19
Nu ra Pilato bi manda dí fɛi a ra Jesús. 2 Nu yʉ dofʉi bʉya bi ꞌyørpa nꞌda ra corona gue yʉ ꞌyʉꞌuįni, nɛ ntsꞌɛdi bi huspa rá yą ra Jesús. Nɛ bim pärba nꞌda ra ꞌbøꞌtꞌe xʉn jʉpoi tengu dim pätꞌ yʉ hmutsꞌʉtꞌabi. 3 Nɛ bi den bʉya nɛ bi ꞌyɛnspa yʉ́ biba, bi ꞌyɛ̨mbi:―Biba, grá hmutsꞌʉtꞌabi yʉ judío, bi ꞌyɛ̨mbi. Nɛ bi mbɛꞌmi bʉya ngue yʉ́ ꞌyɛ.
4 Bi mba bʉ thi mahønꞌa a ra Pilato, bin yąhʉ ma ngʉrpihe:
―Nuya ga dä ahʉ na ran ꞌyohʉ, dami pąhmbʉ nte dá tįnba nꞌda ran tsꞌo gue xʉ ꞌyøtꞌ na, bi ꞌyɛ̨na.
5 Bi tsꞌix bʉ thi ra Jesús bʉya, ya i huꞌtsꞌ ra corona ngue ntꞌøtꞌe yʉ ꞌyʉꞌuįni, nɛ he ra ꞌbøꞌtꞌe xʉn jʉpoi.
―I ꞌbäcua na ran ꞌyohʉ ya, bi ꞌyɛ̨nꞌa ra Pilato.
6 Nuꞌʉ yʉ dąmbäją nɛ ma ngʉrpihe ꞌbʉ mín nu a ra Jesús, ntsꞌɛdi bi mbafi, nɛ xʉn ngu yʉ nidi bi ꞌyɛ̨na:
―Dá du, dá ꞌdømꞌpʉ ja ra pontꞌi.
Nu ra Pilato bi ꞌyɛ̨mpꞌʉ bʉya:
―Dami sizɛhɛhʉ ꞌbʉ guín nde gui cuathʉ bʉ ja ra pontꞌi, nguetho nugä hin te dá tįnbä nꞌda ran tsꞌo xʉ ꞌyøtꞌ na, bi ꞌyɛ̨mpꞌʉ.
7 Nuꞌʉ ma ngʉrpihe bi dąpʉya:
―Nugähe i jaje nꞌda man tꞌɛ̨dihe gue da du nꞌda im ma tengu im ma na, nguetho bi mansɛ guesɛ rá Tsꞌʉntꞌʉ Oją, bi ꞌyɛ̨nꞌʉ.
8 Nuꞌbʉ mí ꞌyø a ra Pilato mí ɛ̨nꞌa ra Jesús gue rá Tsꞌʉntꞌʉ Oją a, manꞌda bi zu a. 9 Nɛ bi zix pʉ mbo ja ran tsꞌɛmbate mahønꞌa a ra Jesús, bi ꞌyänni:
―Hapʉ ɛ majuąni guí nɛtsꞌi.
Pɛ nu ra Jesús him bi dąti.
10 Nu ra Pilato bi ꞌyɛ̨mpꞌa:
―Hanja hin gní thąrcagui. Ha hin guí pądi ja ma tsꞌɛdi ga cuatꞌa bʉ ja ra pontꞌi, nɛ ja ma tsꞌɛdi ga xocꞌa bʉ, bi ꞌyɛ̨mbi.
11 Nu ra Jesús bi dądi:
―Hin xtín ja ni tsꞌɛdi nɛ nte sä gui ꞌyørque ꞌbʉ hin xtán zän Oją ꞌbɛꞌa gui ꞌyørque. Pɛ nuꞌʉ bi dägä ua, manꞌda ja yʉ́ tsꞌoqui ʉ xinda gueꞌe, bi ꞌyɛ̨nꞌa ra Jesús.
12 Nɛ nubʉya nu ra Pilato ɛ̨mmɛ bi hyoni ꞌbɛpʉ dí hyɛtho a ra Jesús. Pɛ nu ma ngʉrpihe ntsꞌɛdi bi mbafi, bi ꞌyɛ̨nꞌʉ:
―Nuꞌbʉ gui hyɛt na, nin sʉiui a ma hmutsꞌʉtꞌabihʉ ra César ꞌbʉ. Nguetho nuꞌbʉ ꞌboꞌo da ma gue im hmutsꞌʉtꞌabi zɛhɛ din sʉhmi a ra César ꞌbʉ, bi ꞌyɛ̨nꞌʉ.
