Bi zøh rá Hogandąhi Oją
2
Pɛ guextaꞌa di thoqui dim pɛti gätho yʉ ꞌyɛ̨cꞌyɛi, din jaꞌa mí tøꞌmi, gue bá pɛnh Oją a rá Hogandąhi, nɛ bin thɛui nꞌda ra dąmpɛti mí sänba Oją ʉ yʉ israel, tꞌɛ̨mbi Pentecostés. 2 ꞌDahmantho bi zøpʉ di hį, tenguꞌbʉ nꞌda ra ndønthį gue bí ꞌyɛ̨h mahɛ̨tsꞌi a. Nɛ nuꞌa ní hį bʉ, bi yusꞌpʉ ja ra ngu guepʉ mi huꞌʉ. 3 Bi nɛqui tengu yʉ tꞌʉsibi nɛ ꞌdaꞌi tsꞌʉ bi zox yʉ́ yą yʉ jąꞌi nꞌda ngu nꞌda ʉ mi ꞌbʉpʉ. 4 Ngue nꞌda ngu nꞌda mi ꞌbʉpʉ, gätho bin tꞌun rá Hogandąhi Oją, nɛ bi hąt ra tsꞌɛdi xʉn ho ʉ. Nɛ bi mbʉdi ꞌdahma ꞌdanꞌyo bʉ án yąꞌʉ nꞌda ngu nꞌdaꞌʉ nangue rá tsꞌɛdi rá Hogandąhi Oją in ꞌyohʉ.5 Nɛ nuꞌʉ yʉ paꞌʉ bi zøm bʉ Jerusalén ʉ yʉ judío, da ꞌyøtꞌa ra dąmpɛti mí xi Oją mayaꞌbʉ, ngue bá nɛxpʉ gätho yʉ häi ua ja ra ximhäi. 6 Nɛ nuꞌbʉ mi ꞌyøꞌa di hį ʉ yʉ jąꞌi, bim pɛti bʉ, nɛ nꞌda ngu nꞌda ʉ bi zoꞌʉ yʉ ꞌyɛ̨cꞌyɛi nangue yʉ́ ndesɛ, nɛ him bi zä bi bɛ̨ni ha bin ja. 7 Nɛ bi hyonya thoho nɛ him bi bądi ꞌbɛꞌa nam bøni, nɛ bin ꞌyɛ̨mb zɛhɛ ʉ:
―Hague án zä bin ja bʉ, bin ꞌyɛmpꞌʉ. Ha hinga gueꞌʉ yʉ mɛngu bʉ Galilea gätho i yą ua ya. 8 Hanja sä i sijʉ ma ndesɛhʉ nꞌda ngu nꞌdajʉ. 9 Nɛ nujʉ nꞌdaꞌa nꞌdanni bá nɛxhʉ, nɛ ꞌdajʉ, ꞌbʉꞌi ꞌda bá nɛxpʉ Partia, nɛpʉ Media, nɛpʉ Elam, nɛpʉ Mesopotamia, nɛpʉ Judea, nɛpʉ Capadocia, nɛpʉ Ponto, nɛpʉ ra häi Asia. 10 Nɛpʉ Frigia, nɛpʉ Panfilia, nɛpʉ ra häi Egipto, nɛpʉ ra häi Africa jom bʉ Cirene. Nɛ nuꞌʉ miꞌda yʉ romanos ʉ, madagueꞌbʉ gätho yʉ judío ʉ, nɛ nu miꞌda ʉ gue ɛ̨cꞌyɛi tengugahʉ dyʉ judíohʉ, nɛ ꞌbʉh miꞌda bá nɛxpʉ Creta, nɛpʉ Arabia. 11 Nɛ dí øhmbʉ i mam ma ndehʉ nangue yʉ́n tꞌøtꞌe gue i øtꞌ rá tsꞌɛdi Oją, bin ꞌyɛ̨mpꞌʉ.
12 Nɛ gätho madi hyonya thoho, nɛ hingui pądi ꞌbɛꞌa da bɛ̨ni. Nɛ nꞌda ngu nꞌda bi mansɛ ʉ:
―ꞌBɛꞌa ní mba na in ja ya.
13 Pɛ nuꞌʉ miꞌda bi ma:
―Įti ʉ.
Bi zoh yʉ jąꞌi ra Pedro
14 Nɛ nu ra Pedro bʉya ꞌdarpʉ mí ꞌbähmbʉ ʉ mi ꞌdɛꞌmaꞌda yʉ́ ꞌbäihʉ ra Cristo, nɛ ntsꞌɛdi bin yą, bi ꞌyɛ̨na:
―Nꞌyohʉ ahʉ dyʉ judíohʉ nɛ gätho ahʉ guí ꞌbʉhmbʉ ua Jerusalén, dami ꞌyøhmbʉ xʉn ho ꞌbɛꞌa ga xi ahʉ ya. 15 Nuje hin dí įtihe tengu guím bɛ̨mhbʉ, nguetho ja gʉto ya. 16 Pɛ nuna guehna gue bin ja ya, gueꞌa bi man ra Joel rá pøngahyą Oją, bi ꞌyɛ̨na:
17 Din ja bʉ nꞌda ra pa ba ɛ̨hɛ, ɛ̨n Oją,
gue ga pɛnꞌnahʉ ma Hogandąhi gätho nangu yʉ jąꞌi ꞌbʉcua ja ra ximhäi.
Nɛ nuꞌʉ ni tsꞌʉntꞌʉhʉ nɛ ni tꞌįxuhʉ dim pøngahyą.
Nɛ ni tsꞌʉntꞌʉhʉ da nuꞌʉ yʉn tꞌuti tengu yʉ tꞌį
nɛ ni dącꞌyɛihʉ da ꞌuį yʉ tꞌį.
18 Nuꞌbʉ bin ja, nuꞌʉ ma ꞌyɛ̨hɛ, yʉn ꞌyohʉ nɛ yʉ xisu, ga pɛnpä ma Hogandąhi ʉ,
nɛ dim pøngahyą nanguecä.
19 Nɛ ga uh yʉ hmɛpya bʉ magątsꞌi,
nɛpʉ ja ra häi, yʉ hmɛpya ra ji, nɛ ra sibi nɛ ra ꞌbifi.
20 Nɛ nuꞌa ra hyadi ya hin din ja rán nɛqui,
nɛ ra ząna xtan thɛni tengu ra ji.
Mꞌbɛtꞌo nja bʉ din ja, mꞌbɛjua da zøn ra pa dua ɛ̨h ra Hmu mahɛ̨tsꞌi,
nɛ nuꞌa ra pa a, nuįxte thoho nɛ ntsꞌutho ꞌbɛꞌa din ja.
21 Nɛ nuꞌa ra pa dua ɛ̨hɛ, din ja gue høntꞌa toꞌo xí mbaꞌtꞌa ra Hmu da yąn Oją a.
Ngubʉ bi ꞌyoꞌtꞌa ra Joel ꞌbʉ mayaꞌbʉ, bi ꞌyɛ̨nꞌa ra Pedro.
22 Nu ra Pedro xø bi ꞌyɛ̨mpꞌʉ mahønꞌa:
―Nꞌyohʉ ahʉ dyʉ israelhʉ, dami ꞌyøhmbʉ ma nde. Dím mangä nangue ra Jesús ra mɛngu Nazaret. Oją bi japi ngue bi ꞌyøtꞌ yʉn tꞌøtꞌe nuįxte nangue rá tsꞌɛdi Oją, nɛ yʉ hyonya ntꞌøtꞌe, nɛ yʉ hmɛpya, guepʉ da zä gui pąhmbʉ ngue Oją bi zɛꞌa. 23 Nɛ mayaꞌbʉ Oją mi pądi ꞌbɛꞌa gá ꞌyørpahʉ rá Tsꞌʉntꞌʉ. Nɛ Oją mi sänni gue gá cuathʉ bʉ ja nꞌda ra pontꞌi nangue yʉ́ ꞌyɛ yʉ tonto, nɛ gá hyohʉ. 24 Pɛ nuꞌa Oją bi xox ꞌbʉ mí du, nɛ bi hyącua ran dąte, nguetho hinꞌyʉ rá tsꞌɛdi ran dąte xtán zä xtán ząmꞌma ra Jesús. 25 Nguetho bi man ra David gue ꞌbɛꞌa da nu ra Jesús, ꞌbʉ mí ꞌyɛ̨na:
Nugä thocua thoho dí nugä Oją bʉ ja ma hmi.
