Ra Jesús bi xʉguaba yʉ́ xädi
13
Nuꞌbʉ mi tsꞌʉtho da mbʉh ra dąmpɛti nangue ran dąbaxjua, nɛ mí pąh ra Jesús ya mi tsꞌʉtho da zøn ra ora da bøngua ja ra ximhäi, da mbeng bʉ bí ꞌbʉh rá Ta. Nɛ gätho yʉ pa mi ꞌbʉcua, midí huɛ̨cꞌʉ to gätho bi ꞌyɛ̨cꞌyɛi a, nɛ nuya manꞌda di huɛ̨cꞌʉ di huɛ̨qui.2 Nɛ nuꞌbʉ mán sihmɛhe ra Jesús ꞌbʉ bin de, nuꞌa ra zįthu bʉya bi bɛ̨nba ra Judas rá tsꞌʉntꞌʉ ra Simón Iscariote gue di dä a ra Jesús. 3 Nu ra Jesús i pądi bí nɛxpʉ ꞌbʉh rá Ta nɛ da mbeng bʉ mahønꞌa, nɛ i pądi gue rá Ta bi unni gätho ꞌbɛꞌa i ja gue di manda zɛhɛ. 4 Pɛ guehma bin ꞌyɛ̨hɛ nanguecähe. Nguetho bi ndantsꞌ ꞌbʉ mín sihmɛ nɛ bi mbøꞌa nꞌda rá pahni, in nde nte di hɛ̨ni. Nɛ bi dutꞌ rá foho nꞌda ran thuꞌyɛ. 5 Nɛ nuꞌbʉ mí xitꞌ ra dehe ra ximbo, bi dʉꞌmi bi mberca ma guahe nɛ bi dugahe nangueꞌa ran thuꞌyɛ mim bongui bʉ rá foho.
6 Nɛ nuꞌbʉ mí zøm bʉ huh ra Simón Pedro, nu ra Pedro bi ꞌyɛ̨mpꞌa bʉya:
―Ma Hmu i, ha gui perca ma gua, bi ꞌyɛ̨na.
7 Nu ra Jesús bi dąti nɛ bi ꞌyɛ̨mbi:
―Majuąni hingui sä gui pąh ya ꞌbɛꞌa nam bønꞌa dí øtꞌä, pɛ mꞌbɛjua da zä gui pądi, bi ꞌyɛ̨mbi.
8 Nu ra Pedro xø bi ꞌyɛ̨mpꞌa:
―Njąmꞌbʉ dan uni gui perca ma gua.
Pɛ nu ra Jesús bi dątꞌa:
―Nuꞌbʉ hin ga peꞌtꞌä ni gua, nte man jaui ꞌbʉ, bi ꞌyɛ̨na.
9 Nu ra Simón Pedro bʉya bi ꞌyɛ̨mpꞌa:
―Ma Hmu i, hinga høntꞌa ma gua ꞌbʉ, nɛꞌa ma ꞌyɛ nɛꞌa ma yą, bi ꞌyɛ̨mbi.
10 Nu ra Jesús bi ꞌyɛ̨mpꞌa:
―Pɛ ya ma zä bi bo ahʉ nangue ni tsꞌoquihʉ, nguetho nuꞌa toꞌo bin hi ya bi bo rá jąꞌi. Pɛ høntꞌʉ ni guahʉ ząi da ꞌbeꞌtꞌe ngue pärpʉ yʉ fonthäi hapʉ guí ꞌyohʉ. Pɛ nu nꞌda ahʉ him bin hi, bi ꞌyɛ̨na.