13 Nuꞌbʉ mí ꞌyøhna ra Pilato, bá si bʉ thi mahønꞌa a ra Jesús bʉ ja rá ngunꞌyu ran juąnbate magątsꞌi, dí ɛ̨mfe ma ndehe Gabata. Nɛ bi hyux ra Pilato bʉ ja rá mɛxa ran juąnbate. 14 Nuꞌa ra pa a, i pa ma hoqui yʉn tsꞌihmɛ da tsꞌi ꞌbʉ bi hyatsꞌi, nangue ran dąbaxjua. Nɛ di ꞌbɛh mitsꞌʉ da zøn i huxhyadi. Nɛ nu ra Pilato bi ꞌyɛ̨mpꞌʉ ma ngʉrpihe:
―Nuya ꞌbäcua na ni hmutsꞌʉtꞌabihʉ, bi ꞌyɛ̨mpꞌʉ.
15 Pɛ ntsꞌɛdi bi mba ʉ:
―Dá du, dá duhma, dá ꞌdømꞌpʉ ja ra pontꞌi, bi ꞌyɛ̨nꞌʉ.
Nɛ nu ra Pilato bi ꞌyɛ̨mpꞌʉ:
―Hanja gní ꞌyɛ̨njʉ gam ma da ꞌdømꞌpʉ ja ra pontꞌi ni hmutsꞌʉtꞌabihʉ, bi ꞌyɛ̨mbi.
Pɛ nu yʉ dąmbäją bi dądi:
―Njongui ꞌbʉcua manꞌda ma hmutsꞌʉtꞌabihe, høntꞌa ma hmutsꞌʉtꞌabihʉ bʉ Roma ngue ra César, bi ꞌyɛ̨nꞌʉ.
16 Nu ra Pilato bʉya bi ꞌyøtꞌa bi nde yʉ mbäją, bi manda dí cuati bʉ ja ra pontꞌi ra Jesús. Nɛ bi tsꞌix bʉya.
Bi mba nꞌdøꞌmi bʉ ja ra pontꞌi ra Jesús
17 Nɛ bi zix yʉ dofʉi a ra Jesús bʉya, nɛ i tuzɛhɛ rá pontꞌi bʉ ní mba, da zøm bʉ ja nꞌda ra nyuni tꞌɛ̨mbi Gólgota, nde da ma ra Nyuni nyąxmu. 18 Nɛ nuꞌbʉ mí zøm bʉ, bi mba nꞌdøꞌmi ra Jesús bʉ ja ra pontꞌi. Bim ꞌbä inde rá pontꞌi, nɛ nꞌda an ꞌdanguadi bim ꞌbä ʉ miꞌda yʉ pontꞌi, bi guarpʉ ʉ mi yoho. 19 Nu ra Pilato, bi ꞌyoꞌtꞌa nꞌda ram hma bi ꞌyɛ̨na: “Nuna ra Jesús ra mɛngu bʉ Nazaret, rá hmutsꞌʉtꞌabi yʉ judío na,” bi ꞌyoꞌtꞌi. Nɛ nuꞌa ra tꞌohni bi mba nꞌdøꞌmi bʉ ja ra pontꞌi. 20 Xʉn ngu ma mijudíohe dyʉ israelhe bi nu bʉya ꞌbɛꞌa ntꞌoꞌtꞌi bʉ, nguetho mbɛ ndehnini tho bʉ. Nɛ ntꞌoꞌtꞌi nangue ma ndesɛhe ra hebreo, nɛ yʉ́ nde yʉ mɛngu bʉ Grecia gue ra griego, nɛ yʉ́ nde yʉ mɛngu bʉ Roma gue ra latín. 21 Nuꞌʉ yʉ dąmbäją bʉya bi ꞌyɛ̨mpꞌa ra Pilato:
―Hanja gá ꞌyoꞌtꞌi gue ma hmutsꞌʉtꞌabihe. Pɛ dami hoqui da ma: “Bi mansɛ: Nugä drá hmutsꞌʉtꞌabi yʉ judío,” da ꞌyɛ̨na, bi ꞌyɛ̨nꞌʉ.
