Ra xisu ra ꞌyomtꞌɛ̨ni
8
Pɛ nu ra Jesús bi mba bʉ ja ra nyuni Olivos. 2 Nɛ nuꞌbʉ tꞌʉxudi tho bi mbeng bʉ ja ra dąniją mahønꞌa nɛ bi hyupʉ. Nɛ gätho nan ngu yʉ jąꞌi bá ɛ̨hɛ nangueꞌa nɛ bi xänba ʉ. 3 Ya xí yą bʉ ra Jesús ꞌbʉ mí zøm bʉ yʉ fariseo nɛ yʉ xänbate niją, bi zispa nꞌda ra xisu gue bi nu ꞌbʉ mín yąui nꞌda ran ꞌyohʉ hing rá ndø. Nɛ bi mbäꞌminde bʉ ꞌbʉh yʉ jąꞌi. 4 Bi ꞌyɛ̨mpꞌa ra Jesús:―Xänbate, nuna ra xisu dá tįmhbe bʉ i øtꞌ ran ꞌyomtꞌɛ̨ni. 5 Nɛ nu ran tꞌɛ̨di bi xijʉ ra Moisés, tengu na bi ꞌyøtꞌ ra xisu ya, nɛ i jatho da mba ma batꞌado gue da du. Xiꞌe, ꞌbɛ go guí xije ya, bi ꞌyɛ̨nꞌʉ yʉ fariseo nɛ yʉ xänbate niją.
6 Pɛ guehna bi man ʉ nguetho i sätho ra Jesús, i honi ꞌbɛpʉ dí yąpi. Nɛ ꞌbex bi mbom thoho a ra Jesús nɛ bi ꞌyoꞌtꞌ rá saha bʉ häi tenguꞌbʉ hin xtá ꞌyøꞌa bi manꞌʉ. 7 Pɛ manꞌda bi thoqui bi ꞌyänni, nu ra Jesús bim ꞌbäh pʉya nɛ bi ꞌyɛ̨mpꞌʉ:
―Nuꞌbʉ ꞌbʉ a nꞌda ahʉ hinꞌyʉ ni tsꞌoquihʉ, gueꞌa di dʉꞌmi da ꞌyɛmba ra do ra xisu a.
8 Nɛ bi mboꞌmi mahønꞌa bʉ häi nɛ bi ꞌyoꞌtꞌ rá saha bʉ ja ra häi. 9 Nɛ nuꞌbʉ mí ꞌyøꞌʉ ꞌbɛꞌa bi man ra Jesús, bi dʉꞌmi ꞌdahmi ꞌdatho bi mba, mꞌbɛtꞌo bi mba a manꞌda xín dącꞌyɛi asta gueꞌbʉ go mín the ʉ yʉ yąpate, nguetho bi bąsɛ mbo yʉ́ mbʉi i ja yʉ́ tsꞌoqui. Nɛ høntꞌa ra Jesús bi gohmbʉ bʉ ʉ mí xänbi, nɛꞌa ra xisu. 10 Nɛ nuꞌbʉ mím ꞌbäꞌa ra Jesús nɛ bi nu njoꞌo bʉ yʉ yąpate, pɛ høntꞌa ra xisu bi gopʉ, bi ꞌyɛ̨mbi:
―Grá xisu, hapʉ bi mba ʉ bi yąpꞌi i. Ha njoꞌo ua ʉ in nde xtí ꞌdaꞌa rá muui ni tsꞌoqui.
11 Nɛ bi dąꞌa ra xisu:
―Grá Hmu, xínga nꞌda.
Nɛ nu ra Jesús bi ꞌyɛ̨mbi:
―Nɛcä, xínga guecä ga ꞌdaꞌa rá muui ni tsꞌoqui. Ní mba ya, pɛ hin gui ꞌyøtꞌ miꞌda yʉ tsꞌoqui.
Rá nyotꞌi yʉ́ mbʉi yʉ jąꞌi
12 Nu ra Jesús bi thoqui bi xänba yʉ jąꞌi mahønꞌa, bi ꞌyɛ̨na:
―Nugä, drá nyotꞌi yʉ́ mbʉi yʉ jąꞌi ꞌbʉcua ja ra ximhäi. Nuꞌa toꞌo da dɛngui him man ꞌyo bʉ ja ra ꞌbɛxui, pɛ din ja ran nɛqui yʉ́ mbʉi gue ra ꞌdaꞌyote maząi, bi ꞌyɛ̨mpꞌʉ.
13 Janangueꞌa nuꞌbʉ mi dą ʉ ꞌda yʉ fariseo mi ꞌbʉpʉ, bi ꞌyɛ̨mbi:
―Pɛ nuꞌi guím mansɛ ꞌbɛꞌa guí øzɛhɛ, janangueꞌa säti thoho a guím ma, sä bi ꞌyɛ̨nꞌʉ.
14 Nuꞌa ra Jesús bʉya bi dątꞌʉ nɛ bi ꞌyɛ̨mpꞌʉ:
―Madagueꞌbʉ dím mansɛ nanguesɛgä, pɛ di muui a, nguetho dí pącä hapʉ bá nɛxä nɛ hapʉ ná mbagä. Pɛ nu ahʉ hin guí pąhmbʉ hapʉ bá nɛxä o hapʉ ná mbagä. 15 Nuꞌehʉ sä gadí juąnbahʉ nꞌda ꞌbʉ hin guí pąhmbʉ xʉn ho ꞌbɛꞌa øtꞌa nꞌda. Pɛ nugä madagueꞌbʉ dí pądi ꞌbɛꞌa øtꞌa nꞌda, pɛ njon dadí juąnbä ya. 16 Pɛ nuꞌbʉ dím mangä ꞌbɛꞌa øtꞌa nꞌda, majuąni dím ma, nguetho hin dí ꞌdasɛ pɛ nꞌdatꞌa dím mamꞌbe ma Ta gue bá pɛngä ua. 17 Ntꞌoꞌtꞌi bʉ ja yʉn tꞌɛ̨di ząi guidín xähmbʉ, gue nuꞌbʉ yoho yʉn ꞌyohʉ ꞌdaꞌangu da ma ꞌbʉ xʉn juąnni, mfądi gue ya majuąni a bʉya. 18 Nugä dí xi ahʉ toꞌogä, nꞌdahma gui pąjʉ, nɛꞌa ma Ta bá pɛngä di jaqui da fąqui, bi ꞌyɛ̨na.
19 ꞌBex bi ꞌyɛ̨nꞌʉ:
―Hapʉ ꞌbʉh ni ta, bi ꞌyɛ̨mbi.
Nɛ nu ra Jesús bi dątꞌʉ:
―Hin guí pąjʉ, xínga gueꞌa ma Ta guí pąhmbʉ. Nuꞌbʉ xquí pąjʉ, nɛꞌa ma Ta xquí pąhmbʉ ꞌbʉ, bi ꞌyɛ̨na.
20 Nɛ guehna bi man ra Jesús ꞌbʉ mín xänbate bʉ ja ra dąniją guepʉ i pa mꞌbɛꞌtsꞌi ra mbɛti. Nɛ njom bi bɛntꞌi gue xtan gotꞌi nguetho hin ní zøn ra ora dim fɛntꞌi.
Him bi zä bi mbähä ra Jesús
21 Nu ra Jesús bi thoqui bi xih mahønꞌa ʉ:
―Nugä ga mbagä, nɛ mꞌbɛjua gui hyonjʉ, nɛ gui tuhʉ ꞌbʉ hin nín hotho ni tsꞌoquihʉ. Nubʉ hapʉ ga mbagä hin da zä gui mbähä bʉ, bi ꞌyɛ̨na.
22 Nɛ bi ꞌyɛ̨n ʉ ma ngʉrpihe:
―Ha din hyosɛ nanguesɛ nguetho bi ma: “Nubʉ ga mbagä, hin da zä gui mbähä bʉ,” bi ꞌyɛ̨njʉ, bi ꞌyɛ̨nꞌʉ.
23 Nɛ nuꞌa ra Jesús bi ꞌyɛ̨mpꞌʉ:
―Nuꞌahʉ i ja ahʉ rán ꞌyomfɛ̨ni ra ximhäi nguetho gyʉ mɛnguhʉ ua ja ra ximhäi. Pɛ nugä ꞌdaꞌangu dím bɛ̨mꞌbe Oją, nguetho hin dra mɛngugä ua ja ra ximhäi. 24 Janangueꞌa dí xi ahʉ, nuꞌbʉ hin gui ꞌyɛ̨cꞌyɛihʉ ꞌbɛꞌa dím mansɛ gue toꞌogä, gui tuhʉ nɛ njąmꞌbʉ din hoh ni tsꞌoquihʉ, bi ꞌyɛ̨na.
25 Nɛ bi ꞌyänꞌndʉ bʉya:
―Toꞌo i, bi ꞌyɛ̨nꞌʉ.
Nuꞌa ra Jesús bʉya bi ꞌyɛ̨mpꞌʉ:
―Ya xtá xi ahʉ toꞌogä nɛ guexta thohogä. 26 I ja manꞌda xʉn ngu ga xi ahʉ ꞌbɛpʉ nín ja ni tsꞌoquihʉ. Pɛ majuąni a dím ma nguetho majuąni a bá pɛngä. Nɛ nuꞌʉ yʉm hma di bɛ̨ngä a, gueꞌʉ dím mangä ua ja ra ximhäi ʉ, bi ꞌyɛ̨na.
27 Pɛ nuꞌʉ ma ngʉrpihe ꞌbʉ mí xi ʉ, him bi bą ʉ gueꞌa bi ma ra Jesús gue Oją bá pɛnhua. 28 Janangueꞌa xø bi ꞌyɛ̨nꞌa ra Jesús:
―Nuꞌbʉ gá cuarcahʉ bʉ magątsꞌi, guecä dán jąꞌigä ua ja ra ximhäi, mꞌbɛjua bʉya ja gui pąhmbʉ toꞌogä. Nɛ ja gui pąhmbʉ bʉya nte dím mansɛ, pɛ gätho xtá ma bi xänga ma Ta. 29 Nu a ma Ta gue bá pɛngä ua, nꞌdatꞌa dím bɛ̨mꞌbe, nɛ njąmꞌbʉ i sogä a nguetho ząi gätho dí øtꞌä a in numanho, bi ꞌyɛ̨nꞌa ra Jesús.
30 Nuꞌbʉ mí man na, xʉn ngu ʉ miꞌda bi ꞌyɛ̨cꞌyɛi mahønꞌa.
Yʉ́ ꞌyɛ̨hɛ a ra tsꞌoqui
31 Nɛ nu ra Jesús bi ꞌyɛ̨mpꞌʉ ꞌda ma mijudíohe ngue ɛ̨na bi ꞌyɛ̨cꞌyɛi a:
―Nuꞌbʉ gui thoqui gui tɛnhdʉ mam hmangä, majuąni ma ꞌyɛ̨cꞌyɛi ahʉ ꞌbʉ. 32 Nɛ da zä gui pąhmbʉ ꞌbɛꞌa nam bønꞌʉ yʉm hma majuąni, nɛ gueꞌa dí yąn ahʉ gue da zin ahʉ Oją, bi ꞌyɛ̨na.
33 Nɛ bi dą ʉ:
―Pɛ nugähe, dyʉm bomꞌbɛtoje ra Abraham janangueꞌa ya yʉ́ tꞌʉhnigähe Oją. Nɛ njąmꞌbʉ midí mandagähe manꞌda ra hmu. Hanja gní xije da mba nhyąnigähe gue da zinje Oją, bi ꞌyɛ̨nꞌʉ.
