Rá tsꞌoqui ra Ananías nɛ ra Safira
5
Pɛ nuꞌa manꞌda ra ꞌyɛ̨cꞌyɛi í Ananías mi ꞌbʉpʉ, nɛ rá xisu, bi mbä yʉ́ häi. Nuꞌa rá xisu ra Safira a. 2 Nɛ bi gønꞌi tsꞌʉ ra mbɛti nɛ ꞌdatꞌa bi bɛ̨ mmi rá xisu. Nɛ bá hąc made ra mbɛti, bi gäpʉ ꞌbʉꞌʉ yʉ́ ꞌbäihʉ ra Cristo. 3 Pɛ nu ra Pedro bi ꞌyɛ̨mpꞌa:―Nuꞌi grá Ananías, hanja guí cʉꞌtꞌ ni mbʉi ra zįthu, ra Satanás, gue di ꞌbɛpꞌiꞌi gui xih ra fɛhni rá Hogandąhi Oją, ngue gá hyącꞌi tsꞌʉ ra mbɛti guí pä ni häi. 4 Nuꞌbʉ hin xquí pä ni häi, ha hin xquí cohmi gue ni mbɛti zɛhɛ. Nɛ nuꞌi gá pä ni häi, ha hinga gue ni ꞌbɛfizɛhɛ xquí ꞌyøtꞌe nangue ni mbɛti. Hanja ngubʉ guím bɛ̨ni. Hinga gueꞌʉ yʉn ꞌyohʉ gá xih ra fɛhni, pɛgue Oją gá xih ra fɛhni, bi ꞌyɛ̨nꞌa ra Pedro.
5 Nɛ nuꞌbʉ mí ꞌyøꞌa ra Ananías ꞌbɛꞌa bi manꞌa ra Pedro, ꞌbex bi du. Nɛ gätho toꞌo bi ꞌyøde nangueꞌa ɛ̨mmɛ bin ja ra mbidi yʉ́ mbʉi ʉ. 6 Nuꞌʉ yʉn ꞌyohʉ mi ꞌbʉpʉ bi ndantsꞌi, bi mbantꞌa ra ánima Ananías, bi dutsꞌi, bi ꞌyägui.
7 Nɛ nuꞌbʉ mi thoꞌi tsꞌʉ nhyu ora, bi zøh ra Safira, rá xisu ra Ananías, nɛ him mi pądi ꞌbɛꞌa bi thogui. 8 Nu ra Pedro bi ꞌyänꞌna ra xisu:
―Xiqui hangu guí päui ni häi, tengu man ni ndø, bi ꞌyɛ̨nꞌa ra Pedro.
―Hąha ngubʉ rá muui, bi ꞌyɛ̨ntho ra Safira.
9 Nu ra Pedro bi ꞌyɛ̨mpꞌa bʉya:
―Hanja ꞌdatꞌa gá bɛ̨mmi, hanja sä gá cøn rá Hogandąhi Oją. Nuya ꞌbäcua ja ra goxthi ʉ gue bá äcꞌa ni ndø, nɛꞌe da duxꞌa ya, bi ꞌyɛ̨mbi.
10 Nɛ ꞌbex bi yørpʉ ja rá gua ra Pedro, nɛ bi du. Bi yʉtꞌʉ yʉn ꞌyohʉ, bi nu, ya xí du, nɛ bi dutsꞌi, nɛ bi ꞌyägui, ꞌdarpʉ thoho bi ꞌyoui rá ndø. 11 Nɛ ɛ̨mmɛ bi mbidi gätho ʉ yʉ ꞌyɛ̨cꞌyɛi, nɛꞌʉ gätho miꞌda bi ꞌyøde bi mbidi.
Xʉn ngu yʉn tꞌøtꞌe nuįxte bi ꞌyøtꞌ yʉ́ ꞌbäihʉ ra Cristo
12 Xʉn ngu yʉ hmɛpya, nɛ yʉn tꞌøtꞌe nuįxte bi ꞌyøtꞌ yʉ́ ꞌbäihʉ ra Cristo bʉ ꞌbʉh yʉ jąꞌi. Nɛ gätho madim pɛti bʉ ja ra dąniją guepʉ tꞌɛ̨mbi rá ngunꞌyu ra Salomón, nɛ ꞌdatꞌa im bɛ̨nꞌʉ. 13 Nɛ nuꞌʉ miꞌda ʉ gue hingui ɛ̨cꞌyɛi, bi zu din uąnsꞌhʉ yʉ ꞌyɛ̨cꞌyɛi, nɛ bi hnumansu yʉ ꞌyɛ̨cꞌyɛi. 14 Pɛ manꞌda manꞌda xʉn ngu bi ꞌyɛ̨cꞌyɛi ra Hmu, yʉn ꞌyohʉ nɛ yʉ xisu. 15 Nɛ nangue bi ꞌyøtꞌ yʉn tꞌøtꞌe nuįxte yʉ́ ꞌbäihʉ ra Cristo, jananjabʉ i tsꞌopʉ ja ꞌyu yʉ hyɛ̨nni guepʉ da thoꞌʉ, i oxpʉ ja yʉ́ tꞌotsꞌi nɛ yʉ́ fįdi. Nɛ nuꞌbʉ da thopʉ rá xudi ra Pedro da yąni. 16 Nɛ xʉn ngu bi bøm bʉ ja yʉ hnini guepʉ hän bʉ Jerusalén, bi mba bʉ Jerusalén, bi zixꞌʉ yʉn zämanꞌʉ, nɛꞌʉ min ꞌyohʉ yʉ zįthu. Gätho bi zä.
