Ra Jesús bi ꞌuįn ʉ cʉtꞌa mahuąhi
6
Nɛ nuꞌbʉ mí tho i ꞌda yʉ pa, mꞌbɛjua bʉya, dá mbähmbe ra Jesús bʉ ꞌdanguadi ra dądehe Galilea, nꞌdatꞌa ra dądehe Tiberias. 2 Nɛ xʉn ngu yʉ jąꞌi bi dɛngähe nguetho bi nu yʉn tꞌøtꞌe nuįxte bi ꞌyøtꞌa ra Jesús nangue ʉ mín zämanꞌʉ. 3 Nɛ dá mbähmbe ra Jesús bʉ ja nꞌda ra nyuni, nɛ dá huhmbe bʉ. 4 Nɛ nuꞌʉ yʉ pa ʉ mí tsꞌʉtho da zøn ra pa ga øtꞌähe ra dąmpɛti ran dąbaxjua, dyʉ judíohe. 5 Nɛ nuꞌa ra Jesús bin hanni nɛ bi hyandi xʉn ngu yʉ jąꞌi ba ɛ̨pʉ. Nuꞌa ra Jesús bi ꞌyɛ̨mpꞌa ra Felipe bʉya:―ꞌBɛpʉ dí zä ga tämhbʉ ꞌbɛꞌa da zi yʉ ba ɛ̨hnʉ.
6 Gueꞌa bi man ra Jesús nguetho in nde da bądi ꞌbɛꞌa dí dątꞌa a ra Felipe. Pɛ nu ra Jesús mí pąsɛ ꞌbɛꞌa da ꞌyøzɛhɛ. 7 Nɛ bi dątꞌa ra Felipe:
―Pɛ hin dí guaꞌʉ yʉ mahuąhi tho dá tämhbʉ a da zi yʉ ba ɛ̨hnʉ ꞌbʉ di ja, madagueꞌbʉ zʉ tsꞌʉtho din tꞌunni nꞌda ngu nꞌda, bi ꞌyɛ̨na.
8,9 Nɛ nubʉya nuꞌa manꞌda ma mixädihe ra Andrés, rán ꞌyohʉ ra Simón Pedro, bi xi a ra Jesús:
―ꞌBʉcua nꞌda ra tsꞌʉntꞌʉ i hą zʉ tsꞌʉ rán zɛdi, gue cʉtꞌa yʉ hmɛ ra cebada, nɛ yoho yʉ tꞌʉhuą. Pɛ hin dí guaꞌʉ yʉ jąꞌi nguetho xʉn ngu ʉ, bi ꞌyɛ̨nꞌa ra Andrés.
10 Nɛ bi ꞌyɛ̨ngdahe ra Jesús:
―Jafʉ din säya yʉ jąꞌi, bi ꞌyɛ̨na.
Nguetho mi ja bʉ ra ꞌbotꞌɛi. Nɛ bi hyupʉ häi bʉya, nɛ mí jua i cʉtꞌa mahuąhi ʉ yʉn ꞌyohʉ. 11 Nɛ nuꞌa ra Jesús bi hyąnꞌa ra hmɛ, nɛ bi ꞌyäp rán jąpi Oją nangue ra hmɛ nɛ bi ꞌdaje yʉ́ xädigähe. Nɛ nugähe dá darpähe ʉ yʉ jąꞌi bʉya, nɛ ʉ yʉ huą, nɛ bin niyą gätho yʉ jąꞌi. 12 Nɛ nuꞌbʉ mín niya yʉ jąꞌi, nu ra Jesús bi xicähe:
―Pɛthʉ ʉ gätho ꞌbɛꞌa bi bongui, gue nte dim ꞌbɛdi, bi ꞌyɛ̨nje.
13 Nɛ nuꞌbʉ má pɛthe bʉya bi yu ʉ gätho ꞌdɛꞌma yoho ma ꞌbøtsꞌehe yʉ xɛqui, ꞌbʉ mín niyą yʉ jąꞌi nangue cʉtꞌa yʉ hmɛ. 14 Nuꞌbʉ mín nu ran tꞌøtꞌe nuįxte ʉ gue bi ꞌyøtꞌa ra Jesús, bi ꞌyɛ̨nꞌʉ bʉya:
―Masque majuąni guehna ra pøngahyą mí hma da zøcua ja ra ximhäi, bi ꞌyɛ̨n ʉ.