22 Pɛ nu ra Pilato bi dątꞌʉ:
―Ya ntꞌoꞌtꞌi ꞌbɛꞌa dá oꞌtꞌä, dá guetꞌa, bi ꞌyɛ̨mthoho.
23 Nuꞌbʉ mí cuar bʉ ja ra pontꞌi ra Jesús, nu yʉ dofʉi bʉya bi gąspa yʉ́ he, goho muntsꞌi bin ja yʉ́ he, nꞌda ngu nꞌda yʉ dofʉi nꞌda nꞌda muntsꞌi bi gąxꞌʉ. Pɛ nu rá pahni rám ꞌbɛxøtsꞌe hin hapʉ ma zøte a. 24 Janangueꞌa bin ꞌyɛ̨mzɛhɛ ʉ:
―Ndeꞌbʉ ga øthʉ nꞌda ran tąha toꞌo da bøni din thɛui rá pahni na.
Nɛ nuꞌa bi manꞌʉ bin thɛui a mán tꞌoꞌtꞌi bʉ ja rá tꞌohni Oją gue njabʉ da ꞌyøtꞌʉ, mi ɛ̨na: “Bi mba ma darqui ma he, nꞌda a nꞌda muntsꞌi bi gąxꞌʉ ꞌda. Pɛ nuꞌa mam ꞌbɛxøtsꞌe bi tꞌøtꞌa nꞌda ran tąha toꞌo da gątsꞌi,” mí ɛ̨n rá tꞌohni. Gueꞌa bi ꞌyøtꞌ yʉ dofʉi a.
25 Nuya mí ꞌbäpʉ ja ra pontꞌi rá mbe ra Jesús nɛ a rá juhuɛ, nɛꞌa ra María rá bømbe a ra Cleofas, nɛꞌa ra María ra mɛngu bʉ Magdala a. 26 Nɛ nuꞌa ra Jesús ꞌbʉ mín nu a rá mbe, nɛcä gue madí huɛ̨gä, bi xi a rá mbe bʉya:
―Ma mbe i, dami ꞌyɛ̨mbi ni tsꞌʉntꞌʉ nʉ ma xädi guí ꞌbähmi, bi ꞌyɛ̨mbi.
27 Nɛ bi ꞌyɛ̨ngä ra Jesús bʉya:
―Dami bɛ̨ni tenguꞌbʉ ni mbe nʉ ma mbegä, bi ꞌyɛ̨ngui.
Nɛ ꞌbex dá sixä bʉ ja ma ngu bʉya, nɛ dá jamansu a.
Bi du ra Jesús
28 Nɛ nuꞌbʉ mí man a ra Jesús bi bąh pʉya gue bi juah rá ꞌbɛfi mí mam bʉ ja rá Tꞌohni Oją gue din ja. Nɛ bi ꞌyɛ̨m bʉya:
―Dí tuthe, bi ꞌyɛ̨na.
Nɛꞌa bin thɛui a mán tꞌoꞌtꞌi a bi ma. 29 Nɛ mí høpʉ nꞌda ra tꞌʉxaro i po ra guindätꞌo xʉn ju. Nuꞌʉ mí ꞌbäpʉ bʉya bi gärpʉ ja ra guindätꞌo a nꞌda ɛ̨na ra fʉnjo gue bi zinni, bi fospa rá yą ra xithi bʉya nɛ bi hyurpa rá nde ra Jesús da zʉꞌtsꞌi. 30 Nuꞌbʉ mí zʉꞌtsꞌa ra Jesús:
―Ya bi guah ma ꞌbɛfi, bi ꞌyɛ̨na.
ꞌBex bin yeꞌmahäi rá yą, nɛ bi unsɛ rá te bi du bʉya.
