Bin yąui ra Jesús a ra Nicodemo
3
Mí ꞌbʉ a nꞌda ran ꞌyohʉ, nꞌda ra fariseo, gueꞌʉ min ɛ̨hya da ꞌyøtꞌ yʉ́n tꞌɛ̨di Oją, í Nicodemo a. Nuꞌa nꞌda rá ngʉrpi ma mijudíohe. 2 Nꞌda ra xui bi zøm bʉ ꞌbʉh ra Jesús, nɛ bi ꞌyɛ̨mbi:―Xänbate i, dí pąhmbe Oją bi zänꞌni i gui xängahe, nguetho hin xtán zä xquí ꞌyøtꞌ yʉn tꞌøtꞌe nuįxte ꞌbʉ hin di zɛ a Oją, bi ꞌyɛ̨na.
3 Nu ra Jesús bi dądi, bi ꞌyɛ̨mpꞌa:
―Majuąni dí xi a i, nuꞌa hin dim ꞌbʉi maꞌdaꞌyo, hin da zä da yʉrpʉ di manda Oją, bi ꞌyɛ̨mbi.
4 Nu ra Nicodemo bi ꞌyɛ̨m bʉya:
―Hague dán zä dim ꞌbʉi maꞌdaꞌyo nꞌda gueꞌbʉ xʉn dącꞌyɛi nꞌda. Ha da zä da yʉtꞌ mahønꞌa bʉ ja rá mbʉi rá mbe nɛ dim ꞌbʉi mahønꞌa.
5 Nuꞌa ra Jesús bi ꞌyɛ̨mpꞌa:
―Majuąni dí xi a i, gue nuꞌa toꞌo him bim ꞌbʉi maꞌdaꞌyo nangue ra dehe nɛ rá Hogandąhi Oją, hin da zä da yʉrpʉ di manda Oją. 6 Nguetho nuꞌbʉ din xąnd yʉ jąꞌi, xø yʉ jąꞌitho yʉ́ tꞌʉhni, pɛ nuꞌʉ di xąnd rá Hogandąhi Oją, gueꞌʉ i ja rá te Oją bʉ ja yʉ́ mbʉi ʉ. 7 Janangueꞌa o gadi hyonya thoho a dí xi a i, jatho gam ꞌbʉi maꞌdaꞌyo. 8 Nɛ tengu ran dąhi i ꞌyo hønbʉ go hapʉ in nde, nɛ guí øde di hį, pɛ hin guí pądi hapʉ ní ꞌyɛ̨hɛ o hapʉ ní mba. Njabʉ i øtꞌ rá Hogandąhi Oją ꞌbʉ bi xąnd mahønꞌa nꞌda, hingam ꞌbatho ha bin ja ꞌbʉ mí un ra ꞌdaꞌyote, pɛ mfądi ngue i ja a, bi ꞌyɛ̨n a ra Jesús.
9 ―Hín dí pądi ꞌbɛꞌa nam bøn a guí man ya, bi ꞌyɛ̨nꞌa ra Nicodemo.
10 Nu ra Jesús bi ꞌyɛ̨mpꞌa:
―Nuꞌi grá xänbate, ząi guí xänba rám Hman Oją ʉ ma mi israelhʉ, hanja hin guí pądi ꞌbɛꞌa dí xi a i. 11 Majuąni dí xi i, dím mangä a dí pącä, nɛ dím ma majuąni ꞌbɛꞌa xtá nugä, pɛ hin guí hąmhbʉ mam hmangä. 12 Dá xiꞌa rá ꞌbɛfi Oją i øtꞌ ua ja ra ximhäi, pɛ hin gá ꞌyɛ̨cꞌyɛi. Pɛ dami ꞌyɛ̨cꞌyɛi a, janangueꞌa da zä ga xi i ꞌbɛꞌa rán ꞌyomfɛ̨ni Oją, ngue ꞌbɛpʉ ní nɛqui rá ꞌbɛfi i øtꞌ ua.