11 Ngubʉ bi ma nguetho bi bądi i hupʉ a di dä a. Janangueꞌa bi ma hinga gätho dán hihe.
12 Nuꞌbʉ mí jua a bi xʉguagahe, bi hye mahønꞌa rá pahni nɛ bin säya. Bi ꞌyɛ̨nje bʉya:
―Ha guí pąhmbʉ ꞌbɛꞌa nam bønꞌa dá øtꞌahʉ ya. 13 Nu ahʉ guí ɛ̨njʉ drá xänbategä nɛ guí ɛ̨njʉ drá Hmugä. Xʉn ho guím mamhbʉ nguetho gueꞌa dí øtꞌä a. 14 Dá peꞌtꞌä ni guahʉ, guecä ni xänbatejʉ nɛ ni Hmujʉ. Janangueꞌa nɛ ahʉ gam perpa ni guahʉ nꞌda ngu nꞌda ahʉ, ngue gui ꞌyøthʉ gui cohmbʉ häi nɛ ꞌda gdám fäxtahʉ. 15 Nuya dá utꞌahʉ ꞌbɛꞌa gui ꞌyøthʉ nguetho dín nde ahʉ gui ꞌyøthʉ tengu dá øtꞌahʉ. 16 Majuąni dí xi ahʉ, manꞌda nuįxte nꞌda ra Hmu xinda gueꞌʉ yʉ́ mbɛfi, manꞌda nuįxte a i pɛhnate xinda gueꞌa ram ꞌbɛhni. 17 Nuꞌbʉ guí pąhmbʉ a dím mangä ya nɛ thocpa thoho gui ꞌyøthʉ a, gan johyahʉ nangue Oją ꞌbʉ.
18 Pɛ hín dím mangä gätho ahʉ da zä gan johyahʉ nangue Oją, nguetho dí pątꞌa ni mbʉihʉ nꞌda ngu nꞌda ahʉ gue dá huanꞌnahʉ. Pɛ guehma dá huahni gätho ahʉ, nꞌdahma din ja ꞌbɛꞌa bi man rá tꞌohni Oją ngue bi ꞌyɛ̨na: “Nuꞌa nꞌda dí sihmɛꞌbe, gueꞌa di dägä a.” 19 Mꞌbɛtꞌo dí xi ahʉ ꞌbɛꞌa da tꞌørcä, janangueꞌa da zä gui thoqui gui ꞌyɛ̨cꞌyɛigahʉ gue drá Cristogä ꞌbʉ ya bin ja. 20 Majuąni dí xi ahʉ, nuꞌa toꞌo da ꞌyømanho a im man a nꞌda mam ꞌbɛhnigä, i simanhogä a nɛ i simanho a bá pɛngä, bi ꞌyɛ̨nje.
Ra Jesús i pądi di dä a ra Judas
21 Nuꞌbʉ mí jua a bi man ra Jesús, bi du rá mbʉi, nɛ bi xije mahønꞌa:
―Majuąni dí xi ahʉ, i ꞌbʉ a nꞌda ahʉ di dägä, bi ꞌyɛ̨nje.
22 Nugähe bʉya dyʉ xädigähe, dán hyɛ̨the nꞌda ngu nꞌdaje nɛ dán ꞌyänhde: “Toꞌogahʉ di dä ꞌbʉ,” dán ꞌyɛ̨mfe. 23 Nɛ nugä ꞌdarpʉ mi huꞌbe ra Jesús nguetho ɛ̨mmɛ midí huɛ̨gä. 24 Nu ra Simón Pedro bʉya bi uąnga rá ꞌyɛ, ndeque ga änni ndaꞌa di dä a. 25 Nugä bʉya gue ꞌdarpʉ mí huꞌbe ra Jesús, dá änni:
―Ma Hmu i, toꞌo a guím ma, dá ɛ̨mbi.
26 Bi ꞌyɛ̨ngä a ra Jesús bʉya:
―Nuꞌa ga cärpa a ra hmɛ ra tʉhʉ gue ga unni, gueꞌa di dägä a, bi ꞌyɛ̨ngä a bʉya.
Nɛ ꞌbex bi unꞌna ra hmɛ a ra Judas Iscariote rá tsꞌʉntꞌʉ ra Simón. 27 Nɛ nuꞌbʉ mí zi ra hmɛ, ꞌbex bi yʉtꞌ ra zįthu rá mbʉi. Nɛ nu ra Jesús bi ꞌyɛ̨mbi:
―Nuꞌa guí nde gui ꞌyøtꞌe dami ꞌyøtꞌa nꞌdihi ya, bi ꞌyɛ̨na.
28 Nɛ xínga nꞌdagähe mi huhmbe bʉ ja ra mɛxa gue dá pąhmbe ꞌbɛꞌa nám bøn a bi xifi. 29 Pɛ ꞌdagähe dím bɛ̨mhbe gue gueꞌa bi xih ra Judas da mba da däi ꞌbɛꞌa ga homhbe ꞌbʉ bin ja ra dąntsꞌihmɛ. Nɛ nu miꞌda gähe dím bɛ̨mhbe gue bi xih ra Judas da mba di unni tsꞌʉ ra mbɛti yʉ hyoya, nguetho mí hą ra buxa i o ma mbɛtihe. 30 Nɛ nuꞌbʉ ya xí zi ra hmɛ, ꞌbex bi mba nꞌdihi. Ya bin xui bʉya.
Ra ꞌdaꞌyontꞌɛ̨di
31 Nuꞌbʉ ya xí mba ra Judas, nu ra Jesús bi ꞌyɛ̨ngähe:
―Nuya di nɛqui dan uįxtegä guecä dán jąꞌigä ua ja ra ximhäi. Nɛ nuꞌa ga øtꞌä ya, gueꞌa manꞌda dí nɛqui gue xʉn hotho Oją. 32 Ga udi nuįxte xʉn hotho Oją, nɛ nu Oją da ꞌyudi gue nuįxte xʉn hogä guecä ngue dán jąꞌi ua ja ra ximhäi. Nɛ mi tsꞌʉtho ya din ja a dím mangä. 33 Ma zʉ tꞌʉhni ahʉ, manꞌda zʉ ora dam ꞌbʉhmbʉ ya. Nɛ mꞌbɛjua guim bɛ̨njʉ. Nɛ ga xi ahʉ ya tengu dá xi ʉ ma ngʉrpihʉ, hingui sä ꞌdarbʉ ga mbähä hapʉ ga mbagä. 34 Nuya ga xi ahʉ nꞌda ran tꞌɛ̨di maꞌdaꞌyo, gue ꞌda xtín huɛ̨ctahʉ nꞌda ngu nꞌda ahʉ. Tengu thoho bʉ dá huɛ̨cꞌahʉ, ngubʉ gan ꞌyørpahʉ nꞌda ngu nꞌda ahʉ. 35 Nangue ꞌda gdín huɛ̨ctahʉ nꞌda ngu nꞌda ahʉ, gätho yʉ jąꞌi da bądi guí tɛngahʉ, bi ꞌyɛ̨nje.
Ra Jesús i pądi din cønꞌa ra Pedro
36 Nu ra Simón Pedro bi ꞌyɛ̨mpꞌa:
―Ma Hmu i, hapʉ gui mba.
Nu ra Jesús bi dątꞌa:
―Hingui sä ꞌbex gui tɛngä ya hapʉ ga mba. Pɛ mꞌbɛjua da zä gui mba bʉ ga mbagä.
37 Janangueꞌa nu ra Pedro bi ꞌyɛ̨mpꞌa:
―Hanja hingui sä ꞌdarpʉ ga mbɛ ya, madagueꞌa nɛcä da thogä nangueꞌa ga tɛnꞌni i, bi ꞌyɛ̨na.
38 Nu ra Jesús bi dątꞌa:
―Ha majuąni gui tɛngui madagueꞌbʉ da tho i, nguetho ná hyundį xquí cøng ꞌbʉ bi mbah ra tamfø, bi ꞌyɛ̨mbi.