Hingui ɛ̨cꞌyɛi yʉ́n ꞌyohʉzɛhɛ a ra Jesús
7
Mꞌbɛjua bʉya, bin ꞌyo bʉ miꞌda yʉ hnini bʉ Galilea. Him bi nde bi mba bʉ ja ra xɛqui Judea, nguetho nu ma ngʉrpihe dyʉ judíohe, dyʉ israelhe, nde xtá hyo bʉ. 2 Nɛ ma guepʉ da dät ra pa ngue ząi dim pɛti ma mijudíohe, ꞌbʉ xʉ hyøh yʉ tꞌʉngu, im bɛ̨ni ꞌbɛꞌa bi ꞌyørpa Oją ʉ mam bombøtahe ꞌbʉ min ꞌyo bʉ ja ra ʉhäi. 3 Nu yʉ́n ꞌyohʉ a ra Jesús bi ꞌyɛ̨mbi:―Ndeꞌbʉ gui pøngua ní mba bʉ ja ra xɛqui Judea, ba nu a bʉ i tɛnꞌni i nangueꞌa guí øtꞌe. 4 Nguetho njoꞌo to da ꞌyąh rá ꞌbɛfi ꞌbʉ in nde da tꞌɛ̨spi. Nuꞌbʉ majuąni guí øtꞌ yʉn tꞌøtꞌe nuįxte bá ut yʉ jąꞌi, nɛ gätho ra ximhäi da bąꞌa i, bi tꞌɛ̨mpꞌa ra Jesús.
―Hinga na søn ra ora bi tsꞌängä ga mbagä bʉ, pɛ nuꞌahʉ høntꞌa go ꞌbɛꞌa má ora da zä gui mbähä bʉ. 7 Nuꞌʉ ꞌbʉcua ja ra ximhäi hin di ʉcꞌahʉ nguetho ꞌda i gu guí øthʉ ʉ, pɛ go di ʉgä ʉ nguetho dím mangä gue hingui ho øtꞌʉ. 8 Ní mbäsɛhʉ ꞌbʉ guín ndehʉ, nugä hin ga mba ya nguetho hinga na søn ra ora ga mba bʉ, bi ꞌyɛ̨na.
9 Nuꞌbʉ mí guaꞌa bi man bʉya bim ꞌbʉt pʉ miꞌda yʉ pa bʉ ra xɛqui Galilea.
Bin xänbate ra Jesús bʉ ja ra dąmpɛti
10 Nuꞌbʉ mí mba bʉ Jerusalén ʉ yʉ́n ꞌyohʉ, mꞌbɛjua bi mba bʉ ra Jesús. Mbɛ bin ꞌyąntho nguetho bi nde him ꞌbexque da hnu. 11 Nɛ nu ma ngʉrpihe dyʉ judíohe i ꞌbʉpʉ, bi hyonꞌa ra Jesús bʉ ja ram pɛti. Nɛ bin ꞌyɛ̨m zɛhɛ ʉ:
―Hapʉ i ꞌbʉi ꞌbʉ, bin ꞌyɛ̨mpꞌʉ.
12 Nɛ xʉn ngu yʉ jąꞌi bin yąnjoꞌdre nangueꞌa ra Jesús, nuꞌʉ ꞌda im ma ngue xʉn ho a, nɛ nuꞌʉ ꞌda i ɛ̨na: “Häte a.”
13 Pɛ xinga nꞌda bin yą tsꞌɛdi nangueꞌa ra Jesús nguetho i su ma ngʉrpihe ꞌbʉpʉ.
14 Nuꞌbʉ mí thoꞌi tsꞌʉ yʉ pa, ya bi zo i nde yʉm pɛti i tꞌørpʉ, ja bi mba bʉ ja ra dąniją ra Jesús bʉya nɛ bin xänbate bʉ. 15 Nɛ nu ma ngʉrpihe bʉ ja ra niją bi hyonya thoho nɛ bi ꞌyɛ̨nꞌʉ:
―Hague nja i sä da ma xʉn ho rám hman Oją na ran ꞌyohʉ, nɛ him bi zʉꞌa man xädihʉ, bin ꞌyɛ̨m zɛhɛ ʉ.
16 Bi dą a ra Jesús:
―Nuꞌa man xädigä him mam hmansɛgä a pɛgue rám hman a to bá pɛngä. 17 Nuꞌbʉ ꞌbʉ a nꞌda gue nde da ꞌyøtꞌ rá pähä Oją, da bą ꞌbʉ rán xädi Oją, o gue da bą ꞌbʉ mam hmansɛgä. 18 Nuꞌbʉ ꞌbʉ a nꞌda im ma ꞌbɛꞌa mbɛ̨nsɛ, i honi da hnumansusɛ. Pɛ nuꞌbʉ ꞌbʉ a nꞌda i honi da tꞌɛ̨spa rá hmu, im ma majuąni a nɛ hingui häte a.
19 Nɛ xø bi ꞌyɛ̨na:
―Bi ꞌdajʉ yʉn tꞌɛ̨di ra Moisés, pɛ xínga nꞌda ahʉ guí øthʉ nguetho bi ma njon din hote, nɛ guín nde gui hyojʉ, bi ꞌyɛ̨nꞌa ra Jesús.
20 Nɛ bi dąꞌʉ yʉ jąꞌi thoho:
―Masque bi bɛ̨nꞌna ra zįthu a gám ma, njoꞌo to in nde da hyo i, bi ꞌyɛ̨nꞌʉ.
21 Nu ra Jesús bi dątꞌʉ:
―Nugä dá øtꞌa nꞌda ra ꞌbɛfi ꞌbʉ ra pa ran tsꞌäya, nɛ gätho ahʉ gá hyonya thohohʉ. 22,23 Pɛ nɛꞌahʉ, nuꞌbʉ din tįn i yoho yʉn tꞌɛ̨di bi man ra Moisés, nuꞌa nꞌda bi ma gue gui hyɛcpahʉ yʉ́ jąꞌi yʉ ꞌuɛre, nɛ nu manꞌda bʉya ra pa ran tsꞌäya, guí huanhdʉ ndaꞌa guí øthʉ, gue guí hɛcpahʉ yʉ́ jąꞌi yʉ ꞌuɛre. Nguetho hin guín nde gui fɛstahʉ a rán tꞌɛ̨di ra Moisés. Nɛ hinga høntꞌa ra Moisés bi ma da thɛcpa yʉ́ jąꞌi yʉ ꞌuɛre, pɛ nɛꞌʉ mam bombøtahʉ bi ma. Nɛ ngutho dá øtꞌ ꞌbʉ má hocꞌa nꞌda ra hyɛ̨nni ꞌbʉ ra pa ran tsꞌäya. Hanja gní sʉjʉ nɛ gueꞌa nꞌyoui bʉ rán tꞌɛ̨di ra Moisés dá øtꞌä. 24 Pɛ damin ꞌyomfɛ̨nihʉ xʉn ho ꞌbʉ guí ɛ̨na gui juąnbahʉ nꞌda ra jąꞌi. Jatho ꞌbɛ gui pąhmbʉ ꞌbɛꞌa nam bønꞌa i øtꞌa nꞌda, bi ꞌyɛ̨nꞌa ra Jesús.
Bin ꞌyänꞌdʉ ꞌbʉ gueꞌa ra Cristo
25 Nɛ nuꞌʉ ꞌda yʉ mɛngu bʉ Jerusalén bin ꞌyɛ̨mpꞌʉ:
―Ha hinga guehna ran ꞌyohʉ im ma ma ngʉrpihʉ da hyo. 26 Pɛ hague in ja, in xänbate ua bim pɛti gätho yʉ jąꞌi nɛ nte i xih ya. Uague bi bɛ̨nꞌʉ ma ngʉrpihʉ gue majuąni ra Cristo na ra Jesús, gue bi huand Oją dim Hmu ua. 27 Pɛ nuna ran ꞌyohʉ, dí pąhmbʉ hapʉ bá nɛxna, pɛ nuꞌbʉ bá ɛ̨ a majuąni ra Cristo, njoꞌo to da bądi hapʉ dí nɛxꞌa, bin ꞌyɛ̨m zɛhɛ ʉ.
