16
Nɛ manꞌda bi man ra Jesús bi ꞌyɛ̨na:―Guehya dí xi ahʉ nꞌdahma hin gui hyɛgahʉ ꞌbʉ gá nuhʉ yʉn ʉnbi. 2 Nguetho da hyøn ahʉ thi bʉ ja yʉ́ niją ma mijudíohʉ, nɛ da zøn ra pa da hyo ahʉ nɛ da bɛ̨ni gueꞌa ní ꞌyørpa rá ꞌbɛfi Oją a. 3 Nɛ din ja bʉ da ꞌyøtꞌahʉ, nguetho him bi bącä, xínga gueꞌa ma Ta. 4 Pɛ nuna dí xi ahʉ, janangueꞌa nuꞌbʉ bin ja, guim bɛ̨mhbʉ bʉya gue gueꞌa xtá xi ahʉ. Nɛ nuna dí xi ahʉ ya, hin dá xi ahʉ mámꞌbɛtꞌo, nguetho hin ní zøn ra ora ga mba.
Nu rá ꞌbɛfi rá Hogandąhi Oją
5 ―Nuya ga mbagä bʉ bí ꞌbʉ a bá pɛngä. Nɛ xínga nꞌda ahʉ guí ängahʉ ya hapʉ ga mbagä. 6 Nguetho i tu ni mbʉihʉ ngue dá xi ahʉ ga mbagä. 7 Pɛ guehma majuąni dí xi ahʉ, manꞌda xʉn ho nangue ahʉ ngue ga mbagä. Nguetho nuꞌbʉ hin ga mbagä, hin da zä ba ɛ̨h nim fätsꞌihʉ ꞌbʉ. Pɛ nuꞌbʉ dá mbagä, ba pɛnꞌnahʉ nim fätsꞌihʉ gue rá Hogandąhi Oją. 8 Nɛ nuꞌbʉ bi zøcua ja ra ximhäi rá Hogandąhi Oją, di jap yʉ jąꞌi ua ja ra ximhäi da bądi i ja yʉ́ tsꞌoqui, nɛ di japi da bądi drá ꞌyugä nangue ran ho, nɛ di japi da bądi din ja rá muui ran tsꞌo. 9 Nu rá Hogandąhi Oją di bɛ̨nba yʉ jąꞌi gue i jatho yʉ́ tsꞌoqui nguetho him bi xiqui gan yąnba yʉ́ te. 10 Nɛ di bɛ̨nba yʉ jąꞌi gue drá ꞌyugä nangue ran ho. Da fądi nguetho ga thąmbɛ̨ni nɛ da zingä ma Ta bʉ bí ꞌbʉi, nɛ hin da hnugä ua ja ra ximhäi. 11 Nɛ nu rá Hogandąhi Oją di bɛ̨nba yʉ jąꞌi ngue din ja ran ʉnbi rá muui ran tsꞌo, nguetho da tsꞌänba rá muui a rá ꞌbɛfi ra zįthu gue nuꞌa rá ngʉrpi ra ximhäi.
12 Guextaꞌa i jagä xʉn ngu dín nde ga xi ahʉ, pɛ hin gui hyäthʉ gui ꞌyøhmbʉ miꞌda ꞌbʉ ga xi ahʉ. 13 Pɛ nuꞌbʉ bi zøcua rá Hogandąhi Oją, da xänꞌnahʉ gätho a majuąni. Nɛ nte da mansɛ nanguesɛ, pɛ høntꞌa ꞌbɛꞌa da xi Oją, gueꞌa da xi ahʉ a. Nɛ da xänꞌnahʉ ꞌbɛpʉ gdí ꞌyøthʉ rá ꞌbɛfi Oją, nɛ da xi ahʉ ꞌbɛꞌa gätho manꞌda din ja. 14 Nɛ di japi da fądi i ja ma tsꞌɛdi xʉn ho, nguetho ga un mam hma da xänꞌnahʉ nanguecä. 15 Nuꞌa nam bøni nꞌdatꞌa ra tsꞌɛdi i jacꞌbe ma Ta, janangueꞌa dá xi ahʉ, ga un mam hma da xänꞌnahʉ nanguecä.
Ni dumbʉihʉ dim pommi ran johya
16 ―Nɛ hin guin nujʉ manꞌda pa o gue manyopa, pɛ sä guin nujʉ mahønꞌa miꞌda yʉ pa, nɛ mꞌbɛjua ga mba bʉ bí ꞌbʉh ma Ta, bi ꞌyɛ̨na.
17 ꞌBex bin ꞌyänꞌdʉ ꞌda ma mixädihe:
―ꞌBɛꞌa ní mba bi ma, nɛ ɛ̨na: “Hin guin nujʉ manꞌda pa o gue manyopa, pɛ sä guin nujʉ mahønꞌa ꞌda yʉ pa, nɛ mꞌbɛjua ga mba bʉ bí ꞌbʉh ma Ta,” bi ꞌyɛ̨njʉ. 18 ꞌBɛꞌa ní mba gue bi xijʉ na, ꞌbɛꞌa da ꞌyøtꞌe ꞌda yʉ pa. Hingui sä ga pąhmbʉ ꞌbɛꞌa man na, bin ꞌyɛ̨mzɛhɛ ma mixädihe.