34 Nɛ nuꞌa ra Jesús bi ꞌyɛ̨mpꞌʉ:
―Majuąni dí xi ahʉ, nuꞌa toꞌo øtꞌ ra tsꞌoqui, rá hmu ra tsꞌoqui a. 35 Nɛhna manꞌda guim bɛ̨mhbʉ, hin gui sä gui comhbʉ ran ho ra Abraham, pɛ tenguꞌbʉ yʉ́ ꞌyɛ̨hɛ thoho ahʉ a. Pɛ høntꞌʉ njuąntho yʉ́ tꞌʉhni da gomhbʉ ran ho maząi. 36 Nugä njuąntho rá Tsꞌʉntꞌʉ Ojągä. Nɛ nuꞌbʉ guecä ga jʉcꞌahʉ bʉ ja yʉ tsꞌoqui, majuąni da zin ahʉ ma Ta nɛ yʉ́ tꞌʉhni ahʉ a ꞌbʉ. 37 Nɛ madagueꞌbʉ bi xąntꞌahʉ ra Abraham, tengugä, pɛ guín nde gui hyojʉ, nguetho hin hapʉ da zä da yʉtꞌ mam hma bʉ ja ni mbʉihʉ. 38 Høntꞌa bi ꞌyurcä ma Ta dím mangä. Ngutho ahʉ, høntꞌa bi ꞌyutꞌa ni tahʉ guí øthʉ, bi ꞌyɛ̨mpꞌʉ.
39 Nɛ bi dą ʉ ma mijudíohe mí ꞌbäpʉ:
―Ra Abraham ma tahe.
Nɛ nu ra Jesús xø bi ꞌyɛ̨mpꞌʉ:
―Nuꞌbʉ majuąni yʉ́ tꞌʉhni ahʉ ra Abraham xquí comhbʉ ran ꞌyomfɛ̨ni ra Abraham ꞌbʉ. 40 Pɛ nuya guín nde gui hyojʉ, guecä dí xi ahʉ a majuąni gueꞌa bi xänga ma Ta. Pɛ hinga ngubʉ bi ꞌyøtꞌ ra Abraham tengu guín nde gui ꞌyørcahʉ. 41 Janangueꞌa dí xi ahʉ, guí øthʉ rá ꞌbɛfi manꞌda ni tahʉ, bi ꞌyɛ̨na.
Nɛ ꞌbex bi ꞌyɛ̨nꞌʉ:
―Hin dyʉ ꞌbɛtatꞌʉhni gähe, pɛgue nꞌdatho ma tahe ꞌbʉi, Oją a, bi tꞌɛ̨mpꞌa ra Jesús.
42 Nuꞌa ra Jesús bi dątꞌʉ:
―Nuꞌbʉ da gueꞌa Oją ni tahʉ, xquí numanhojʉ ꞌbʉ, nguetho bá ɛ̨cä bʉ bí ꞌbʉ Oją. Nɛ hin bá ɛ̨cä nangue ma tsꞌɛdi zɛhɛ pɛ gueꞌa Oją bá pɛngä ua. 43 Hanja hingui sä gui pąhmbʉ ꞌbɛꞌa dím mangä. Nguetho hin guín nde gui pąhmbʉ a. 44 Nguetho ra zįthu ni tahʉ, nɛ guí honi gui ꞌyøthʉ rá pähä a. Nɛ nuꞌa, rá mbʉdi thoho bi dʉꞌmi bin hote, nɛ guetꞌʉ yʉ pa i ja bʉ ya i øthoho. Nɛ nuꞌa, him bin ząmmi a majuąni nguetho him bi numanho a. Nɛ hønt yʉ fɛhni manꞌa nguetho rám ꞌbäi a. Nɛ in ta nangue gätho yʉ fɛhni. 45 Pɛ nugä dím ma majuąni, janangueꞌa hin guí ɛ̨cꞌyɛigahʉ. 46 Toꞌo ahʉ da ma majuąni dí øtꞌ ran tsꞌo o gue dím man ra fɛhni. Pɛ nuꞌbʉ gätho majuąni a dí xi ahʉ, hanja hingui sä gui ꞌyɛ̨cꞌyɛihʉ. 47 Nuꞌa toꞌo bim ꞌbʉi nangue Oją, i ømanho rám hman Oją a, pɛ nuꞌahʉ hin guí ømanho rám hman a nguetho hin gám ꞌbʉhmbʉ nangue Oją, bi ꞌyɛ̨nꞌa ra Jesús.