Nɛ di ꞌdac ra tsꞌɛdi, janangueꞌa njon da zä di ꞌuegagui.
26 Janangueꞌa i hu ma mbʉi, nɛ dadín johya ꞌbʉ dím mangä nangueꞌa.
Nɛ nuꞌbʉ din sʉnya ma jąꞌi bʉ ja ran ꞌyägui, dí tøpꞌma ran ho da tꞌørcagui.
27 Nguetho hin gui hyɛgä ma te da gopʉ guepʉ oꞌʉ xʉn du,
Nɛ hin gui japi da ꞌya ma ngøcꞌyɛi, guecä, ni Hoga tꞌʉhnigui.
28 Nɛ gá ꞌyurqui ꞌbɛpʉ dám ꞌbʉhmi maząi mahønꞌa,
nɛ nuꞌi gui jaqui ngue din ja ran johya ma mbʉi nuꞌbʉ dá nutꞌa ni hmi,
bi ꞌyɛ̨n ra Pedro tengu bi man ra David.
29 Nɛ xø bi ꞌyɛ̨nꞌa ra Pedro:
―Nꞌyohʉ ahʉ, da zä ga xi ahʉ majuąni nangue ma ngʉrpa mbombøtahʉ ra David mi ꞌbʉi mayaꞌbʉ, him bi mansɛ nanguesɛ ꞌbɛꞌa da tꞌørpe, nguetho bi du, nɛ guextaꞌa i o bʉ rán ꞌyägui i ja ua dí ꞌbʉhmbʉ. 30 Pɛ nu ra David bim pøngahyą ꞌbʉ mí man na, nɛ mí pądi majuąni ꞌbɛꞌa bi xiꞌa Oją, gue nꞌda rám bomꞌbɛto ra David din tsꞌʉtꞌabi nangue yʉ israel tengu ra David, nɛ guehna ra Cristo na. 31 Nɛ mi pąh ra David ꞌbɛꞌa din ja, janangueꞌa bi ma nangue da ndantsꞌ mahønꞌa ra Cristo, nɛ hin da tsꞌopʉ nidu rá te, nɛ xín da ꞌya rá ngøcꞌyɛi a. 32 Nguehna ra Jesús, Oją bi xox ꞌbʉ mi du, nɛ nuꞌa dí pąhmbe majuąni gätho gahe, nɛ dí mamhbe nguetho dá nuhe ꞌbɛꞌa bi tꞌørpe. 33 Oją bi xotsꞌi nɛ bi zixpʉ ja rá tsꞌɛdi, nɛ bi unꞌna rá Hogandąhi tengu xí man Oją, janangueꞌa bi ꞌdacähe bʉya. Gueꞌa rá Hogandąhi i øtꞌe ꞌbɛꞌa gätho guín nuhʉ ya, nɛ guí øhmbʉ ya. 34 Nguetho ra David him bi ndex mahɛ̨tsꞌi, pɛ gueꞌa im mansɛ a:
Nuꞌa ra Hmu bi xiꞌa ma Hmu:
“Dami hyucua ja ma tsꞌɛdi,
35 asta gueꞌbʉ ga tąhui man sʉiui,”
bi ꞌyɛ̨nꞌa ra David, bi ꞌyɛ̨nꞌa ra Pedro.
36 Nɛ xø bi ꞌyɛ̨na:
―Gätho ahʉ ma mi israel ahʉ, gui pąhmbʉ ya majuąni bi jap Oją dim hmu a gá cuathʉ bʉ ja ra pontꞌi, nɛ guehna ra Jesús, nɛ gui pąhmbʉ gue bi huan Oją a, bi ꞌyɛ̨nꞌa ra Pedro.
37 Nuꞌbʉ mi ꞌyøh yʉ jąꞌi ꞌbɛꞌa bi manꞌa ra Pedro, ɛ̨mmɛ bi du yʉ́ mbʉi, ꞌbʉ mí ꞌyøde gue rá Tsꞌʉntꞌʉ Oją a xí hyo. Nɛ bi tꞌänꞌna ra Pedro nɛ yʉ́n ꞌyohʉ:
―Man ꞌyohʉ ahʉ, ꞌbɛꞌa da zä ga øthe ya, ɛ̨nꞌʉ.
38 Nu ra Pedro bi dąti:
―Gui päh nin ꞌyomfɛ̨nihʉ nangue ran tsꞌo, nɛ gan xixyąhʉ nꞌda ngu nꞌda ahʉ nangue rá thuhu ra Jesucristo. Nɛ din ja ra punbi ni tsꞌoquihʉ, nɛ di ꞌda ahʉ rá Hogandąhi Oją. 39 Nguetho bi man Oją di ꞌda ahʉ ran tꞌunni gueꞌa rá Hogandąhi Oją, nɛ ni tꞌʉhnihʉ din tꞌunni, nɛ gätho ʉ hønbʉ go hapʉ i ꞌbʉi din tꞌunni, gue høntꞌa go toꞌo da zohnꞌna Oją ra Hmu, bi ꞌyɛ̨nꞌa ra Pedro.
40 Nɛ nu ra Pedro manꞌda xʉn ngu bi xifi nɛ bi hɛcui, nɛ bi ꞌyɛ̨mbi:
―Damin yąmhbʉ nangueꞌa ran ʉnbi da nuꞌʉ yʉ tsꞌomꞌbäi i ꞌbʉcua ya, bi ꞌyɛ̨nꞌa ra Pedro.
41 Nɛ gätho toꞌo bi ꞌyømanho a bi man ra Pedro bi mba ma xixyąbi. Nu ra pa gue bi man ra Pedro, mbɛ hyu mahuąhi yʉ jąꞌi bi ꞌyɛ̨cꞌyɛi. 42 Nɛ nuꞌʉ bi thoctaꞌa bi xänba yʉ́ ꞌbäihʉ ra Cristo ʉ, nɛ bi hyu yʉ́ mbʉi nguetho ꞌdaꞌangu im bɛ̨ni. Nɛ thocua thoho bim pɛti gue din yąhʉ Oją, nɛ da zi ra xɛcahmɛ, ngue bi bɛ̨n rán dąte ra Hmu.
Yʉ́m ꞌbʉi ʉ mbʉdi bi ꞌyɛ̨cꞌyɛi
43 Gätho yʉ jąꞌi bi numansu Oją nɛ ɛ̨mmɛ bi hyonya thoho ꞌbɛꞌa bin ja nangue yʉn tꞌøtꞌe nuįxte nɛ yʉ hmɛpya bi ꞌyøtꞌ yʉ́ ꞌbäihʉ ra Cristo. 44 Nɛ gätho gue bi ꞌyɛ̨cꞌyɛi nꞌdatꞌa in numanho nꞌda ngu nꞌda, nɛ nuꞌa ꞌbɛꞌa mí pɛꞌtsꞌi nꞌda ngu nꞌda, ꞌda nan gomthoho. 45 Nɛ nuꞌbʉ nꞌda mí honi ꞌbɛꞌa madí ꞌbɛdi, nuꞌa manꞌda bʉya bi mbä ꞌbɛꞌa mí pɛꞌtsꞌi, bi unꞌna bʉya. 46 Nɛ mpa ꞌbʉ mpa ꞌbʉ madím pɛti bʉ ja ra dąniją. Nɛ nuꞌbʉ xʉn sihmɛ, bin sänbi bi mba bʉ ja yʉ́ ngu yʉ́ miꞌyɛ̨cꞌyɛihʉ, nɛ bin johya yʉ́ mbʉi, nɛ ꞌdatꞌa im bɛ̨ni. 47 Nɛ bi ꞌyɛ̨spa Oją, nɛ bi hnumansu ʉ nangue gätho yʉ jąꞌi. Nɛ nu Oją bi japi nꞌdapa ngu nꞌdapa i cʉrpʉ ja rá tsꞌɛdi miꞌda yʉ jąꞌi, gue bi zinꞌʉ.