʉ mi ꞌbʉpʉ ra Xuua. Ha gá mbähä gbá nuhʉ nꞌda tengu ra xithi i ɛn ran dąhi. 8 Uague gá mbähä gbá nuhʉ nꞌda ran ꞌyohʉ mahotho rá he mí he. Pɛ guí pąhmbʉ toꞌo mahotho yʉ́ he i ꞌbʉpʉ ja yʉ nguntsꞌʉtꞌabi ʉ. 9 Uague gá mbähä gbá nuhʉ nꞌda rá pøngahyą Oją. Majuąni ngue gán nuhʉ nꞌda rá pøngahyą Oją, nɛ nuꞌa, manꞌda xʉn hɛ̨tsꞌi rá tsꞌɛdi a xínda gueꞌʉ gä miꞌda yʉ pøngahyą. 10 Nguetho gueꞌa ra Xuua a mí hmam bʉ ja rám hman Oją mayaꞌbʉ ꞌbʉ mí ꞌyɛ̨na:
Mꞌbɛtꞌo ga pɛhna nꞌda ran ꞌyohʉ ngue mam ꞌbɛhni
da xih yʉ jąꞌi ngue da døpꞌeꞌe xʉn ho,
bi ꞌyɛ̨n Oją, bi ꞌyɛ̨nꞌa ra Jesús.
11 Majuąni dí xi ahʉ, njon mí ꞌbʉh manꞌda ran ꞌyohʉ manꞌda xʉn hɛ̨tsꞌi nangue a rá ꞌbɛfi bin tꞌunni xínda gue a ra Xuua. Pɛ høntꞌa go toꞌo din uni ngue di manda rá tsꞌɛdi Oją, madagueꞌa hingui hɛ̨tsꞌi rá ꞌbɛfi din tꞌunni, pɛ manꞌda xtán hɛ̨tsꞌi bʉ dí nɛqui, xinda guepʉ ni nɛqui a ra Xuua ya, bi ꞌyɛ̨na.
12 Asta gueꞌbʉ mi dʉmpꞌ rá ꞌbɛfi ra Xuua nɛ guehya, i honi da yʉrpʉ di manda rá tsꞌɛdi Oją yʉ jąꞌi. Nɛ nuꞌʉ i humbi i honi, da dąha da yʉrpʉ, bi ꞌyɛ̨nꞌa ra Jesús. 13 Nɛ gueꞌa bi man ʉ yʉ pøngahyą mayaꞌbʉ ʉ bin ja, nɛ mí ɛ̨m bʉ ja yʉ́n tꞌɛ̨di Oją, nɛ gueꞌʉ mí man ʉ ꞌbʉ hín nim ꞌbʉh ra Xuua. 14 Nɛ nuꞌbʉ guí ɛ̨cꞌyɛi a dí xi ahʉ, gui pąhmbʉ ngue tenguꞌbʉ da gue a ra Elías a ra Xuua, ngue gueꞌa ra Elías guí tømhbʉ ngue mí ꞌbʉh mayaꞌbʉ. 15 Nɛ nuꞌbʉ ꞌboꞌo i ja rá zagu di jamansu a dím mangä ya, bi ꞌyɛ̨nꞌa ra Jesús.
16 Ga xi ahʉ ꞌbɛꞌa guí øthʉ ya, ngue nte guí ʉrpahʉ ra güɛnda. Guí øthʉ tengu i øtꞌ yʉ tꞌʉhni ꞌbʉ in ɛ̨ni. Din sʉsɛ ʉ, nɛ i xih yʉ́ mitꞌʉhnihʉ: 17 “Dá pixtꞌ mam ꞌbixtꞌi pɛ hin gá ꞌyʉrpahʉ ra güɛnda, nɛ hin gán nɛ̨hmbʉ,” i ɛ̨nꞌʉ ꞌda. “Pɛ nugähe dá pɛꞌbe nꞌda ra ꞌbɛi ngue tenguꞌbʉ xøn du nꞌda, pɛ nte gá bɛ̨mhbʉ nɛ hin gán zomhbʉ, ” i ɛ̨nꞌʉ miꞌda yʉ tꞌʉhni. 18 Nɛ ngutho guí øthʉ, hin gá ꞌyʉrpahʉ ra güɛnda a ra Xuua, ngue him mi ho yʉ́n sihmɛ nɛ him bi zi ra vino, pɛ gá ꞌyɛ̨mdahʉ in ꞌyoui ra zįthu. 19 Pɛ nugä, dán jąꞌigä ua ja ra ximhäi, xʉn ho man tsꞌihmɛ ꞌbʉ nꞌdandį nɛ ma tsꞌithegä, pɛ xínga guecä guí ʉrcahʉ ra güɛnda. Pɛ guí xijʉ yʉ fɛhni, guí ɛ̨njʉ: “Nuna ran ꞌyohʉ ran zäthu nɛ ra mihni na, nɛ yʉ́ amigo yʉ tsꞌomꞌbäi nɛ yʉ ziyate hyącahäi,” guí ɛ̨njʉ. Pɛ Oją i pądi ꞌbɛꞌa xʉn ho da ꞌyøtꞌe ngue bi zängaꞌbe, bi ꞌyɛ̨n a ra Jesús.
