Nu ra Jesús bi ꞌyäp ra dehe ra xisu bʉ Samaria
4
Nɛ nubʉya nu yʉ fariseo bi ꞌyø a man yʉ jąꞌi ngue manꞌda xʉn ngu i tɛn ra Jesús nɛ manꞌda xʉn ngu di xixyąbi, xinda gueꞌa ra Xuua Nxixyaą. 2 Pɛ nu ra Jesús him bi ꞌyøzɛhɛ ran xixyą, pɛ høngdähe yʉ́ xädigähe dá øthe ran xixyą. 3 Nɛ nuꞌbʉ mi bąꞌa ra Jesús ꞌbɛꞌa mi ꞌyø ʉ yʉ fariseo, bi bɛ̨ni da ꞌuetho, ngue hin da bɛ̨n yʉ fariseo din sʉhmi ra Xuua. Bi bøm bʉ ja ra häi Judea bʉya, nɛ dá mbähmbe mahønꞌa bʉ ra häi Galilea.4 Pɛ guemhma bá thohmbe bʉ ja ra häi Samaria. 5 Nɛ nuꞌbʉ má thohmbe bʉ, dá sømhbe bʉ ja ra hnini Sicar, mbɛ häntho ra xɛqui bi unꞌa ra Jacob, bi unꞌna ra José rá tsꞌʉntꞌʉ. 6 I jabʉ nꞌda ra pozo ra dehe gue bi ꞌyøtꞌa ra Jacob mayaꞌbʉ. Nɛ guepʉ bin säya tsꞌʉ ra Jesús, nguetho bi yäh ra ꞌyu. Mbɛ huxhyadi ꞌbʉ má sømhbe bʉ. 7 Nɛ bi zøm bʉ nꞌda ra xisu ra mɛngu Samaria, da gʉx ra dehe. Bi ꞌyɛ̨nꞌa ra Jesús:
―ꞌDaqui tsꞌʉ ni dehe, ga sigä tsꞌʉ, bi ꞌyɛ̨mpꞌa.
8 Nɛ gätho gähe dyʉ xädigähe xtá sohmbe bʉ ra Jesús, nɛ dá cʉthe bʉ ja ra hnini ga tämhbe ꞌbɛꞌa gätho ga sihe.
9 Nuꞌa ra xisu bi ꞌyɛ̨na:
―Hanja gní zoqui nɛ guí äc ra dehe, nguetho nuꞌi grá judío, nɛ nugä drá mɛngu Samaria, bi ꞌyɛ̨mbi.
Ngubʉ bi man ra xisu nguetho nu ma mijudíohe hinguin zomanho yʉ mɛngu bʉ Samaria. 10 Nu ra Jesús bi ꞌyɛ̨mbi:
―Nuꞌbʉ xquí pą a rá mate Oją in nde di ꞌdaꞌi, nɛꞌbʉ xquí pąqui toꞌogui gue dí äꞌa ra dehe, xquí ꞌyäc ra dehe di un ra te, nɛ nugä xcá ꞌdaꞌa ꞌbʉ, bi ꞌyɛ̨na.
11 Nɛ nu ra xisu bi ꞌyɛ̨na:
―Nuꞌi grán ꞌyohʉ, hinꞌyʉ nin jʉxthe, nɛ xʉn hɛ̨ ua po na ra dehe. Hapʉ ja a ra dehe di un ra te guím ma. 12 Pɛ nu mam bombøtahʉ ra Jacob bi zi ra dehe i po ua nɛ ʉ gätho yʉ́ tꞌʉhni nɛ yʉ́n dąni. Nɛ bi zogahe ra pozo ja ua. Ha manꞌda ja ni tsꞌɛdi ngue guí ɛ̨na manꞌda xʉn ho ra dehe gui ꞌdaje, bi ꞌyɛ̨nꞌa ra xisu.
13 Nɛ nu ra Jesús bi dątꞌa bʉya:
―Høntꞌa go toꞌo i sithe ua, gueꞌa nám ꞌbʉ ʉ yʉ pa ja bʉya, pɛ i tuthe mahønꞌa. 14 Pɛ høntꞌa go toꞌo da zi ra dehe dadí ungä, njąmꞌbʉ din tuthe mahønꞌa, pɛ din ja tengu nꞌda ra mbøthe bʉ mbo rá mbʉi njąmꞌbʉ din thegue, nɛ gueꞌa nám ꞌbʉh maząi nꞌda a, bi ꞌyɛ̨na.
15 Nuꞌa ra xisu bi ꞌyɛ̨mbi:
―Grán ꞌyohʉ, ꞌdaqui tsꞌʉ ra dehe guím ma gue hin dan tuthe mahønꞌa, nɛ hin gua ɛ̨cä mahønꞌa ua ja ra pozo ga jʉx ra dehe bʉya.
16 Nuꞌa ra Jesús bi dątꞌa:
―Grá xisu, ní mba bá si a ni ndø.
17 Nuꞌa ra xisu bi dątꞌa:
―Njoꞌo ma ndø, bi ꞌyɛ̨ntho.
Nuꞌa ra Jesús bi ꞌyɛ̨mpꞌa:
―Majuąni guím ma, njoꞌo ni ndø. 18 Nguetho ya hin guí ꞌbʉhmi ꞌda ʉ cʉtꞌa yʉn ꞌyohʉ xcán thąthʉ, pɛ nuꞌa guí ꞌbʉhmi ya hin ni ndøsɛ a. Janangueꞌa majuąni njoꞌo ni ndø, bi ꞌyɛ̨nꞌa ra Jesús.
19 Bi dąꞌa ra xisu bʉya:
―Nuꞌi grán ꞌyohʉ, masque grá pøngahyą Oją. 20 Xiqui tsꞌʉ ꞌbɛꞌa ga øtꞌähe, nguetho nu ma tahe mí thąnde Oją ua ja ra tꞌøhø, pɛ nu ahʉ gyʉ judío ahʉ guí ɛ̨mhbʉ, jatho da mba nꞌda bʉ Jerusalén da dąnde Oją bʉ, bi ꞌyɛ̨na.
21 Nu ra Jesús bʉya bi ꞌyɛ̨mpꞌa:
―Grá xisu, dami ꞌyɛ̨cꞌyɛi a ga xi i, ɛ maguepʉ da zøn ra pa hinga høntꞌua ja ra tꞌøhø, xínga hønbʉ Jerusalén din thąnde ra Ta. 22 Sä guí ɛ̨na guí thąndehʉ Oją, pɛ hin guí thąndehʉ tengu bi zän zɛhɛ Oją ngue din thąnde. Nugähe dyʉ judíohe dí thąndehe a bi zän Oją nguetho bi zän Oją ma tꞌɛ̨cꞌyɛihe, nɛꞌa ra Yąnte bi zänꞌna Oją ra judío a. 23 Pɛ bi zän Oją nꞌda ra xɛqui bʉ din thąnde, guepʉ ja ní mbʉi nꞌda. Nɛ mi tsꞌʉtho da zøn ra ora, pɛ ya bi zøni, ngue da dąnde Oją nangue yʉ́ mbʉi ʉ to majuąni da dąnde, nɛ hin nangue yʉn tꞌøtꞌe ua ja ra ximhäi. Nguetho nuꞌa Oją i honi toꞌo da dąnde nangue yʉ́ mbʉi. 24 Nguetho hin di nɛqui Oją. Janangueꞌa høntꞌa go toꞌo da dąnde Oją, jatho da dąnde nangue rá mbʉi nɛ nangue i tɛnꞌna ram hma majuąni, bi ꞌyɛ̨nꞌa ra Jesús.
25 Nuꞌa ra xisu bʉya bi ꞌyɛ̨mbi:
―Dí pącä ba ɛ̨ a rá Thahni Oją ngue ra Cristo a. Nɛ nuꞌbʉ bá ɛ̨hɛ da xängahʉ xʉn ho gätho.
26 Nuꞌa ra Jesús bi ꞌyɛ̨mbi:
―Guecä drá Cristogä dín zoꞌa i ya, bi ꞌyɛ̨mbi.
27 Nuꞌbʉ mí guaꞌa bi man ra Jesús, ɛ xø dí sømhbe bʉ dyʉ xädigähe. Nɛ dá hyonya thohohe gue nu ra Jesús mi yąui a ra xisu. Pɛ xínga nꞌdagähe gue dá änhde hanja bin yąui o ꞌbɛꞌa bin xifi. 28 Nu ra xisu bʉya ꞌbex bi zopʉ rá mbamhmi, nɛ bi mba bʉ hnini bi xih yʉ jąꞌi:
29 ―Mbähä nɛ gua nuhʉ nꞌda ran ꞌyohʉ bi xicä gätho ꞌbɛꞌa xtá øtꞌä. Ha hinga gueꞌa ra Cristo ꞌbʉ, bi ꞌyɛ̨mpꞌʉ.
30 Bi mba yʉ jąꞌi bʉya da zøm bʉ ꞌbä a ra Jesús. 31 Pɛ nuꞌbʉ hin ni zøm bʉ yʉ jąꞌi, nugähe dá xihmbe ra Jesús:
―Xänbate i, xiꞌbʉ gan sihmɛ ya, dá ɛ̨mfe.
32 Pɛ bi dąꞌa ra Jesús, nɛ bi ꞌyɛ̨nje:
―Ja manꞌda ní niyą ma mbʉigä, pɛ hinga ná pąhmbʉ, bi ꞌyɛ̨nje.
33 Dán ꞌyänzɛhɛhe:
―Ha ꞌbʉi toꞌo bi ꞌuįni, dán ꞌyɛ̨mfe bʉya dyʉ xädigähe.
34 Nuꞌa ra Jesús bi ꞌyɛ̨nje:
―Tenguꞌbʉ man tsꞌihmɛgä a ngue ga øtꞌä rá pähä a bá pɛngä nɛ ga juacä rá ꞌbɛfi a. Nɛ gueꞌa manꞌda ní niyą ma mbʉigä a. 35 Janangueꞌa gueꞌa dí xi ahʉ a ya, nguetho ya ba ɛ̨hnʉ yʉ jąꞌi. Nɛ ha guí ɛ̨mhbʉ di ꞌbɛh man goho ząna din ja ran sofo. Pɛ dami hyanthʉ yʉ ba ɛ̨hnʉ, tenguꞌbʉ nꞌda ra huąhi ya xʉ ꞌyotꞌi gue da mba nsoqui, nguetho ꞌbexque da zä ga cʉthʉ bʉ di manda Oją yʉ. 36 Nɛ nuꞌʉ to i pa ma cʉꞌtꞌi bʉ din ząm bʉ høntꞌbʉ go njąmꞌbʉ. Janangueꞌa nuꞌʉ to da xoqui di johya, nɛ nuꞌʉ to bi duhu nɛꞌʉ bi xoqui ꞌda dán johya thoho. 37 Nguetho majuąni rán thɛui rá ꞌbɛfi Oją a bi ꞌyøtꞌa nꞌda ra jąꞌi, “bi zopʉ rá huąhi bi duhu, nɛ nꞌdanꞌyo bi xoqui,” ngue i man yʉ jąꞌi. 38 Ya xtá xi ahʉ gui xojʉ hapʉ hin gá tuhmbʉ, xín gá uąfʉ, pɛ nꞌdanꞌyo bi ꞌyøtꞌ ra ꞌbɛfi bʉ, pɛ guehma gui comhbʉ ꞌbɛꞌa da dą ʉ, bi ꞌyɛ̨ngähe ra Jesús.
39 Nɛ nuꞌbʉ mí mam bʉ ja ra hnini ra xisu, xʉn ngu yʉ́ mɛnguhʉ bi ꞌyɛ̨cꞌyɛi gue ra Cristo a ra Jesús, nguetho bi manꞌa ra xisu gue xí xi a ra Jesús gätho ꞌbɛꞌa xí ꞌyøtꞌe. 40 Nuꞌbʉ mí zøm bʉ yʉ mɛngu Samaria bʉ ꞌbäh ra Jesús, bi ꞌyɛ̨nꞌʉ:
―Dami ꞌbʉcua ja ma hninihe, bi tꞌɛ̨mpꞌa ra Jesús.
Nɛ dán dehe bʉ nyopa bʉya. 41 Nɛ ɛ̨mmɛ manꞌda xʉn ngu bi ꞌyɛ̨cꞌyɛi yʉ jąꞌi bʉ, nangue rám hmansɛ ra Jesús. 42 Bi tꞌɛ̨mpꞌa ra xisu bʉya:
―Ya dí ɛ̨cꞌyɛihe ya, pɛ hinga høntꞌa gá xije ná ɛ̨cꞌyɛigähe ya, pɛ nɛꞌa dá øsɛhe bi man na ra Jesús. Nɛ dí pąhmbe majuąni ra Cristo na, rám pørpate yʉ jąꞌi ꞌbʉcua ja ra ximhäi, bi ꞌyɛ̨nꞌʉ yʉ jąꞌi.
