Ra Jesús bi ꞌyuti ndaꞌa manꞌda xʉn ho xtá ꞌyøtꞌʉ yʉ fariseo
12
Nɛ nuꞌa nꞌda ra pa mi ꞌyo a ra Jesús bʉ ja yʉ huąhi. Nɛcähe dá mbähmbe yʉ́ xädigähe a, ꞌbʉ ra pa ran tsꞌäya. Dá ndehmɛhe nɛ dá tʉje ꞌda yʉ trigo. Dá tɛ̨ntꞌ ma ꞌyɛhe ʉ yʉ trigo nɛ dá sahe. 2 Nu yʉ fariseo bi nu ꞌbɛꞌa dá øthe nɛ bi ꞌyɛ̨mpꞌa ra Jesús:―Nu ni xädi bi ꞌyøtꞌa hin xtá ꞌyøtꞌe, nguetho bi ꞌyøtꞌa nꞌda ra ꞌbɛfi ra pa ran tsꞌäya, ꞌbʉ mi dʉc yʉ trigo.
3 Nɛ bi dąꞌa ra Jesús, bi ꞌyɛ̨mbi:
―Ha hin gán nuhʉ bʉ ja ni søcuąhʉ, ngue nɛ a ra David bi mbɛsta a rán tꞌɛ̨di Oją ꞌbʉ mi mbähä ʉ ꞌda, nɛ bin tumanthuhu, má hinꞌyʉ ꞌbɛꞌa da zi ʉ. 4 Janangueꞌa bi yʉrpʉ ja rá ngu Oją, bi zi ʉ yʉ ꞌbøxthuhmɛ him mi sä da zi ʉ, pɛ høntꞌʉ yʉ mbäją mi si ʉ. Pɛ hin guí ɛ̨mhbʉ bi ꞌyøtꞌ ra tsꞌoqui ra David, bi ꞌyɛ̨nꞌa ra Jesús. 5 Uague hin guím bɛ̨mhbʉ ꞌbɛꞌa mam bʉ ja rán tꞌɛ̨di ra Moisés nangue yʉ mbäją ꞌbʉpʉ ja ra niją, ngue nɛꞌbʉ ra pa ran tsꞌäya i øtꞌ yʉ́ ꞌbɛfi. Pɛ hing ra tsꞌoqui a i øtꞌe, nguetho guepʉ ja ra niją dim pɛfi. 6 Nɛ nugä dí xi ahʉ, manꞌda xʉn hɛ̨tsꞌi ma tsꞌɛdigä xínda gue ra niją, hanja guí ɛ̨mhbʉ bi ꞌyøtꞌ ra tsꞌoqui ma xädigä, bi ꞌyɛ̨mbi. 7 Pɛ nu ahʉ hin guí pąhmbʉ ꞌbɛꞌa nam bønꞌa im ma bʉ ja rám hman Oją ngue i ɛ̨na: “Nugä manꞌda dí nde din ja nin huɛ̨catehʉ, xinda gue gui hyohʉ yʉ zuꞌuɛ̨ ngue gui pøscahʉ,” i ɛ̨n Oją, bi ꞌyɛ̨nꞌa ra Jesús. Nuꞌbʉ xquí pąhmbʉ ꞌbɛꞌa nam bønꞌa, hin xcami yąfʉ ʉ hinꞌyʉ yʉ́ tsꞌoqui, bi ꞌyɛ̨nꞌa ra Jesús. 8 Nɛ nugä guecä dán jąꞌigä ua ja ra ximhäi, drá hmu, nɛ i ja man tꞌɛ̨di ga mangä ꞌbɛꞌa da ꞌyøtꞌ yʉ jąꞌi ra pa ran tsꞌäya, bi ꞌyɛ̨mbi.
Nꞌda ranꞌyohʉ ra mbɛdi rá ꞌyɛ bi hocꞌa ra Jesús
9 Nɛ bi thoh pʉya nɛ bi yʉrpʉ ja ra niją. 10 Nɛ nu yʉ́n sʉihʉ a ra Jesús mi nde xtán dįnba nꞌda ra tsꞌoqui ngue mi sä xtí yąpi, nɛ bi tꞌɛ̨mpꞌa ra Jesús:
―Ha da zä da mba ma hoqui a ra pa ran tsꞌäya nꞌda ra hyɛ̨nni, uague hinꞌna, bi ꞌyɛ̨nꞌʉ. Nguetho mí ꞌbʉpʉ nꞌda ran ꞌyohʉ ngue ra mbɛdi rá ꞌyɛ.
