Hechos 3

Bi zä ra dogua

Nꞌda ra pa ꞌbʉ hyunde, gueꞌa ra ora ꞌbʉ nząi mí yąhʉ Oją yʉ jąꞌi, bi mba bʉ ra dąniją ra Pedro nɛ ra Xuua. 2 Mi ꞌbʉpʉ nꞌda ran ꞌyohʉ ra dogua gueꞌbʉ go mim ꞌbʉi. Nɛ nząi bi thuxpʉ ja rá goxthi ra dąniją. Nu ra goxthi tꞌɛ̨mbi mahotho. Nu ran ꞌyohʉ da ꞌyäp yʉn tꞌunni yʉ jąꞌi i thopʉ mbo. 3 Nuna, nuꞌbʉ min nu ra Pedro nɛꞌa ra Xuua ní mba bʉ ja ra dąniją, bi ꞌyäp ran tꞌunni. 4 Nu ra Pedro nꞌyoui ra Xuua, nuꞌbʉ min nu i hupʉ, bi ꞌyɛ̨mbi:

―Hyandgäꞌbe.

5 Nu ra dogua bi hyantꞌʉ, mi tøꞌmi da hyąni ꞌbɛꞌa di unꞌdʉ. 6 Pɛ nu ra Pedro bi ꞌyɛ̨mbi:

―Xíng ra tꞌaxi xíng ra cꞌaxtꞌi dí hągä, pɛ nuꞌa i jagui dadí ꞌdaꞌaꞌi. Nangue rá tsꞌɛdi ra Jesucristo mɛngu bʉ Nazaret, damí ndantsꞌi nɛ gan ꞌyo, bi ꞌyɛ̨mbi.

7 Nu ra Pedro bi bɛntpa rán ꞌyɛi, bi xotsꞌi. ꞌBex bin hątsꞌɛdi rá gua, nɛ rá hyudi xįngua. 8 Nɛ nꞌda sägui thoho bi ꞌyøtꞌ ꞌbʉ mi ndantsꞌi nɛ bin ꞌyo. Nɛꞌa bi yʉthʉ bʉ ja ra dąniją, sägui nɛ ꞌyo, nɛ ɛ̨spa Oją. 9 Gätho yʉ jąꞌi bi nu ran ꞌyohʉ ngue bin ꞌyo nɛ bi ꞌyɛ̨spa Oją. 10 Nɛ mi pądi gue nuꞌa mi hupʉ ja ra goxthi mahotho bʉ ja ra dąniją mi äh ra mbɛti. Nɛ gätho bi hyonya thoho ꞌbɛꞌa bin ja ran ꞌyohʉ.

Nu ra Pedro im mam bʉ ja ra ngunꞌyu tꞌɛ̨mbi Salomón

11 Nuꞌa mi dogua hingui nde da hyɛꞌa ra Pedro nɛ ra Xuua, nɛ bá ɛ̨pʉ xʉn ngu yʉ jąꞌi guepʉ ja ra ngunꞌyu mi ꞌbä ʉ, tꞌɛ̨mbi Salomón, nɛ madí hyonya thoꞌʉ. 12 Nuꞌbʉ mí hyantꞌʉ yʉ jąꞌi a ra Pedro, bi ꞌyɛ̨mbi:

―Nꞌyohʉ ahʉ dyʉ israelhʉ, hanja gadí hyonya thohʉ nanguehna ra dogua, nɛ hanja gní hyandgaꞌbe. Ha guí ɛ̨mhbʉ gue ma tsꞌɛdisɛꞌbe nɛ man hosɛꞌbe gue xtá japꞌbe bin ꞌyo na. 13 Hinꞌna maha, pɛ ga xi ahʉ hague bin ja. Nꞌdatꞌa Oją gue mí ɛ̨spa mam bombøtahʉ ra Abraham nɛ ra Isaac nɛ ra Jacob, bi zixpʉ mahɛ̨tsꞌi a rá Tsꞌʉntꞌʉ, nɛ bi un rá tsꞌɛdi. Nꞌdatꞌa ra Jesús gue gá dähʉ bʉ ja rá hmi ra Pilato nɛ gá cømhbʉ bʉ. Nu ra Pilato mim ma xtá mba nthɛgui. 14 Pɛ nuꞌehʉ gá cømhbʉ nꞌda xʉn ho, nɛ gueꞌa rá Thahni Oją a. Nɛ gá ꞌyähmbʉ nꞌda ra hyodu da socꞌahʉ. 15 Nɛ gá mamhbʉ gue da mba ntho ra Hmu gue di un ra te. Pɛ Oją bi xoxpʉ ꞌbʉꞌʉ xʉn du, gueꞌa dá nuhe nɛ dadín juąnhde. 16 Bi zä na ran ꞌyohʉ nguetho bi ꞌyɛ̨cꞌyɛi ra Jesús. Nɛ guehna ran ꞌyohʉ guín nuhʉ ya, nɛ guí pąhmbʉ toꞌo na.

