Hechos 27

Bi ꞌbɛnpʉ Roma a ra Pablo

Nuꞌbʉ ya xí hma ngue ga huhe ra barco, nɛ ga mbäcähe bʉ Roma, ra häi Italia, nu ra Pablo nɛ miꞌda yʉ ofädi bi mba ma däpi a ra ngʉrpadofʉi, rá thuhu ra Julio, rá ngʉrpadofʉi ra hmutsꞌʉtꞌabi Augusto bʉ Roma. 2 Dá huhe ra barco ngue bi nɛxpʉ ra hnini Adramitio, nɛ ɛ̨nꞌʉ da thopʉ ja yʉ hnini bʉ ja ndendeją bʉ ra häi Asia. Dá nɛxhe bʉ bʉya, nɛ dá mbähmbe ra Aristarco, ra mɛngu ra hnini Tesalónica bʉ ra häi Macedonia. 3 Nu manꞌda pa dá sømhbe bʉ ra hnini Sidón, dán säyahe bʉ. Nu ra Julio min yąmanhoui ra Pablo, nɛ bi un ran tꞌɛ̨di da mba bʉ ꞌbʉh yʉ́ amigo. Nɛ nu yʉ́ amigo bi un ran säya. 4 Nɛ nuꞌbʉ má nɛxhe bʉ, dá thohmbe bʉ nthɛ̨ꞌtꞌi ra tꞌʉhäi Chipre i ja bʉ made ra deją. Dá thothe bʉ nꞌdanguadi nguetho ɛ̨mmɛ tsꞌɛdi ran dąhi bʉ njombʉ. 5 Mꞌbɛjua dá thohmbe bʉ ja ra häi Cilicia nɛ ra häi Panfilia ja bʉ ndendeją. Dá sømhbe bʉ ra hnini Mira bʉ ra häi Licia.

6 Guepʉ bi dįm bʉ nꞌda ra barco a ra hmudofʉi ngue bá nɛxpʉ Alejandría, ní mba bʉ ra häi Italia. Nɛ nuꞌa ra hmudofʉi bi jaje dá huhe ra barco. 7 Nɛ xʉn ngu yʉ pa zʉ njante thoho dán ꞌyohe bʉ ja ra deją, nɛ xʉn hɛ̨i dá thohmbe bʉ gätho rá nyąni ra tꞌʉhäi Gnido. Nu ran dąhi him bi jaje njuąntho dá uɛ̨nthe, janangueꞌa yabʉ dá cäthe njombʉ ja ra tꞌʉhäi Creta, guepʉ nthɛ̨ꞌtꞌi ra tꞌʉhäi Salmón. 8 Nɛ xʉn hɛ̨i dá thohmbe bʉ gätho rá nyąni ra tꞌʉhäi Creta, nɛ dá sømhbe bʉ ja yʉ́n säya yʉ barco, tꞌɛ̨mbi Buenos Puertos. Nɛ hinga yabʉ ja ra hnini Lasea.

9 Nɛ xʉn ngu yʉ pa ya dá ꞌbɛhmbe nangue ran dąhi, nɛ ntsꞌutho bʉ dín ꞌyo ra barco bʉ ja ra dehe, nguetho yʉ pa ya i ja yʉn dąhi. 10 Nuꞌa ra Pablo bi xiꞌʉ min ꞌyohʉ:

―Nꞌyohʉ ahʉ dí xi ahʉ, nuꞌbʉ ga thohmbʉ, ga nuhʉ nꞌda ra ꞌyąnthį nguetho xʉn hɛ̨i thoho bʉ dí mba ma ꞌyoni ra barco. Nɛ hinga høntꞌa ra barco nɛ ra ꞌbɛni ga ꞌbɛhmbʉ, pɛ tsꞌʉrpʉ thoho nɛcähʉ ga tuhʉ, bi ꞌyɛ̨mpꞌʉ.