13 Nɛ høngdä da zä ga mangä ua a, nguetho drá mɛngugä bʉ mahɛ̨tsꞌi nɛ bá ɛ̨cä bʉ, guecä ngue dán jąꞌigä ua ja ra ximhäi. Nɛ njoꞌo manꞌda ra jąꞌi ngue bi yʉt mahɛ̨tsꞌi nɛ bá pengui ngue da mangua ꞌbɛꞌa øtꞌ Oją. 14 Nɛ tengu thoho bi ꞌyøtꞌ ra Moisés, gue bi cuarpʉ magątsꞌi nꞌda ra pozʉ ntꞌøtꞌe ra tꞌɛgui, nuꞌbʉ mín ꞌyo bʉ ja ra ʉhäi, ngutho jatho din jacä din cuarcä magątsꞌi, guecä gue dán jąꞌigä ua ja ra ximhäi. 15 Nɛ nuꞌbʉ bin jacä tengu a, nɛ høntꞌa go toꞌo da ꞌyɛ̨cꞌyɛi ꞌbɛꞌa dá tugä bʉ, hin da nu ran ʉnbi maząi, pɛgue din ja ra ꞌdaꞌyote maząi a, bi ꞌyɛ̨n a ra Jesús, bi ꞌyɛ̨mpꞌa ra Nicodemo.
Oją di huɛ̨cꞌʉ ꞌbʉcua ja ra ximhäi
16 Nguetho ɛ̨mmɛ di huɛ̨gahʉ Oją gue dí ꞌbʉhmbʉ ua ja ra ximhäi. Janangueꞌa bi ꞌdajʉ rá ꞌdatsꞌʉntꞌʉ ngue ma yąntehʉ, nꞌdamhma hin da nu ran ʉnbi maząi toꞌo gätho di däp rá mbʉi a, pɛgue din tꞌun ra ꞌdaꞌyote maząi. 17 Nguetho in nde Oją da yąnjʉ guejʉ dí ꞌbʉhmbʉ ua ja ra ximhäi, nɛ hinguin nde di ꞌdajʉ rá muui ma tsꞌoquihʉ, nɛ gueꞌa bí mbɛnhua rá Tsꞌʉntꞌʉ ua ja ra ximhäi a.
18 Nɛ nuꞌa toꞌo di däp rá mbʉi a rá Tsꞌʉntꞌʉ Oją, hin da nu a rá muui yʉ́ tsꞌoqui. Pɛ nuꞌa toꞌo hin di däp rá mbʉi a, pɛ guehma da nu a xí tsꞌänbi da nu nangue yʉ́ tsꞌoqui, nguetho hingui ɛ̨cꞌyɛi a rá ꞌdatsꞌʉntꞌʉ Oją. 19 Nɛ gueꞌa bí mbɛn Oją ran nɛqui ua ja ra ximhäi, gue ní nɛqui ꞌbɛꞌa di ho yʉ jąꞌi. Nuꞌʉ to di ho ra ꞌbɛxui hingui søm bʉ ja ran nɛqui, nguetho øtꞌ ran tsꞌo. Mfądi xʉn ho din ʉnba ʉ. 20 Nguetho gätho ʉ i øtꞌ ran tsꞌo hin di ho ran nɛqui, nɛ hingui søm bʉ ja ran nɛqui, ngue i su hin da hnumanho ꞌbɛꞌa øtꞌʉ. 21 Pɛ nu yʉ jąꞌi i honi da ꞌyøtꞌa ran ho, i pa bʉ ja ran nɛqui, nꞌdahma da hnu gue gueꞌa Oją di zɛ ʉ da ꞌyøtꞌ ran ho.
Nu ra Xuua Nxixyą bi ma mahønꞌa nangue ra Jesús
22 Mꞌbɛjua dá mbähmbe ra Jesús dyʉ́ xädihe, dá mbähmbe bʉ ja ra häi Judea, nɛ dám ꞌbʉhmbe bʉ ꞌda yʉ pa nɛ dá xixyąbahe yʉ jąꞌi bʉ. 23 Nɛꞌa ra Xuua Nxixyą mí øtꞌ ran xixyą bʉ Enón ꞌdarpʉ ra xɛqui Salim, nguetho xʉn ngu yʉ mbøthe i pøpʉ, 24 ngueꞌbʉ hin ní jotꞌa fädi ra Xuua Nxixyą.