Ra Pedro nɛ ra Xuua bi hnumanꞌʉ
17 Janangueꞌa yʉ dąmbäją nɛ gätho min ꞌyohʉ, nuꞌʉ ɛ̨mbi yʉ saduceos, ɛ̨mmɛ bin ja yʉn tsꞌɛya yʉ́ mbʉi ʉ. 18 Janangueꞌa bi bɛntꞌʉ yʉ́ ꞌbäihʉ ra Cristo nɛ bi gotꞌa fädi. 19 Pɛ nuꞌa nꞌda ram ꞌbɛhni bí ꞌyɛ̨h mahɛ̨tsꞌi ꞌbʉ min xui, bi xocua ra jutꞌi yʉ ofädi nɛ bi zixpʉ thi. Nɛ bi xifi:
20 ―Ní mba, damam ꞌbähmbʉ bʉ ja ra dąniją, dami xihmbʉ yʉ jąꞌi gätho nangue ram ꞌbʉi maꞌdaꞌyo, bi ꞌyɛ̨na.
21 Nuꞌʉ, nuꞌbʉ mí ꞌyøh na, bi yʉrpʉ ja ra dąniją ꞌbʉ mi tꞌʉxuditho, nɛ bi xänba yʉ jąꞌi.
Nɛ nuꞌbʉ mí pɛti yʉ hmumbäją bʉ ja nꞌda ra ngu, nɛꞌʉ min ꞌyohʉ, nɛ madin zohni yʉ ngʉrpi nɛ yʉ́ dącꞌyɛi yʉ israel, nɛ sä bi mbɛnpʉ fädi yʉ asmayo gue ba si yʉ́ ꞌbäihʉ ra Cristo. 22 Pɛ nuꞌbʉ mi zøm bʉ ja ra fädi yʉ asmayo, njom bi dįm bʉ ʉ. Bi mbeng mahønꞌa bʉ bí ꞌbʉh yʉ hmumbäją, 23 nɛ bi ꞌyɛ̨mbi:
―Dá tįmꞌbe ra goxthi xø man thʉꞌtꞌi thoho nɛ yʉ mbädi mi ꞌbäpʉ thi ja ra goxthi. Nɛ nuꞌbʉ ma xocꞌbe, njoꞌo toꞌo dá tįmꞌbe bʉ mbo, bi ꞌyɛ̨nꞌʉ.
24 Nɛ nuꞌbʉ mi ꞌyøꞌa rá hmu yʉ mbädi bʉ ja ra dąniją, nɛ yʉ hmumbäją, bi hyonya thoho. Ɛ̨mmɛ bi du yʉ́ mbʉi: “Hapʉ maha nín sɛꞌa øtꞌʉ,” din ꞌyɛ̨mpꞌʉ. 25 ꞌBex bi zønꞌa nꞌda, bi xifi:
―Nuꞌʉ yʉn ꞌyohʉ gá cothʉ fädi bí ꞌbäpʉ ja ra dąniją ya, nɛ i xänba ʉ yʉ jąꞌi, bi tꞌɛ̨mpꞌʉ.
26 Nɛ bi mba rá hmu yʉ mbädi bʉya, nɛ in ꞌyohʉ yʉ mbädi. Nɛ xø bá si yʉ́ ꞌbäihʉ ra Cristo, nɛ him bi ʉnbi, nguetho mí su xtí mba ma batꞌado. 27 Nɛ nuꞌbʉ bá tsꞌi bʉ ja ra junta, bi ꞌyän yʉn tꞌänni a ra hmumbäją. Bi ꞌyɛ̨mpꞌʉ:
28 ―Ha hin dá hɛcꞌahʉ gue hin gui xänbahʉ yʉ jąꞌi nangue ra Jesús. Pɛ hin guí øhmbʉ ꞌbɛꞌa dá mangähe. Nuya gätho yʉ jąꞌi ꞌbʉcua Jerusalén i pąh ram hma guí mamhbʉ. Ha guí ɛ̨nje go ma tsꞌoquihe bi du ra Jesús.
