Pa ma juąnbi ra Pedro nɛ ra Xuua
4
Nuꞌbʉ mi xänba yʉ jąꞌi ra Pedro nɛ ra Xuua, bá ɛ̨h yʉ mbäją nɛꞌʉ yʉ hmu bʉ ja rá dąniją yʉ judío, nɛ yʉ saduceos. 2 Nuꞌʉ ɛ̨mmɛ bin cuɛ ʉ, nguetho bi xänba yʉ jąꞌi gue bi ndantsꞌa ra Jesús bʉ ꞌbʉꞌʉ xʉn du. 3 Nuꞌʉ bi bɛntꞌa ra Pedro nɛ ra Xuua, nɛ bi gotꞌa fädi, jagueꞌbʉ mi hyatsꞌi bi juąnbi, nguetho xʉn de ꞌbʉ mi gotꞌi. 4 Pɛ xʉn ngu ʉ xí ꞌyøh ram hma bi ma, bi ꞌyɛ̨cꞌyɛi. Mbɛ í juaꞌi cʉtꞌa mahuąhi yʉn ꞌyohʉ ngue bi ꞌyɛ̨cꞌyɛi. 5 Nuꞌbʉ mi hyatsꞌi bim pɛti bʉ Jerusalén yʉ ngʉrpa mbäją nɛ yʉ dącꞌyɛi nɛ yʉ xänbate niją. 6 Mi ꞌbʉpʉ ra Anás ra dąmbäją a, nɛ ra Caifás, nɛ ra Xuua, nɛ ra Alejandro, nɛ gätho miꞌda yʉ́ mɛni ra dąmbäją, bim pɛti ngue di juąnba ra Pedro nɛ ra Xuua. 7 Nɛ bi manda da tsꞌispa ra Pedro nɛ ra Xuua, nɛ bim ꞌbäpʉ ja yʉ́ hmi nɛ bi ꞌyänni:
―ꞌBɛꞌa má tsꞌɛdi o gue toꞌo rán tꞌɛ̨di ngue xcá ꞌyøtꞌui na.
8 Nu ra Pedro bʉya nꞌyoui xʉn ngu rá tsꞌɛdi rá Hogandąhi Oją, bi ꞌyɛ̨mbi:
―Gyʉ́ ngʉrpihʉ yʉ jąꞌi nɛ gyʉ dącꞌyɛihʉ dyʉ jąꞌi israelhʉ. 9 Ha guí ängahe nam pa ya nangue ran ho bi tꞌørpa na ran ꞌyohʉ, nɛ hague nja bi zä na ran ꞌyohʉ ngue mi ʉ. 10 Nuꞌbʉ majuąni guí ängahe, gui ꞌyøhmbʉ ya, nɛ gätho ma miꞌisraelhʉ, ngue nangue rá tsꞌɛdi ra Jesucristo, gueꞌa í zä ín ꞌyo na ran ꞌyohʉ ya. Gueꞌa ra Jesús ra mɛngu bʉ Nazaret, gue gá cuathʉ bʉ ja ra pontꞌi, nɛ nu Oją bi xoxpʉ ꞌbʉꞌʉ xʉn du. 11 Guehna ra Jesús hin gá nde gá pąhmbʉ, ngue tenguꞌbʉ gyʉ gądohʉ gá samhbʉ nꞌda ra do. Pɛ nuya Oją bi japi ngue tenguꞌbʉ nꞌda ra do manꞌda mahyonidą bʉ pa nthøe ra ngujądo. 12 Njoꞌo manꞌda da zä di pøꞌa nꞌda hinda høntꞌa ra Jesús. Nguetho him bi zän Oją manꞌda ra tsꞌɛdi ua ja ra ximhäi gue da zä di pøjʉ, hinda høntꞌa ra Jesús, bi ꞌyɛ̨nꞌa ra Pedro.
