Bi nɛqui ra Jesús bʉ ndenthe
21
Mꞌbɛjua bʉya dá nuhe ra Jesús mahønꞌa, bi jaje dá pąhmbe manꞌda xʉn ho bʉ ja ra dądehe Tiberias, nꞌdatꞌa ra dądehe Galilea. Nɛ ga xi ahʉ gätho bin ja. 2 Mín ꞌyohe ra Simón Pedro nɛ ra Tomás i tꞌɛ̨mbi ra Go, nɛ ra Natanael ra mɛngu bʉ Caná ra xɛqui Galilea, nɛ man ꞌyohʉgä yʉ́ tsꞌʉntꞌʉ gäꞌbe ra Zebedeo, nɛ mí yoho ma mixädihe. 3 Nɛ nubʉya bi ꞌyɛ̨nje ra Simón Pedro:―Nugä ga mba na ꞌbahuą, bi ꞌyɛ̨nje.
―Ga mbähä ꞌbʉ, dá ɛ̨mfe.
Dá mbähmbe bʉya ꞌbex dá huhe nꞌda ma mbosahe. Pɛ gätho ra xui nte dá thɛhe yʉ huą. 4 Nɛ nuꞌbʉ mí hyax bʉya mí ꞌbäpʉ ndenthe a ra Jesús. Pɛ nugähe him ꞌbexque dá pąhmbe gue gueꞌa. 5 Bi ꞌyɛ̨nje ra Jesús:
―Gyʉ tsꞌʉntꞌʉhʉ, ha nte gá thɛhʉ yʉ huą.
―Hinꞌna, dá ɛ̨mfe.
6 Nu ra Jesús bi ꞌyɛ̨nje bʉya:
―Pɛ dami ꞌyɛnt ni xitꞌąhʉ bʉ ja rán ꞌyɛi ra mbosa, nɛ ꞌbex gui thɛhʉ bʉya.
Dá øthe a bi xije ra Jesús, nɛ ɛ̨mmɛ xʉn ngu dá thɛhe yʉ huą, him mí sä ga jʉxhe ra xitꞌą. 7 Nɛ nugä gue madi huɛ̨gä ra Jesús, dá ɛ̨mpꞌa ra Pedro:
―Guehnʉ ma Hmuhʉ nʉ.
Nuꞌbʉ mí ꞌyøh ra Simón Pedro gue gueꞌa ra Hmu a, ꞌbex bi hye rá he nguetho xí mbøgue. Nɛ bin säcpʉ ja ra mbosa gue bi zønꞌa nꞌdihi bʉ i ꞌbäh ra Jesús. 8 Pɛ nuje dá cohmbe bʉ ja ra mbosa, zʉn jante dá sømhbe bʉ ndenthe nguetho dí jʉtꞌähe ra xitꞌą nɛ yupʉ yʉ huą. Nɛ hinga yatho ndenthe, mbɛ nꞌda ciɛnto metro. 9 Nɛ nuꞌbʉ mí zøm bʉ ndenthe ra mbosa mí huhe, dá nuhe nꞌda ra sibi i zø bʉ, nɛ nꞌda ra huą i oxpʉ ja yʉ dɛspi, nɛ mí oxpʉ ra hmɛ. 10 Nɛ nu ra Jesús bi ꞌyɛ̨nje:
―Bá cʉ ꞌda ni huąhʉ xcá thɛhʉ.
11 Nu ra Simón Pedro bʉya, bi mba bá jʉtꞌa ra xitꞌą bʉ ja ra häi i yuh yʉ huą, nꞌda ciɛnto nɛ yote ma ꞌdɛꞌma hyu yʉ huą xʉn ndoho. Pɛ hin hapʉ bi xɛtꞌa ra xitꞌą. 12 Nu ra Jesús bi xije:
―Ba ɛ̨hmbʉ dan sihmɛhʉ, bi ꞌyɛ̨nje.
Pɛ xínga nꞌdaje xcá änhde toꞌo a, nguetho dá pąhmbe gue gueꞌa ma Hmuhe. 13 Nɛ bi mba bʉ zø ra sibi a ra Jesús bi hyąc ra hmɛ, nɛ bi ꞌdaje, nɛ ra huą.
14 Nɛ ná hyundį dá nuhe ra Jesús bʉya gue bin ꞌyusɛ, gueꞌbʉ go mí dąmbɛ̨ni bʉ ja rán ꞌyägui.
I yąui ra Jesús a ra Simón Pedro
15 Nuꞌbʉ mán niyąhe, nu ra Jesús bi ꞌyɛ̨mpꞌa ra Simón Pedro:
―Simón rá tsꞌʉntꞌʉ i ra Jonás, ha manꞌda guí numanhogui xinda guehya ꞌda.
Nu ra Pedro bi ꞌyɛ̨mpꞌa:
―Hąha ma Hmu i, guí pądi gue dí numanho i.
Nu ra Jesús bi ꞌyɛ̨mb bʉya:
―Dami ꞌuįn ʉ ma tꞌʉdɛꞌyo, nangue mam hmangä gui xänba yʉ jąꞌi i ɛ̨cꞌyɛigui.
16 Ná yondį xø bi ꞌyɛ̨mpꞌa:
―Simón rá tsꞌʉntꞌʉ i ra Jonás, ha majuąni guí numanhogui.
―Hąha ma Hmu i, guí pądi gue dí numanho i, bi ꞌyɛ̨mbi.
Nɛ nu ra Jesús bi ꞌyɛ̨mpꞌa:
―Dami fäh ma dɛꞌyo ꞌbʉ.
17 Nɛ ná hyundį bʉya bi ꞌyɛ̨mbi:
―Simón rá tsꞌʉntꞌʉ i ra Jonás, ha guí numanhogui, bi ꞌyɛ̨mbi.
Nɛ bi du rá mbʉi ra Pedro, nguetho ya ná hyundį bi ꞌyän ꞌbʉ i numanho. Nɛ bi dąti:
―Ma Hmu i, gätho guí pądi, guí pądi dí numanho i.
Nɛ nu ra Jesús bi ꞌyɛ̨mbi mahønꞌa:
―Dami ꞌuįnꞌʉ ma zʉ dɛꞌyo dadí huɛ̨cä. 18 Nuꞌbʉ gmín tsꞌʉntꞌʉ ząi gán ꞌyosɛ hønbʉ go hapʉ guín nde gui mba, nɛ guí tuzɛhɛ rá ngʉtꞌi ni foho. Pɛ nuꞌbʉ gán dącꞌyɛi gui įng ni ꞌyɛ nɛ nꞌdanꞌyo da tutꞌi i, nɛ da zixꞌi i hapʉ hin guín nde gui mba, bi ꞌyɛ̨mbi.
19 Guehna bi man ra Jesús, gue da bąh ra Pedro ꞌbɛꞌa nín dąte da nu a, nɛ gueꞌa dí ꞌyudi xʉn hotho Oją a. Nɛ nu ra Jesús bi ꞌyɛ̨mpꞌa ra Pedro mahønꞌa:
―Dami tɛngui gui thocꞌa ma ꞌbɛfigä, bi ꞌyɛ̨mbi.
Bi tꞌänꞌna ra Jesús nangue a ra Xuua
20 Nɛ nuꞌbʉ mí dʉꞌmi bi dɛn bʉya bi nyɛ̨gui, bi nugä gue nɛqui dí tɛtꞌi, guecä madí huɛ̨gä ra Jesús, ngue ꞌdarpʉ xtá huꞌbe bʉ ja ra mɛxa ꞌbʉ mán sihmɛhe gueꞌbʉ má änni toꞌo di dä a. 21 Nɛ nuꞌa ra Pedro ꞌbʉ mín nugui dí tɛtꞌi, bi ꞌyänꞌna ra Jesús:
―Ma Hmu i, ꞌbɛꞌa nín dąte xin da nu na ra Xuua, bi ꞌyɛ̨mbi.
22 Nu ra Jesús bi dąti:
―Nuꞌbʉ ma pähä di ꞌbʉtho ua gueꞌbʉ go dá søcä mahønꞌa, hin ni ꞌbɛfi gui ꞌyängui. Pɛ nuꞌa ni ꞌbɛfi gui tɛngui gui thocꞌa ma ꞌbɛfi, bi tꞌɛ̨mbi.
23 Pɛ janangueꞌa mi mansɛ yʉ ꞌyɛ̨cꞌyɛi gue njąmꞌbʉ ga tugä. Pɛ hinga ngubʉ bi man ra Jesús, pɛ bi ꞌyɛ̨na: “Nuꞌbʉ ma pähä di ꞌbʉtho ua gueꞌbʉ go dá søcä mahønꞌa, hin ni ꞌbɛfi gui ꞌyängui,” xí ꞌyɛ̨mpꞌa.