Bi dąmbɛ̨ni a ra Jesús
20
Tꞌʉxuditho domingo hin ní nɛc ra häi nu ra María ra mɛngu bʉ Magdala bi zøm bʉ ja ran ꞌyägui. Bi nu gue xí mba njʉnni a ra xįndo mi juax bʉ ja rá goxthi ran ꞌyägui. 2 Bá pengui nɛ bán tihi, bi zøm bʉ mí ꞌbʉꞌbe ra Simón Pedro nɛ bi ꞌyɛ̨ncꞌbe:―Bin jʉc ma Hmuhʉ. Nɛ hin dí pądi hapʉ bi thux ya, bi ꞌyɛ̨ncꞌbe.
3 Dá mbɛꞌbe bʉ ja ran ꞌyägui bʉya. 4 Ɛ̨mmɛ dán tiꞌbe, bin tsꞌogui tsꞌʉ ra Pedro, nɛ mꞌbɛtꞌo go dá søngä bʉ ja ra hyądo. 5 Dá cꞌąꞌtꞌä bʉ mbo dá nu høntꞌʉ yʉ ꞌbøꞌtꞌe cąx bʉ ngue xí ꞌbantꞌi. Pɛ him ꞌbex dá cʉtꞌä mbo. 6 Nɛ nuꞌbʉ mí zøm bʉ ra Simón Pedro, ꞌbex bi uɛ̨ntho bʉ mbo, nɛꞌa bi nu cąx bʉ yʉ ꞌbøꞌtꞌe. 7 Nɛ nuꞌa nꞌda ra ꞌbøꞌtꞌe xí ꞌbanba rá yą ra Jesús nꞌdanni mí cątsꞌi, ma doꞌmi a. 8 Nɛcä dá cʉtꞌä mbo bʉya, madagueꞌbʉ mꞌbɛtꞌo dá søngä bʉ. 9 Nɛ nuꞌbʉ má nu ꞌbɛꞌa di ja bʉ, dá ɛ̨cꞌyɛigä gue majuąni bi dąmbɛ̨ni a ra Jesús. 10 Dá pengꞌbe bʉ ma nguꞌbe bʉya.
Nu ra Jesús bi nɛqui bʉ mi ꞌbä a ra María
11 Pɛ nuꞌa ra María bi gotho bʉ ja rá goxthi ra hyądo nɛ i zoni nɛ di cꞌąrpʉ mbo. 12 Nɛ bi nu yoho yʉ́m ꞌbɛhni Oją mahɛ̨tsꞌi i he yʉ tꞌaxcahe. I hupʉ nꞌda bʉ mí ja rá yą ra Jesús nɛ hupʉ manꞌda bʉ mí ja yʉ́ gua. 13 Nɛ bi xi a ra María:
―Grá xisu, hanja gná zoni, bi ꞌyɛ̨mpꞌa.
Nɛ nu ra María bi dątꞌʉ:
―Nguetho bin jʉcꞌa ma Hmu nɛ hin dí pądi hapʉ bi thutsꞌi, bi ꞌyɛ̨na.
14 Nɛ nuꞌbʉ mín hanni ra María, bi nu ra Jesús i ꞌbäpʉ. Pɛ him mi pądi gue gueꞌa. 15 Nuꞌa ra Jesús bi ꞌyɛ̨mpꞌa:
―Grá xisu, hanja gná zoni, toꞌo guí honi, bi ꞌyɛ̨mbi.
Pɛ nu ra María mím bɛ̨ni gue gueꞌa ran ꞌyohʉ di jamansu ra nuąndätꞌo. Janangueꞌa bi ꞌyɛ̨mbi:
―Nuꞌbʉ gueꞌe gá jʉga ma Hmu, dami ꞌyurqui tsꞌʉ hapʉ gá pɛgui nɛ ga tuxä, bi ꞌyɛ̨mbi.
16 Nɛ nu ra Jesús bi ndønba rá thuhu:
―María, bi ꞌyɛ̨mbi.
Nu ra María ꞌbex bi ꞌbäꞌtꞌi xʉn ho bʉya, bi nu nɛ bi ꞌyɛ̨na:
―Raboni, nde da ma, “Xänbate i,” bi ꞌyɛ̨mbi.
17 Nɛ nu ra Jesús bi ꞌyɛ̨mbi:
―Pɛ hingui sä ꞌbexque gui thäcä ya nguetho di ꞌbɛh mi tsꞌʉ ga mba bʉ bí ꞌbʉh ma Ta. Janangueꞌa ꞌbɛ ní mbahma bá xi ʉ ma cuui ga pengbʉ bí ꞌbʉh ma Tagä, nɛ ahʉ ni Tahʉ a, nuꞌa ma Ojągä a, nɛ ahʉ ni Ojąhʉ a, bi ꞌyɛ̨mbi.
