HECHOS
Yʉ́n tꞌøtꞌe yʉ́ ꞌbäihʉ ra Jesucristo
Bi man ra Jesús ba ɛ̨h rá Hogandąhi Oją
1
Nuꞌi Teófilo, rá mbʉdi ra søcuą dá oꞌtꞌaꞌi mámꞌbɛtꞌo, dá xiꞌi gätho bi ꞌyøtꞌ ra Jesús nuꞌbʉ mi dʉmpꞌ rá ꞌbɛfi. Nɛ dá xiꞌaꞌi gätho ngue bi ma ꞌbʉ mín xänbate. 2 Nɛ dá xiꞌaꞌi gätho bi ꞌyøtꞌa ra Jesús asta gueꞌbʉ mi mba mahɛ̨tsꞌi. Nɛ nuꞌbʉ mi ꞌbʉcua ja ra häi, nu rá Hogandąhi Oją bi xih ra Jesús ꞌbɛꞌa da xih yʉ́ ꞌbäihʉ gue da ꞌyøtꞌe. Nuꞌʉ yʉ́ ꞌbäihʉ, gueꞌʉ yʉn ꞌyohʉ bi huanh ra Jesús ngue man yʉ́ xädi ʉ. 3 Nu ra Jesús bi nu ran ʉnbi nɛ bi du. Nɛ gätho nyote pa ꞌbʉ mí ndantsꞌi mahønꞌa, bin ꞌyusɛ bʉ ꞌbʉh yʉ́ ꞌbäihʉ, jaꞌbʉ bi hnu, jaꞌbʉ hinꞌna. Nɛ bi ꞌyuti xʉn ngu yʉn tꞌøtꞌe guepʉ bi nde da fądi gue i ꞌbʉi. Nɛ bi xiꞌʉ nangue rá ꞌbɛfi i øtꞌ Oją ua ja ra ximhäi, nɛ ꞌbɛpʉ dí manda Oją ʉ gätho dim ꞌbʉi.4 Nuꞌbʉ mím ꞌbʉhmbʉ yʉ́ ꞌbäihʉ mahønꞌa a ra Jesús, nɛ bin sihmɛhʉ, bi xiꞌʉ da dømpꞌʉ Jerusalén ꞌbɛꞌa bi ma majuąni rá Ta gue ba ɛ̨hɛ. Nɛ ɛ̨nꞌa ra Jesús:
―Ya xcá ꞌyøhmbʉ dá mangä mamꞌbɛtꞌo ngue ba pɛnh Oją rá Hogandąhi. 5 Nuꞌa ra Xuua bi ꞌyøtꞌahʉ ran xixyą nangue ra dehe thoho, pɛ mi tsꞌʉtho ya ga ꞌda ahʉ rá Hogandąhi Oją, bi ꞌyɛ̨nꞌa ra Jesús.
Bi ndex mahɛ̨tsꞌi ra Jesús
6 Nuꞌbʉ mim pɛti ʉ, bi ꞌyänni:
―Ma Hmu ahe, hague guehya yʉ pa jabʉya gui ꞌyøtꞌe din ja ma tsꞌɛdi zɛhɛhʉ mahønꞌa, dyʉ israelhʉ.
7 Bi dąꞌa ra Jesús:
―Hingui sä gui pąhmbʉ ndaꞌa ní pa xʉn zän ma Tahʉ da ꞌyøtꞌa ꞌbɛꞌa gätho da ꞌyøzɛhɛ. Hin ni ꞌbɛfihʉ gui pąhmbʉ. 8 Pɛ nuꞌbʉ bá ɛ̨h rá Hogandąhi Oją, nɛ gam ꞌbʉhmbʉ, din ja ni tsꞌɛdihʉ. Nɛ nuꞌbʉ bin ja, gui xihmbʉ yʉ jąꞌi ua ra dąhnini Jerusalén nanguecä, nɛ gätho ua ra häi Judea, nɛpʉ ra häi Samaria, nɛ gätho na ngʉni ra ximhäi.
9 Nuꞌbʉ mi guaꞌa man ra Jesús bi mba mahɛ̨tsꞌi. Nu yʉ́ ꞌbäihʉ bi nu nuꞌbʉ mi ndex mahɛ̨tsꞌi. Nɛ nꞌda ra güi bi goꞌmi nɛ him bi nu yʉ́ ꞌbäihʉ mahønꞌa. 10 Nɛ mi ꞌbäpʉ, mi ndøꞌtsꞌ mahɛ̨tsꞌi, ꞌbex mi ꞌbähmbʉ yoho yʉ́m ꞌbɛhni Oją mahɛ̨tsꞌi, i he yʉ tꞌaxca pahni. 11 Nɛ bi ꞌyɛ̨mbi:
―Nuꞌahʉ gyʉ mɛnguhʉ Galilea, hanja gní ꞌbähmbʉ ua ya nɛ gni ndøsꞌhʉ mahɛ̨tsꞌi. Nu ra Jesús bi ndex ua guí ꞌbähmbʉ, nɛ tengutho bʉ á ndetsꞌe, ngutho ꞌbʉ bá cąh mahønꞌa, nɛ guetꞌa ra Jesús a.
