Bin yąui rá Ta ra Jesús
17
Nuꞌbʉ mí jua a man ra Jesús, bi ndøtsꞌe, nɛ bin yąui rá Ta:―Ma Ta a i, ya bi zøm ma oragä din ja a gá sängui. Dami jap ya ɛ̨mmɛ da bømanho ꞌbɛꞌa ga øtꞌä ya, ni tsꞌʉntꞌʉgui, nɛ gueꞌa dí fądi nuįxte xʉn ho i bʉya. 2 Nguetho ya xcá ꞌdac ra tsꞌɛdi ga unni ꞌbɛꞌa xcá sänba ʉ gätho i ꞌbʉcua ja ra ximhäi, janangueꞌa ga un ra ꞌdaꞌyote maząi ʉ gätho gá ꞌdaqui. 3 Nɛ nuꞌa toꞌo i ja ra ꞌdaꞌyote maząi, majuąni dím pąhmbʉ ʉ, gue gueꞌe hønꞌa thoho i majuąni grá Oją, nɛ nugä drá Jesucristogä gue guá pɛngä dan yąntegä ua.
4 Ya ní mba bʉ ga juacä ra ꞌbɛfi gá ꞌdaqui, guepʉ da bąh yʉ jąꞌi ua ja ra ximhäi ɛ̨mmɛ xʉn hotho i. 5 Ma Ta i, nuꞌbʉ ya dá juacä, dami jaqui ga conhui ni nuįxte bʉ guí ꞌbʉi, tengu tho mín jaui ꞌbʉ má hinꞌyʉ ra ximhäi. 6 Nuya dá xih yʉ jąꞌi nangue e, gue nuꞌʉ gá huanhua ja ra ximhäi. Ni mbɛti ʉ, nɛ gá ꞌdaqui, nɛ bi mbɛꞌtsꞌa nim hma dá xänba ʉ. 7 Nɛ i pą ʉ ya gue gueꞌe gá ꞌdac ra tsꞌɛdi dá øtꞌ ra ꞌbɛfi dá øtꞌe, nɛ ʉ yʉm hma dá mangä. 8 Nguetho bi hyąnꞌa ram hma gá xiqui dá xifi. Janangueꞌa i pądi majuąni bá nɛxä bʉ guí ꞌbʉi, nɛ bi ꞌyɛ̨cꞌyɛi gue gueꞌe guá pɛngä dan yąntegä ua.
9 Nugä dí äpꞌa ya gui fäxꞌi tsꞌʉ ʉ, nɛ hin dí ä a nim fätsꞌi nangue ʉ i tɛn ra ximhäi. Pɛ høntꞌʉ gue gá ꞌdaqui nguetho ni mbɛti ʉ. 10 Nɛ nuꞌʉ gätho ma mbɛti ni mbɛti ʉ, nɛ nuꞌʉ gätho ni mbɛti ma mbɛti ʉ. Nɛ gueꞌʉ i udi nuixte xʉn hogä ʉ.
11 Nuya him man dam ꞌbʉcua ja ra ximhäi. Ga mbagä bʉ guí ꞌbʉi. Pɛ nuꞌʉ go di thoqui dim ꞌbʉcua ʉ. Janangueꞌa, ma Hogata i, dami jamansu ʉ gätho gá ꞌdaqui nangue ni tsꞌɛdi zɛhɛ, gue da gohi tenguꞌbʉ nꞌdanjąꞌitho tengu gaui. 12 Gätho yʉ pa dám ꞌbʉhmbe ʉ gá ꞌdaqui, dá jamansu ʉ nangue ni tsꞌɛdi gá ꞌdaqui. Nɛ xinga nꞌda bim ꞌbɛdi, høntꞌa nꞌda ntsꞌänni dim ꞌbɛdi, tengu mán tꞌoꞌtꞌi bʉ ja ni søcuą mayaꞌbʉ ngue ngubʉ din ja.
