Nꞌda ran thąti bin ja bʉ Caná
2
Nɛ nuꞌbʉ mí thoꞌa nyopa bʉya bin ja nꞌda ra dąntsꞌihmɛ ꞌbʉ mín thąta nꞌda ra tsꞌʉntꞌʉ bʉ Caná ra häi Galilea. Nɛ bi zøm bʉ rá mbe ra Jesús, bi mbäxꞌʉ bi hoc ran tsꞌihmɛ. 2 Nɛ ra Jesús nɛcähe yʉ́ xädigähe bi tsꞌoncahe bʉ ja ran tsꞌihmɛ. 3 Nɛ nuꞌbʉ min theh ra guiꞌuva dá sihe, bi ꞌyɛ̨nꞌa rá mbe ra Jesús:―Bin theꞌa ra guiꞌuva, bi ꞌyɛ̨mpꞌa ra Jesús.
4 Bi dąꞌa ra Jesús bʉya:
―Ma mbe i, ꞌbɛ gám bɛ̨nsɛ ꞌbɛꞌa ga øtꞌä, nguetho hinga na søn ra ora ga øtꞌa nꞌda ran tꞌøtꞌe nuįxte, bi ꞌyɛ̨mpꞌa rá mbe.
5 Nɛ nuꞌa rá mbe ra Jesús bʉya bi xi ʉ yʉ ꞌyɛ̨hɛ ꞌbʉpʉ:
―Høntꞌa go ꞌbɛꞌa da xi ahʉ ra Jesús, dami ꞌyøthʉ, bi ꞌyɛ̨na.
6 Nɛ mí høpʉ ꞌdato yʉ xaro ngue yʉ do, mbɛ goho ꞌdäte litro i hätꞌʉ. Nguetho i ja ran tꞌɛ̨di ma mi judíohe gue i jatho din xʉtꞌyɛ. 7 Nɛ nuꞌbʉ mí zøn ra ora bi man ra Jesús, bi xi ʉ yʉ ꞌyɛ̨hɛ ꞌbʉpʉ:
―Dami yusꞌhʉ yʉ xaro nangue ra dehe.
―Dami ꞌyä i tsꞌʉ ra dehe nɛ gui unꞌna ra ngʉrpa ꞌyɛ̨hɛ, bi ꞌyɛ̨na.
Nɛ bi un bʉya. 9 Nɛ nuꞌbʉ mí zä a ra ngʉrpa ꞌyɛ̨hɛ gue xín guiꞌuva a ra dehe, bi zä mancʉhi. Pɛ him bi bądi hapʉ bi nɛqui, pɛ nu yʉ ꞌyɛ̨hɛ gue bi ꞌyä a ra dehe mi pą ʉ. Janangueꞌa nu ra ngʉrpa ꞌyɛ̨hɛ bi ma bá tsꞌi a ra tsꞌʉntꞌʉ da ꞌyänni nangue ra guiꞌuva, gue nuꞌa ra tsꞌʉntꞌʉ go din thąti. 10 Nɛ bi tꞌɛ̨mpꞌa:
―Pɛ hanja ꞌbɛ bin niyą ʉ yʉ jąꞌi, gá unꞌna ra guiꞌuva xʉn cʉhi, nɛ hinga gueꞌa ząi øtꞌ yʉ jąꞌi a. Pɛ ząi rá mbʉdi thoho di un a xʉn cʉhi bʉ ja nꞌda ran tsꞌihmɛ, nɛ nuꞌbʉ bin niyą yʉ jąꞌi din tꞌunꞌna hin ɛ ho, bi ꞌyɛ̨nꞌa ra ngʉrpa ꞌyɛ̨hɛ. Nɛ xinga gueꞌa mí pą a.
11 Nɛ guehna rá mbʉdi ran tꞌøtꞌe nuįxte bi ꞌyøtꞌ ra Jesús bʉ Caná ra häi Galilea, gue bi ꞌyuh rá tsꞌɛdi. Nɛ manꞌda dá ɛ̨cꞌyɛihe bʉya yʉ́ xädigähe a.