Bi thahnꞌna ra Matías rám poniui ra Judas
12 Nu yʉ́ ꞌbäihʉ ra Jesús bi nɛxpʉ ja ra nyuni Olivos bʉya, bi mba bʉ ra hnini Jerusalén, nɛ hinga yatho, ndehnini. 13 Nɛ nuꞌbʉ mi yʉrpʉ ja ra hnini bi ndexpʉ nꞌda ra cuarto magątsꞌi guepʉ i ꞌbʉꞌʉ. Gueꞌʉ i ꞌbʉpʉ ʉ, ra Pedro, nɛ ra Xuua, nɛ ra Jacobo, nɛ ra Andrés, nɛ ra Felipe, nɛ ra Tomás, nɛ ra Bartolomé, nɛ ra Mateo, nɛ ra Jacobo rá tsꞌʉntꞌʉ ra Alfeo, nɛ ra Simón gue tꞌɛ̨mbi ra Zelote, nɛ ra Judas rán ꞌyohʉ ra Jacobo. 14 Gätho ya ꞌdarpʉ bim pɛti nɛ ząi min yąhʉ Oją. Nɛ bi zøpʉ ꞌda yʉ xisu nɛ ra María rá mbe ra Jesús, nɛꞌʉ yʉ́n ꞌyohʉ ra Jesús.
15 ꞌDarpʉ madím pɛti ʉ nꞌda ciɛnto nɛ ꞌdäte njąꞌi. Nɛ nuꞌʉ yʉ paꞌʉ bi ndantsꞌa ra Pedro nɛ bi ꞌyɛ̨na:
16 ―Ma cu ahʉ nangue ra Cristo, nu rá Hogandąhi Oją mayaꞌbʉ bi japꞌa ra David da ꞌyoꞌtꞌ ra søcuą, nɛ bi ma ꞌbɛꞌa da ꞌyøtꞌ ra Judas, nguetho mí pą Oją ꞌbɛꞌa da ꞌyøtꞌa. Gueꞌa ra Judas ngue bi däꞌa ra Jesús nuꞌbʉ mi fɛntꞌi. Nɛ gueꞌa bin ja nguetho gätho ꞌbɛꞌa mán tꞌoꞌtꞌi bʉ rám hman Oją din ja. 17 ꞌDatꞌa ra ꞌbɛfi dá øthe ra Judas nguetho ra Jesús bi huahnꞌna ra Judas tengu bʉ á huancähe. 18 Nɛ bi thänꞌa nꞌda ra häi nangueꞌa í mbäꞌa ra Jesús. Nuꞌbʉ mi zohäi ra Judas, bi nyepʉ häi, nɛ bi føh rá foho, nɛ bi bøni gätho yʉ́ xɛ̨fo. 19 Gätho yʉ jąꞌi mi ꞌbʉpʉ Jerusalén bi ꞌyøde ꞌbɛꞌa bin ja. Jananjabʉ bi mba ma huti ra häi ngue yʉ́ ndeꞌʉ, Acéldama, gue nde da ma bim fäm bʉ ra ji. 20 Nguetho ntꞌoꞌtꞌi bʉ ja rá søcuą ra Salmos:
Din häitho ra häi
nɛ njon dim ꞌbʉpʉ,
nɛ ntꞌoꞌtꞌi ngue nꞌdanꞌyo da hyąn rá ꞌbɛfi mi ja xtá ꞌyøtꞌa.
21 Janangueꞌa jatho ga huahndʉ a dam pɛhmbe. Jatho ga huahndʉ nꞌda rám poniui ra Judas, gueꞌa nꞌda madí hyʉnje gätho yʉ pa mí ꞌbʉhmbe ra Hmu, ra Jesús. 22 Nɛ ga huahndʉ nꞌda bi nu ꞌbʉ mi xixyąba ra Jesús a ra Xuua, nɛ madí hyʉnje gätho yʉ pa dám ꞌbʉhmbe ra Jesús, gueꞌbʉ go mí mba mahɛ̨tsꞌi, bi nu, nguetho nꞌdatꞌa ga mamhbe ngue bi ndantsꞌ mahønꞌa ra Jesús ꞌbʉ mi du, bi ꞌyɛ̨nꞌa ra Pedro.
23 Nɛ nubʉya bi ndønba yʉ́ thuhu toꞌo da thahni, gue yoho yʉn ꞌyohʉ bi hndøni. Nuꞌa nꞌda ra José Barsabás nɛ í Justo, nɛ nuꞌa manꞌda ra Matías. 24 Nɛ nuꞌʉ yʉ jąꞌi bin yąhʉ ra Hmu bʉya, nɛ bi ꞌyɛ̨na:
―Ma Hmu ahe, guí pąrpa yʉ́ mbʉi gätho, dami ꞌyurcahe ya yoho ndaꞌa xcá huahni. 25 Nuꞌa ga comhbe ra ꞌbɛfi ngue ma ꞌbäigähe ra Jesucristo, ngueꞌa xtá ꞌyøtꞌa ra Judas. Nguetho xí ꞌuepʉ ja rá ꞌbɛfi nangue rá tsꞌoqui, bi mba da nuꞌa rán säui da nu, bi ꞌyɛ̨m ꞌbʉ min yąhʉ Oją.
26 Nu yʉ ꞌyɛ̨cꞌyɛi bʉya bi ꞌyøtꞌe tenguꞌbʉ nꞌda ran tąha, ngue nde da bąꞌʉ ndaꞌa bi nde Oją. Bi bøni gue gueꞌa ra Matías. Nɛ nu yʉ ꞌyɛ̨cꞌyɛi bʉya bi huanh ra Matías, nɛ bi gomhbʉ yʉ́ ꞌbɛfi ʉ ꞌdɛꞌmaꞌda yʉ́ ꞌbäihʉ ra Cristo.