Bi thahni yoto má ꞌyohʉ ngue dim fäxte
6
Nuꞌʉ yʉ pa ʉ manꞌda xʉn ngu bi ꞌyɛ̨cꞌyɛi. Nuꞌʉ ꞌda bʉya gue i yą ra griego, bi dʉꞌmi bi zʉꞌʉ i yą ra hebreo, i ɛ̨na hingui pa ma pɛti xʉn ho ʉ ꞌda yʉ́ mɛnguhʉ, gue yʉ xisu xʉn du yʉ́ ndø, gueꞌbʉ pa ma datꞌi yʉn tsꞌihmɛ nꞌda pa ngu nꞌda pa. 2 Nuꞌʉ ꞌdɛꞌmayoho yʉ́ ꞌbäihʉ ra Cristo bi ma gue dim pɛti yʉ ꞌyɛ̨cꞌyɛi bʉya, nɛ bi xifi:―Hingui sä yoho ga øtꞌähe, hingui sä ga thoqui ga unhde yʉn tsꞌihmɛ yʉ jąꞌi, nguetho jatho ga mamhbe rám Hman Oją. 3 Janangueꞌa ma zʉ cu ahʉ nangue ra Cristo, dami huahndʉ ꞌda gue gueꞌahʉ yoto yʉ hoganꞌyohʉ gue i hą ra tsꞌɛdi xʉn ho nangue rá Hogandąhi Oją in ꞌyohʉ, nɛ xʉn ho yʉ́n ꞌ yomfɛ̨ni, di darpa yʉ́n tsꞌihmɛ yʉ jąꞌi ngue nte i ja. 4 Pɛ nugähe ga thoje dan yąhe Oją nɛ ga mamhbe rám Hman Oją.
5 Nɛ gätho ʉ gue madi pɛti bʉ, bi ꞌyømanho ʉ ꞌbɛꞌa bi manꞌʉ yʉ́ ꞌbäihʉ ra Cristo. Nɛ bi thanꞌna ra Esteban, nꞌda ran ꞌyohʉ ɛ̨mmɛ ɛ̨cꞌyɛi xʉn ho nɛ in ꞌyoui xʉn ho rá Hogandąhi Oją. Nɛ bi thanꞌna ra Felipe, nɛ ra Prócoro, nɛ ra Nicanor, nɛ ra Timón, nɛ ra Parmenas, nɛ ra Nicolás, nuꞌa mí tɛnba yʉ́ tꞌɛ̨cꞌyɛi yʉ judío ꞌbʉ hin ní ꞌyɛ̨cꞌyɛi ra Cristo, nuꞌa bá nɛxpʉ ja ra hnini Antioquía. 6 Nɛ gätho bi tsꞌixpʉ ꞌbʉh yʉ́ ꞌbäihʉ ra Cristo. Nɛ nuꞌʉ bi gäspa yʉ́ ꞌyɛ yʉ́ yą ʉ bʉya, nɛ bin yąhʉ Oją ngue da mbäxꞌʉ nangue ra ꞌbɛfi bin tꞌunꞌdʉ.
7 Nɛ manꞌda manꞌda bi hman rám hman Oją, janangueꞌa manꞌda xʉn ngu yʉ jąꞌi bʉ Jerusalén bi ꞌyɛ̨cꞌyɛi. Nɛꞌʉ yʉ mbäją bʉ ja yʉ́ niją yʉ judío, xʉn ngu bi ꞌyɛ̨cꞌyɛi nɛ bi dɛnni.
Bi fɛntꞌa ra Esteban
8 Nuna ra Esteban, xʉn ngu rám fätsꞌi Oją bi unni nɛ rá tsꞌɛdi, nɛ bi ꞌyøtꞌ yʉn tꞌøtꞌe nuįxte nɛ yʉ hmɛpya nangue rá tsꞌɛdi Oją bʉ ꞌbʉh yʉ jąꞌi. 9 Pɛ nuꞌʉ ꞌda yʉn ꞌyohʉ bi dʉꞌmi bin junthʉ ra Esteban, gueꞌʉ i pa bʉ ja nꞌda rá niją yʉ judío guepʉ i pa yʉ jąꞌi min ꞌyɛ̨hɛ, nɛꞌʉ ꞌda yʉ mɛngu bʉ ra häi Cirene, nɛpʉ ja ra hnini Alejandría, nɛpʉ ja ra häi Cilicia, nɛ ꞌda yʉ mɛngu bʉ ra häi Asia, gätho bin junthʉ ra Esteban. 10 Pɛ him bi zä bi dąpꞌa ra Esteban, nguetho xʉn ngu rán ꞌyomfɛ̨ni mi ja, ngue mi yą con rá tsꞌɛdi rá Hogandąhi Oją. 11 Janangueꞌa ntꞌągui thoho bi ꞌbɛpꞌi ꞌda da man ra fɛhni, da ꞌyɛ̨na: “Dá øhmbe a bi ma, bi cꞌąmanꞌʉ ra Moisés gue bi ꞌdac man tꞌɛ̨dihʉ, nɛ bi cꞌąmanꞌʉ Oją,” bi tꞌɛ̨mpꞌʉ ꞌda. 12 Bi parpa yʉ jąꞌi bʉya, nɛ yʉ dącꞌyɛi, nɛ yʉ xänbate niją, bi fɛntꞌa ra Esteban nɛ bi tsꞌixpʉ bí ja ra junta nguepʉ i ja rán juąnbate yʉ hmumbäją. 13 Nɛ bi mba nthoni ꞌda da man yʉ fɛhni, nɛ bi ꞌyɛ̨na:
―Hingui ɛꞌtsꞌa ní cꞌąmanꞌʉ na ra dąniją nɛꞌʉ yʉ́n tꞌɛ̨di ra Moisés. 14 Nguetho dá øhmbe bi man na ran ꞌyohʉ, bi ꞌyɛ̨na: “Nu ra Jesús ra mɛngu Nazaret da xoꞌtꞌ ra dąniją nɛ di päh yʉn tꞌøtꞌe gue bi xijʉ ra Moisés,” bi ꞌyɛ̨n na ra Esteban, sä bi ꞌyɛ̨nꞌʉ.
15 Gätho mi hupʉ ja ra junta bi hyand ra Esteban, nɛ bi nu ngue majuąni in ꞌyoui xʉn ngu rá tsꞌɛdi Oją.