Ra Jesús ra ꞌyu ní zøm bʉ bí ꞌbʉh rá Ta
14
―Pɛ o di tu ni mbʉihʉ. Guí ɛ̨cꞌyɛihʉ Oją janangueꞌa nɛcä dami ꞌyɛ̨cꞌyɛigahʉ. 2 Nubʉ rá ngu ma Ta bí ja bʉ xʉn ngu yʉ ngu mahotho. Nuꞌbʉ hin te di ja bʉ, xcá xi ahʉ ꞌbʉ. Pɛgue i ja bʉ, janangueꞌa nuꞌbʉ dá mbagä gua hocꞌahʉ hapʉ dam ꞌbʉhmbʉ. 3 Nɛ nuꞌbʉ dá mbagä ba hocꞌahʉ bʉ dam ꞌbʉhmbʉ, nɛ ba pengä mahønꞌa ga six ahʉ bʉ ngue ꞌdarpʉ dam ꞌbʉhmbʉ bʉya. 4 Nubʉ ga mbagä guí pąhmbʉ nɛ guí pąhmbʉ ra ꞌyu, bi ꞌyɛ̨nje.5 Pɛ nuꞌa ra Tomás bi ꞌyɛ̨mpꞌa:
―Ma Hmu i, hin dí pąhmbe hapʉ gui mba, xín dí pąhmbe a ra ꞌyu, bi ꞌ yɛ̨na.
6 Nu ra Jesús bi ꞌyɛ̨mpꞌa:
―Nugä drá ꞌyugä nɛ guecä ní fą a majuąni nɛ dadí ungä ra ꞌdaꞌyote maząi. Njon da zä da zøm bʉ ꞌbʉh ma Ta hinda høntꞌbʉ da ꞌyɛ̨cꞌyɛigui. 7 Nuꞌbʉ majuąni xquí pąjʉ nɛꞌa ma Ta xquí pąhmbʉ ꞌbʉ. Pɛ ja gá pąhmbʉ ya nguetho ya guín nuhʉ a ya, bi ꞌyɛ̨nje.
8 Pɛ nu ra Felipe bi ꞌyɛ̨mpꞌa:
―Ma Hmu i, pɛ hin dín nuhe a ni Ta, dami jaje gan nuhe nɛ nte ga ꞌbɛhmbe, bi ꞌyɛ̨na.
9 Nu ra Jesús bi dątꞌa:
―Ha guextaꞌa hin guí pąqui nɛ nyaꞌa tho xtám ꞌbʉhmbʉ. Nuꞌa toꞌo xʉn nugui, ya xʉn nu ma Ta. Hanja gní ꞌyɛ̨ngui: “ꞌYurcahe ni Ta.” 10 Ha hin guí ɛ̨cꞌyɛi gue nꞌdatho dí comꞌbe ma Ta. Nuꞌʉ yʉm hma dí xi ahʉ him mam hmansɛgä ʉ, pɛ yʉ́m hman a ma Ta i ꞌbʉcua ja ma mbʉigä, nɛ gueꞌa di jacä ga øtꞌä a dí øtꞌä. 11 Dami ꞌyɛ̨cꞌyɛigahʉ gue nꞌdatho dí comꞌbe ma Ta. Pɛ nuꞌbʉ xʉn hɛ̨i gui pąhmbʉ, dami pąhmbʉ gue høntꞌa Oją sä i øtꞌʉ yʉ nuįxte dí øtꞌä. Janangueꞌa da zä gui ꞌyɛ̨cꞌyɛihʉ gue nꞌdatꞌa dí comꞌbe ma Ta. 12 Majuąni dí xi ahʉ, nuꞌbʉ gui ꞌyɛ̨cꞌyɛigahʉ, nu ra ꞌbɛfi dí øtꞌä, nɛ ahʉ da zä gui ꞌyøthʉ ꞌbʉ. Nɛ manꞌda nuįxte yʉ ꞌbɛfi da zä gui ꞌyøthʉ nguetho ga mba bʉ bí ꞌbʉh ma Ta. 13 Nguetho høntꞌa go ꞌbɛꞌa gui ꞌyähmbʉ ꞌbʉ ꞌda angu dím bɛ̨mhbʉ, ga øtꞌä, janangueꞌa da tꞌɛ̨spa ma Ta nangue a ga øtꞌä, rá Tsꞌʉntꞌʉgä a. 14 Høntꞌa go ꞌbɛꞌa gui ꞌyäqui ꞌbʉ nꞌdatꞌa dím bɛ̨mhbʉ, ga øtꞌä.