19 Nu ra Jesús mi pądi ꞌbɛꞌa nde da ꞌyänni, gue ꞌbɛꞌa nam bønꞌa xí man a, nɛ bi ꞌyɛ̨nje:
―Ha gadín ꞌyänzɛhɛhʉ ꞌbɛꞌa nám bønꞌa dám mangä ꞌbʉ má xi ahʉ: “Hin guin nujʉ manꞌdapa o manyopa, pɛ sä guin nujʉ mahønꞌa miꞌda yʉ pa,” gue dá ɛ̨ngä. 20 Majuąni dí xi ahʉ, da du ni mbʉihʉ nɛ gan zomhbʉ, pɛ nuꞌʉ yʉ jąꞌi i tɛn ra ximhäi din johya ʉ. Pɛ mꞌbɛjua bʉya nu ni dumbʉihʉ dim pommi ran johya. 21 Tengu nꞌda ra xisu ꞌbʉ bi zøn ra ora dim ꞌbʉh rá tꞌʉhni, i tu rá mbʉi nguetho in nu ran ʉnbi, pɛ mꞌbɛjua din johya ꞌbʉ bim ꞌbʉh rá tꞌʉhni bʉya, nɛ him mam bɛ̨n a ran ʉnbi mín nu. 22 Nɛ ngutho ahʉ i tu ni mbʉihʉ ya. Pɛ gan nu ahʉ mahønꞌa nɛ da hyu ni mbʉihʉ, nɛ njon da zä da hyącꞌa nin johyahʉ bʉya.
23 Nɛ nuꞌbʉ bi zøn ra ora a dím mangä ya, nte gui ꞌyängahʉ. Pɛ majuąni dí xi ahʉ, høntꞌa go ꞌbɛꞌa gui ꞌyäfʉ ma Ta ꞌbʉ ꞌdatꞌa dím bɛ̨mhbʉ, nɛ din ja bʉya. 24 Nte ganá äfʉ ma Ta nangue ma thuhugä, pɛ nuya dami ꞌyäfʉ ya nɛ din ja ahʉ, janangueꞌa da yuh ni mbʉihʉ ran johya.
Nu ra Jesucristo bi ꞌbɛrpa rá tsꞌɛdi ra ximhäi
25 ―Nuya yʉm hma dá xi ahʉ, yʉn tꞌuti ʉ, bi ꞌyɛ̨nꞌa ra Jesús. Pɛ da zøn ra ora hin ga xi ahʉ miꞌda yʉn tꞌuti, pɛ njuąntho ga xi ahʉ xʉn ho nangue Oją. 26 Nɛ nuꞌbʉ bi zønꞌa ra pa dím mangä, da zä gui ꞌyäpzɛhɛhʉ ma Ta nangue ya guí pąjʉ, nɛ him man ga thocpä a guí äfʉ ma Ta. 27 Nguetho guesɛ ma Ta di huɛ̨cꞌahʉ nangue guín numanhojʉ, nɛ gá ꞌyɛ̨cꞌyɛihʉ gue guepʉ bí ꞌbʉh ma Ta bá nɛxä. 28 Nugä bá nɛxä bʉ ꞌbʉh ma Ta, nɛ dá søcua ja ra häi. Nɛ ga pøngä mahønꞌa ua ja ra häi, ga mba bʉ bí ꞌbʉh ma Ta, bi ꞌyɛ̨nje.
29 ―Nuya mfądi ꞌbɛꞌa guí xije ya, nguetho hin guí xije nꞌda ran tꞌuti ya, dá ɛ̨mfe bʉya. 30 Nuya dí pąhmbe nte guídí ꞌbɛdi gui pądi, nguetho mꞌbɛtꞌo thoho guí pądi ꞌbɛꞌa dím bɛ̨mhbe ꞌbʉ ya ja a dín nde ga änꞌnahe. Nɛ gueꞌa ná pąhmbe gue guepʉ bí ꞌbʉ Oją gbí ꞌyɛ̨que, dá ɛ̨mfe.
31 Nu ra Jesús bi ꞌyɛ̨nje mahønꞌa:
―Ha majuąni guí ɛ̨cꞌyɛigahʉ. 32 Pɛ nuya bi zøn ra ora gan ꞌuɛ̨xthʉ, gui ꞌdahmbʉ, nꞌda an ꞌdanni gui mbähä. Nɛ gätho ahʉ gui sogahʉ. Pɛ hin dan ꞌdasɛ nguetho dí ꞌbʉꞌbe ma Ta. 33 Nuya yʉm hma dá xi ahʉ, nꞌdahma guextaꞌa gan johyahʉ nanguecä, madagueꞌbʉ guin nuhʉ ran ʉnbi nangue ra ximhäi. Pɛ o di tu ni mbʉihʉ, pɛ guim bɛ̨mhbʉ dá tąpä ra ximhäi.