11 Nɛ bi dąꞌa ra Jesús:
―Ha i ꞌbʉ a nꞌda ahʉ ngue nuꞌbʉ ni dɛꞌyohʉ da däpʉ ja ra hyąhäi gueꞌbʉ ra pa ran tsꞌäya, ha hin gui jʉxhʉ. 12 Ha má guetꞌa nꞌda ra jąꞌi ngue hin da zä da tꞌørpa ran ho ꞌbʉ ra pa ran tsꞌäya. Nɛ nuꞌa, manꞌda di muui xinda gue yʉ dɛꞌyo, bi ꞌyɛ̨nꞌa ra Jesús.
13 Nɛ nubʉya, bi ꞌyɛ̨nꞌa ra Jesús:
―Dami juąn ni ꞌyɛ, bi tꞌɛ̨mpꞌa ran ꞌyohʉ.
Nɛ bi juąn bʉya. Nɛ ꞌbex bi gohi xʉn ho tengu manꞌda rá ꞌyɛ xʉn ho. 14 Nɛ nu yʉ fariseo ɛ̨mmɛ bin cuɛ bʉya. Bi bøm bʉ ja ra niją, bi nyąsɛ ʉ ꞌbɛꞌa dí zä da hyo ra Jesús.
Mayaꞌbʉ bi hma ꞌbɛꞌa bi ꞌyøtꞌa ra Jesús
15 Nɛ nuꞌbʉ mi bɛ̨nꞌa ra Jesús ꞌbɛꞌa mi nde xtá ꞌyørpa ʉ yʉ fariseo, bi bøm bʉ bʉya, bi mba nꞌdanni, nɛ ɛ̨mmɛ xʉn ngu yʉ jąꞌi bi numanho da dɛnthoho. Nɛ gätho midín hyɛ̨nni bi hocꞌa ra Jesús. 16 Nɛ bi xi ʉ njon da xifi toꞌo a bi hoqui. 17 Nɛ nuꞌa bi ꞌyøtꞌa ra Jesús ngue njon bi ndepe da xifi, bin thɛui a mi hma mayaꞌbʉ ꞌbʉ mi ꞌyɛ̨nꞌa ra pøngahyą Isaías:
18 Nuna guehna ma ꞌyɛ̨hɛgä dá huahni
ngue ɛ̨mmɛ didí huɛ̨cä nɛ i hurca ma mbʉi,
ga un ma Hogandąhi
ngue da xi ʉ i thąnde yʉ́ oją zɛhɛ, nangue ran juąnbi ga øtꞌä ꞌbʉ ran zɛgui ra pa.
19 Nɛ hin din sʉte a nɛ xín dim mbatho, nɛ hingan tsꞌɛdi din yą hapʉ din ꞌyo.
20 Nɛ nuꞌʉ in ja tenguꞌbʉ ra xithi bi dompꞌ ran dąhi, da xotsꞌi mahønꞌa.
Ngutho ʉ in ja tengu nꞌda ra sibi mi tsꞌʉtho da huɛ̨zɛhɛ, di japi ngue da dɛ xʉn ho mahønꞌa, asta gueꞌbʉ bi zøni dim hmu xʉn ho ua ja ra ximhäi, nɛ din jabʉ da ꞌyøtꞌe.
21 Nɛ gätho yʉ jąꞌi ꞌdahma ꞌdanꞌyo bʉ na yą da dømpꞌ ran ho da ꞌyørpa ʉ, i ɛ̨n Oją, bi ꞌyɛ̨nꞌa ra Isaías mayaꞌbʉ.
Gueꞌa bi ma nangue ra Cristo rá Thahni Oją.
