Bi fɛntꞌa ra Jesús
18
Nuꞌbʉ mí juaꞌa bin yąui rá Ta, dá mbähmbe ra Jesús bʉya dyʉ xädihe, dá ꞌdaxhe nꞌda ra tꞌʉhyɛ̨ gue ra Cedrón, nɛ dá cʉthe bʉ ja nꞌda ra nuąndätꞌo. 2 Nuꞌa ra Judas, gueꞌa di dä a ra Jesús, mí pąpʉ ja ra nuąndätꞌo nguetho ząi mí pähmbe bʉ ra Jesús. 3 Nu yʉ fariseo nɛ yʉ dąmbäją bá pɛhnꞌdʉ ꞌda yʉ dofʉi nɛ miꞌda yʉn ꞌyohʉ gue bán ꞌyohʉ ra Judas. Gätho i hą yʉ sibi nɛ yʉ́ juai. 4 Nu ra Jesús i pądi gätho ꞌbɛꞌa din ja ngue da tꞌørpe. Janangueꞌa bi mba bin cꞌathʉ, nɛ bi ꞌyänꞌdʉ:―Toꞌo guí homhbʉ, bi ꞌyɛ̨mbi.
5 Nɛ bi dą ʉ:
―Dí homhbe ra Jesús ra mɛngu bʉ Nazaret, bi ꞌyɛ̨nꞌʉ.
―Guecä, bi ꞌyɛ̨nꞌa ra Jesús bʉya.
Nɛ i ꞌbähmbʉ bʉ ra Judas gue di dä. 6 “Guecä,” ꞌbʉ mí ꞌyɛ̨nꞌa ra Jesús, ꞌbex bi goh yʉ́ xʉtha ʉ yʉn hyonte nɛ bi ꞌya ʉ bʉya nangue ra mbidi. 7 Nu ra Jesús bi ma mahønꞌa:
―Toꞌo guí homhbʉ.
Nɛ bi dą ʉ:
―Dí homhbe ra Jesús ra mɛngu bʉ Nazaret, bi ꞌyɛ̨nꞌʉ.
8 Nu ra Jesús bi dątꞌʉ bʉya:
―Ya dá xi ahʉ, guecä. Pɛ nuꞌbʉ høngdä guí honjʉ, hinga nɛhya ma xädi gui sixhʉ, bi ꞌyɛ̨na.
9 Nɛ guehna bi man na ra Jesús bin thɛui a bi xih rá Ta ꞌbʉ mín yąui, ngue xí ꞌyɛ̨mbi: “Gätho gá ꞌdaqui xínga nꞌda ga ꞌbɛdi,” xí ꞌyɛ̨mbi. 10 Nu ra Simón Pedro bʉya bi gʉx a rá juai mí hą nɛ bi ꞌyespa rán ꞌyɛizagu a rá ꞌyɛ̨hɛ ra dąmbäją, rá thuhu Malco a. 11 Pɛ nuꞌa ra Jesús bi ꞌyɛ̨mpꞌa ra Pedro:
―Foꞌtsꞌ ni juai a nin tꞌojuai. Nuna ra mbohi xʉn zänga ma Ta ha hin ga sigä na, bi ꞌyɛ̨mbi.
Bi tsꞌix bʉ ꞌbʉh ra hmumbäją a ra Jesús
12 ꞌBex bi bɛntꞌʉ yʉ dofʉi nɛꞌʉ yʉ́ hmu nɛ yʉ policía bi mbɛn ma mijudíohe, nɛ bi duꞌtꞌi. 13 Mꞌbɛtꞌo bi zixpʉ ꞌbʉh ra Anás rá ndøhyą a ra Caifás, nɛ nuꞌa ra Caifás, ra dąmbäją a ra jɛya a. 14 Guehna ra Caifás ngue xí xi ʉ yʉ́ mi ngʉrpihʉ, gue manꞌda xʉn ho ꞌbʉ nꞌdatho da du, xinda gueꞌbʉ gätho ga juahmbʉ.
Nu ra Pedro bi gønꞌa ra Jesús
15 Nu ra Simón Pedro, nɛcä bʉya, dá tɛnꞌbe ra Jesús. Nɛ madím pąꞌbe a ra dąmbäją, janangueꞌa bi zä dá cʉtꞌä bʉ bi mba ma cʉꞌtꞌi a ra Jesús bʉ mbo rá mbäꞌtꞌi a rá ngu ra dąmbäją. 16 Pɛ nu ra Pedro mí ꞌbäpʉ thi bʉ ja ra goxthi. Pɛ dá pøngä bʉya gue dá äp ra mate a ra mbängoxthi, janangueꞌa bi zä bi yʉtꞌambo ra Pedro bʉya. 17 Nuꞌa ra mbängoxthi bʉya, gue nꞌda ra xisu, bi ꞌyɛ̨mpꞌa ra Pedro:
―Nuꞌi ha hinga gueꞌe rá xädiꞌi nʉ ran ꞌyohʉ, bi ꞌyɛ̨mbi.