28 Nuꞌbʉ mín xänbate ra Jesús bʉ ja ra dąniją, ntsꞌɛdi bi ꞌyɛ̨na:
―Guím bɛ̨mhbʉ guí pąjʉ nɛ guím bɛ̨mhbʉ guí pąhmbʉ hapʉ bá nɛxä. Pɛ hin bá ɛ̨cä nanguesɛgä, pɛgue bá pɛngä a majuąni i ja rá tsꞌɛdi. Nuꞌehʉ hin guí pąhmbʉ a. 29 Nugä dí pącä a nguetho bá nɛxä bʉ i ꞌbʉ a, nɛ gueꞌa bá pɛngä a, bi ꞌyɛ̨na.
30 Nɛ ꞌbexque nde da bɛnt pʉya, pɛ njom bi zä bi bɛntꞌi nguetho hin ní zøn ra ora da bɛntꞌi. 31 Nɛ xʉn ngu yʉ jąꞌi bi ꞌyɛ̨cꞌyɛi gue majuąni ra Cristo a. Nɛ bi ꞌyɛ̨nꞌʉ:
―Guehma majuąni ra Cristo na ra Jesús gue mí hma ba ɛ̨hɛ, nguetho njon da zä da ꞌyøtꞌ yʉn tꞌøtꞌe manꞌda nuįxte, bi ꞌyɛ̨nꞌʉ.
Bi ꞌbɛnh yʉ asmayo da bɛntꞌa ra Jesús
32 Nuꞌbʉ mí ꞌyøh yʉ fariseo nɛ yʉ dąmbäją ꞌbɛꞌa bi man yʉ jąꞌi nangueꞌa ra Jesús, bi xi ʉ ꞌda yʉ asmayo bʉya da bɛntꞌa ra Jesús ngue da gotꞌi. 33 Nuꞌa ra Jesús ꞌbʉ mí thoqui bin xänbate, bi ꞌyɛ̨na:
―Mi tsꞌʉtho dí ꞌbʉhmbʉ ua nguetho ga mba bʉ bí ꞌbʉ a bá pɛngä. 34 Nɛ nuꞌahʉ bʉya gui hyonjʉ pɛ hin da zä gui tįnjʉ, nɛ hin da zä gui sømhbʉ bʉ hapʉ dam ꞌbʉcä, bi ꞌyɛ̨na.
35 Nɛ bin ꞌyɛ̨mzɛhɛ ma ngʉrpihe:
―Hapʉ da mba gue hin da zä ga tįmhbʉ. Ha da mba bʉ nꞌdanni ꞌbʉ ʉ ma mijudíohʉ, nɛ da xänba ʉ, nɛꞌʉ nꞌdanꞌyo yʉ jąꞌi gue yʉ griego. 36 ꞌBɛꞌa ním bønꞌa manꞌa: “Gui hyonjʉ nɛ hin gui tįnjʉ, nɛ hin da zä gui sømhbʉ hapʉ ga mba,” ɛ̨njʉ, bin ꞌyɛ̨mzɛhɛ ʉ.
Tengu nꞌda ra dąthe da nɛxpʉ ní mbʉi nꞌda
37 Nu rán zɛgui ra pa nangue yʉm pɛti mí øtꞌʉ, gueꞌa ra pa ɛ̨mb yʉ jąꞌi manꞌda xʉn ndʉxqui a. Nɛ ꞌbäpʉ ra Jesús nɛ ntsꞌɛdi im manꞌa:
―Nuꞌa toꞌo di ꞌbɛ a manꞌda mahyoni thoho rá mbʉi, tenguꞌbʉ i tuthe, ba ɛ̨hɛ ga unꞌna mahyoni thoho, tenguꞌbʉ da zi ra dehe. 38 Nɛ nuꞌa toꞌo da zi ra dehe dím mangä, din ja tengu nꞌda ra dąthe da nɛxpʉ rá mbʉi gue di un mahønꞌa ra ꞌdaꞌyote, tengu xí man rá tꞌohni Oją, bi ꞌyɛ̨nꞌa ra Jesús.
