Rá za ra uva majuąni nɛꞌʉ yʉ́ ꞌyɛ
15
Nu ra Jesús bi ꞌyɛ̨na:―Nugä drá za majuąni, ngue i zʉh yʉ́n dätꞌo. Nɛ nuꞌa ma Ta di jamansu a. 2 Nɛ nuꞌʉ yʉ́ ꞌyɛ hingui ja yʉ́n dätꞌo, nuꞌa ma Ta da hyɛqui, nɛ da mbøgue. Pɛ nuꞌʉ yʉ ꞌyɛ i ja yʉ́n dätꞌo, di hoqui gue din ja miꞌda yʉ́n dätꞌo. 3 Nuꞌahʉ ya mahoqui ahʉ nangue mam hmangä dá xi ahʉ. 4 Dami thojʉ ngue thocpa thoho dam ꞌbʉhmbʉ. Nguetho hingui sä gui ꞌyøthʉ rá ꞌbɛfi Oją ꞌbʉ hin gui thoqui gui hyąmhbʉ ma tegä, tengu nꞌda rá ꞌyɛ ra za hingui sä din jasɛ yʉ́n dätꞌo ꞌbʉ hin da nɛxpʉ rá te a rá za.
5 Nugä tenguꞌbʉ drá za, nu ahʉ tenguꞌbʉ yʉ́ ꞌyɛ ahʉ ra za i zʉh yʉ́n dätꞌo. Nuꞌa toꞌo da guatꞌi nanguecä, da hyąnga ma tsꞌɛdi nɛ din zʉdi xʉn ngu yʉ́n dätꞌo. Pɛ nuꞌa hin da guatꞌi nanguecä nte din ja. 6 Nu a toꞌo da hyɛgä din ja tengu nꞌda ra ꞌyɛza ꞌbʉ bi däsɛ, da ꞌyotꞌi, da mba ma bʉntꞌi nɛ i pa ma pɛti da tꞌupʉ ja ra sibi.
7 Nuꞌbʉ gui thoqui gui cuathʉ nanguecä nɛꞌbʉ din ząm bʉ ja ni mbʉihʉ mam hmangä, dami ꞌyähmbʉ ꞌbɛꞌa guín nde gui ꞌyähmbʉ nɛ din ja bʉya. 8 Nɛ nuꞌbʉ din ja xʉn ngu nin dätꞌohʉ, gueꞌa dí ꞌyu a rá nuįxte ma Tahʉ a, nɛ gueꞌa dí fądi majuąni ma ꞌyɛ̨cꞌyɛi ahʉ a. 9 Tengu thoho bʉ ni huɛ̨gä ma Ta, ngubʉ na huɛ̨cꞌahʉ. Dami thoqui guin ndehʉ man huɛ̨cate. 10 Nuꞌbʉ gui pɛspʉ ni mbʉihʉ gätho dí xi ahʉ nɛ gui ꞌyøthʉ a, da zä thocpa thoho gui pąhmbʉ man huɛ̨cate ꞌbʉ. Tengu bʉ na pɛꞌtsꞌä rám hma ma Ta, janangueꞌa thocpa thoho dí pąh rán huɛ̨cate.
11 Gätho ya dí xi ahʉ nꞌdahma ga comhbʉ a man johyagä, nɛ da yupʉ ni mbʉihʉ nɛ da bontsꞌ thoho bʉya. 12 Nuꞌa man tꞌɛ̨di dí xi ahʉ, gan huɛ̨jʉ nꞌda ngu nꞌda ahʉ, tengu bʉ na huɛ̨cꞌahʉ. 13 Nuꞌa ran huɛ̨cate manꞌda xʉn ho, gue di un rá te nꞌda nangue ʉ yʉ́ amigo da yąni. 14 Nu ahʉ ma amigo ahʉ ꞌbʉ guí øthʉ ꞌbɛꞌa gätho dí xi ahʉ. 15 Him ma xi ahʉ ma ꞌyɛ̨hɛ ahʉ, nguetho nu a ra ꞌyɛ̨hɛ hingui pądi ꞌbɛꞌa i øtꞌ rá hmu. Pɛ nuya dí xi ahʉ ma amigo ahʉ, nguetho ya dá xi ahʉ gätho bi xicä ma Ta. 16 Nuꞌahʉ hin gá huangahʉ, pɛ go dá huanꞌnahʉ nɛ dá sänꞌnahʉ din zʉh nin dätꞌohʉ, nangue gui ꞌyøthʉ ma ꞌbɛfigä nɛ da hyätꞌ maząi. Janangueꞌa høntꞌa go ꞌbɛꞌa gui ꞌyähmbʉ ma Ta nangue nꞌdatꞌa dím bɛ̨mhbʉ, din ja bʉya. 17 Nuna man tꞌɛ̨digä dí xi ahʉ, gan huɛ̨jʉ nꞌda ngu nꞌda ahʉ.
Nu ra ximhäi di ʉcpa ra Jesús nɛꞌʉ i tɛnni
18 Nɛ xø bi ꞌyɛ̨nꞌa ra Jesús:
―Nuꞌbʉ di ʉcꞌahʉ ʉ di ho ra ximhäi, dami pąhmbʉ mꞌbɛtꞌo thoho bi ʉgä. 19 Nuꞌbʉ da ꞌda angu guí øthʉ ʉ di ho ra ximhäi, nuꞌʉ da numanho ahʉ ʉ ꞌbʉ. Pɛ hin guí øthʉ tengu øtꞌʉ nguetho dá huanꞌnahʉ. Janangueꞌa di ʉcꞌahʉ ya. 20 Pɛ guim bɛ̨mhbʉ a ram hma dá xi ahʉ: “Pɛ manꞌda rán säui da hnumanho nꞌda ra Hmu xinda gueꞌʉ yʉ́ mbɛfi.” Nɛ nugä hingui hnumanhogui, janangueꞌa ha ma gueꞌadahʉ, da hnumanho ahʉ. Nɛ him bi tꞌømanho a dá ma, janangueꞌa ngutho hin da tꞌømanho a guim mamhbʉ. 21 Nɛ din ja bʉ da tꞌøtꞌahʉ nangue guí tɛngahʉ. Nguetho nuꞌʉ di ho ra ximhäi hingui pą a bá pɛngä.
22 Nuꞌbʉ hin xcá søcä ua gue xcá zofo, hin xtám bądi gue ja yʉ́ tsꞌoqui ꞌbʉ. Pɛ nuya hingui sä da gøn yʉ́ tsꞌoqui ʉ ya. 23 Nuꞌa to i pøh rá cuɛ nanguecä, nɛ a ma Ta i numanꞌʉ. 24 Nuꞌbʉ hin xcá øtꞌ yʉn tꞌøtꞌe njoꞌo sä da ꞌyøtꞌe, hin xtám bądi gue ja yʉ́ tsꞌoqui ꞌbʉ. Pɛ nuya ya bi nu man tꞌøtꞌe nuįxte. Pɛ bi cuɛcthohogä ʉ. Pɛ nuꞌʉ bi ʉgä gueꞌa ma Ta bi ʉpꞌʉ. 25 Pɛ gueꞌa mán tꞌoꞌtꞌi bʉ ja rán tꞌɛ̨di Oją mayaꞌbʉ, bi ꞌyɛ̨na: “Din ja ra cuɛ nanguecä, pɛ hinꞌyʉ ꞌbɛꞌa dín cuɛ ʉ,” mí ɛ̨n ra tꞌohni ząi din xä ʉ.