29 Nuꞌa ra Pedro nɛꞌʉ miꞌda yʉ́n ꞌyohʉ bi dąti:
―Jatho ga øthe ꞌbɛꞌa i xije Oją xinda gue i xije yʉ jąꞌi. 30 Nu Oją gue bi dąnde ma ngʉrpa bøtahʉ, bi xoxꞌa ra Jesús, nuꞌa gueꞌa gá hyohʉ ꞌbʉ gmí cuathʉ bʉ ja ra za. 31 Pɛ Oją bi zixpʉ bi gonhui rá tsꞌɛdi, ngue dim hmu nɛ dim pørpate. Nɛ da japi di päh yʉ́ mbʉi yʉ jąꞌi israel nɛ di punba yʉ́ tsꞌoqui. 32 Nɛ nugähe dí mamhbe majuąni nanguehna. Nɛꞌa rá Hogandąhi Oją im ma majuąni nanguehna. Nɛ nu Oją bi un rá Hogandąhi toꞌo gätho bi ꞌyɛ̨cꞌyɛi, gue da bąsɛ gue majuąni a, bi ꞌyɛ̨nꞌa ra Pedro.
33 Nɛ nuꞌbʉ mí ꞌyøꞌʉ hupʉ, ɛ̨ mmɛ bi dɛ ra cuɛ, nɛ min nde xtá hyo ʉ. 34 Pɛ bi ndantsꞌa nꞌda ran ꞌyohʉ mi hupʉ ja ra junta, nuna nꞌda ra fariseo rá thuhu ra Gamaliel. Gueꞌa nꞌda ra xänbate yʉ́n tꞌɛ̨di yʉ judío. Nɛ gätho yʉ jąꞌi in numansu a. Nuꞌa bi manda da tsꞌixpʉ thi nꞌda zʉ ora ʉ i pa ma juąnbi. 35 Nɛ bi ꞌyɛ̨na:
―Nꞌyohʉ ahʉ, dyʉ israelhʉ, dami jamansu ꞌbɛꞌa guí ørpahʉ ya yʉn ꞌyohʉ. 36 Nguetho hin ɛ huą mayaꞌbʉ bi ndantsꞌa nꞌda ran ꞌyohʉ ra Teudas, mi ɛ̨na mi jasɛ rá tsꞌɛdi. Nɛ xʉn ngu yʉ jąꞌi bi dɛnni, mbɛ goho ciɛnto. Nɛ nte dá ørpahʉ pɛ bi tho, nɛ gätho mi tɛnni bin ꞌuɛ̨xtꞌi ꞌdaꞌa nꞌdanni bi mba. 37 Mꞌbɛjua bʉya, bi ndantsꞌ ra Judas ra mɛngu ra häi Galilea. Nu yʉ pa bin ja ra pede bin tɛtꞌi ꞌda yʉ jąꞌi. Pɛ nɛꞌa bi mba ntho, nɛ gätho mi tɛnni bin ꞌuɛ̨xtꞌi. 38 Janangueꞌa dí xi ahʉ, dami hyɛhmbʉ ya yʉn ꞌyohʉ, nguetho nuꞌbʉ rá tsꞌɛdi zɛhɛ gue ra ꞌbɛfi i øtꞌe, da mba ma juadi ꞌbʉ. 39 Pɛ nuꞌbʉ rá ꞌbɛfi Oją i øtꞌe, hingui sä gui hɛcpahʉ. Nuꞌbʉ guí ɛ̨na gui hɛcpahʉ, gan sʉhmbʉ Oją ꞌbʉ, bi ꞌyɛ̨nꞌa ra Gamaliel.
40 Nuꞌʉ, bi ꞌyømanho ꞌbɛꞌa bi man ra Gamaliel, nɛ nuꞌbʉ mí xifi da yʉtꞌa mbo mahønꞌa yʉ́ ꞌbäihʉ ra Cristo, bi mba mꞌbɛi, nɛ bi xiꞌʉ hin din xänbate nangue ra Jesús, nɛ bi hyɛtho bʉya. 41 Nuꞌbʉ mí bøm bʉ ja ra junta ʉ, bin johya yʉ́ mbʉi, nguetho ya bi nu ran ʉnbi nangue ra Jesús. 42 Nɛ xínga nꞌda ra pa mi ɛꞌtꞌi gue him mi mampꞌa ra hogam hma nangue ra Jesucristo, nɛ bi xänba yʉ jąꞌi nubʉ ja rá dąniją yʉ judío, nɛpʉ ja yʉ ngu.