11 Pɛ nu ra hmudofʉi manꞌda mi ɛ̨cꞌyɛi ꞌbɛꞌa bi ma rá mbɛti ra barco nɛ ra hmu ngue madí ꞌyoni, xinda gueꞌa ꞌbɛꞌa mi man ra Pablo. 12 Nubʉ Buenos Puertos hingui ho ngue da gopʉ ra barco yʉ pa xʉ sɛ. Janangueꞌa nuꞌʉ mbɛ gätho ʉ mi ɛ̨na xcá sømhbe bʉ ra hnini Fenice, guepʉ xcám ꞌbʉhmbe yʉ pa xʉ sɛ. Nubʉ Fenice, ra hnini bʉ ra tꞌʉhäi Creta, manꞌda ja yʉ́n säya xʉn ho bʉ yʉ barco, nguetho hin ɛ tsꞌɛdi thopʉ ran dąhi.

Ran dąhi bi ꞌyɛn ra deją

13 Nɛ nꞌda ra pa bi pom bʉ bí ꞌyɛ̨h ran dąhi, nɛ hinga ntsꞌɛdi i ꞌyo. Nɛ ɛ̨nꞌʉ xʉn ho ꞌbʉ da thogui. Janangueꞌa bi gʉxꞌa ra tꞌɛgui mi o bʉ mbo ra dehe, ngue rán tsꞌąmmi ra barco. Dá thohmbe bʉya, zʉ njante thoho á thoꞌa ndendeją ra barco bʉ ra tꞌʉhäi Creta. 14 Nɛ ꞌbex bá ɛ̨ꞌa nꞌda ran dąhi ɛ̨mmɛ ntsꞌɛdi, bá nɛxpʉ Creta. 15 Nɛ nuꞌbʉ mí mbʉdi bi ndøn ra barco ran dąhi, him mí sä da mba ma ꞌyoni bʉya, dán unthe bʉya, nɛ dá tɛndahe ran dąhi bʉ í mba. 16 Nɛ dá cäthe bʉ hɛ̨rpʉ ja ra tꞌʉhäi Clauda i ja bʉ made ra deją, nguetho bi täcꞌi tsꞌʉ ran dąhi ra häi. Nɛ xʉn hɛ̨i bʉ dá jʉxhe bʉ mbo a nꞌda zʉ tꞌʉbarco ngue mí jʉtꞌa ra barco. 17 Nɛ nuꞌbʉ mi cʉrpʉ mbo ra tꞌʉbarco, bi mba mꞌbänba yʉ xąhi a ra barco ngue hin da xøꞌtsꞌ yʉ xithɛ. Nɛ nuꞌʉ bʉya mí supi da ꞌyɛn ran dąhi ra barco bʉ ja ra ꞌbomu, nɛ da dontpʉ guepʉ tꞌɛ̨mbi Sirte. Janangueꞌa bi gącua yʉ́n thäcan dąhi ra barco. Nɛ bi duxtho ran dąhi ra barco bʉ ja ra dehe. 18 Manꞌda pa bʉya bi dʉꞌmi bi hyørpʉ ja ra dehe yʉ ꞌbɛni mi høpʉ mbo ra barco, ndepe hin di hyʉ ra barco, nguetho ɛ̨mmɛ ntsꞌɛdi mi ɛnje ran dąhi. 19 Nɛ ná hyu pa bʉya dá sosɛgähe, dá hømhbe thi ꞌbɛꞌa gätho mí honi ꞌbʉ di ꞌyon ra barco. 20 Nɛ xʉn ngu yʉ pa ɛ̨mmɛ mi ja yʉ güi, nɛ nyaꞌa him bin cꞌą ra hyadi, xínga gue yʉ sø ꞌbʉ xʉn xui. Nɛ dá nuhe nꞌda ran dątendąhi ɛ̨mmɛ ntsꞌutho. Nɛ dí su ga tuhe.