13 Nɛ madi hyonya thoho ʉ yʉ juąnbate ꞌbʉ mí bądi him bi zu din yąhʉ ra Pedro nɛ ra Xuua, gue mí pądi him bin xädi. Pɛ bi bɛ̨m bʉya, bin ꞌyohʉ ra Jesús ra Pedro nɛ ra Xuua. 14 Nɛ nuꞌbʉ min nu ran ꞌyohʉ xí zä gue mi ꞌbʉhmbʉ ʉ, hinꞌyʉ ꞌbɛꞌa manꞌda sä da xifi. 15 Nɛ bi mbɛhn bʉ thi ʉ yoho nꞌda zʉ ora, ngue nde din ꞌyänꞌdʉ ꞌbɛꞌa da zä da ꞌyørpe. 16 Nɛ bin ꞌyänꞌdʉ:
―ꞌBɛꞌa sä ga øthʉ nangue yʉn ꞌyohʉ, nguetho majuąni nꞌda ran tꞌøtꞌe nuįxte bi ꞌyøtꞌʉ. Nɛ gätho ꞌbʉcua Jerusalén i pądi, hingui sä ga cømhbʉ. 17 Pɛ guehma ndeꞌbʉ ga sʉhmbʉ nꞌdahma njon da xifi nangue ra Jesús, gue him manꞌda di thoc ram hma bʉ ꞌbʉh yʉ jąꞌi, bi ꞌyɛ̨nꞌʉ.
18 Bi zohn mahønꞌa ʉ, bi xih pʉya, gue him manꞌdandį da ma, xín da xänba yʉ jąꞌi nangue ra Jesús. 19 Bi dąh ra Pedro nɛ ra Xuua, bi ꞌyɛ̨mbi:
―ꞌBɛꞌa go guím bɛ̨nsɛhʉ ngue i nde Oją ga øtꞌbe, ha gueꞌa guím mamhbʉ o gueꞌa man Oją a ga øtꞌbe. 20 Nguetho jatho ga mamhbe ꞌbɛꞌa xtá nuhe nɛ ꞌbɛꞌa xtá øhmbe, bi ꞌyɛ̨nꞌʉ.
21 Nuꞌbʉ manꞌda mi dąmhyą ʉ, bi hyɛgui nguetho him mi tįni ꞌbɛꞌa dí ʉnba ʉ. Nuꞌʉ i supi din cuɛ yʉ jąꞌi ꞌbʉ xtí ʉnba ra Pedro nɛ ra Xuua, nguetho gätho yʉ jąꞌi mí ɛ̨spa Oją nangueꞌa xín ja. 22 Nguetho nu ran ꞌyohʉ mi ponga nyote njɛya mi pɛꞌtsꞌi, ngue bi tꞌørpa ran tꞌøtꞌe nuįxte, gue bi zä.
Nu yʉ ꞌyɛ̨cꞌyɛi bi ꞌyäp Oją hin din su
23 Nuꞌbʉ mi thɛh ra Pedro nɛ ra Xuua, bá ɛ̨pʉ guepʉ mi ꞌbʉh yʉ ꞌyɛ̨cꞌyɛi. Nɛ bi xifi gätho xí xiꞌʉ yʉ mbäją nɛ yʉ dącꞌyɛi. 24 Nuꞌʉ, nuꞌbʉ mí ꞌyøde, bi zo Oją, nꞌdatꞌa im bɛ̨ni, nɛ bi ꞌyɛ̨nꞌʉ:
―Ma Oją ahe, gue gra Hmu, gá ꞌyøtꞌ mahɛ̨tsꞌi nɛcua ja ra häi nɛ ra deją nɛ gätho ʉ i jabʉ. 25 Nɛ nu ní Hogandąhi bi bɛ̨nba mam bombøtahe ra David, ni ꞌyɛ̨hɛ, ꞌbʉ mí ꞌyɛ̨na:
Hanja nín ꞌyoꞌtsꞌʉ yʉ jąꞌi gue hingui tɛnꞌna Oją,
nɛ im bɛ̨nꞌʉ gue him majuąni.