12 Mꞌbɛjua bʉya dá mbähmbe ra Jesús bʉ ra hnini Capernaum, nɛ rá mbe nɛ yʉ́n ꞌyohʉ. Pɛ hinga nyaꞌa dám ꞌbʉhmbe bʉ.
Ra Jesús bi mbaxtꞌa ra dąniją
13 Dá mbähmbe ra Jesús bʉ Jerusalén ꞌbʉ ma guepʉ da dätꞌ ra pa mahønꞌa ran dąbaxjua gue ꞌbʉ mi hyo ra tꞌʉdɛꞌyo bʉ Egipto mam bombøtahe. 14 Nɛ nuꞌbʉ mí yʉrpʉ mbo má mbäꞌtꞌi ra dąniją, bi nu ngue ꞌbʉpʉ yʉ mbändąni nɛ yʉ mbädɛꞌyo nɛ yʉ mbätsꞌąha mim pä bʉ. Nɛ mí ꞌbʉpʉ ʉ yʉm pämbɛti øtꞌ yʉ́ ꞌbɛfi bʉ. 15 Nɛ bi ꞌyøtꞌa nꞌda ram fɛi gue ra xąhi gue í dɛxꞌʉ yʉ mbä. Nɛ gätho bi hyøn a thi yʉ mbä nɛ yʉ́n dąni nɛ yʉ́ dɛꞌyo. Nɛ bi ꞌuɛ̨nba yʉ́ mbɛti yʉm pämbɛti, bi ndønba yʉ́ mɛxa. 16 Nɛ bi tꞌɛ̨mpꞌʉ yʉ mbätsꞌąha:
―Ní mbähä, dami six ni dojahʉ. Hingui sä gui ꞌyøthʉ ra nguntäi ua rá ngu ma Ta, bi ꞌyɛ̨nꞌa ra Jesús.
17 Nɛ ꞌbex dá bɛ̨mhbe a mán tꞌoꞌtꞌi ja rá tꞌohni Oją: “Ɛ̨na da guah ma mbʉi nangue ra dumbʉi ꞌbʉ má nu a ni ngu, nguetho ɛ̨mmɛ dín ndepe xtán hotho bʉ,” bi ꞌyɛ̨mp a rá Ta ra Cristo, bi ꞌyɛ̨n rá tꞌohni.
18 Nuꞌʉ ma ngʉrpihe dyʉ judíohe bi ꞌyän bʉya, nɛ bi ꞌyɛ̨mbi:
―ꞌBɛꞌa ní hmɛpya gui ꞌyurcahe ya, nꞌdahma da zä ga pąhmbe ꞌbʉ i ja nin tꞌɛ̨di gui ꞌyøtꞌa gá ꞌyøtꞌ ya, gue gá hyøn a thi yʉ mbä, bi ꞌyɛ̨nꞌʉ.
19 Nu ra Jesús bi dątꞌʉ:
―Ga xi ahʉ ra hmɛpya gá ꞌyäjʉ. Nuꞌbʉ gui xothʉ ra niją ua, nɛ hyupa thoho dá høh mahønꞌa, bi ꞌyɛ̨mpꞌʉ.
20 Bi ꞌyɛ̨nꞌʉ ma ngʉrpihe bʉya:
―Pɛ yote ma ꞌdato njɛya án guahna ra niją, nɛ guí ɛ̨na, nhyupa thoho gdí hyøh mahønꞌa, bi ꞌyɛ̨nꞌʉ.
21 Pɛ nuꞌa ra niją bi man a ra Jesús, bi ma nangue rá ngøcꞌyɛ̨i zɛhɛ. 22 Nuꞌbʉ mí zøn ra ora bi du nɛ bi dąmbɛ̨ni, ꞌbexgue dá bɛ̨mhbe ꞌbɛꞌa xí manꞌa, nɛ manꞌda dá pąhmbe majuąni a bi man rá tꞌohni Oją nɛ yʉ́m hman ra Jesús.
Gätho i pąsɛ ra Jesús
23 Nɛ nuꞌbʉ mám ꞌbʉhmbe bʉ Jerusalén, gueꞌʉ yʉ pa ran dąbaxjua, xʉn ngu ɛ̨na bi ꞌyɛ̨cꞌyɛi ra Jesús ꞌbʉ mín nu yʉn tꞌøtꞌe nuįxte bi ꞌyørpʉ. 24 Pɛ nuꞌa ra Jesús hinga gätho bi xi ʉ ꞌbɛꞌa mím bɛ̨ni, nguetho bi bądi ꞌbɛꞌa di ja yʉ́ mbʉi gätho yʉ jąꞌi, bi bądi hin da ꞌyømanho ʉ. 25 Nɛ hinga hnɛhi tho da sih ra Jesús ꞌbɛꞌa im bɛ̨n yʉ jąꞌi nguetho ya i pą a ra Jesús ꞌbɛꞌa di ja yʉ́ mbʉi.