25 Bin junthʉ ꞌda ʉ yʉ́ mijudíohʉ ʉ yʉ́ xädi ra Xuua, gue bi bɛ̨ni manꞌda di muui rán xixyą i øtꞌa ra Jesús. 26 Bi zøm bʉ ꞌbäꞌa ra Xuua Nxixyą ʉ yʉ́ xädi bʉya, nɛ bi ꞌyɛ̨mbi:
―Xänbate i, nuꞌa ran ꞌyohʉ gmín ꞌyoui bʉ ꞌdanguadi ra dąthe Jordán, gue gá xije toꞌo a, pɛ nuya i øtꞌ ran xixyą, nɛ gätho yʉ jąꞌi i tɛnni.
27 Nu ra Xuua Nxixyą bʉya bi ꞌyɛ̨mpꞌʉ:
―Guesɛ Oją bi zänni hangu nangu ra ꞌbɛfi nꞌda ngu nꞌda ngue da zä da ꞌyøtꞌa nꞌda. 28 Nuꞌehʉ guí pąhmbʉ ꞌbɛꞌa gätho dám mangä gue dá xi ahʉ, hinga guecä drá Cristo, pɛ nugä bám ꞌbɛtꞌogä, gue dá xih yʉ jąꞌi din sä da dɛn ra Cristo. 29 Tenguꞌbʉ nꞌda ra hmute din thąti, da dɛnꞌna rá ndø. Nɛ nuꞌa rá amigo a ran ꞌyohʉ bin thąti, i ꞌbäpʉ i øꞌa i ma, nɛ di johya gue i tɛnꞌna rá ndø a ra hmute. Dín jadä bʉya, dadín johyagä ꞌbʉ dín nu i tɛn yʉ jąꞌi a ra Jesús. 30 Nuꞌa ra Jesús jatho da dąha gue nugä, pɛ nugä jatho ga ꞌbɛcä, bi ꞌyɛ̨n a ra Xuua Nxixyą.
Bí ꞌyɛ̨h mahɛ̨tsꞌi ra Jesús
31 Nguetho nuꞌa ra Jesús bá ɛ̨h mahɛ̨tsꞌi, manꞌda nuįxte a xinda gue ʉ gäthogahʉ. Pɛ nujʉ dám ꞌbʉhmbʉ nangue yʉ jąꞌi ua ja ra ximhäi, dyʉ mɛnguhʉ ua ja ra ximhäi, nɛ hinga gätho da zä ga pąhmbʉ, høntꞌa ꞌbɛꞌa da zä da bąꞌa nꞌda ua ja ra ximhäi. Pɛ nuꞌa bá ɛ̨h mahɛ̨tsꞌi manꞌda xʉn ho ngue gätho miꞌda, 32 nɛ im ma ꞌbɛꞌa bi nu bʉ nɛ ꞌbɛꞌa bi ꞌyørpʉ. Pɛ hingui ngu bi hyąnba rám hman a. 33 Nuꞌa toꞌo bi hyąnba rám hma, bi bądi majuąni bi man Oją ngue gueꞌa rá Tsꞌʉntꞌʉ a. 34 Nguetho bá pɛnh Oją a, nɛ guesɛ Oją i yą ꞌbʉ i yą a, nguetho nte di ꞌbɛh rá Hogandąhi Oją a. 35 Nuꞌa ra Ta ɛ̨mmɛ in numanho rá Tsꞌʉntꞌʉ, janangueꞌa bi un ran tꞌɛ̨di gätho di manda rá ꞌbɛfi. 36 Nuꞌa toꞌo i ɛ̨cꞌyɛi rá Tsꞌʉntꞌʉ Oją ya i ja ra ꞌdaꞌyote maząi, pɛ nuꞌa hingui ɛ̨cꞌyɛi rá Tsꞌʉntꞌʉ Oją, hin da nu ra te pɛ guextaꞌa da nu rá cuɛ Oją mi ja da nu, nɛ gätho yʉ pa maząi.