21 Nɛ nyaꞌa thoho njom bin sihmɛ. Nu ra Pablo bim ꞌbäi bi ꞌyɛ̨na:

―Nꞌyohʉ ahʉ ndeꞌbʉ xquí ꞌyøde ꞌbɛꞌa dá mangä. Ndeꞌbʉ xcambán säyahʉ bʉ Creta, nɛ hin xcá nuhʉ ran ʉnbi ya, nɛ hin xquí ꞌbɛh ni ꞌbɛnihʉ. 22 Pɛ nuya, o di tu ni mbʉihʉ, nguetho xínga nꞌda ahʉ gam ꞌbɛhmbʉ, pɛ høntꞌa ra barco dim ꞌbɛdi. 23 Nguetho dám ꞌbäꞌbe nꞌda rám ꞌbɛhni Oją mahɛ̨tsꞌi má xui, gue nugä rá mbɛtigä Oją nɛ dí thąnde a. 24 Nɛ nuꞌa ram ꞌbɛhni bi xiqui: “O guín su Pablo, nguetho jatho da mba ma däꞌi bʉ ꞌbʉh ra hmutsꞌʉtꞌabi bʉ Roma. Nɛ nuꞌa Oją hin di japi da du ʉ guí ꞌbʉhmbʉ ua ja ra barco, tengu gá ꞌyäpi,” ɛ̨nꞌa rám ꞌbɛhni Oją mahɛ̨tsꞌi. 25 Nuya, nꞌyohʉ ahʉ, dan johyahʉ, nguetho dí ɛ̨cꞌyɛi gue majuąni da ꞌyøtꞌ Oją tengu bi xic rám ꞌbɛhni. 26 Pɛ nu ran dąhi da ꞌyɛnjʉ bʉ ja nꞌda ra tꞌʉhäi i ja bʉ made ra dehe, bi ꞌyɛ̨nꞌa ra Pablo.

27 Nɛ nuꞌbʉ ya xí guaꞌi ꞌdɛꞌma goho ma pa dí ꞌyohe, nubʉya bi ꞌyɛngähe ran dąhi bʉ ja rá xɛqui ra deją tꞌɛ̨mbi Adria, ꞌbʉ min xui. Nɛ nuꞌʉ yʉ mbɛfi gue di ꞌyon ra barco, mím bɛ̨ni hinga yabʉ ja nꞌda ra häi. 28 Nɛ bi ꞌyɛni hangu nan hɛ̨ ra dehe, ꞌdäte ma ꞌdɛꞌmaꞌdato metro nan hɛ̨. Nɛ bi dąnꞌi tsꞌʉ ra barco, bi ꞌyɛni mahønꞌa, nɛ nuya høntꞌi ꞌdäte ma yoto metro nan hɛ̨ ra dehe. Janangueꞌa bi bądi him ma yatho bʉ ndenthe. 29 Nuꞌʉ mi supi da zøm bʉ ndenthe ra barco, gue din thɛhʉ yʉ do. Janangueꞌa bi ꞌyɛntꞌi goho yʉ tꞌɛgui ngue yʉ́n tsꞌąmmi ra barco, bi ꞌyɛntpʉ ja rá xʉthä ra barco, ndepe hin din ꞌyo. Nɛ ɛ̨mmɛ mi xønni din nɛqui. 30 Nu yʉ mbɛfi di ꞌyon ra barco mim bɛ̨ni xtá ꞌdagui, bi cąꞌma manꞌda ra tꞌʉbarco bʉ ja ra dehe. Pɛ bin häte, nguetho ɛ̨na gueꞌʉ yʉ tꞌɛgui xtá ꞌyɛntꞌ miꞌda bʉ ja rá yą ra barco, gue yʉ́n tsꞌąmmi. 31 Pɛ nu ra Pablo bi ꞌyɛ̨mpꞌa ra hmudofʉi, nɛꞌʉ yʉ dofʉi:

―I nde da ꞌdah yʉ di ꞌyon ra barco, pɛ nuꞌbʉ da ꞌdah yʉ, hin da zä gui ponjʉ ꞌbʉ.