Bin sʉnba rá ꞌbøtsꞌe ra Jesús
31 Nu ma ngʉrpihe hingui ndepe da guathoho bʉ ja yʉ pontꞌi ʉ yʉ jąꞌi ꞌbʉ ya xʉ hyatsꞌi, nguetho gueꞌa ra pa a ya manꞌda tąte nangue ra dąmpɛti. Janangueꞌa bi tꞌäp ra mate ra Pilato da mba nꞌuacpi yʉ́ juąngua gue da du nꞌdihi ʉ, nɛ da mba ma tongui bʉya. 32 ꞌBex bi mba ʉ yʉ dofʉi, nɛ bi ꞌuacpa yʉ́ juąngua ʉ yoho mí cuarpʉ ja yʉ́ pontꞌi guepʉ mí ꞌbäh rá pontꞌi ra Jesús. 33 Pɛ nuꞌbʉ mi zøm bʉ cuatꞌa ra Jesús, bi nu gue ya xí du, janangueꞌa him bi ꞌuacpa yʉ́ juąngua a.
34 Pɛ nuꞌa nꞌda ra dofʉi bi sʉnba rá ꞌbiꞌbøtsꞌe ra Jesús a ra tsꞌątꞌɛgui. ꞌBex bi bøn ra ji nɛ ra dehe. 35 Nɛ nugä gätho dá nusɛ ꞌbɛꞌa bi tꞌørpa ra Jesús. Janangueꞌa majuąni na dí oꞌtꞌä ya. Nɛ guehna dí oꞌtꞌä na nꞌdahma da zä gui ꞌyɛ̨cꞌyɛihʉ. 36 Nɛ nu ꞌbɛꞌa gätho bin ja, bin thɛui a mán tꞌoꞌtꞌi bʉ ja rá søcuą Oją gue din ja. Nɛ man tꞌoꞌtꞌi: “Xínga nꞌda rá doꞌyo da mba nꞌuacpi,” mi ɛ̨n ra tꞌohni. 37 Nɛ manꞌda bi hmam bʉ ja rá Tꞌohni Oją, bi ꞌyɛ̨na: “Nuꞌʉ di ʉcpi da nu gue gueꞌa bi mba ma sʉnbi ra tsꞌątꞌɛgui rá ꞌbøtsꞌe,” mí manꞌa ra Tꞌohni.
Bi tꞌäꞌa ra Jesús
38 Nɛ nubʉya nu ra José ra mɛngu bʉ Arimatea, nuꞌa nꞌda rá ꞌyɛ̨cꞌyɛi ra Jesús, pɛ him mi ma gue mí ɛ̨cꞌyɛi nguetho mí su ma ngʉrpihe, pɛ nuya bi ꞌyäp ran tꞌɛ̨di ra Pilato di tongba rá ngøcꞌyɛ̨i ra Jesús bʉ ja ra pontꞌi da ꞌyägui. Nɛ nuꞌbʉ min tꞌun ran tꞌɛ̨di ra José, bi mba bʉya nɛ bi tongba rá ngøcꞌyɛi ra Jesús. 39 Nɛ bá ɛ̨h ra Nicodemo bʉya, gue gueꞌa xí zøm bʉ mí ꞌbʉh ra Jesús nꞌda ra xui. Nɛ i tu ra ꞌyɛ̨thi ɛ̨mmɛ i yʉmanꞌu, mbɛ ꞌdäte ma ꞌdɛtꞌa kilo nan hyʉ, ma thąspi ra mirra a ra áloes. 40 Nuꞌbʉ mi mbantpa rá ngøcꞌyɛi ra Jesús ra hocꞌbøꞌtꞌe xʉn ho, nɛ bi ꞌyʉrpa ra ꞌyɛ̨thi guepʉ ním fįx ra ꞌbøꞌtꞌe, tengu ząi dí øthe dyʉ judíohe ꞌbʉ dí ähmbe nꞌda ra du. 41 Nɛ i ja bʉ nꞌda ra mbaꞌye jombʉ ja ra pontꞌi xí ꞌdømꞌma ra Jesús, nɛ nubʉ häi oqui bʉ nꞌda ra hyądo ngue ran ꞌyägui, mahoqui pɛ njon ní ꞌyo bʉ nꞌda ra du. Nɛ jabʉ nꞌda ra nuąndätꞌo bʉ rá goxthi a ra hyądo gue ran ꞌyägui. 42 Nɛ nuꞌa ra pa manꞌda tąte thoho nangue ran dąbaxjua ɛ ma guepʉ da mbʉdi. Janangueꞌa bi cʉꞌtꞌa nꞌdihi bʉ ja ra hyądo a rá ngøcꞌyɛi ra Jesús, nguetho hinga yatho bʉ.