Nu ra Pedro bi dątꞌa:
―Hinꞌna, hinga guecä, bi ꞌyɛ̨na.
18 Madín tąspihʉ ʉ yʉ́ ꞌyɛ̨hɛ ra dąmbäją nɛ yʉ policía a ra Pedro, nubʉ ja ra sibi xí ꞌyudi, nguetho xʉn sɛ.
Nu ra hmumbäją bi juąnba ra Jesús
19 Nu ra dąmbäją bi ꞌyänna ra Jesús toꞌo gätho i tɛnni, nɛ bi ꞌyänni ꞌbɛꞌa ním hma im ma ꞌbʉ in xänbate. 20 Nu ra Jesús bi dąꞌa:
―Nugä ząi dá mam bʉ ja ma nijąhʉ nɛpʉ ja ra dąniją, guepʉ ząi dim pɛti gätho ma mijudíohʉ. Njąmꞌbʉ dá mangä bʉ njongui ꞌbʉh yʉ jąꞌi. 21 Nɛ ndetho guí ängui ꞌbɛꞌa dá mam ꞌbʉ mán xänbate. Ndeꞌbʉ gui ꞌyänꞌdʉ bi ꞌyøh mam hmangä. Nuꞌʉ i pądi ꞌbɛꞌa dá mangä ʉ, bi ꞌyɛ̨na.
22 Nɛ nuꞌa ra Jesús ꞌbʉ mí dątꞌa ra dąmbäją, nɛ nuꞌa nꞌda ra ngʉrpa dofʉi bi mbɛmpꞌa rá hmi, bi ꞌyɛ̨mbi:
―Hanja ngubʉ gá xih ra dąmbäją, bi ꞌyɛ̨mbi.
23 Nu ra Jesús bi ꞌyɛ̨mpꞌa:
―Nuꞌbʉ ja ꞌbɛꞌa dá mangä gue hingui ho, dami ma. Pɛ nuꞌbʉ nte dá mangä, hanja gní pɛgbi, bi ꞌyɛ̨mbi.
24 Nu ra Anás bʉya bi mbɛnhna ra Jesús bʉ ꞌbʉh ra Caifás, rá mi dąmbäjąui.
Nu ra Pedro bi gøm mahønꞌa ra Jesús
25 Nɛ mí ꞌbäpʉ ra Simón Pedro madín tąspi a. Nɛ änꞌdʉ i ꞌbähmbʉ:
―Ha nɛꞌe rá xädiꞌi nʉ.
ꞌBex bin cøni:
―Hinga guecä, ɛ̨na.
26 Nuꞌa nꞌda rá ꞌyɛ̨hɛ ra dąmbäją bʉya, gue dim mɛniui a ra ꞌyɛ̨hɛ xí ꞌyespa rá zagu ra Pedro ꞌbʉ mí ꞌyɛ̨na da yąnꞌa rá Hmu, bi ꞌyɛ̨mbi:
―Ɛ̨na gueꞌe dá nu a bʉ ja ra nuąndätꞌo, bi tꞌɛ̨mpꞌa ra Pedro.
27 Nɛ bin cøm mahønꞌa ra Pedro. ꞌBex bi mbah ra tamfø.
Nu ra Pilato bi juąnba ra Jesús
28 Tꞌʉxuditho bá tsꞌi bʉ ja rá ngu ra Caifás a ra Jesús, nɛ bi tsꞌix bʉ ja ra ngutsꞌʉtꞌabi. Pɛ nu ma ngʉrpihe dyʉ judíohe dyʉ israelhe, him bi yʉzɛhɛ bʉ mbo nguetho ɛ̨n yʉ́n tꞌɛ̨di din tsꞌon yʉ́ jąꞌi ꞌbʉ da yʉrpʉ ja yʉ́ ngu ʉ hing yʉ judío, nɛ hin da zä da zi ran tsꞌihmɛ nangue ran dąbaxjua ꞌbʉ xtán yʉrpʉ mbo. 29 Janangueꞌa nu ra tsꞌʉtꞌabi Pilato, bi mba bʉ thi gue da zo ʉ yʉ yąpate, nɛ bi ꞌyänꞌdʉ:
―ꞌBɛꞌa gní yąfʉ a ran ꞌyohʉ, bi ꞌyɛ̨na.
