Ra xädä ꞌbʉ mim ꞌbʉi bi yąni
9
Nuꞌbʉ má mbähmbe bʉ ꞌyu ra Jesús, dá nuhe nꞌda ran ꞌyohʉ, ra xädä gueꞌbʉ go mim ꞌbʉi. 2 Nɛ nugähe dyʉ xädihe dá änhde:―Xänbate i, toꞌo bi ꞌyøtꞌ ra tsꞌoqui, ha gueꞌa rá ta o gue rá mbe, uague rá tsꞌoqui zɛhɛ gue bin xädä, dí ɛ̨mfe.
3 Nuꞌa ra Jesús bi ꞌyɛ̨ngähe:
―Xínga guehna ran ꞌyohʉ nɛ xinga gueꞌa rá ta nɛ xínga gueꞌa rá mbe, pɛ høntꞌa ran tꞌøtꞌe nuįxte da ꞌyørpa Oją gue da nu yʉ jąꞌi. 4 Nujʉ i jatho ga humbi ga ørpahʉ rá ꞌbɛfi Oją ya tenguꞌbʉ ma patho ya, nguetho da zøn ra pa ga tuhʉ, nɛ hin man da zä ga øthʉ ra ꞌbɛfi ua ja ra ximhäi bʉya. 5 Nuꞌbʉ dí ꞌbʉcua ja ra ximhäi dí xänba yʉ jąꞌi, tenguꞌbʉ dí xocpa yʉ́ dä da nu ran nɛqui, bi ꞌyɛ̨nje.
6 Nuꞌbʉ mí juaꞌa bi ma, bi zoh rá jįni bʉ häi, nɛ í ꞌyøtꞌ ra bøhäi rá jįni nɛ gueꞌa í gospa rá dä ra xädä a bʉya. 7 Nɛ bi ꞌyɛ̨mpꞌa ra xädä:
―Ní mba bán xʉdä nʉ ja ra mbothe Siloé.
Bi mba nɛ bán xʉdä. Nɛ nuꞌbʉ mam bá pengui in nu ran nɛqui bʉya. 8 Nɛ nuꞌʉ din tøtꞌamꞌbʉihʉ nɛꞌʉ miꞌda yʉ jąꞌi gue ząi mín nu ꞌbʉ mín xädä, nuꞌbʉ mín nu ʉ, bin ꞌyɛ̨mpꞌʉ:
―Ha hinga guehnʉ ra xädä nʉ mí hąxtaꞌa ꞌbɛꞌa mí si.
9 ꞌDaꞌʉ bi ma:
―Guehnʉ.
Nɛ nuꞌʉ miꞌda bi ꞌyɛ̨na:
―Ɛ̨na ngunʉ a pɛ hinga guehnʉ.
Pɛ nu ra xädä bi dądi:
―Guecä, bi ꞌyɛ̨nꞌa.
10 Nɛ bi ꞌyänꞌdʉ bʉya:
―Hague nja bi xoh ni dä.
11 Nɛ nu ra xädä bi dądi:
―Nuꞌa ran ꞌyohʉ rá thuhu ra Jesús bi ꞌyøtꞌ ra bøhäi nɛ bi gosca ma dä. Nɛ bi ꞌyɛ̨ngä: “Ní mba bʉ ja ra mbothe Siloé nɛ guan xʉdä bʉ,” bi ꞌyɛ̨ngä a. Nɛ dá mba dán xʉdä, nɛ bi zä dá nu ran nɛqui ma dä bʉya, bi ꞌyɛ̨na.
12 Nɛ bi tꞌɛ̨mpꞌa:
―Hapʉ i ꞌbʉ a.
Nɛ bi dąh pʉya:
―Hin dí pądi, bi ꞌyɛ̨ntho.
Bi tꞌørpa ran tꞌänni a mí xädä
13 Nɛ bi zix bʉ ꞌbʉh yʉ fariseo bʉya. 14 Nuꞌa ra pa bi ꞌyøtꞌ ra bøhäi ra Jesús nɛ bi xocpa rá dä ra xädä, ra pa ran tsꞌäya a. 15 Nu yʉ fariseo bi ꞌyänni mahønꞌa:
―Hague nja bi nu ran nɛqui ni dä.
