Bi du ra Lázaro
11
Mí ꞌbʉpʉ Betania nꞌda ran ꞌyohʉ in zämanꞌʉ, í Lázaro. Nɛ mí ꞌbʉhmbʉ yoho yʉ́n ju, ra María nɛ ra Marta. 2 Nɛ nuna ra María, guehna bi xispa ra ꞌyɛ̨thi rá gua ra Jesús ɛ̨mmɛ yʉmanꞌu nɛ bi ꞌyonbi nangue yʉ́ xtą. Guehna rán ju ra Lázaro na, gue xʉn ʉ. 3 Janangueꞌa nuꞌʉ yʉ́n ju bi mbɛhna nꞌda ra nde bʉ ꞌbʉh ra Jesús nɛ bi ꞌyɛ̨mpꞌa:―Ma Hmu aꞌbe, xiya ꞌbɛꞌa ga øthʉ ya, xʉn ʉ a guidí huɛ̨qui, bi ꞌyɛ̨mbi.
4 Nɛ nuꞌbʉ mí ꞌyøh ra Jesús, bi ꞌyɛ̨na:
―Nuꞌa ran ʉ hing ran dąte a pɛ høntꞌa gue da hnu rá tsꞌɛdi Oją nuįxte thoho, nɛcä rá Tsꞌʉntꞌʉ Ojągä, bi ꞌyɛ̨na.
5 Nu ra Jesús ɛ̨mmɛ madi huɛ̨cꞌa ra Marta nɛ rá juhuɛ nɛꞌa ra Lázaro. 6 Pɛ nuꞌbʉ mí ꞌyøde xʉn ʉ ra Lázaro, him ꞌbex bi nde da mba, ꞌbɛ bi dømꞌ man yopa guepʉ mí ꞌbʉhmbe. 7 Mꞌbɛjua bʉya bi xije dyʉ xädigähe a:
―Ga mbähä bʉ Judea mahønꞌa, bi ꞌyɛ̨nje.
8 Pɛ dá ɛ̨mfe bʉya:
―Xänbate i, ha gui mba bʉ mahønꞌa, nguetho nu ma mijudíohʉ ꞌbʉpʉ him mayaꞌbʉ gue nde di batꞌa do i, dá ɛ̨mfe.
9 Nu ra Jesús bi xije nꞌda ran tꞌuti bʉya:
―Ha hinga gueꞌa ꞌdɛꞌmayo ora nꞌda pa. Nuꞌbʉ ma pa i ꞌyo nꞌda ra jąꞌi, hin di fet rá gua nguetho in nu hapʉ i pa. 10 Pɛ nuꞌbʉ ꞌyoxui nꞌda, di fet rá gua nguetho hinguin nu hapʉ i pa. Nuꞌa bi ma gue hingana søn ra ora da du.
11 Nɛ mꞌbɛjua bi ꞌyɛ̨nje mahønꞌa:
―Nuꞌa ma amigohʉ ra Lázaro i ąha. Nɛ ga mbähä ga entsꞌä a, bi ꞌyɛ̨na.
12 ꞌBex dá ɛ̨mbähe a bʉya:
―Ma Hmu ahe, nuꞌbʉ i ąha da yąm ꞌbʉ, dá ɛ̨mfe.
13 Pɛ nu ra Jesús bi ma gue bi du ꞌbʉ mí ma i ąha. Pɛ dá bɛ̨mhbe gue i ątho. 14 ꞌBexque njuąntho bi man ra Jesús:
―Ya bi du ra Lázaro. 15 Pɛ nangue ahʉ, xʉn ho gue hin dá nugä ꞌbʉ mín hyɛ̨nꞌna, gue manꞌda gui ꞌyɛ̨cꞌyɛigahʉ ꞌbʉ guin nuhʉ ꞌbɛꞌa ga øtꞌä ya. Nuya ga mbähä ba nuhʉ.
16 Pɛ nuꞌa ra Tomás nɛ i tꞌɛ̨mbi ra Go, ma mixädihe, bi ꞌyɛ̨nje:
―Mbähmahʉ ꞌbʉ, madagueꞌa ꞌdarpʉ ga tuhʉ.
Nu ra Jesús di un ra te ʉ xʉn du
17 Nuꞌbʉ má sømhbe bʉ ra Jesús bʉya, ya ná goho pa xí tꞌä a ra Lázaro. 18 Nu bʉ Betania hinga ya bʉ Jerusalén, mbɛ made ora na ꞌyo. 19 Janangueꞌa xʉn ngu ma mijudíohe bi mba bʉ rá ngu ra Marta nɛ ra María gue da hyurpa yʉ́ mbʉi ʉ, nangueꞌa rá įda bi du. 20 Nuꞌbʉ mí ꞌyøh ra Marta gue ba ɛ̨pʉ ra Jesús, bi mba nɛ bin cꞌatꞌui bʉ ꞌyu. Pɛ nu ra María bi gotpʉ ja rá ngu. 21 Nɛ nuꞌa ra Marta bi ꞌyɛ̨mpꞌa ra Jesús:
―Ma Hmu i, nuꞌbʉ xquím ꞌbʉque ua, hin xtán du ma įda. 22 Pɛ madagueꞌbʉ ya bi du ya, pɛ dí pącä di ꞌdaꞌa Oją høntꞌa go ꞌbɛꞌa gui ꞌyäpi, bi ꞌyɛ̨na.
23 Nu a ra Jesús bi dątꞌa:
―Nuꞌa ni įda da ndantsꞌ mahønꞌa, bi ꞌyɛ̨na.
24 Nu ra Marta bi ꞌyɛ̨na:
―Dí pącä da ndantsꞌa rán zɛgui ra pa a, nɛ ʉ gätho xʉn du, bi ꞌyɛ̨na.
25 Nɛ nu ra Jesús bi ꞌyɛ̨mpꞌa:
―Nugä guecä dadí un ra te ʉ xʉn du. Nuꞌa toꞌo da ꞌyɛ̨cꞌyɛigui, madagueꞌa da du, pɛ ga japi da ndantsꞌi nɛ din ja ra ꞌdaꞌyote maząi. 26 Nɛ nuꞌa toꞌo ꞌbʉi nanguecä nɛ ɛ̨cꞌyɛigui, njąmꞌbʉ da du a. Ha guí ɛ̨cꞌyɛi a dí xi i, bi ꞌyɛ̨mbi.
27 Nɛ bi ꞌyɛ̨mpꞌa:
―Hąha ma Hmu i, dí ɛ̨cꞌyɛi gue gueꞌe grá Cristo, rá Tsꞌʉntꞌʉ i Oją, gueꞌe mí hma gua ɛ̨cua ja ra ximhäi, bi ꞌyɛ̨na.
Bin zonꞌa ra Jesús
28 Nɛ nuꞌbʉ mí guaꞌa bin yąui ra Marta a ra Jesús, bi mbeng bʉ rá ngu nɛ bin yąjodreui a rá juhuɛ ra María, nɛ bi xi a:
―Bí ꞌbäpʉ ra xänbate nɛ in zonꞌna i, bi ꞌyɛ̨na.
29 Nɛ nuꞌbʉ mí ꞌyø a ꞌbɛꞌa bi sifi, bi ndantsꞌa nɛ bi mba nꞌdihi guepʉ ꞌbäh ra Jesús. 30 Nu ra Jesús him ꞌbex bi zøm bʉ ja ra hnini, pɛ bim ꞌbätho bʉ ndehnini guepʉ xín yąui ra Marta. 31 Nu ma mijudíohe mí hupʉ mbo rá ngu ra María gue i hurpa rá mbʉi, nuꞌbʉ mí nu bi ndantsꞌa ra María nɛ bi mba nꞌdihi, bi dɛnꞌdʉ ma mijudíohe bʉya, nɛ bi ꞌyɛ̨n ʉ: “Masque ní mba ban zom bʉ ja ran ꞌyägui na.”
32 Nuꞌbʉ mí zøm bʉ ra María bʉ bí ꞌbäh ra Jesús, bin dąnyahmu bʉ ja rá gua, nɛ bi ꞌyɛ̨mpꞌa:
―Nuꞌbʉ xquím ꞌbʉque ua, hin xtán du ma įda ꞌbʉ, bi ꞌyɛ̨na.
33 Nuꞌbʉ mín nu ra Jesús gue i zonꞌa ra María, nɛ ʉ ma mijudíohe zoni gueꞌʉ bi dɛnni, bin gąsꞌ pʉya nɛ bi hyundumbʉi. 34 Nɛ nu ra Jesús bi ꞌyänni:
―Hapʉ bi tꞌä a ra Lázaro.
Nɛ bi tꞌɛ̨m bʉya:
―Ma Hmu ahe, ga mbähä gua nu, bi tꞌɛ̨mbi.
―Nuna guehna bi xocua yʉ́ dä ra xädä. Ha hin xtán zä xtí japi hin xtán du ra Lázaro ꞌbʉ.
Nu ra Jesús bi xoxꞌa ra Lázaro bʉ ja rán ꞌyägui
38 Nuꞌbʉ mí zøm bʉ ja ran ꞌyägui ra Jesús, bin gąꞌtsꞌ mahønꞌa. Nu ran ꞌyägui nꞌda ra hyądo a nɛ bi juaspa nꞌda ra xįndo. 39 Nɛ nu ra Jesús bi ꞌyɛ̨mpꞌʉ:
―Dami ꞌuejʉ tsꞌʉ na ra xįndo.
Pɛ nu ra Marta, rán ju a xí du, bi ꞌyɛ̨mbi:
―Ma Hmu i, masque xʉn xą ya nguetho má goho ma pa ya bi du, bi ꞌyɛ̨na.
40 Nu ra Jesús bi ꞌyɛ̨mpꞌa:
―Pɛ dí xi i mahønꞌa, nuꞌbʉ gui ꞌyɛ̨cꞌyɛi gue i ja ma tsꞌɛdi, guin nu rá tsꞌɛdi Oją nuįxte, bi ꞌyɛ̨mbi.
41 ꞌBex bi mba ma ꞌueque ra do bʉya. Nɛ nu ra Jesús bi ndøtsꞌe nɛ bi ꞌyɛ̨na:
―Ma Ta i, dadí ꞌda a ra jamadi, nguetho gá ꞌyøh ma nde ꞌbʉ má äpꞌiꞌi nanguehna ra Lázaro. 42 Nɛ dí pądi thocpa thoho guí øh ma nde. Pɛ nuꞌa dí xi a ya, ngue dí ndepe da ꞌyøh ya i ꞌbäcua ya, nꞌdahma da ꞌyɛ̨cꞌyɛi gue gueꞌe bá pɛngä ua.
43 Nɛ nuꞌbʉ mí juaꞌa bin yąui Oją bin yą ntsꞌɛdi:
―Lázaro, bá pøni.
44 Nɛ nuꞌa xí du bá pøm bʉ ja rán ꞌyägui bʉya, nsøtꞌe thoho ra ꞌbøꞌtꞌe rá ꞌyɛ nɛ rá gua, nɛ nu rá yą nꞌdanꞌyo ra ꞌbøꞌtꞌe mán søtꞌe. Nu ra Jesús bi ꞌyɛ̨mpꞌʉ:
―Xothʉ, da zä din ꞌyo bʉya, bi ꞌyɛ̨nꞌa ra Jesús.
I hma da fɛntꞌa ra Jesús
45 Nɛ xʉn ngu ma mijudíohe ngue xí dɛnꞌna ra María, bi ꞌyɛ̨cꞌyɛi ra Jesús ꞌbʉ mí nu a bi ꞌyøtꞌe. 46 Pɛ nu miꞌda bi mba bá xih yʉ fariseo ꞌbɛꞌa bi ꞌyøtꞌ ra Jesús. 47 Janangueꞌa bi man yʉ dąmbäją nɛ yʉ fariseo ngue ꞌdarpʉ dim pɛtihʉ ʉ yʉ́ mi ngʉrpihʉ, nɛ bin ꞌyɛ̨m zɛhɛ ʉ:
―ꞌBɛꞌa sä ga øthʉ, nguetho nuꞌa ran ꞌyohʉ i øtꞌe xʉn ngu yʉn tꞌøtꞌe nuįxte. 48 Nuꞌbʉ hin ga hɛcpahʉ, gätho yʉ jąꞌi da ꞌyɛ̨mbi yʉ́ ngʉrpi. Nɛ nubʉya nu yʉ romano da zʉjʉ ngue da bɛ̨ni ya dá tɛnhdʉ manꞌda ra Hmu, nɛ hinga høntꞌʉ dí tɛnhdʉ ʉ, nɛ di juarca ma dʉxca nijąhʉ nɛ di juajʉ bʉya.
49 Nɛ nuꞌa nꞌda í Caifás, ra dąmbäją a ra jɛya a, bi ꞌyɛ̨na:
―Ha hin guí pąhmbʉ ꞌbɛꞌa da zä ga øthʉ ya. 50 Ha hin guí pąhmbʉ manꞌda xʉn ho ꞌbʉ nꞌdatho da du nꞌdahma hinga gätho na ngujʉ ga juahmbʉ, bi ꞌyɛ̨na.
51 Pɛ him bi bɛ̨nsɛ a bi ma, pɛ nangueꞌa ra dąmbäją a ra jɛya a, janangueꞌa bi jap Oją da ma ꞌbɛꞌa da tꞌørpa ra Jesús, gue da du da yąnje dyʉ judíohe. 52 Pɛ nu ra Jesús ꞌbʉ mí du, hinga høngdähe in nde da yąnje, pɛ nɛ ʉ gätho miꞌda i ꞌbʉi hønbʉ go bi zä gätho na ndoho ra ximhäi, ꞌdarpʉ dam ꞌbʉhmbʉ a. 53 Nɛ nangueꞌa xí man ra Caifás, ꞌdaꞌangu bi bɛ̨n ʉ gätho ma ngʉrpihe bʉya. Nɛ gueꞌa ra pa bi ma njuąntho da hyo ra Jesús.
54 Janangueꞌa mꞌbɛtꞌo bi ꞌuetho tsꞌʉ bʉ ꞌbʉh ma ngʉrpihe, nɛ bi mba bʉ ja rá nyąni nꞌda ra ʉhäi, nɛ dám ꞌbʉhmbe bʉ ꞌda yʉ pa bʉ ja ra hnini Efraín.
55 Nɛ mi tsꞌʉtho da zøn ra pa ran dąbaxjua, nꞌda ra dąntsꞌihmɛ bi zängahe Oją mayaꞌbʉ dyʉ judíohe. Janangueꞌa xʉn ngu yʉ jąꞌi ꞌdaꞌa nꞌdanni bi nɛtsꞌi bi mba bʉ Jerusalén. Nguetho bi sije mꞌbɛtꞌo thoho ga hoc ma jąꞌihe bʉ, nangue ra dehe. 56 Nɛ nuꞌbʉ mí zøm bʉ ja ra dąniją ʉ ꞌda ma mijudíohe, bi hyom bʉ a ra Jesús nɛ bin ꞌyänꞌdʉ nꞌda ngu nꞌda ʉ:
―ꞌBɛꞌa guím mamhbʉ, ha ba ɛ̨h ra Jesús da nu ram pɛti ua uague hinꞌna, bin ꞌyɛ̨mpꞌʉ.
57 Nu yʉ dąmbäją nɛ yʉ fariseo bi ꞌyɛ̨nꞌʉ:
―Nuꞌbʉ ꞌbʉi to i pądi hapʉ i ꞌbʉi, jatho da ma, nꞌdahma da zä gam bɛnthe, bi ꞌyɛ̨mpꞌʉ yʉ jąꞌi.