26 Yʉ́ hmutsꞌʉtꞌabi yʉ häi ya bi dʉꞌmi bi zä bi dʉmpꞌ ra sʉi.
Nɛ yʉ tsꞌʉtꞌabi bim pɛti
din sʉhmbʉ ra Hmu Oją nɛ ra Cristo rá Thahni Oją,
bi ꞌyɛ̨nꞌa ra David.
27 Nguetho majuąni bim pɛti ua ja ra hnini ra Herodes, nɛ ra Poncio Pilato, nɛ yʉ jąꞌi ngue hing yʉ judío, nɛ ma miꞌisraelhe, nɛ bi zʉh ni hoga Tsꞌʉntꞌʉ Jesús, gueꞌa gá huahni. 28 Nuꞌʉ bi ꞌyøtꞌʉ gätho ꞌbɛꞌa xcá sän mamꞌbɛtꞌo gue bin ja. 29 Nuya ma Hmu ahe, damí nuꞌʉ gue nde di ʉnje, nɛ damí ꞌdaje ni tsꞌɛdi, ni ꞌyɛ̨hɛgähe, ga huthe ran zambʉi ga mamhbe nim hma. 30 Nɛ ga uthe yʉ jąꞌi ni tsꞌɛdi gue da zäꞌʉ yʉn zämanꞌʉ. Nɛ gui ꞌyut yʉn tꞌøtꞌe nuįxte nɛ yʉ hmɛpya nangue ni Hoga tsꞌʉntꞌʉ ra Jesús, bi ꞌyɛ̨m ꞌbʉ min yąhʉ Oją ʉ.
31 Nɛ nuꞌbʉ mí juaꞌa bin yąhʉ Oją, nu ra ngu guepʉ xím pɛti bin huąni, nɛ gätho ʉ manꞌda bi hyą yʉ́ tsꞌɛdi nangue rá Hogandąhi Oją. Nɛ gätho yʉ ꞌyɛ̨cꞌyɛi bi hyutꞌan zambʉi, bi mampꞌa rám hman Oją.
Bi gohmi ꞌbɛꞌa gätho mi ja
32 Gätho yʉ ꞌyɛ̨cꞌyɛi i ꞌbʉi tengu nꞌdanjąꞌi tho, ꞌdatꞌa i øtꞌe, ꞌdatꞌa im bɛ̨ni. Xínga nꞌda bi ma gue jasɛ yʉ́ mbɛti, nɛ gätho ꞌbɛꞌa mi ja mi cohmi. 33 Nɛ nu yʉ́ ꞌbäihʉ ra Cristo, nuꞌbʉ mí thoqui bi ma gue bi ndantsꞌa ra Hmu Jesús ꞌbʉ mi du, nɛ bi jap Oją bin ja rá tsꞌɛdi yʉ́m hma, nɛ xʉn ngu rá mate Oją bin tꞌunꞌndʉ nꞌda ngu nꞌda ʉ. 34 Gätho yʉ ꞌyɛ̨cꞌyɛi nte madi ꞌbɛdi ꞌbɛꞌa gätho mi honi, nguetho xʉn ngu bi mbä yʉ́ häi o gue yʉ́ ngu mí ja, nɛ bi un ra mbɛti yʉ́ ꞌbäihʉ ra Cristo. 35 Nɛ nuꞌʉ bi darpa ʉ toꞌo di ꞌbɛ a da hyoni. 36 Nɛ gueꞌa bi ꞌyøtꞌa nꞌda ra ꞌyɛ̨cꞌyɛi, ra José na, ra mɛngu Chipre, rá ꞌyʉ ra Leví, pɛ nuꞌʉ yʉ́ ꞌbäihʉ ra Cristo bi zänba manꞌda rá thuhu gue dí Bernabé, nde da ma i hurpa rá mbʉi nꞌda. 37 Nɛ gueꞌa bi ꞌyøtꞌe, bi mbä nꞌda rá huąhi mi ja, nɛ bá hą ra mbɛti, nɛ bi dä bʉ ꞌbʉh yʉ́ ꞌbäihʉ ra Cristo, ngue di unꞌdʉ nte mi ja.