17 Pɛ nuya, nꞌyohʉ ahʉ, dí pącä ngue hin gmí pąhmbʉ ꞌbɛꞌa xcá ꞌyøthʉ ꞌbʉ gmí hyohʉ ra Jesús, nɛ ximangutho ni ngʉrpihʉ. 18 Pɛ Oją bi japi bin ja ꞌbɛꞌa gätho bi ma mayaꞌbʉ, gue bi man yʉ pøngahyą nangue ran ʉnbi bi nu ra Cristo rá Thahni Oją. 19 Janangueꞌa nuya, damí päh nin ꞌyomfɛ̨nihʉ nɛ gui däp ni mbʉihʉ Oją. Nɛ nu Oją bʉya da zä da ducꞌa ni tsꞌoquihʉ nɛ di ꞌda ahʉ ran johya ni mbʉihʉ. 20 Nɛ nu Oją ba pɛnhua mahønꞌa ra Jesús nɛ gueꞌa ra Cristo xa tsꞌänni di jącuahʉ. 21 Nu ra Jesús jatho da gopʉ mahɛ̨tsꞌi jagueꞌbʉ da zøn ra pa da mba ma hoqui gätho ua ja ra ximhäi, tengu bi man Oją mayaꞌbʉ, nangue yʉ́ nde yʉ́ hoga pøngahyą. 22 Pɛ bi ꞌyɛ̨nsɛ a ra Moisés: “Nuꞌa ra Hmu ma Ojąhʉ, da zänna nꞌda rám ꞌbɛhni ngue gueꞌa nin ꞌyohʉhʉ tengugä. Damí ꞌyøhmbʉ ꞌbɛꞌa gätho da manꞌa. 23 Nɛ din ja, høntꞌa go toꞌo má jąꞌi hin da ꞌyømanho a, da mba ma ꞌueque nangue yʉ́ tꞌʉhni Oją, nɛ da mba ma ꞌbɛpi rá te,” bi ꞌyɛ̨nꞌa ra Moisés.

24 Nɛ majuąni, gätho bi man yʉ́ pøngahyą Oją gueꞌbʉ mí man ra Samuel nɛ gätho miꞌda yʉ pøngahyą mꞌbɛjua mí ꞌbʉi, gätho bi ma ꞌbɛꞌa gätho da ꞌyøtꞌ Oją, nɛ gueꞌʉ dí nuhʉ yʉ pa jabʉya. 25 Guejʉ dyʉm bomꞌbɛtojʉ yʉ́ pøngahyą Oją, nɛ ndejʉ Oją ga comhbʉ rán hogui bi ꞌyørpa ma ngʉrpa bøtahʉ nuꞌbʉ mi tꞌɛ̨mpꞌa ra Abraham: “Nangue nꞌda nim bomꞌbɛto dim ꞌbʉh niyaꞌbʉ, dí mba ma jąpi gätho yʉ ją ꞌi guecua ja ra häi,” bi tꞌɛ̨mpꞌa. 26 Janangueꞌa nuꞌbʉ mi xoxa Oją a rá Tsꞌʉntꞌʉ gue bi du, mꞌbɛtꞌo thoho bá pɛnhua dí ꞌbʉhmbʉ, ngue nde di ꞌuegahʉ nꞌda ngu nꞌdajʉ nangue ma tsꞌoquihʉ, bi ꞌyɛ̨nꞌa ra Pedro.