39 Nɛ gueꞌa bi ma nangue rá Hogandąhi Oją da hyąni toꞌo gätho da ꞌyɛ̨cꞌyɛi. Pɛ hin ní zøh rá Hogandąhi Oją ꞌbʉ mím ma nguetho hin ní ndex mahɛ̨tsꞌi ra Jesús gue tpa pɛngahʉ a.
ꞌDahma ꞌdanꞌyo bi bɛ̨n yʉ jąꞌi
40 Nuꞌbʉ mí ꞌyøh yʉ jąꞌi ꞌbɛꞌa bi man ra Jesús, bi ꞌyɛ̨n i ꞌda:
―Masque majuąni rá pøngahyą Oją mí hma ba ɛ̨hɛ.
41 Nɛ nu miꞌda bi ꞌyɛ̨na:
―Nuꞌa, ra Cristo gue rá Thahni Oją a.
Pɛ nu miꞌda bi ꞌyɛ̨na:
―Pɛ ha dí ꞌyɛ̨pʉ Galilea ra Cristo. 42 Nguetho bi man rá tꞌohni Oją, gue ra Cristo ba ɛ̨hɛ nangue rá ꞌyʉ ra David, nɛ di nɛqui bʉ ra hnini Belén guepʉ mí ꞌbʉh ra David, ɛ̨nꞌʉ.
43 ꞌBex bin hec yʉ jąꞌi nangueꞌa bi manꞌʉ, nɛ ꞌdahma ꞌdanꞌyo ꞌbɛꞌa mím bɛ̨ni ngue toꞌo a ra Jesús. 44 Nɛ ꞌda ʉ nde da bɛntꞌi ngue da gotꞌi, pɛ xínga nꞌda bi zä bi bɛntꞌi.
Him bi ꞌyɛ̨cꞌyɛi yʉ ngʉrpi
45 Nuꞌbʉ mbencꞌʉ yʉ asmayo bʉ ꞌbʉ ʉ yʉ dąmbäją nɛ yʉ fariseo, nuꞌʉ bi ꞌyänni:
―Hanja hin guá sihʉ a dá xi ahʉ, bi ꞌyɛ̨nꞌʉ.
46 Nɛ nu yʉ asmayo bʉya bi dądi:
―Pɛ him mí ꞌbʉ a nꞌda im ma tengu manꞌa ra Jesús, bi ꞌyɛ̨nꞌʉ.
47 Nɛ bi dą ʉ yʉ fariseo bʉya:
―Ha nɛ ahʉ bi hyä ahʉ. 48 Pɛ xínga nꞌdagähe dyʉ fariseohe dí ɛ̨cꞌyɛihe a, xínga gueꞌʉ miꞌda ma mingʉrpihe. 49 Pɛ nu ʉ yʉ jąꞌi thoho gue hingui pąh yʉn tꞌɛ̨di, høntꞌʉ i ɛ̨cꞌyɛi a ran ꞌyohʉ ʉ, pɛ da nu ran ʉnbi maząi ʉ, bi ꞌyɛ̨n ʉ.
50 Nɛ nubʉya nu ra Nicodemo, gueꞌa xí zøm bʉ ꞌbʉh ra Jesús ꞌbʉ nꞌda ra xui, bi ꞌyɛ̨mpꞌʉ yʉ́ mifariseohʉ:
51 ―Nuꞌa man tꞌɛ̨dihʉ, hingui sä ga juąnbahʉ nꞌda ra jąꞌi ꞌbʉ hin dá øhmbʉ ꞌbɛꞌa da mansɛ, nɛꞌbʉ hin dí pąhmbʉ majuąni ꞌbɛꞌa i øtꞌe, bi ꞌyɛ̨na.
52 Nɛ bi dą ʉ, bi ꞌyɛ̨mbi:
―Nuꞌi tenguꞌbʉ nɛꞌi guí ꞌyɛ̨pʉ Galilea, nguetho nɛꞌi guím ma tengu im man yʉ ꞌyąmbʉi. Pɛ dami hyomhbʉ ja rá søcuą Oją gueꞌbʉ di nɛqui bʉ Galilea nꞌda rá pøngahyą Oją.
53 Nɛ nꞌda ngu nꞌda bi mba yʉ́ ngu bʉya.