32 Nu yʉ dofʉi bʉya bi hyɛcua yʉ́n thątꞌi ra tꞌʉbarco, nɛ bi dux ra dehe, janangueꞌa njom bi ꞌdagui.

33 Nɛ nuꞌbʉ tꞌʉnɛqui tho nuꞌa ra Pablo bi xifi ndeꞌbʉ din sihmɛ. Bi ꞌyɛ̨na:

―Nuya, ná ꞌdɛꞌmagoho ma pa ya ngue mí tutho ni mbʉihʉ, nɛ hin gán sihmɛhʉ. 34 Nuya dí øtꞌahʉ ra tsꞌɛdi gui sihʉ tsꞌʉ ra hmɛ. Nuꞌa dí zac ni jąꞌihʉ a, nɛ guepʉ da zä xínga nꞌda gam ꞌbɛhmbʉ nɛ njon din ʉnbi, xíngui tsꞌʉ.

35 Nɛ nuꞌbʉ mi juaꞌa bi manꞌa ra Pablo bi hyąca nꞌda ra thuhmɛ, bi un ra jamadi Oją bʉ ja yʉ́ hmi gätho mí ꞌbʉpʉ, nɛ bi xɛni bi dʉꞌmi bi zi. 36 Nuꞌa bi man ra Pablo bi hyurpa yʉ́ mbʉi ʉ, bin sihmɛ tsꞌʉ bʉya. 37 Nɛ nugähe í juaje yociɛnto nɛ hyąte ma ꞌdɛꞌma ꞌdato njąꞌi mi ꞌbʉhmbe bʉ ja ra barco. 38 Nɛ nuꞌbʉ mi juadi bin sihmɛ ʉ, nuꞌa ra trigo mi høpʉ ja ra barco bi hyøm bʉ ja ra dehe, ndepa dí cąh nan hyʉ ra barco.

Bi xɛn ra barco ra dehe

39 Nɛ nuꞌbʉ mí hyatsꞌi, him mi pądi ꞌbɛꞌa rá thuhu ra häi bi hyandi. Nuꞌbʉ mi nu mi ja bʉ nꞌda ra ꞌyɛthe gue him mí ja yʉ do, guepʉ mim bɛ̨ni mi sä xtí cʉꞌtꞌ ra barco. 40 Bi hyɛcua yʉ́n thątꞌi yʉn tsꞌąmmi bʉya, bi zopʉ dehe. Nɛ bi xocua yʉ́n thuꞌtꞌi yʉ́n thäcadehe ngue yʉ́m ꞌbäꞌtꞌi ra barco. Nɛ bi ꞌyɛ̨spa mahønꞌa nꞌda ran thäcandąhi. Nu ran dąhi bʉya bi ꞌyon ra barco, nɛ bi dʉꞌmi bi hyäm bʉ ja ra ndendeją. 41 Pɛ nuꞌbʉ má sømhbe hapʉ hingui hɛ̨ ra dehe, dán tįmhbe bʉ yoho yʉ ꞌyɛthe, nꞌda nꞌdanni ní yɛ̨hɛ. Nuꞌa rá yą ra barco bi yʉrpʉ ja ra ꞌbomu nɛ bin dʉ bʉ, nɛ him mi sä da thogui. Pɛ nu rá xʉthä bʉya bi mbʉdi bi xɛn ra dehe, nguetho ntsꞌɛdi din thɛ bʉ yʉ dehe. 42 Nu yʉ dofʉi bʉya, ɛ̨na da hyo yʉ ofädi, ngue mi supi din xaha, da ꞌdagui. 43 Pɛ nu ra hmudofʉi him mi ndepe gue nɛ ra Pablo da tho, him bi japi da ꞌyøtꞌe ꞌbɛꞌa mim bɛ̨nꞌʉ yʉ dofʉi bʉya. Bi manda ngue toꞌo pąh nan xaha, ra mbʉdi da zo bʉ ja ra dehe nɛ din xaha, da zøm bʉ ja ra häi. 44 Nɛꞌʉ miꞌda ngue him mi pąh nan xaha, bi ꞌyoxpʉ ja yʉ xithɛ o gue yʉ xɛca barco. Nɛ gätho bi zømanho bʉ ja ra häi.