Nɛ bi ꞌyɛ̨mpꞌʉ:
―Bi gosca ra bøhäi ma dä, nɛ bán xʉdä, nɛ nuya dín nu ran nɛqui, bi ꞌyɛ̨na.
16 Janangueꞌa bi ꞌyɛ̨nꞌʉ ꞌda yʉ fariseo:
―Nuꞌa ran ꞌyohʉ guím ma, hingui numansu Oją nguetho hingui numansu ra pa ran tsꞌäya, sä bi ꞌyɛ̨nꞌʉ.
Pɛ nuꞌʉ miꞌda ʉ bi ꞌyɛ̨na:
―Pɛ nuꞌbʉ ra tsꞌomꞌbäi hin xtán zä da ꞌyøtꞌ yʉn tꞌøtꞌe nuįxte gue i øtꞌa.
―ꞌBɛꞌa guím ma nangueꞌa bi xocꞌa ni dä.
Nɛ bi ꞌyɛ̨na:
―Nuꞌa, nꞌda rá pøngahyą Oją a, bi ꞌyɛ̨na, nɛ bi bøm bʉya.
18 Pɛ nuꞌʉ him bi ꞌyɛ̨cꞌyɛi gue gueꞌa mí xädä, jagueꞌbʉ mí zonpa a rá ta nɛ rá mbe. 19 Nɛ bi ꞌyänꞌdʉ:
―Ha gueꞌa ni tsꞌʉntꞌʉui gue mí xädä a. Hague nja in nu ran nɛqui ya, bi ꞌyɛ̨nꞌʉ.
20 Bi dąꞌa rá mbe nɛ rá ta:
―Dí pąꞌbe gue gueꞌa ma tsꞌʉntꞌʉꞌbe gue mí xädä ꞌbʉ mim ꞌbʉi. 21 Pɛ hin dí pąꞌbe hague in ja in nu ran nɛqui ya, hin dí pąꞌbe toꞌo bi xocpa rá dä. Nuꞌa xʉn dąnꞌyohʉ ya, dami ꞌyänhdʉ, da mansɛ toꞌo.
22 Ngubʉ bi man rá ta nɛ rá mbe nguetho i su ma ngʉrpihe dyʉ judíohe. Gue bi zänꞌna nꞌda ra nde, gue da hyønꞌa thi bʉ ja ra niją ʉ toꞌo da ma bá pɛnh Oją a ra Jesús, nɛ ma zä hin da hnumanho bʉ ja yʉ́ hnini. 23 Janangueꞌa bi ꞌyɛ̨ntho rá ta nɛ rá mbe: “Xʉn dąnꞌyohʉ ya, dami ꞌyänhdʉ,” bi ꞌyɛ̨ntho ʉ.
24 Janangueꞌa bi zonh mahønꞌa ran ꞌyohʉ mí xädä, nɛ bi ꞌyɛ̨mpꞌa:
―Pɛ dami ma majuąni gue gueꞌa Oją bi xocꞌa ni dä. Pɛ nuꞌa ran ꞌyohʉ gá ma, dí pąhmbe ra tsꞌomꞌbäi a, bi ꞌyɛ̨nꞌʉ.
25 Nɛ nuꞌa mí xädä bi dądi:
―Hin dí pącä ꞌbʉ ra tsꞌomꞌbäi a, o gue hinꞌna, pɛ høntꞌa dí pądi mí xädägä, nɛ dín nu ran nɛqui ya.
26 Nɛ bi ꞌyɛ̨mbi mahønꞌa:
―ꞌBɛꞌa bi ꞌyøtꞌaꞌi ꞌbʉ mí xocꞌa ni dä.
27 Nɛ bi dąꞌa:
―Nugä ya xtá xi ahʉ nɛ hin gá ꞌyɛ̨cꞌyɛihʉ. Ha gui ꞌyɛ̨cꞌyɛihʉ ꞌbʉ ga xi ahʉ mahønꞌa. Ha nɛ ahʉ guín nde gui tɛnhdʉ a ꞌbʉ, bi ꞌyɛ̨na.