Ná mbähmbe Galilea a ra Jesús
43 Nuꞌbʉ mí guaꞌa nyopa dá pømhbe bʉ ra hnini Sicar, dá hąxhe ra ꞌyu mahønꞌa ní mba bʉ Galilea. 44 Nɛ bi mansɛ ra Jesús, nubʉ rá häi zɛhɛ nꞌda ra pøngahyą hin da hnumansu bʉ. 45 Pɛ nuꞌbʉ má sømhbe bʉ ra häi Galilea, bi numanho ma mɛnguhe bʉ. Nguetho xí nu yʉn tꞌøtꞌe nuįxte bi ꞌyøtꞌa ra Jesús bʉ Jerusalén ꞌbʉ mín ja ra dąmpɛti ran dąbaxjua, ngue nɛꞌʉ xí mba bʉ ʉ.
Bi yąn rá tsꞌʉntꞌʉ rám fätsꞌiui ra tsꞌʉtꞌabi
46 Nɛ dá mbähmbe ra Jesús mahønꞌa bʉ ra hnini Caná ra häi Galilea, guepʉ xí päh ra dehe bin guiꞌuva. Nɛ mí ꞌbʉpʉ nꞌda rám fätsꞌiui ra tsꞌʉtꞌabi xʉn ʉ rá tsꞌʉntꞌʉ, nɛ i ꞌbɛm bʉ ja rán oi nubʉ ja ra hnini Capernaum. 47 Nuꞌbʉ mí ꞌyøde gue bi zøh mahønꞌa bʉ ra häi Galilea ra Jesús nɛ i ꞌbʉpʉ ra hnini Caná, nɛ bá ɛ̨pʉ ꞌbʉh ra Jesús bʉya, bi ꞌyørpa ra tsꞌɛdi da zixpʉ Capernaum bʉ ná ꞌbɛn a rá tsꞌʉntꞌʉ, da xospi nguetho nde da du a. 48 Nɛ bi dą a ra Jesús:
―Pɛ ha jatho mꞌbɛtꞌo guin nuhʉ yʉ hmɛpya nɛ yʉn tꞌøtꞌe nuįxte, ja gui ꞌyɛ̨cꞌyɛigahʉ bʉya.
49 Pɛ manꞌda i humbi sitsꞌi, nɛ bi ꞌyɛ̨mbi:
―Pɛ mbɛhma tsꞌʉ cuø, xøhma da du ma tꞌʉhnigä.
50 Nɛ bi dątꞌa ra Jesús:
―Ní mba bá nu, nguetho hin da du ni tꞌʉhni.
Nɛ nubʉya bi ꞌyɛ̨cꞌyɛi a rám hman a ra Jesús, nɛ bi mba bʉya. 51 Nɛ bá thą ʉ ꞌda yʉ́ ꞌyɛ̨hɛ ꞌbʉ mím mba bʉ ꞌyu bi xifi:
―Bi zä ni tsꞌʉntꞌʉ ya, ɛ̨nꞌʉ.
52 Nɛ bi ꞌyänni:
―ꞌBɛꞌa ma ora bi zä.
Nɛ bi tꞌɛ̨mbi:
―Nꞌdande mande bi bøn ra pa, bi ꞌyɛ̨nꞌʉ.
53 Nɛ ꞌbex bi bąꞌa rá ta gue gueꞌa ra ora mín yąui ra Jesús ꞌbʉ mí ꞌyɛ̨mbi da yąn a rá tsꞌʉntꞌʉ. Janangueꞌa nuꞌa ran ꞌyohʉ bi däp rá mbʉi ra Jesús bʉya, nɛꞌʉ gätho miꞌda ꞌbʉpʉ rá ngu.
54 Guehna bi ꞌyøtꞌ ra Jesús ꞌbʉ mambá penje bʉ Judea dá sømhbe bʉ Galilea. Ya ná yondį ra hmɛpya bi ꞌyørpʉ ja ra häi Galilea.