15 Pɛ nuꞌa ra Jesús bi bądi ꞌbɛꞌa mbɛ̨n ʉ yʉ jąꞌi ngue nde da bɛntꞌi, im bɛ̨nbi din tsꞌʉtꞌabi. Janangueꞌa bi zoh yʉ jąꞌi bʉya, bi mbasɛ, nɛ manꞌda bi guam bʉ ja ra dąpo.
Ra Jesús bin ꞌyo maxøtsꞌe ra dehe
16 Nuꞌbʉ mín de bʉya dá mbäsɛhe bʉ ja ra dądehe. 17 Nɛ dá hux ma mbosahe, gue ga sømhbe bʉ ja ra hnini Capernaum. Nɛ hin ná nuthe ra Jesús ꞌbʉ mí zʉje ra ꞌbɛxui. 18 Nɛ ntsꞌɛdi bi ꞌyɛn ran dąhi a ra dehe bʉya. 19 Nuꞌbʉ mí dąn i tsꞌʉ ra mbosa mí huxhe nɛ dá sømhbe made ra dądehe, dá nuhe ba ɛ̨pʉ ra Jesús, ba ꞌyo maxøtsꞌe ra dehe, ní ꞌyɛ̨pʉ ja a ra mbosa mí huxhe. Nɛ ɛ̨mmɛ dá suhe nguetho him min nuhe xʉn ho, him mi pąhmbe ngue gueꞌa ra Jesús. 20 Nu ra Jesús bi ꞌyɛ̨nje:
―Guecä, o guín suhʉ.
21 Nɛ bi hyu ma mbʉihe, nɛ dá xihmbe a ra Jesús da hyuxpʉ ja ra mbosa. Nɛ ɛ̨na ya xmí ꞌbähmbe bʉ ndenthe ná mbähmbe bʉya nubʉ ra hnini Capernaum.
Bi thonꞌa ra Jesús
22 Nuꞌbʉ mí nɛc pʉya, nuꞌʉ yʉ jąꞌi ꞌbʉpʉ hapʉ xí ꞌuįn a ra Jesús, bi bɛ̨m bʉya gue høntꞌa nꞌda ra mbosa mí høpʉ a ran de dán sihmɛhe, nɛ hin dá mbähmbe ra Jesús ꞌbʉ má huhe ra mbosa, pɛ dá mbäsɛhe. 23 Pɛgue mꞌbɛjua thoho bi zøm bʉ miꞌda yʉ mbosa bí nɛxpʉ Tiberias, nɛ bi zøm bʉ jom bʉ dán sihmɛhe ꞌbʉ mí ꞌyäp rán jąpi Oją ra Jesús. 24 Nɛ nuꞌʉ yʉ jąꞌi ꞌbʉ mí hyonꞌa ra Jesús nɛ him bi dįm bʉ, xínga guecähe, bi hyuxꞌʉ miꞌda yʉ mbosa bʉya nɛ bi zøm bʉ ja ra hnini Capernaum, i hon a ra Jesús.
Ra Jesús ra hmɛ dám ꞌbʉh maząi nꞌda a
25 Nɛ nuꞌʉ yʉ jąꞌi ꞌbʉ mí dįm bʉ ra Jesús bʉ ꞌdanguadi ra dądehe, bi ꞌyänni:
―Mán jąmꞌbʉ gá søcua, bi ꞌyɛ̨mpꞌʉ.
26 Nuꞌa ra Jesús bi ꞌyɛ̨mpꞌʉ:
―Majuąni dí xi ahʉ, hin gní hyonjʉ gue gui pąhmbʉ a ran tꞌuti dá utꞌahʉ, pɛ nuꞌa guín niyąhʉ ꞌbʉ gmín sihmɛhʉ gueꞌa gní hyonjʉ a. 27 Pɛ dami ꞌyɛsꞌhʉ ngue høntꞌa gní hyomhbʉ ra hmɛ nám ꞌbʉhmbʉ yʉ pa ja bʉya. Pɛ mꞌbɛtꞌo thoho dami hyomhbʉ a ra hmɛ nám ꞌbʉh maząi nꞌda a gue ga ꞌda ahʉ, guecä dán jąꞌigä ua ja ra ximhäi. Nguetho gueꞌa ran tꞌɛ̨di bi ꞌdac Oją ma Ta, bi ꞌyɛ̨na.
28 Nu yʉ jąꞌi bʉya bi ꞌyänꞌna ra Jesús nɛ bi ꞌyɛ̨mbi:
―ꞌBɛꞌa sä ga øtꞌähe gue ga tįmhbe a guím ma, bi ꞌyɛ̨nꞌʉ.
29 Nuꞌa ra Jesús bi dądi:
―Nuꞌa in nde Oją gui ꞌyøthʉ gui sinjʉ bʉ ni mbʉihʉ, guecä bá pɛngä Oją, bi ꞌyɛ̨na.
30 Nɛ bi tꞌɛ̨mpꞌa ra Jesús:
―ꞌBɛꞌa ní hmɛpya gui ꞌyurcähe, ngue da zä ga sin ahe bʉ ma mbʉihe. Ha da zä gui ꞌyøtꞌe tengu bi ꞌyøtꞌa ra Moisés. 31 Nguetho nuꞌʉ mam bombøtahʉ bi zi ra maná ꞌbʉ mí ꞌyo bʉ ja ra ʉhäi, tengu mán tꞌoꞌtꞌi bʉ ja rá søcuą Oją, i ɛ̨na: “Nuꞌa ra Moisés, bi un yʉ jąꞌi ra hmɛ bí ꞌyɛ̨h mahɛ̨tsꞌi,” i ɛ̨na, bi ꞌyɛ̨nꞌʉ yʉ jąꞌi.
32 Nuꞌa ra Jesús bi ꞌyɛ̨mpꞌʉ:
―Majuąni dí xi ahʉ, hinga gueꞌa ra Moisés bi unꞌa ra hmɛ bí ꞌyɛ̨h mahɛ̨tsꞌi, pɛ Oją bi un a. Nɛ hinga gueꞌa ra hmɛ nám ꞌbʉh maząi nꞌda a ra maná mi si ʉ. Pɛ nuya, nu ma Ta di un a njuąntho ra hmɛ mahɛ̨tsꞌi gue nám ꞌbʉh maząi nꞌda a. 33 Nɛ nuꞌa njuąntho ra hmɛ di un Oją, bí ꞌyɛ̨h mahɛ̨tsꞌi a, gue dám ꞌbʉh maząi ʉ yʉ jąꞌi ꞌbʉcua ja ra ximhäi, bi ꞌyɛ̨na.
34 Nɛ bi ꞌyɛ̨nꞌʉ:
―ꞌDaje thocpa thoho a ra hmɛ guím ma, nꞌyø.
35 Nuꞌa ra Jesús bi ꞌyɛ̨mpꞌʉ:
―Guecä drá hmɛ dámꞌbʉh maząi nꞌda a. Nuꞌa toꞌo da zingä bʉ ja yʉ́ mbʉi tenguꞌbʉ i sihmɛ, nɛ njąmꞌbʉ din tumanthuhu yʉ́ mbʉi nɛ xín din tuthe bʉya. 36 Pɛ tengu dá xi ahʉ, hin guí ɛ̨cꞌyɛigahʉ, madagueꞌbʉ gá nuhʉ ꞌbɛꞌa dá øtꞌä. 37 Pɛ nuꞌʉ toꞌo bi ꞌdacä ma Ta, gueꞌʉ di däcä yʉ́ mbʉi ʉ. Nɛ nuꞌʉ di däc yʉ́ mbʉi, njon ga ɛ̨mbi hin da zä ga sini. 38 Nguetho bá ɛ̨cä mahɛ̨tsꞌi ngue ga øtꞌ rá pähä a bá pɛngä, nɛ him bá ɛ̨cä ga øtꞌ ma pähä zɛhɛ. 39 Nuꞌa rá pähä ma Ta bá pɛngä, gueꞌa nte ga ꞌbɛcä gätho bi ꞌdacä, pɛ ga xoxä ʉ ꞌbʉ rán zɛgui ra pa, nɛ dim ꞌbʉi maząi. 40 Nu rá pähä ma Ta, gue høntꞌa go toꞌo da bądi rá Tsꞌʉntꞌʉgä Oją, nɛ da ꞌyɛ̨cꞌyɛigui, din ja ra te maząi ʉ. Janangueꞌa ga xoxä ʉ ꞌbʉ rán zɛgui ra pa, bi ꞌyɛ̨nꞌa ra Jesús.
41 Nɛ bi mbʉdi bi ʉcpa a ra Jesús ʉ ma mijudíohe ꞌbʉ mí ꞌyø a bi ma, gue bi ꞌyɛ̨na: “Nugä drá hmɛ majuąni gue bá cąh mahɛ̨tsꞌi.” 42 Nɛ bin ꞌyɛ̨mzɛhɛ ʉ:
―Ha hinga guehna ra Jesús, rá tsꞌʉntꞌʉ ra José na, rá ta nɛ rá mbe dí pąhmbʉ. Hanja ní ꞌyɛ̨na bí ꞌyɛ̨h mahɛ̨tsꞌi, bi ꞌyɛ̨n ʉ.
43 Nɛ nu ra Jesús bi ꞌyɛ̨mpꞌʉ bʉya:
―O gadí cꞌąmanꞌʉjʉ nꞌda ngu nꞌda ahʉ. 44 Xínga nꞌda sä da dɛngui ꞌbʉ hin di un ra pähä a ma Ta, gueꞌa bá pɛngä, nɛ ga xoxä ꞌbʉ rán zɛgui ra pa ʉ, ga undä ra te maząi. 45 Tengu mán tꞌoꞌtꞌi bʉ ja yʉ́ søcuą yʉ́ pøngahyą Oją, bi ꞌyɛ̨na: “Gätho yʉ jąꞌi da xänba Oją,” bi ꞌyɛ̨nꞌʉ. Janangueꞌa nuꞌʉ toꞌo gätho bi hyąni xʉn ho a bi xänba Oją, nɛ gueꞌʉ di däc yʉ́ mbʉi ʉ.
46 Pɛ hin dí ɛ̨na ꞌboꞌo xʉn nu Oją, hinda høngdä gue bá nɛxä bʉ, dín nugä a. 47 Majuąni dí xi ahʉ, nuꞌa toꞌo ɛ̨cꞌyɛigui i ja ra ꞌdaꞌyote maząi a. 48 Nugä drá hmɛ majuąni gue nám ꞌbʉh maząi nꞌda. 49 Nuꞌʉ mam bombøtahʉ bi zi ra maná bí ꞌyɛ̨h mahɛ̨tsꞌi ꞌbʉ min ꞌyo bʉ ja ra ʉhäi, pɛ guehma bi du ʉ. 50 Pɛ nugä drá hmɛ majuąni, bá nɛxä bʉ mahɛ̨tsꞌi, gue sä da zinꞌa nꞌda tenguꞌbʉ i sihmɛ, nɛ njąmꞌbʉ da du. 51 Nugä drá hmɛ majuąni, bá ɛ̨cä mahɛ̨tsꞌi, tengu ra hmɛ i si nꞌda i ja rán zaqui yʉ pa i ja bʉ ya. Pɛ nuꞌa ra hmɛ dím mangä, din ja ran zaqui maząi to da zi. Nɛ gueꞌa ma jąꞌigä a gue ga uni, ngue din ja ra ꞌdaꞌyote ʉ ꞌbʉcua ja ra ximhäi, bi ꞌyɛ̨nꞌa ra Jesús.
52 Bin junzɛhɛ ʉ ma mijudíohe bʉya, bin ꞌyɛ̨mzɛhɛ ʉ:
―Hague nja ran ꞌyohʉ sä di ꞌdajʉ rá jąꞌi ga sahʉ, bin ꞌyɛ̨mpꞌʉ.
53 Nɛ nu ra Jesús bi dątꞌʉ:
―Majuąni dí xi ahʉ, nuꞌbʉ hin gui sihʉ ma ngøcꞌyɛ̨i nɛ ma ji, guecä dán jąꞌigä ua ja ra ximhäi, hinꞌyʉ mbo ni mbʉihʉ ra ꞌdaꞌyote maząi. 54 Nuꞌa toꞌo da za ma ngøcꞌyɛ̨i nɛ da zi ma ji, i ja ra ꞌdaꞌyote maząi, nɛ ga xox ꞌbʉ rán zɛgui ra pa. 55 Nguetho nu ma ngøcꞌyɛ̨i nɛ ma ji njuąntho ran tsꞌihmɛ ngue dám ꞌbʉh maząi nꞌda. 56 Nuꞌa toꞌo da za ma ngøcꞌyɛ̨i nɛ da zi ma ji dí ząm bʉ ja yʉ́ mbʉi, nɛ i ja ra te nanguecä. 57 Tengu thoho dí øtꞌbe ma Ta, nuꞌa i jasɛ rá te, nɛ i jagä ra te nangueꞌa bʉya. Nɛ bá pɛngä gue ga thocpa a ra te ʉ to da zingä, tenguꞌbʉ i sagä. 58 Nuna ra hmɛ dí xi ahʉ gue bá cąh mahɛ̨tsꞌi, hinga ngu a bi zi mam bombøtahʉ, nguetho bi du ʉ. Pɛ nuꞌa toꞌo da zi ra hmɛ dím mangä ya, gueꞌa dím ꞌbʉh maząi a, bi ꞌyɛ̨nꞌa ra Jesús.
59 Nɛ guehna ram hma bi manꞌa ra Jesús ꞌbʉ mín xänbate bʉ ja ra niją bʉ Capernaum.
Yʉm hma di un ra ꞌdaꞌyote maząi
60 Nuꞌbʉ mí guaꞌa bi man ra Jesús, bi ꞌyɛ̨nꞌʉ mí tɛnni:
―Hingui ho a bi xijʉ nʉ ya, toꞌo da hyätꞌi da ꞌyøde, xʉn ngu ʉ bi ꞌyɛ̨na.
61 Nu ra Jesús bi bądi ꞌbɛꞌa bi bɛ̨nꞌʉ yʉ jąꞌi, gue him bi numanho rám hma, nɛ bi ꞌyɛ̨mpꞌʉ:
―Ha guím bɛ̨mhbʉ hingui ho a dá xi ahʉ. 62 ꞌBɛꞌa guim bɛ̨mhbʉ ꞌbʉ gá nujʉ ga texä bʉ mahɛ̨tsꞌi guepʉ bá nɛxä, guecä dán jąꞌigä ua ja ra ximhäi. 63 Pɛ nuꞌa nam bønꞌʉ yʉm hma dá xi ahʉ, hingan juąntho gui sajʉ, pɛ gui ꞌyɛ̨cꞌyɛihʉ ngue ga un ma te nangue ahʉ, nɛ din ja ahʉ ra te bʉya. 64 Pɛ ꞌbʉ i ꞌda ahʉ hin guí ɛ̨cꞌyɛigahʉ, bi ꞌyɛ̨nꞌa ra Jesús.
―Janangueꞌa dá xi ahʉ, hingui sä nꞌda ra jąꞌi ba ɛ̨hɛ da dɛngui ꞌbʉ him bi japꞌa ma Ta bi däc rá mbʉi.
66 Nuꞌbʉ mí ꞌyøh mahønꞌa ʉ mí tɛnni, xʉn ngu bi ꞌue ʉ nɛ him bin ꞌyohʉ mahønꞌa. 67 Janangueꞌa nu ra Jesús bi ꞌyängahe dí ꞌdɛꞌmayohogähe:
―Ha nɛ ahʉ gui sogahʉ, bi ꞌyɛ̨nje.
68 Nu ra Simón Pedro bi dątꞌa:
―Ma Hmu i, pɛ njoꞌo manꞌda da zä ga tɛnhde nguetho nuꞌi ja nim hma di un ra ꞌdaꞌyote maząi. 69 Nɛ nugähe dí ɛ̨cꞌyɛi ahe nɛ dí pąhmbe gue gueꞌe grá Cristo rá Tsꞌʉntꞌʉ i Oją i ꞌbʉi, bi ꞌyɛ̨na.
70 Bi dąꞌa ra Jesús:
―Nugä xtá huanꞌnahʉ guí ꞌdɛꞌmayohohʉ, pɛ nuꞌa nꞌda ahʉ i tɛn ra zįthu, bi ꞌyɛ̨nje.
71 Pɛ nuꞌa bi man ra Jesús, gueꞌa ra Judas a, rá tsꞌʉntꞌʉ ra Simón Iscariote, nguetho gueꞌa di dä a. Nɛ gueꞌa nꞌda mín ꞌyohe a, mí ꞌdɛꞌmayohogähe.