Ya xmí ꞌbʉh ra Cristo ꞌbʉ hin ním ꞌbʉh ra Abraham
48 ꞌBex bi dąꞌʉ ma mijudíohe bʉya:
―Ha him majuąni dím mamhbe, gue nuꞌi grá mɛngu bʉ Samaria, gue him majuąni grá mbomꞌbɛto ra Abraham. Nɛ guí ꞌbʉhmi nꞌda ra zįthu, sä bi ꞌyɛ̨nꞌʉ.
49 Nu ra Jesús bi dątꞌʉ:
―Nugä hin dí ꞌbʉꞌbe nꞌda ra zįthu pɛ dí numansu ma Ta. Nuꞌahʉ hin guí numansujʉ. 50 Nɛ hin dí honi gue da hnumansugui pɛ i ꞌbʉ a nꞌda gue i honi da hnumansugui, nɛ di ʉnbi toꞌo hingui numansugui. 51 Majuąni dí xi ahʉ, nuꞌa toꞌo da ꞌyɛ̨cꞌyɛi a dím mangä hin da nu ran dąte a, bi ꞌyɛ̨na.
52 ꞌBex bi dąꞌʉ ma mijudíohe:
―Nuya dí pąhmbe go gueꞌe guí ꞌbʉhmi a ra zįthu, nguetho bi du ra Abraham nɛ gätho yʉ́ pøngahyą Oją, pɛ sä guí ɛ̨na, hin da du toꞌo da ꞌyɛ̨cꞌyɛi i. 53 Ha guí ɛ̨na manꞌda guín nuįxte xinda gueꞌa ma tahe ra Abraham nɛ ʉ yʉ pøngahyą, nɛ mayaꞌbʉ xʉn du ʉ. Toꞌo guí ɛ̨na gue gueꞌe ꞌbʉ, bi ꞌyɛ̨nꞌʉ.
54 Nuꞌa ra Jesús bi dątꞌʉ:
―Nuꞌbʉ xcá honi dan nuįxte zɛhɛgä, säti thoho ꞌbʉ. Pɛ nangue a rá tsꞌɛdi ma Ta, gueꞌa nán nuįxtegä a, gueꞌa guí ɛ̨mfʉ ni Ojąhʉ. 55 Pɛ njąmꞌbʉ gá pąhmbʉ a. Pɛ nugä dí pącä a, nɛ nuꞌbʉ xcá mangä hin dí pącä a, xcám fɛhnigä ꞌbʉ, tengu ahʉ. Pɛ majuąni dí pącä a nɛ dí øtꞌa im man a. 56 Nu a ra Abraham, ząi guí ɛ̨mfʉ ni tahʉ, pɛ bin johya ꞌbʉ mi bądi da zøn ra pa ba ɛ̨cä ua. Nɛ bi tꞌuti gue ga søcä ua, nɛ bin johya ꞌbʉ mi nugui, bi ꞌyɛ̨na.
57 Nɛ sä ꞌbex bi ꞌyɛ̨mpꞌʉ ma mijudíohe:
―Hin guí pɛꞌtsꞌi yote ma ꞌdɛtꞌa njɛya nɛ guí ɛ̨na gá nu ra Abraham, bi ꞌyɛ̨nꞌʉ.
58 Nɛ nu ra Jesús bi ꞌyɛ̨mpꞌʉ:
―Majuąni dí xi ahʉ, nuꞌbʉ hin ním ꞌbʉh ra Abraham, xmí ꞌbʉcä, nguetho ząi dí ꞌbʉi, bi ꞌyɛ̨mpꞌʉ.
59 ꞌBex bi gʉx yʉ do ʉ, ɛ̨na di batꞌi, pɛ nu ra Jesús ꞌbex bi yʉtꞌi nde bʉ ꞌbʉh yʉ jąꞌi, bin ꞌyąni nɛ bi bøm bʉ ja ra dąniją bʉya.