Bi tꞌɛ̨mbi nꞌyoui rá tsꞌɛdi ra zįthu a ra Jesús
22 Nɛ nꞌda ran ꞌyohʉ min ꞌyoui ra zįthu nɛ mi xädä nɛ mi gore, bi tsꞌixpʉ ꞌbʉ a ra Jesús, ngue di hoqui. Nɛ ꞌbexgue bin zø yʉ́ dä, nɛ bi nyą bʉya. 23 Nuꞌʉ gätho bi nu ꞌbɛꞌa bi ꞌyøtꞌe bi hyonya thoho ʉ, nɛ bi ꞌyɛ̨na:
―Masque guehna mi man ʉ yʉ pøngahyą, ngue rám bomꞌbɛto ra David, ngue rá Thahni Oją, bi ꞌyɛ̨nꞌʉ yʉ jąꞌi.
24 Nɛ nu yʉ fariseo ꞌbʉ mi ꞌyøde ꞌbɛꞌa i man yʉ jąꞌi, bin cuɛ ʉ, bi ꞌyɛ̨na:
―Nuna ran ꞌyohʉ na i høn a thi yʉ zįthu nguetho in ꞌyoui rá tsꞌɛdi a yʉ́ hmu, sä ɛ̨nꞌʉ.
25-26 Nɛ ꞌbex bi bąꞌa ra Jesús ꞌbɛꞌa mim bɛ̨nꞌʉ yʉ fariseo nɛ bi ꞌyɛ̨mpꞌʉ:
―Pɛ him majuąni guí mamhbʉ, nguetho nu ra zįthu hin da zä din sʉsɛhʉ yʉ́m fätsꞌihʉ. Nuꞌbʉ din sʉsɛ din juasɛ yʉ́ tsꞌɛdi ʉ ꞌbʉ, tenguthoho ꞌbʉ nꞌda ra tsꞌʉtꞌabi din heque nɛ din tunhdʉ ʉ yʉ́m fätsꞌihʉ, di ꞌbɛsɛ yʉ́ tsꞌɛdi ꞌbʉ. Nɛ ngutho nꞌda ra hnini o gue nꞌda ra ngu ꞌbʉ din heque, pɛ gä dim ꞌbɛ ʉ. 27 Nuꞌahʉ guí ɛ̨mhbʉ dín ꞌyoꞌbe rá tsꞌɛdi ra zįthu, janangueꞌa i sä dí høn a thi yʉ zįthu, sä guí ɛ̨mhbʉ. Pɛ xiꞌbʉ da gueꞌa dí øtꞌä, ha in jabʉ ʉ guí xänbahʉ ꞌbʉ i høn a thi yʉ zįthu ʉ. Nɛ guesɛ ʉ i utꞌahʉ ngue him majuąni a guí mamhbʉ, bi ꞌyɛ̨nꞌa ra Jesús. 28 Pɛgue rá Hogandąhi Oją dá høn a thi yʉ zįthu nɛ dá utꞌahʉ ngue ya di manda rá tsꞌɛdi Oją ua guí ꞌbʉhmbʉ, bi ꞌyɛ̨mpꞌʉ.
29 Nɛ tenguthoho nꞌda ran ꞌyohʉ ꞌbʉ i ꞌbʉpʉ ja rá ngu, hin njongui sä da yʉrpʉ ꞌbʉ hinga mꞌbɛtꞌo da mba nthurpi yʉ́ ꞌyɛ, nɛ nuya sä da yʉrpʉ nɛ da hyąspi ꞌbɛꞌa gätho i ja bʉ. Dín jagä bʉ, him mí sä xcá mispa yʉ zįthu ꞌbʉ hin xcá tąpä ʉ yʉ́ hmu, bi ꞌyɛ̨nꞌa ra Jesús.
30 Nɛ nuꞌa toꞌo hingui numansugui, man sʉiꞌbe a. Nɛ nuꞌa toꞌo hingui øtꞌ ma ꞌbɛfi i di japi dim ꞌbɛ ʉ miꞌda, bi ꞌyɛ̨nꞌa ra Jesús.
31 Janangueꞌa dí xi ahʉ, høntꞌa go má tsꞌoqui nɛ høntꞌa go má tsꞌore da man a nꞌda, i sä da mba ma punbi, pɛ nuꞌbʉ i man ra tsꞌore nangue rá Hogandąhi Oją nꞌda, ya hin da zä da mba ma punbi nꞌda ꞌbʉ. 32 Pɛ dí xi ahʉ, nuꞌbʉ ꞌboꞌo da man ra tsꞌore nanguecä, dán jąꞌigä ua ja ra ximhäi, pɛ i sä da mba ma punbi a. Pɛ nuꞌa da man ra tsꞌore nangue rá Hogandąhi Oją, pɛ hin jąmꞌbʉ da mba ma punbi a, bi ꞌyɛ̨nꞌa ra Jesús.
