Pa nsispi ra ꞌyɛ̨thi rá gua ra Jesús
12
Di ꞌbɛh man ꞌdato pa din ja ra dąntsꞌihmɛ bʉ Jerusalén nangue ran dąbaxjua, nɛ bi mba mahønꞌa bʉ Betania a ra Jesús, nguepʉ rá ngu a ra Lázaro, gueꞌa xí jap ra Jesús bi dąmbɛ̨ni bʉ ja rán ꞌyägui ngue xí du. 2 Nuꞌbʉ mín de, nu ra Marta bi ꞌyørpa nꞌda ran tsꞌihmɛ ra Jesús. Nɛꞌa ra Lázaro ꞌdarpʉ bin sihmɛhʉ bʉ ja ra mɛxa. 3 Nɛ bi mba ra María bʉ mí huh ra Jesús, bi xispa rá gua made litro ra ꞌyɛ̨thi ɛ̨mmɛ yʉmanꞌu nɛ xʉm hmadi, nɛ í ꞌyonba ra ꞌyɛ̨thi nangue rá xtą. Nɛ gätho ra ngu bi yʉnꞌa ra ꞌyɛ̨thi. 4 Nɛ mí ꞌbʉpʉ rá tsꞌʉntꞌʉ ra Simón, ra Judas Iscariote a, nꞌda ma mixädihe a, nɛ gueꞌa bi dä a ra Jesús. Nɛ nuꞌbʉ mín nu a bi ꞌyøtꞌa ra María, bi ꞌyɛ̨na:5 ―Hanja him bi ꞌbä a ra ꞌyɛ̨thi, yʉ mahuąhi thoho xtín ja rá muui gue xtín tꞌun yʉ hyoya, sä bi ꞌyɛ̨n a ra Judas.
6 Ngubʉ bi man a nguetho ra bɛ̨ a, nɛ him majuąni di huɛ̨c yʉ hyoya. Pɛ rá ꞌbɛfi a gue ní mbɛsca ma mbɛtihe dyʉ xädihe nɛꞌa rá mbɛti ra Jesús. Nɛ nząi hąc zɛhɛ ra mbɛti ꞌbʉ in nde. 7 ꞌBex bi ꞌyɛ̨nꞌa ra Jesús:
―O guidí hɛcpa na ra xisu, nguetho bi ꞌyørca a rán säui da ꞌyørque, nguetho mi tsꞌʉtho ga tu ngue da tꞌägagui. Janangueꞌa mí pɛstaꞌa ra ꞌyɛ̨thi na, xtí jacä ma jąꞌi ꞌbʉ dá tu. 8 Pɛ thocpa thoho gam ꞌbʉhmbʉ yʉ hyoya, pɛ nugä hinga thocpa thoho dam ꞌbʉhmbʉ ua, bi ꞌyɛ̨nꞌa ra Jesús.
I hma da tho ra Lázaro
9 Nuꞌbʉ mi ꞌyøde xʉn ngu ma mijudíohe, gue ꞌbʉpʉ ja rán ngu ra María a ra Jesús, bi mba bá nu, pɛ hinga høntꞌa ra Jesús in nde da nu, pɛ nɛꞌa ra Lázaro gue xí xox ra Jesús bʉ ja ran ꞌyägui. 10 Janangueꞌa nu yʉ dąmbäją bi bɛ̨ni nɛꞌa ra Lázaro da hyo. 11 Nguetho gueꞌa ra Lázaro í japi manꞌda xʉn ngu bi ꞌyɛ̨cꞌyɛi a ra Jesús ʉ ma mijudíohe.
Bi tꞌɛ̨spa ra Jesús ꞌbʉ mí yʉtꞌa Jerusalén
12 Nuꞌbʉ mi hyax bʉya dá mbähmbe ra Jesús bʉ Jerusalén. Nɛ nuꞌʉ yʉ jąꞌi xʉn ngu xí zøm bʉ Jerusalén gue in nu ra dąmpɛti, bi ꞌyøde da mba bʉ ra Jesús. 13 Janangueꞌa bi gąx yʉ́ xi yʉ jąxiza nɛ bi mba bá thąpʉ ꞌyu. Nɛ ntsꞌɛdi bi ꞌyɛ̨nꞌʉ:
―Nuįxte tho rá tsꞌɛdi Oją di jąp na ma Hmutsꞌʉtꞌabihʉ dyʉ israelhʉ, dyʉ judíohʉ, bi zøcua ya nangue rá thuhu Oją, bi ꞌyɛ̨n ʉ.