28 ꞌBex bin sante thoho ʉ ꞌbʉ mí ꞌyɛ̨mpꞌa:
―Nuꞌi rá xädi i a ra tsꞌomꞌbäi. Pɛ nugähe yʉ́ xädigähe a ra Moisés. 29 Dí pąhmbe Oją bin yąui ra Moisés, pɛ nuꞌa ran ꞌyohʉ guí ɛ̨spi hin dí pąhmbe hapʉ bi nɛxꞌa rán tꞌɛ̨di a, bi ꞌyɛ̨nꞌʉ.
30 Bi dąꞌa mín xädä bʉya:
―Nugä dadí hyonya thoho nangueꞌa gá mamhbʉ, gue hin guí pąhmbʉ hapʉ bí ꞌyɛ̨ a rán tꞌɛ̨di, nɛ ya bi xoga ma dą a. 31 Nɛ dí pąhmbʉ hin da ꞌyømanho Oją ꞌbʉ da ꞌyäp rá tsꞌɛdi nꞌda ra tsꞌomꞌbäi, pɛ nuꞌbʉ ꞌbʉ a nꞌda i thąnde Oją nɛ ørpa rá pähä, i ø Oją ꞌbʉ i äp rá tsꞌɛdi. 32 Nɛ gätho yʉ jɛya xʉ thogui njąmꞌbʉ bim ꞌbʉ a nꞌda bi xocpa rá dä nꞌda mi xädä ꞌbʉ mím ꞌbʉi. 33 Nuꞌa ran ꞌyohʉ dím ma, nuꞌbʉ hin di fäx Oją a, hin te sä da ꞌyøt yʉ nuįxte ꞌbʉ, bi ꞌyɛ̨nꞌa mí xädä.
34 Nɛ bi tꞌɛ̨mpꞌ mahønꞌa:
―Nuꞌi grá dąditsꞌoqui, janangueꞌa guí xädä ꞌbʉ gmím ꞌbʉi. Ha go gui xängahe, bi ꞌyɛ̨n ʉ.
Nɛ bi hyøn a thi gue ma zä hin da numanho ma mijudíohe bʉya.
I xädä yʉ́ mbʉi ʉ ꞌda
35 Nuꞌbʉ mí ꞌyøꞌa ra Jesús gue bi thønꞌa thi ra xädä, bi dįni nɛ bi ꞌyänni:
―Ha guí ɛ̨cꞌyɛi rá tsꞌʉntꞌʉ Oją, bi ꞌyɛ̨mbi.
36 Nɛ bi dątꞌa:
―Ma Hmu, toꞌo a guím ma. Dami xiqui tsꞌʉ, ga ɛ̨cꞌyɛi a, bi ꞌyɛ̨na.
37 Nɛ nu ra Jesús bi ꞌyɛ̨mpꞌa:
―Guecä guín nug ya, nɛ dí yąui ya.
38 Nɛ bi ꞌyɛ̨mbi:
―Ma Hmu i, dí ɛ̨cꞌyɛi a ya.
―Janangueꞌa dám ꞌbʉcä ua ja ra ximhäi, gue ga japi di nɛqui ꞌbɛꞌa mbɛ̨ni nꞌda ngu nꞌda. Nɛ nuꞌʉ i xädä da nu ran nɛqui, nɛ nuꞌʉ in nu ran nɛqui din xädä, bi ꞌyɛ̨na.
40 Nɛ nuꞌʉ ꞌda yʉ fariseo bi ꞌyøh rám hman a, bi ꞌyɛ̨nꞌʉ:
―Ha nɛcähe dí xädähe, bi ꞌyɛ̨nꞌʉ.
41 Nɛ nu ra Jesús bi ꞌyɛ̨mpꞌʉ:
―Nuꞌbʉ xquí pąhmbʉ gue guí xädähʉ, xtán zä xtím punꞌnahʉ ꞌbʉ nɛ njon xtá xi ahʉ gue ja ni tsꞌoquihʉ bʉya. Pɛ guí ɛ̨nsɛhʉ guín nuhʉ ran nɛqui, janangueꞌa hin dim punꞌna ni tsꞌoquihʉ, bi ꞌyɛ̨nꞌa ra Jesús.