Ra Jesús bi ma ꞌdaꞌanguui a rá mbʉi nꞌda a rán tꞌøtꞌe nꞌda
33 ―Pɛ nuꞌbʉ xʉn ho ran tꞌøtꞌe ngue dá høn a thi ʉ yʉ zįthu, ndeꞌbʉ gui numanhojʉ ꞌbʉ, nguetho gui ꞌyɛ̨mfʉ xʉn ho ra za gueꞌbʉ xʉn ho rán dätꞌä. Pɛ nuꞌbʉ hingui ho yʉ́n dätꞌä gui ꞌyɛ̨mfʉ hingui ho ra za ꞌbʉ. Nguetho nu yʉ́n dätꞌä i zʉpʉ da bą a nꞌda ndaꞌa ní za a, bi ꞌyɛ̨nꞌa ra Jesús. 34 Nu ahʉ, tenguꞌbʉ yʉ́ mɛni ahʉ yʉ pozʉ. Hague dán zä gui mamhbʉ nꞌda ra nde xʉn ho ꞌbʉ xʉn tsꞌotho ahʉ. Nguetho nuꞌa i yupʉ rá mbʉi nꞌda, gueꞌa i pøn rá nde nꞌda, bi tꞌɛ̨mpꞌʉ yʉ fariseo. 35 Nuꞌa ran ꞌyohʉ i yuh ran ho rá mbʉi, høntꞌa xʉn ho im ma, pɛ nuꞌa ran ꞌyohʉ xʉn tsꞌo, høntꞌa im ma, nguetho xʉn yuh ran tsꞌo rá mbʉi. 36 Nɛ dí xi ahʉ ngue nuꞌa ra pa din ja ran juąnbi, gätho yʉ jąꞌi da mba ma juąnbi nangue a him bin ꞌyomfɛ̨ni ꞌbɛꞌa í mba a bi man ʉ. 37 Nɛ nangue yʉm hma gá mamhbʉ dí tsꞌänꞌnahʉ ran ʉnbi ꞌda ahʉ nɛ dí mba ma thøgue ꞌda ahʉ, bi ꞌyɛ̨nꞌa ra Jesús.
Ra Jesús nte ma hmɛpya bi ꞌyu ꞌbʉ mi tꞌäp yʉ hmɛpya
38 Nɛ nubʉya, bi tꞌɛ̨mpꞌa ra Jesús, bi ꞌyɛ̨mpꞌʉ ꞌda ma ngʉrpihe yʉ fariseo nɛ yʉ xänbate niją:
―Gra xänbate, dami ꞌyurcahe nꞌda ra hmɛpya ngueꞌbʉ majuąni Oją bi ꞌdaꞌa ni tsꞌɛdi.