14 Nuꞌa ra Jesús i huxꞌa nꞌda ra tꞌʉburu xí dįni, tengu mán tꞌoꞌtꞌi bʉ ja rám hman Oją. 15 Gue mán tꞌoꞌtꞌi:
Him man gan suhʉ ya gyʉ mɛnguhʉ ua Sión,
nguetho ba ɛ̨h ni hmutsꞌʉtꞌabihʉ,
da hyuxꞌa nꞌda ra tꞌʉburu, mí ɛ̨n rá tꞌohni mayaꞌbʉ.
16 Pɛ nuje dyʉ xädihe him ꞌbexque dá pąhmbe ꞌbɛꞌa nám bøn na bin ja, pɛ nuꞌbʉ mí mbeng mahɛ̨tsꞌi ra Jesús dá bɛ̨mhbe bʉya gue guehna bi tꞌørpa ra Jesús gätho mán tꞌoꞌtꞌi mayaꞌbʉ.
17 Nuꞌʉ yʉ jąꞌi mí ꞌbʉhmbʉ ra Jesús ꞌbʉ mi xoxꞌa ra Lázaro, xí ma gue xí xoxꞌa ra Lázaro. 18 Janangue xʉn ngu yʉ jąꞌi bi mba bá thą a ra Jesús, nguetho bi ꞌyø a xin ja. 19 Janangueꞌa nu yʉ fariseo bin ꞌyɛ̨mzɛhɛ ʉ:
―Nte tsꞌʉ ní mbatho ꞌbʉ dadí hɛcpahʉ yʉ jąꞌi. Ha hin guín nuhʉ ya gätho ra ximhäi i tɛnnʉ ra Jesús, bin ꞌyɛ̨mpꞌʉ.
I hon ra Jesús ʉ yʉ mɛngu bʉ Grecia
20 Nɛ nuꞌʉ ꞌda bi mba bʉ Jerusalén da nu ram pɛti bʉ, yʉ mɛngu bʉ ja ra häi Grecia ʉ. 21 Nɛ bin tįmhbʉ ra Felipe ʉ ꞌbʉ mám ꞌbʉhmbe bʉ Jerusalén. Nɛ nu ra Felipe, ma mixädihe a, ra mɛngu bʉ Betsaida ra xɛqui Galilea. Nɛ nu yʉ mɛngu bʉ Grecia bi ꞌyɛ̨nꞌʉ:
―Hague nꞌyø, dín nde dan yąhe tsꞌʉ ra Jesús, bi ꞌyɛ̨nꞌʉ.
22 Nuꞌa ra Felipe bʉya bi xi a ra Andrés, nɛ nuꞌʉ bʉya bi xi a ra Jesús. 23 Nɛ nu ra Jesús bi dątꞌʉ:
―Ya mi tsꞌʉtho da zøn ra pa dan uįxtegä ꞌbʉ dá tu, guecä dán jąꞌigä ua ja ra ximhäi. 24 Majuąni dí xi ahʉ, tengu nꞌda ra hmudä, nuꞌbʉ hin da thupʉ ja ra häi ngue dim ꞌbɛpʉ, hin din xąndi. Pɛ nuꞌbʉ da thuhu, da zä din xąndi xʉn ho. 25 Nuꞌa toꞌo i su din ʉnba ꞌbʉ da dɛngui, da mba ma ʉnbi rá te a, pɛ nuꞌa hingui su din ʉnba ꞌbʉ da dɛngui guecua ja ra ximhäi, din ja ra te maząi a. 26 Nguetho nuꞌbʉ ꞌbʉ a nꞌda in nde din ꞌyɛ̨hɛ nanguecä, jatho da bɛ̨ni tengu dím bɛ̨ngä, nɛ ga comꞌbe ma tsꞌɛdi bʉ mahɛ̨tsꞌi bʉya. Nuꞌbʉ ꞌbʉ a nꞌda din ꞌyɛ̨hɛ nanguecä, nuꞌa ma Ta da numanho a.
Ra Jesús im ma da tho
27 ―Pɛ nuya ɛ̨mmɛ tu ma mbʉi, bi ꞌyɛ̨nꞌa ra Jesús. ꞌBɛꞌa sä ga xih ma Ta. Ha sä ga äpi di ꞌuegä ꞌbɛꞌa din jacä ya. Pɛ hingui sä, nguetho gueꞌa bá ɛ̨cä ngue gan nuꞌa i jatho gan nugä ya, bi ꞌyɛ̨nꞌa ra Jesús.
28 Nɛ nubʉya bin yąui rá Ta:
―Ma Ta a i, dami jaqui gan nugä høntꞌa go ndaꞌa dí tꞌɛ̨sꞌi i, bi ꞌyɛ̨mbi.
ꞌBexque bi tꞌøꞌa nꞌda ra nde bʉ mahɛ̨tsꞌi, bi ꞌyɛ̨na:
―Pɛ ya dí jaꞌi guín nu, nɛ guin nu mahønꞌa, bi ꞌyɛ̨na.
29 Nɛ nuꞌʉ yʉ jąꞌi mí ꞌbähmbʉ bʉ, bi ꞌyøh rá nde Oją nɛ bi ꞌyɛ̨nꞌʉ ꞌda:
―Bin gäni.
Nɛ nuꞌʉ miꞌda:
―Masque nꞌda rám ꞌbɛhni Oją mahɛ̨tsꞌi bi zofo, bi ꞌyɛ̨n ʉ.
30 Pɛ nuꞌa ra Jesús bi ꞌyɛ̨mpꞌʉ:
―Nuꞌa ra nde gá ꞌyøhmbʉ, ntsꞌɛdi bi zocä Oją, hin nangue ga pącä bi ꞌyøh ma nde, pɛ guepʉ gui pąhmbʉ ya i øh ma ndegä a. 31 Nuya mi tsꞌʉtho ga øtꞌä a dí fądi ndaꞌʉ da mba ma ʉnbi, nɛ ndaꞌʉ hin da mba ma ʉnbi. Nɛ mi tsꞌʉtho ga tąp ra zįthu, gue in tsꞌʉtꞌabi ua ja ra ximhäi a, nɛ da tsꞌänba ya da tꞌɛrbʉ ja ran ʉnbi. 32 Nuꞌbʉ dá cuatꞌä bʉ ja ra pontꞌi, gueꞌa dá zohnꞌdʉ gätho yʉ́ mbʉi yʉ jąꞌi ga xifi di däc yʉ́ mbʉi gan yąnꞌʉ, bi ꞌyɛ̨nꞌa ra Jesús.
33 Nɛ guehna mi man na, ngue mi ndepe xtám bąh yʉ jąꞌi ꞌbɛꞌa nín dąte dí tho a. 34 Nɛ nu yʉ jąꞌi bʉya bi dątꞌa:
―Nugähe ya dá øhmbe im mam bʉ ja rán tꞌɛ̨di Oją, i ꞌbʉi mazą̈i a ra Cristo. Nɛ guí ɛ̨nsɛ jatho gui tu bʉ ja ra pontꞌi, gán jąꞌi ua ja ra ximhäi. Toꞌo e ngue guí ɛ̨nsɛ gán jąꞌi ua ja ra ximhäi. Masque hinga gueꞌe gra Cristo ꞌbʉ.
35 Nu ra Jesús ꞌbex bi ꞌyɛ̨mpꞌʉ:
―Him min ngu yʉ pa ga xänꞌnahʉ ya, ngue drán nɛquigä. Ndeꞌbʉ gan ꞌyohʉ bʉ ja ran nɛqui ya, nɛ hin da zʉ ahʉ ra ꞌbɛxui. Nguetho nuꞌa toꞌo i ꞌyo bʉ ja ra ꞌbɛxui hingui pądi hapʉ i ꞌyo. 36 Dami hyąmhbʉ ran nɛqui ya, janya i ja ya, nɛ din ja ran nɛqui ni mbʉihʉ bʉya, bi ꞌyɛ̨mpꞌʉ.
Nɛ nuꞌbʉ mí jua a bi man ra Jesús bi mba, bin ꞌyąnsɛ.
Hinguin nde da ꞌyɛ̨cꞌyɛi ʉ ma mijudíohe
37 Pɛ guextaꞌa him bi ꞌyɛ̨cꞌyɛi xʉn ngu ma mijudíohe, madagueꞌa xʉn ngu yʉn tꞌøtꞌe nuįxte bi nu bi ꞌyøtꞌ ra Jesús. 38 Pɛgue bin ja tengu thoho bi man ra pøngahyą Isaías ꞌbʉ mí ma ꞌbɛꞌa din ja, bi ꞌyɛ̨na:
Ma Hmu i, toꞌo maha bi ꞌyɛ̨cꞌyɛi a dá mamhbe
nɛ toꞌo bi bą ꞌbʉ gmí ꞌyuh ni tsꞌɛdi, bi ꞌyɛ̨na.
39 Him bi zä bi ꞌyɛ̨cꞌyɛi ʉ ꞌda nguetho nuꞌbʉ him mín nde ʉ, bi mba njapi tengu bi man ra Isaías ꞌbʉ mí ma mahønꞌa:
40 Nuꞌa Oją bi gomba yʉ́ dä ʉ nɛ bi mɛp yʉ́ mbʉi ʉ,
gue din ja tenguꞌbʉ din xädä,
nɛ hin din ja yʉ́n ꞌyomfɛ̨ni yʉ́ mbʉi,
nɛ hin da zä di päh yʉ́ mbʉi gue xtí punba Oją ʉ, bi ꞌyɛ̨n a ra Isaías.
41 Guehna bi man ra Isaías ꞌbʉ mí ꞌyut Oją din ja rá tsꞌɛdi nuįxte ra Cristo, nɛ bi mam bʉya ꞌbɛꞌa da ꞌyøtꞌa ra Cristo.
42 Pɛ xʉn ngu ma ngʉrpihe mim bɛ̨nsɛ ngue ɛ̨cꞌyɛi ra Jesús. Pɛ him bi ma gue ɛ̨cꞌyɛi ʉ, nguetho i su xtá hyøn a thi yʉ fariseo bʉ ja yʉ́ niją, gue má zä da zanꞌʉ. 43 Nguetho manꞌda bi bɛ̨ni ꞌbɛꞌa da man yʉ́ mijąꞌihʉ, gue da ꞌyɛ̨mbi xʉn ho ʉ, xinda gueꞌbʉ go xtá ꞌyɛ̨mp Oją xʉn ho ʉ.
Dí mba ma juąnbi nꞌda ʉ yʉ́m hman ra Jesús
44 Pɛ nu ra Jesús ntsꞌɛdi bi ma:
―Nuꞌa toꞌo i ɛ̨cꞌyɛigui, i ɛ̨cꞌyɛi a bá pɛngui. 45 Nguetho nuꞌʉ toꞌo i pąqui, i pą a bá pɛngä. 46 Nuꞌa bá ɛ̨cä gue ga yorba yʉ́ mbʉi ʉ ꞌbʉcua ja ra ximhäi. Nuꞌa toꞌo da dɛngui hin din ꞌyo bʉ ja ra ꞌbɛxui a. 47 Nuꞌa toꞌo da ꞌyøh mam hmangä nɛ hingui ɛ̨cꞌyɛi, pɛ hinga guecä ga juąnbä a, nguetho hin ná ɛ̨cä ga øtꞌ ran juąnbate, pɛ ná ɛ̨cä ua gan yąn ʉ ꞌbʉcua ja ra ximhäi. 48 Nuꞌa toꞌo hin da ꞌyɛ̨cꞌyɛigui nɛ hin da ꞌyø a dím mangä ya, nuꞌa mam hma dá mangä ya, gueꞌa dí juąnba ʉ ꞌbʉ rán zɛgui ra pa. 49 Nguetho him mam hmansɛ a dá ma, pɛ nuꞌa ra Ta gue bá pɛngä bi xiqui ꞌbɛꞌa dá mangä nɛ ꞌbɛpʉ ná xänba yʉ jąꞌi. 50 Nɛ dí pącä da dįn ra te maząi ʉ toꞌo da hyąn rám hma ma Ta. Nɛ gueꞌa i xicä a nɛ dí mangä a bʉya, bi ꞌyɛ̨nꞌa ra Jesús.