18 Nuꞌa ra María ra mɛngu bʉ Magdala bi mba bʉya, nɛ bi xije dyʉ xädihe gue bi nu ra Hmu nɛ bi xije ꞌbɛꞌa bi manꞌa.
Nu ra Jesús bi nɛqui bʉ mí ꞌbʉ ʉ yʉ́ xädi
19 Nɛ nuꞌbʉ mín de guetꞌa ra pa domingo, nthʉꞌtꞌi yʉ́ jutꞌi ra ngu bʉ dám ꞌbʉhmbe nguetho dá su ma ngʉrpihe, nɛ nuꞌbʉ má nuhe, ꞌbä inde bʉ dí ꞌbʉhmbe ra Jesús. Nɛ bi ꞌyɛ̨na:
―Daman johyahʉ, bi ꞌyɛ̨nje.
20 Nɛ nubʉya bi ꞌyurcahe yʉ́ ꞌyɛ guepʉ xí ꞌdømbi, nɛ rán zʉꞌbøtsꞌe guepʉ xín sʉnba ra tsꞌątꞌɛgui. Nɛ nuꞌbʉ má nuhe, dá pąhmbe majuąni ma Hmuhe a, nɛ ɛ̨mmɛ dán johyahe bʉya. 21 Nɛ bi ma mahønꞌa ra Jesús:
―Daman johyahʉ. Nɛ tengu tho bʉ í ꞌdac ra ꞌbɛfi ma Ta dá jap yʉ jąꞌi ua ja ra ximhäi da bądi, nguthogä dí ꞌda ahʉ ra ꞌbɛfi gui jafʉ yʉ jąꞌi ua ja ra ximhäi da bądi, bi ꞌyɛ̨nje.
22 Nɛ nuꞌbʉ mí jua a bi man na, bi huigähe ran dąhi nꞌda ngu nꞌdagähe bʉya.
―Dami hyąmhbʉ rá Hogandąhi Oją, bi ꞌyɛ̨nje. 23 Nuꞌa toꞌo di päh yʉ́ mbʉi nangue yʉ́ tsꞌoqui, i ja nin tꞌɛ̨dihʉ gui xihmbʉ ma punbi a. Pɛ nuꞌa hin di päh yʉ́ mbʉi nangue yʉ́ tsꞌoqui, i ja nin tꞌɛ̨dihʉ gui xihmbʉ him ma punbi a, bi ꞌyɛ̨nje.
Bi hyąxanjuąni a ra Tomás
24 Pɛ nu ra Tomás gueꞌa i tꞌɛ̨mbi ra Go a, nꞌda ma mixädihe, njoꞌo bʉ ꞌbʉ mí nɛqui ra Jesús. 25 Mꞌbɛjua bʉya dá xihmbe ra Tomás:
―Nugähe dá nuhe ra Hmu.
Pɛ nu ra Tomás bi ꞌyɛ̨na:
―Pɛ nugä dí ɛ̨na him majuąni a guí xijʉ hinda høntꞌbʉ gan nusɛ hapʉ bim fospa yʉ clavo yʉ́ ꞌyɛ, nɛ ga fospa ma saha hapʉ bim fox yʉ clavo nɛ ga fot ma ꞌyɛ bʉ ja rá ꞌbiꞌbøtsꞌe, sä ga ɛ̨cꞌyɛi ꞌbʉ, bi ꞌyɛ̨nje.
26 Nuꞌbʉ mí dätꞌan hyąto pa bʉya dám pɛtihe mahønꞌa. Nɛꞌa ra Tomás. Nɛ nthʉꞌtꞌi yʉ jutꞌi tengu mamꞌbɛtꞌo, pɛ xø bi nɛqui bʉ ra Jesús mahønꞌa, bim ꞌbä inde bʉ dí ꞌbʉhmbe.
―Daman johyahʉ, bi ꞌyɛ̨nje mahønꞌa.
27 Nuꞌa ra Jesús bʉya bi xi a ra Tomás:
―Dami fosꞌ ni saha ua bim foscä yʉ clavo nɛ guin nu ma ꞌyɛ, nɛ bá ꞌuąt ni ꞌyɛ gui foꞌtsꞌua ja ma ꞌbøtsꞌe. O guí ɛ̨na him majuąni pɛ dami ꞌyɛ̨cꞌyɛi, bi ꞌyɛ̨mbi.
28 Nu ra Tomás bi ꞌyɛ̨mpꞌa:
―Ma Hmu i, ma Oją i, bi ꞌyɛ̨na.
29 Nuꞌa ra Jesús bi ꞌyɛ̨mpꞌa:
―Tomás, guí ɛ̨cꞌyɛi ya nguetho ya gá nugui. Pɛ nuꞌʉ to da ꞌyɛ̨cꞌyɛigui ꞌbʉ nte ní nu, manꞌda di jąp Oją ʉ, bi ꞌyɛ̨mbi.
ꞌBɛpʉ án tꞌoꞌtꞌ na ra søcuą