Nu ra Pablo bin juąn zɛhɛ bʉ ꞌbʉh ra tsