Bi yąn ran ꞌyohʉ bʉ Betesda
5
Mꞌbɛjua bʉya bin ja manꞌda ra dąmpɛti ma mijudíohe. Nɛ dá mbähmbe ra Jesús bʉ Jerusalén. 2 Nubʉ Jerusalén mí po bʉ nꞌda ra mbothe mbɛ häntho bʉ ja rá goxthi yʉ dɛꞌyo, gue ma ndehe dyʉ judíohe dí ɛ̨mfe Betesda. Nɛ jabʉ cʉtꞌa yʉ ꞌdøzangu midí mbäꞌtsꞌa ra dehe. 3 Nɛ xʉn ngu i ꞌbom bʉ yʉ mbɛdi, ꞌda ʉ yʉ xädä nɛ ʉ yʉ dogua nɛ ʉ bi tsꞌa yʉ́ jąꞌi. Nɛ gätho ʉ i tøꞌmi di ꞌyąn ra dehe. 4 Nguetho jaꞌbʉ bí ɛ̨h mahɛ̨tsꞌi nꞌda rám ꞌbɛhni Oją nɛ i ąn ra dehe. Nɛ nuꞌbʉ xʉn nu di ꞌyąn ra dehe, nɛ nuꞌa rá mbʉdi da yʉpʉ ja ra dehe din ho a rá mbɛdi i ja. 5 Nɛ mí ꞌbɛm bʉ nꞌda ran ꞌyohʉ, ya ná ꞌdäte ma ꞌdɛꞌma hyąto njɛya madí tsꞌa rá jąꞌi, him mi sä din ꞌyo. 6 Nɛ nuꞌbʉ min nu a ra Jesús, nɛ bi bądi nyaꞌa thoho mi hɛ̨mbi, bi ꞌyɛ̨mbi:―Ha guín nde xtán ho i, bi ꞌyɛ̨mpꞌa.
7 Bi dątꞌa ra mbɛdi:
―Dín ndehma thą, nꞌyø, pɛ njongui ꞌbʉcua da zixcä nʉ ja ra dehe. Nꞌdandį ngu nꞌdandį dí ɛ̨na ga cʉhnʉ ja ra dehe, ꞌbex go i ꞌbɛtꞌo ʉ ꞌda.
8 Bi ꞌyɛ̨mpꞌa ra Jesús bʉya:
―Dami ndantsꞌi jʉx ni fįdi nɛ gan ꞌyo, bi ꞌyɛ̨mbi.
9 ꞌBex bin hoh rá jąꞌi ꞌbʉ mí ndantsꞌi, nɛ bi gąx rá fįdi nɛ bin ꞌyo. Nɛ nuꞌa gueꞌa ra pa ran tsꞌäya a. 10 Nuꞌʉ ꞌda ma mijudíohe bi ꞌyɛ̨mpꞌa ran ꞌyohʉ xín hoh rá jąꞌi:
―Nuya ra pa ran tsꞌäya ya, hingui sä gui cąx ni fįdi, bi tꞌɛ̨mpꞌa.
11 Bi dąꞌa ran ꞌyohʉ:
―Pɛ nuꞌa bi hoga ma jąꞌi, gueꞌa bi xiqui nguetho bi ꞌyɛ̨ngui: “Dami ndantsꞌi gui cąx ni fįdi nɛ gan ꞌyo,” bi ꞌyɛ̨ngui, bi ꞌyɛ̨nꞌa mí tsꞌa rá jąꞌi.
12 Nɛ nuꞌʉ ꞌda ma mijudíohe bi ꞌyänni:
―Toꞌo nín ꞌyohʉ bi xi i gui cąx ni fįdi nɛ gan ꞌyo, bi ꞌyɛ̨nꞌʉ.
13 Pɛ nuꞌa him mi pądi toꞌo xí hocpa rá jąꞌi, nguetho nu ra Jesús bi yʉtꞌinde bʉ ꞌyo yʉ jąꞌi xʉn ngu.
14 Mꞌbɛjua bi mba ra Jesús bʉ ja ra dąnija. Nɛ nuꞌbʉ mi dįnꞌa ran ꞌyohʉ bʉya, bi ꞌyɛ̨mbi:
―Bin ho a ya, ndeꞌbʉ hin gmi ꞌyøtꞌ miꞌda yʉ tsꞌoqui. Manꞌda tsꞌɛdi ran ʉnbi guin nu ꞌbʉ gui ꞌyøtꞌ miꞌda yʉ tsꞌoqui, bi ꞌyɛ̨mbi.
15 ꞌBex bi mba a ran ꞌyohʉ bʉya, da xi ʉ ma mijudíohe xí ꞌyänni, gue gueꞌa ra Jesús bi hoqui. 16 Janangueꞌa bi dʉpꞌʉ ma ngʉrpihe dyʉ judíohe di ʉcpa ra Jesús, nɛ im bɛ̨ni da hyo. Nguetho ɛ̨nꞌʉ: “I øtꞌ rá ꞌbɛfi a ra pa ran tsꞌäya.” 17 Pɛ nu ra Jesús bi ꞌyɛ̨mpꞌʉ:
―Nząi dim pɛh ma Ta, janangueꞌa nɛcä jatho dam pɛcä, bi ꞌyɛmpꞌʉ.
18 Pɛ nanguehna bi man ra Jesús, nuꞌʉ ma ngʉrpihe bʉya manꞌda bi bɛ̨ni da hyo, nguetho hinga høntꞌa bim pɛfi ra pa ran tsꞌäya í ʉcpi, pɛ nɛꞌa í ma gue gueꞌa Oją rá Ta, nam bøni ꞌda i guui Oją.
I ja rá tsꞌɛdi rá Tsꞌʉntꞌʉ Oją
19 Janangueꞌa nu ra Jesús bi ꞌyɛ̨na:
―Majuąni dí xi ahʉ, nte sä ga øzɛhɛgä pɛ høntꞌa ꞌbɛꞌa dín nu øtꞌ ma Ta. Nɛ gätho ꞌbɛꞌa i øtꞌ ma Ta, gueꞌa dí øtꞌä a. 20 Nguetho nu ma Ta ɛ̨mmɛ in numanhogui ngue rá Tsꞌʉntꞌʉgä a, nɛ i urqui ꞌbɛꞌa gätho i øtꞌe. Nɛ da ꞌyurcä miꞌda yʉn tꞌøtꞌe manꞌda nuįxte xinda gue ʉ gán nuhʉ, nɛ gui hyonya thohohʉ. 21 Nguetho tengu ma Ta i xoxꞌʉ xʉn du nɛ di un ra te mahønꞌa, nguthogä, rá Tsꞌʉntꞌʉgä a, dadí un ra te mahønꞌa ʉ toꞌo gätho dín nde ga unni. 22 Nɛ nu ma Ta hingui juąnbatesɛ, pɛ bi ꞌdacä ra tsꞌɛdi go dan juąnbategä rá Tsꞌʉntꞌʉgä a. 23 Nguetho in nde ma Ta gätho yʉ jąꞌi da numansugui gue rá Tsꞌʉntꞌʉgä a, tengutho ma Ta i hnumansu. Nuꞌbʉ ꞌbʉ a nꞌda hingui numansugui, xinga gue ma Ta i numansu a, gue gueꞌa bá pɛngä.
24 Majuąni dí xi ahʉ, nuꞌa øh mam hmangä nɛ i ɛ̨cꞌyɛi ma Ta bá pɛngä, gueꞌa i ja ra ꞌdaꞌyote maząi a. Nɛ hin da nu rá muui rá tsꞌoqui pɛ tengutho ꞌbʉ xí thąmbɛ̨ni bʉ ꞌbʉ ʉ xʉn du, nguetho ya i ja ra ꞌdaꞌyote maząi a. 25 Majuąni dí xi ahʉ, ya bi zøn ra ora da ꞌyøh mam hmangä ʉ xʉn du nangue yʉ́ mbʉi, pɛgue din tꞌun ra ꞌdaꞌyote ꞌbʉ da ꞌyømanho mam hmangä rá Tsꞌʉntꞌʉ Ojągä. 26 Nguetho tengu ra Ta i jasɛ ra te rá mbʉi, nɛ bi ꞌdacä ra tsꞌɛdi din jasɛ ra te ma mbʉigä, nɛ gueꞌa ra ꞌdaꞌyote dí un yʉ jąꞌi. 27 Nɛ bi ꞌdac ra tsꞌɛdi dan juąnbategä, nguetho dán jąꞌigä ua ja ra ximhäi, dí pądi ꞌbɛꞌa i sä nꞌda. 28 O gadi hyonya thohohʉ a dá xi ahʉ, nguetho da zøn ra ora gätho yʉ jąꞌi xʉ tꞌägui da ꞌyøh ma nde ꞌbʉ dá zohni. 29 Nɛ da bøxꞌʉ bi ꞌyøtꞌ ran ho, din ja ra ꞌdaꞌyote maząi. Nɛ da bøxꞌʉ bi ꞌyøtꞌ ran tsꞌo, da nu ran ʉnbi maząi.
Di dä majuąni nangue ra Jesús
30 Nɛ manꞌda bi manꞌa ra Jesús, bi ꞌyɛ̨na:
―Nugä hin te dím mangä nangue man ꞌyomfɛ̨nisɛ. Pɛ nuꞌa i xic ma Ta gueꞌa dím mangä a. Nɛꞌa ꞌbɛꞌa dí sändä, xʉn ho a, nguetho him ma pähä zɛhɛ dí honi ga øtꞌä, pɛ høntꞌa rá pähä ma Ta bá pɛngä. 31 Nuꞌbʉ høngdä xcá däsɛ majuąni gue i ja ma tsꞌɛdi, nte di muui a mam hmangä ꞌbʉ. 32 Pɛ nɛ a ma Ta di dä majuąni ngue rá Tsꞌʉntꞌʉgä a, nɛ dí pącä ngue majuąni im ma ꞌbʉ im ma nanguecä.
33 Nu ahʉ gá pɛnhdʉ ꞌda da ꞌyänꞌna ra Xuua Nxixyą nanguecä. Nɛ nuꞌa ra Xuua bi ma majuąni a. 34 Nɛ madagueꞌbʉ hin xtí dä majuąni, pɛ guemhma ja ma tsꞌɛdigä. Pɛ dadí bɛ̨nꞌnahʉ a bi man ra Xuua Nxixyą ngue manꞌda da zä gui ꞌyɛ̨cꞌyɛigahʉ nɛ gan yąmhbʉ bʉya. 35 Nɛ tengu ra sibi di hyätꞌi nɛ i fät yʉ zuꞌuɛ̨, bin ja bʉ ra Xuua Nxixyą, gá numanhohʉ ꞌda yʉ pa. 36 Nɛ nuꞌa ra Xuua Nxixyą bi ma nanguecä. Pɛ i ja ꞌbɛꞌa gue manꞌda i udi nanguecä xinda gueꞌa rám hman ra Xuua, nɛ gueꞌa ra ꞌbɛfi bi ꞌdacä ma Ta gue ga juacä. Nɛ gueꞌa ɛ xø i uh majuąni bá pɛngä ma Ta. 37 Nɛꞌa ma Ta gueꞌa bá pɛngä, di dä majuąni nanguecä, pɛ nuꞌahʉ njąmꞌbʉ gá ꞌyømanhohʉ ꞌbʉ mín yą, xín gá ꞌyørpahʉ ra güɛnda ꞌbʉ mín ꞌyusɛ.
38 Mfądi hin gá hyąmhbʉ rám hma bʉ ja ni mbʉihʉ, nguetho nuꞌbʉ xquí hyąmhbʉ a, xquí ꞌyɛ̨cꞌyɛigahʉ gue bá pɛngä a. 39 Nu ahʉ thocpa thoho guidín xähmbʉ yʉ́ søcuą Oją, nguetho guí ɛ̨mhbʉ gueꞌa gní tįmhbʉ ra te maząi a. Pɛ nuꞌʉ gätho yʉ søcuą guidín xähmbʉ gätho im ma nanguecä. 40 Nu ahʉ hin guín nde gui xijʉ gan yąnꞌna ni tehʉ, pɛ hinda høntꞌbʉ gui xijʉ gan yąn ahʉ din ja ahʉ ra te maząi ꞌbʉ, bi ꞌyɛ̨n a ra Jesús.
41 Nɛ xø bi ꞌyɛ̨na:
―Pɛ madagueꞌbʉ njon da numansugui, pɛ guextaꞌa rá Tsꞌʉntꞌʉgä Oją. 42 Pɛ dí pądi hanja hin guí pąjʉ, nguetho hín guín numansuhʉ Oją nangue ni mbʉihʉ. 43 Bá ɛ̨cä nangue rá thuhu ma Ta, pɛ nuꞌehʉ hin guín numanhojʉ. Pɛ nuꞌbʉ ba ɛ̨ a nꞌda nangue rá thuhu zɛhɛ, manꞌda guín numanhohʉ a. 44 Njąmꞌbʉ da zä gui ꞌyɛ̨cꞌyɛigahʉ, nguetho guí homhbʉ da numanho ahʉ yʉ jąꞌi, nɛ hin guí homhbʉ da numanho ahʉ Oją ngue høntꞌa i ꞌbʉi. 45 Ha guí ɛ̨mhbʉ guecä ga yąpꞌahʉ bʉ ꞌbʉh ma Ta. Pɛ dí xi ahʉ gue gueꞌʉ yʉ́m hman ra Moisés gueꞌʉ dí nɛqui i ja ni tsꞌoquihʉ ʉ, pɛ sä guím bɛ̨mhbʉ gueꞌʉ dí yąnꞌahʉ ʉ. 46 Pɛ nuꞌbʉ xquí ꞌyɛ̨cꞌyɛihʉ yʉm hma bi ꞌyoꞌtꞌ ra Moisés, xquí ꞌyɛ̨cꞌyɛigahʉ ya, nguetho bi ma nanguecä. 47 Pɛ hin guí ɛ̨cꞌyɛihʉ ꞌbɛꞌa bi ꞌyoꞌtꞌ ra Moisés, janangueꞌa xín guí ɛ̨cꞌyɛihʉ ꞌbɛꞌa dí mangä ya, bi ꞌyɛ̨nꞌa ra Jesús ꞌbʉ min yąhʉ ma ngʉrpihe dyʉ judíohe.