39 Bi dąꞌa ra Jesús:
―Nuꞌʉ xø ꞌuegue nangue Oją nɛ xʉn tsꞌo yʉ́ mbʉi, gueꞌʉ i äh yʉ hmɛpya ʉ. Pɛ hin da tꞌut yʉ hmɛpya ʉ, pɛ høntꞌa nꞌda ra hmɛpya da tꞌuti, tengu bi ꞌyøtꞌa ra Jonás. 40 Ngue tengu thoho ra Jonás, hyu pa nɛ hyu xui bi ꞌyo bʉ mbo rá foho nꞌda ra dąhuą, nɛ ngutho din jacä guecä dán jąꞌigä ua ja ra ximhäi, hyupa nɛ hyu xui ga o bʉ ꞌbʉ ʉ xʉn du, bi ꞌyɛ̨nꞌa ra Jesús ꞌbʉ mi ꞌyɛ̨mpꞌʉ. 41 Nɛ dí xi ahʉ, nuꞌʉ mí ꞌbʉpʉ ra dąhnini Nínive ꞌdarbʉ gam ꞌbähmbʉ ʉ ꞌbʉ bin ja ran juąnbi ꞌbʉ ran zɛgui, nɛ da ꞌyutꞌahʉ i ja ni tsꞌoquihʉ. Nguetho nuꞌʉ ꞌbex bi päh yʉ́ mbʉi ꞌbʉ mí ꞌyø a bi man a ra Jonás, pɛ nu ahʉ xø hin guín nde gui päh ni mbʉihʉ nangueꞌa dí mangä. Nɛ nugä, manꞌda xʉn hɛ̨tsꞌi ma tsꞌɛdi xinda gue ra Jonás, bi ꞌyɛ̨nꞌa ra Jesús. 42 Nɛꞌa ra xisu min tsꞌʉtꞌabi bʉ Sur, ꞌdarbʉ gam ꞌbähmbʉ a ꞌbʉ bin ja ran juąnbi ꞌbʉ ran zɛgui. Nɛ da ꞌyutꞌahʉ ngue i ja ni tsꞌoquihʉ. Nguetho nuꞌa yatho bá ɛ̨hɛ ngue mi nde da ꞌyø a ꞌbɛꞌa bi man a ra tsꞌʉtꞌabi Salomón nangue ran ꞌyomfɛ̨ni bi un Oją, pɛ nuꞌahʉ hin guí nde gui ꞌyøhmbʉ a dím mangä. Pɛ nugä manꞌda i ja rá tsꞌɛdi mam hmangä xinda gue ra Salomón, bi ꞌyɛ̨mpꞌʉ yʉ fariseo a ra Jesús.
Nu rá mbʉi nꞌda da yʉtꞌ ra zįthu mahønꞌa ꞌbʉ hin da bɛ̨n Oją
43 ―Pɛ nuꞌa ran tsꞌo guidí hohʉ, din ja ahʉ tengu bi ꞌyøtꞌa nꞌda ra jąꞌi min ꞌyoui nꞌda ra zįthu. Nɛ bi bøn a ra zįthu, bin ꞌyo bʉ ja ra ꞌyonhäi, mí honi hapʉ din säya pɛ him bi dįni hapʉ din säya. Nɛ bi mbeng bʉ ja rá mbʉi ra jąꞌi bʉ bá nɛtsꞌi. 44 “Manꞌda xʉn ho ꞌbʉ ga peng bʉ bá nɛtsꞌi,” bi ꞌyɛ̨nsɛ a ra zįthu. Nɛ nuꞌbʉ mi mbeng bʉya, bi zøm bʉ ja rá mbʉi a ra jąꞌi mahønꞌa, nɛ bi nu tenguꞌbʉ nꞌda ra ngu ngue mán joqui bʉ rá mbʉi, nɛ njom mí ꞌbʉpʉ nguetho him bin ząm bʉ rám hman Oją. 45 Nɛ xø bi mba bʉya bá si mí yoto yʉ́ minzįthuhʉ ngue manꞌda ɛ̨mmɛ xʉn tsꞌo i øtꞌe, nɛ bi yʉrpʉ, bin säya bʉ rá mbʉi a ra jąꞌi. Nɛ manꞌda ɛ̨mmɛ xʉn tsꞌo bi ꞌyøtꞌa ra jąꞌi bʉya. Nɛ gan jahʉ bʉ, bi ꞌyɛ̨mpꞌʉ yʉ jąꞌi a ra Jesús.
Ndaꞌa ʉ i din cuhʉ ra Jesús
46 Nɛ nu ra Jesús mi yąhʉ yʉ jąꞌi ꞌbʉ mi zøm bʉ a rá mbe nɛ yʉ́n ꞌyohʉ. Bi zøm bʉ ja ra ngu mí ꞌbʉi. Pɛ him bi yʉrpʉ, bim ꞌbätho bʉ thi, mi nde xtín yąui a rá tsꞌʉntꞌʉ. 47 Nɛ nuꞌʉ ꞌda bʉya bi xi a ra Jesús:
―I ꞌbäcua thi ni mbe nɛ nin ꞌyohʉ, nɛ in nde gan yąhʉ ꞌna, bi tꞌɛ̨mpꞌa ra Jesús.
48 Nɛ bi dą a ra Jesús:
―Ga xi ahʉ toꞌo a ma mbe nɛ toꞌo ʉ man ꞌyohʉ.
49 Nɛ bi ꞌyutꞌʉ yʉ́ xädi bʉya: