Bi dąmbɛ̨ni ra Jesús
28
Nɛ nuꞌbʉ ya mi thoh ra pa ran tsꞌäya, xø rá mbʉdi ra semana, bi mba mxudi thoho ʉ yoho yʉ xisu. Nuꞌa nꞌda ra María Magdalena nɛꞌa manꞌda ra María. Nuꞌbʉ mí nɛtsꞌi ní mba bʉ bí ja a ra hyądo. 2 Nɛ nuꞌbʉ mí mba ʉ, ꞌbexgue ntsꞌɛdi bi ꞌyąn ra häi mahønꞌa. Nguetho bi ꞌyøtꞌa rám ꞌbɛhni Oją xí zøpʉ ꞌbʉ mí ꞌuecꞌa ra do mi juaxpʉ ja rá goxthi ra hyądo. 3-5 Nɛ nuꞌa rám ꞌbɛhni Oją di fɛxni tengu nꞌda ra huɛi. Nɛ nu rá he bʉya, xʉn tꞌaxi tengu nꞌda ran nɛqui. Nɛ nuꞌʉ yʉ dofʉi ꞌbʉ mín nu a rám ꞌbɛhni Oją ɛ̨mmɛ bin su, bi fɛtꞌi, nɛ nte sä da ꞌyøtꞌe, tenguꞌbʉ xi du. Nuꞌa rám ꞌbɛhni Oją, mi hupʉ ja a ra do xí ꞌueque, nɛ bi ꞌyɛ̨mpꞌʉ yʉ xisu ꞌbʉ mi zøm bʉ: ―O guín suui. Dí pądi ngue guí hommi a ra Jesús xí cuatpʉ ja ra pontꞌi ʉ. 6 Pɛ njoꞌo ua, bi mba nsotsꞌi tengu mi ma. Ba thohmi gui nuui ua mí ꞌbɛni, bi ꞌyɛ̨nꞌa rám ꞌbɛhni Oją ꞌbʉ mi ꞌyɛ̨mpꞌʉ yʉ xisu. 7 Nuya, ní mbɛ ꞌdahmantho, gui xihmi yʉ́ xädi: “Bi dąmbɛ̨ni bʉ ꞌbʉ ʉ xøn du ya,” gui ꞌyɛ̨nui. Nɛ ndeꞌbʉ gätho ahʉ gui mbähä bʉ Galilea nɛ guepʉ guin cꞌathʉ bʉ. Nɛ gueꞌa bá ɛ̨cä ua ngue ga xi aui, bi ꞌyɛ̨mpꞌa rám ꞌbɛhni Oją mahɛ̨tsꞌi.
8 Nɛ bi bøm bʉ ja ra hyądo ʉ yʉ xisu, bin su nɛ xim midi johya. Bin tihi, bi mba bá xi ʉ yʉ́ xädi ra Jesús ꞌbɛꞌa bi sifi. 9 Nɛ bi zʉpʉ ꞌyu a ra Jesús ʉ yʉ xisu.
―Xíhatsꞌi, bi ꞌyɛ̨mpꞌʉ.
―O guín suui, ni mbɛ ba xihmi ʉ ma cuhʉ, ní mbähä bʉ Galilea, ja nín tįmhbʉ bʉ, bi ꞌyɛ̨nꞌa ra Jesús.
Ra fɛhni bi man yʉ dofʉi
11 Nɛ nuꞌbʉ mí mbencꞌʉ yʉ xisu, nɛꞌʉ yʉ dofʉi mí fäh ran ꞌyägui bi mba bá xi ʉ yʉ hmumbäją ꞌbɛꞌa gätho bin ja. 12 Bim pɛti yʉ hmumbäją bʉya, nɛ yʉ dącꞌyɛi. Bi ma ꞌbɛꞌa da zä da ꞌyøtꞌe. Nɛ nubʉya xʉn ngu ra mbɛti bi unꞌndʉ yʉ dofʉi 13 nɛ bi ꞌyɛ̨mpꞌʉ:
―Gui ꞌyɛ̨mhbʉ: “Bá ɛ̨ ʉ yʉ́ xädi ꞌbʉ min xui ꞌbʉ mán ąhmbe, bi bɛ̨pꞌa rá ngøcꞌyɛi,” gui ꞌyɛ̨mhbʉ, bi ꞌyɛ̨mpꞌʉ. 14 Nɛ nuꞌbʉ da ꞌyøꞌa ra tsꞌʉtꞌabi ngue gán ąhmbʉ, nɛ da ꞌyɛ̨na da zʉ ahʉ, nugähe dan yąhe ga fäx ahe, bi ꞌyɛ̨n yʉ hmumbäją ꞌbʉ mi ꞌyɛ̨mpꞌʉ yʉ dofʉi.
15 Nɛ bi hyąn a ra mbɛti ʉ yʉ dofʉi bʉya. Bi mba da ꞌyøtꞌa bi sifi. Nɛ nuꞌa ra fɛhni bi man ʉ, xʉn ngu bi ꞌyɛ̨cꞌyɛi ʉ ma mijudíohe dyʉ israelhe. Nɛ guextaꞌa ra fɛhni i man ʉ.
Yʉ́ xädi ra Jesús bi un yʉ́n tꞌɛ̨di da mampꞌa rám hma
16 Nɛ dá mbähmbe bʉ ra häi Galilea bʉya, dí ꞌdɛꞌmaꞌda gähe, yʉ́ xädigähe ra Jesús. Nɛ dá sømhbe bʉ ja ra nyuni xí xije ra Jesús dan cꞌathe bʉ. 17 Nɛ nuꞌbʉ má nuhe, dá ɛ̨spahe a, pɛ nuꞌʉ ꞌda him mi ɛ̨cꞌyɛi gue gueꞌa. 18 Nɛ bi hyäm bʉ dí ꞌbähmbe a ra Jesús nɛ bi ꞌyɛ̨nje:
―Gätho ra tsꞌɛdi bin ꞌdacä ga manda gätho ra ximhäi nɛ mahɛ̨tsꞌi, bi ꞌyɛ̨nje. 19 Janangueꞌa ní mbähä ya hønbʉ go hapʉ ꞌbʉh yʉ jąꞌi gä na ndoho ra ximhäi, gui xihmbʉ da ꞌyɛ̨cꞌyɛigui. Nɛ nuꞌʉ toꞌo di däcä yʉ́ mbʉi, gui xixyąbahʉ nangue rá thuhu ma Ta, nɛ nangue rá thuhu rá Tsꞌʉntꞌʉ, nɛ rá thuhu rá Hogandąhi Oją. 20 Nɛ gui xänbahʉ da ꞌyøtꞌe ꞌbɛꞌa gätho dá xi ahʉ. Nɛ guim bɛ̨mhbʉ dín ꞌyohʉ gätho yʉ pa asta gueꞌbʉ da guah ra ximhäi, bi ꞌyɛ̨ngähe ra Jesús bʉya.