Ra Jesús bi ma ba pɛnpa rá Hogandąhi Oją
15 Nɛ manꞌda bi man ra Jesús, bi ꞌyɛ̨na:
―Nuꞌbʉ majuąni høngdä guín numanhojʉ, dami pɛsꞌhʉ ꞌbɛꞌa gätho dí xi ahʉ. 16 Nɛ ga äp ma Ta ba pɛnꞌnahʉ manꞌda nim fätsꞌihʉ da mbäx ahʉ tengu dá øtꞌahʉ, nɛ gam ꞌbʉhmbʉ maząi a bʉya. 17 Gueꞌa rá Hogandąhi Oją a, nɛ di ja ahʉ gui pąhmbʉ a majuąni. Pɛ nuꞌʉ di ho ra ximhäi hin da zä da zini, nguetho hinꞌyʉ ꞌbɛꞌa dí bą a, xíngui pądi ꞌbɛꞌa rá ꞌbɛfi a. Pɛ nu ahʉ guí pąhmbʉ a nguetho dí ꞌbʉhmbʉ a, nɛ da zøn ra pa din ząm bʉ mbo ni mbʉihʉ. 18 Hin gan jahʉ tengu yʉ hyoya tꞌʉhni ꞌbʉ dá mbagä, nguetho ba pengä dam ꞌbʉcä bʉ mbo ni mbʉihʉ. 19 Mi tsꞌʉtho ya him man da nucꞌʉ di ho ra ximhäi. Pɛ nu ahʉ da zä guin nujʉ nangue ni mbʉihʉ, nɛ ząi gam ꞌbʉhmbʉ nguetho ząi dí ꞌbʉcä. 20 Nɛ nu a ra pa da zøh rá Hogandąhi Oją, da zä gui pąhmbʉ gue dam ꞌbʉpʉ mbo ni mbʉihʉ, nɛ gam ꞌbʉhmbʉ bʉ ja ma mbʉigä bʉya. Nɛ da zä gui pąhmbʉ dí ꞌbʉi nangue ma Ta. 21 Høntꞌa go toꞌo i øtꞌ man tꞌɛ̨digä nɛ pɛꞌtsꞌa mam hmangä, gueꞌa majuąni høngdä i numanhogä a. Nɛ nuꞌa ma Ta nɛcä ga huɛ̨cꞌbe a, nɛ ga japi da bądi xʉn ho ma tsꞌɛdi, bi ꞌyɛ̨nje.
22 Nuꞌa ra Judas, pɛ hinga gueꞌa ra Judas Iscariote, bi ꞌyänꞌna bʉya:
―Haguen ja høngdähe gui jaje ga pąhmbe xʉn ho ni tsꞌɛdi, nɛ hinꞌna ʉ di ho ra ximhäi, bi ꞌyɛ̨na.
23 Nu ra Jesús bi dątꞌa:
―Nuꞌbʉ i ꞌbʉ a nꞌda ahʉ majuąni høngdä i numanhogui, da mbɛsca mam hmangä a ꞌbʉ. Nɛ di huɛ̨cꞌa ma Ta bʉya, nɛ ba ɛ̨ꞌbe, nɛ dan ząmꞌbe bʉ mbo rá mbʉi a. 24 Pɛ nuꞌa toꞌo hingui numanhogui, hingui pɛꞌtsꞌ mam hmangä a. Nɛ nuꞌa mam hmangä, him mam hmansɛgä pɛ rám hma ma Ta gueꞌa bá pɛngä ua, bi ꞌyɛ̨na.
25 Nɛ xø bi ꞌyɛ̨na:
―Nuya yʉm hma dá xi ahʉ gätho yʉ pa dám ꞌbʉhmbʉ ua ja ra ximhäi. 26 Pɛ nuꞌa nim fätsꞌihʉ rá Hogandąhi Oją gue ba pɛnhꞌnahʉ ma Ta, tenguꞌbʉ da guecsɛgä a, nuꞌa di bɛ̨nꞌnahʉ yʉm hma xtá xi ahʉ, nɛ da xänꞌnahʉ ꞌbɛꞌa gätho miꞌda.
27 Dadín ꞌyɛ̨hmbʉ ya, dami hyąmhbʉ ran tꞌunni ngue ran johya dadí ꞌda ahʉ ya, nɛ thocpa thoho din ja ahʉ. Hinguin ja tengu rán johya ra ximhäi. O di tu ni mbʉihʉ nɛ hin din su ni mbʉihʉ. 28 Nɛ nuꞌbʉ majuąni guín numanhojʉ, din johya ni mbʉihʉ nanguehna dí xi ahʉ: “Ga mba bʉ bí ꞌbʉh ma Ta.” Nɛ manꞌda ja rá tsꞌɛdi xinda guecä. 29 Nugä xtá xi ahʉ ꞌbɛꞌa gätho din ja guepʉ da zä manꞌda gui ꞌyɛ̨cꞌyɛigahʉ ꞌbʉ ya bin ja.
30 Nuya him ma nyaꞌa dan yąhʉ ya, nguetho ba ɛ̨pʉ rá ngʉrpi ra ximhäi. Pɛ njąmꞌbʉ bi dącpä a, janangue hinꞌyʉ rá tsꞌɛdi da dącpä a ya. 31 Pɛ jatho ga øtꞌä a ma ꞌbɛfi ga øtꞌä ya, nꞌdahma da bą ʉ ꞌbʉcua ja ra ximhäi høntꞌa ma Ta dín numanhogä, nɛ ząi dí øtꞌa i xiqui. Janangueꞌa ga ndanshʉ ya ga mbähä, bi ꞌyɛ̨nje ra Jesús.