30 Nɛ bi dą ʉ ma ngʉrpihe:
―Nuꞌbʉ hin gra tsꞌomꞌbäi, hin xcá dä ahʉ ꞌbʉ, bi ꞌyɛ̨nꞌʉ.
31 Nɛ nu ra Pilato bi ꞌyɛ̨mpꞌʉ:
―Dami sixhʉ ꞌbʉ, nɛ gui juąnbahʉ nangue nin tꞌɛ̨di zɛhɛhʉ, bi ꞌyɛ̨na.
Nɛ nu ma ngʉrpihe bi dątꞌa:
―Pɛ hinꞌyʉ man tꞌɛ̨dizɛhɛhe gueꞌa ga hohe nꞌda, bi ꞌyɛ̨nꞌʉ.
32 Nuꞌa bi manꞌʉ bin thɛui a bi man a ra Jesús ꞌbʉ mí ma ꞌbɛꞌa mán dąte dí du a, gue da mba ma cuati bʉ ja ra pontꞌi. 33 Nu ra Pilato bi mbeng mahønꞌa bʉ ja ran tsꞌɛmbate nɛ bi ꞌyänna ra Jesús:
―Nuꞌi ha gueꞌe grá hmutsꞌʉtꞌabi yʉ judío, bi ꞌyɛ̨mbi.
34 Nu ra Jesús bi dątꞌa:
―Ha guím bɛ̨nsɛ ꞌbɛꞌa guím ma, uague nꞌdanꞌyo bi xi i nanguecä, bi ꞌyɛ̨mbi.
35 Nu ra Pilato bi ꞌyɛ̨m bʉya:
―Hin drá judíogä. ꞌBɛꞌa gá ꞌyøtꞌe thą, ngue bi däꞌa ua ni mijudíohʉ nɛ ni dąmbäjąhʉ.
36 Nu ra Jesús bi dątꞌa:
―Hin dám hmutsꞌʉtꞌabigä ua ja ra ximhäi. Nuꞌbʉ xcám hmutsꞌʉtꞌabigä ua, xtín tunhdʉ ʉ ma jąꞌigä ʉ bi bɛndgui ꞌbʉ, nɛ hin xtí dägä ua ꞌbʉ. Pɛ nu ma tsꞌɛdigä him bi nɛqui ua ja ra ximhäi a, bi ꞌyɛ̨na.
37 Nu ra Pilato bi ꞌyɛ̨mbi mahønꞌa:
―Ha majuąni grá hmutsꞌʉtꞌabi ꞌbʉ, bi ꞌyɛ̨mbi.
Nu ra Jesús bi dątꞌa:
―Majuąni guím ma gue drá hmutsꞌʉtꞌabigä nɛ gueꞌa dám ꞌbʉcä ua ja ra ximhäi, nɛ gueꞌa ná ɛ̨cä ua gue ga uꞌa majuąni. Nuꞌʉ toꞌo in nde da bąꞌa majuąni, da ꞌyømanho a dím mangä ʉ, bi ꞌyɛ̨na.
38 Nu ra Pilato i ɛ̨na:
―ꞌBɛꞌa maha a majuąni, njon da zä da bądi ndaꞌa a majuąni, bi ꞌyɛ̨mthoho.
Bi tsꞌänba rán ʉnbi ra Jesús
Nɛ nuꞌbʉ mí juaꞌa bi man ra Pilato, bi mba bʉ thi din yąhʉ ʉ yʉ́ yąpate mahønꞌa, nɛ bi ꞌyɛ̨mpꞌʉ:
―Nte mán tsꞌo dá tįnbi. 39 Pɛ nuꞌahʉ ząi guí xijʉ ga thøcꞌahʉ nꞌda ra ofädi ꞌbʉ bi dätꞌ ra pa ran dąbaxjua. Ha guín ndehʉ ga thøcꞌahʉ ni hmutsꞌʉtꞌabihʉ, bi ꞌyɛ̨na.
40 Nɛ bi mbʉdi bi mbafi ntsꞌɛdi ʉ, bi ꞌyɛ̨nꞌʉ:
―Hinꞌna, hinga gueꞌa, pɛ nuꞌa ra Barrabás, gueꞌa gui thøgahe a, bi ꞌyɛ̨nꞌʉ ma ngʉrpihe.
Nu ra Barrabás, nꞌda ra hyote a.