13 Nɛ nuya mi tsꞌʉtho ga mba bʉ guí ꞌbʉi, pɛ nuna dím mangä ya ngue dí ꞌbʉcua ja ra ximhäi, janangueꞌa da yuh yʉ́ mbʉi ʉ i øh ya nangue man johyagä. 14 Nugä dá unꞌna nim hma nɛ bi hyąm bʉya. Janangueꞌa di ʉcpa ra ximhäi ʉ, nguetho hing yʉ́ mɛngu ua ja ra ximhäi ʉ, tengugä hind rá mɛngugä ua ja ra ximhäi. 15 Hin dí äꞌa i gue gui ꞌuecꞌʉ nanguecua ja ra ximhäi ʉ,pɛ dí äꞌa i gui jamansup yʉ́ mbʉi hin da dąp ra zįthu ʉ. 16 Nuꞌʉ hing yʉ mɛngu ua ja ra ximhäi ʉ, tengu thohogä. 17 Dami xänbi xʉn ho a nim hma majuąni, janangueꞌa da ꞌuegue xʉn ho nangue yʉn tsꞌo i ja ua ja ra ximhäi. 18 Tengu tho bʉ guí ꞌdac ra ꞌbɛfi dá jap yʉ jąꞌi ua ja ra ximhäi da bą i, nguthogä dí un ra ꞌbɛfi ʉ, di jap yʉ jąꞌi ua ja ra ximhäi da bąꞌa i. 19 Dan unsɛ janangueꞌa nɛꞌʉ tenguꞌbʉ da du nangue yʉ́ nyombʉi, nɛ da zä da dɛnꞌna ram hma majuąni.
20 Nɛ nuꞌbʉ bi mam mam hmammi ʉ i ɛ̨cꞌyɛigä ya, nɛ nuꞌbʉ bi ꞌyɛ̨cꞌyɛigä ʉ da sifi, nɛꞌʉ dí äpꞌa nim fätsꞌi nangue gätho ʉ bʉya. 21 Janangueꞌa gätho da gohi tenguꞌbʉ nꞌdanjąꞌitho, tengu thohogaui ma Ta i, nꞌdatho dí conhui. Dami japi nꞌdatꞌa da bɛ̨n ʉ, nguetho nꞌdatꞌa man ꞌyomfɛ̨niui dá unui gätho ʉ. Janangueꞌa da ꞌyɛ̨cꞌyɛi ʉ i tɛn ra ximhäi, gue gueꞌe guá pɛngä dan yąntegä ua ja ra ximhäi. 22 Nu ra tsꞌɛdi gá ꞌdaqui dá undä ʉ, gue da zä da gohi tenguꞌbʉ nꞌdanjąꞌitho, tengu gaui. 23 Nugä dí ꞌbʉhmbe ʉ, nɛꞌe dí ꞌbʉhmi, janangueꞌa majuąni da zä gätho ꞌdatꞌa gam bɛ̨mhbʉ. Nɛ da nu ʉ i tɛn ra ximhäi, da bądi gue gueꞌe guá pɛngä dan yąntegä ua ja ra ximhäi, nɛ da bą ʉ i tɛn ra ximhäi gue ɛ̨mmɛ guidí huɛ̨cꞌʉ tengu bʉ gní huɛ̨gagui.
24 Ma Ta i, dín nde ꞌdarpʉ dan ząmhbʉ ʉ gá ꞌdaqui, gue da nu maząi a ran ho tąte thoho gá ꞌdaqui. Nguetho ząi guidí huɛ̨gä nɛ gueꞌbʉ go má hinꞌyʉ ra ximhäi. 25 Ma Hogata a i, nu ra ximhäi hingui pąꞌa i. Pɛ nugä dí pąꞌa i, nɛꞌʉ ꞌda gá ꞌdaqui i pądi gue gueꞌe guá pɛngä. 26 Nugä dá japi bi bąꞌa i, nɛ manꞌda manꞌda ga japi da bądi gätho nin ho, gue da zä din ja xʉn ho nin huɛ̨cate bʉ mbo yʉ́ mbʉi ʉ, tengu tho bʉ nan jagä nin huɛ̨cate. Nɛ dan ząm bʉ ja yʉ́ mbʉi ʉ, bi ꞌyɛ̨mpꞌa rá Ta.