Nꞌda ram hma nangue ran ʉnbi da nu yʉ jąꞌi him bi päh yʉ́ mbʉi
20 Nɛ manꞌda ram hma bi man ra Jesús nangue yʉ hnini bʉ bi ꞌyøtꞌe xʉn ngu yʉ́n tꞌøtꞌe mixte. Nguetho nu yʉ jąꞌi bʉ, njąmꞌbʉ bi nde bi päh yʉ́ mbʉi, madagueꞌa bi nu yʉ́n tꞌøtꞌe mixte. Nɛ bi ꞌyɛ̨nꞌa ra Jesús:
21 ―Huɛ̨hi maha ahʉ gyʉ mɛnguhʉ bʉ ra hnini Corazín nɛ ra hnini Betsaida, nguetho nuꞌbʉ xcá øtꞌä yʉn tꞌøtꞌe xcá utꞌahʉ bʉ ja ra hnini Tiro nɛ ra hnini Sidón, xtán du yʉ́ mbʉi nangue ran tsꞌo mí øtꞌʉ nɛ xtí päh yʉ́ mbʉi ʉ. 22 Janangueꞌa nuꞌbʉ bi zøn ra pa din ja ran juąnbi, manꞌda xʉn ʉ tho ran ʉnbi gui nuhʉ xinda gue ʉ ꞌbʉpʉ Tiro nɛpʉ Sidón, bi ꞌyɛ̨mbi. 23 Ngutho ahʉ gyʉ mɛnguhʉ ra hnini Capernaum. Masque guí ɛ̨mhbʉ manꞌda xʉn hɛ̨tsꞌi rá tsꞌɛdi ni hninihʉ xínda gue ʉ miꞌda. Pɛgue hinꞌna, guehma da mba ma juadi ahʉ. Nguetho nuꞌbʉ xcá øtꞌä yʉn tꞌøtꞌe mixte bʉ ra hnini Sodoma tengu dá ørpʉ ja ni hninihʉ, hin xtán guadi nangue ra sibi, nguetho xtím päh yʉ́n ꞌyomfɛ̨ni yʉ mɛngu bʉ, nɛ guextaꞌa di jatꞌa ra hnini ya. 24 Pɛ guehma majuąni dí xi ahʉ, ꞌbʉ bin ja ran juąnbi, manꞌda xʉn ʉ tho ran ʉnbi gui nuhʉ, xínda gue a da nu yʉ mɛngu bʉ ra hnini Sodoma, bi ꞌyɛ̨nꞌa ra Jesús.
Ra Jesús i hurpa rá mbʉi nꞌda
25 Nɛ nubʉya nu ra Jesús bin yąui Oją nɛ bi ꞌyɛ̨na:
―Ma Ta i, gra Hmu mahɛ̨tsꞌi, nɛ gra Hmu ua ja ra häi, jamadi ya ngue gá japi him bi bąꞌa ram hma nangue ni tsꞌɛdi ʉ im bɛ̨nsɛ ja yʉ́n ꞌyomfɛ̨nisɛ, pɛ gá japi bi bądi nangueꞌe ʉ i honꞌaꞌi, tengu yʉ tꞌʉhni ngue hin te i pądi. 26 Nɛ gueꞌa gá ꞌyøtꞌe ma Ta i, ngue gueꞌa gá numanhosɛ guí øtꞌe, bi ꞌyɛ̨nꞌa ra Jesús ꞌbʉ min yąui Oją rá Ta.
27 Nɛ xø bi ꞌyɛ̨mpꞌʉ yʉ jąꞌi bʉya:
―Gätho ꞌbɛꞌa i ja, bi ꞌdacä ma Ta. Nɛ njon da bąqui xʉn ho, hinda høntꞌa ma Ta i pąqui. Nɛ njon da bądi xʉn ho ma Ta, hinda høngdä ngue rá Tsꞌʉntꞌʉgui dí pącä a, nɛ ʉ ngue ma pähä ga japi da bądi, bi ꞌyɛ̨nꞌa ra Jesús. 28-30 Nɛ nuꞌbʉ gá yähmbʉ nɛ gán xømbʉihʉ nangue ꞌbɛꞌa gätho guí øthʉ, ba ɛ̨hmbʉ gui tɛngahʉ, nɛ nugä ga hutꞌa ni mbʉihʉ. Nɛ nuꞌa ra ꞌbɛfi dí ꞌda ahʉ hingui hɛ̨i a, tenguꞌbʉ dí huthʉ ran thuyą dín hyanbahʉ ya. Nɛ nugä dí sɛt ma mbʉi nɛ hinꞌyʉ ran ꞌyɛ̨tsꞌi ma mbʉi, nɛ ga xänꞌnahʉ ngue njabʉ gui ꞌyøthʉ, nɛ ga hutꞌa ni mbʉihʉ, bi ꞌyɛ̨nꞌa ra Jesús.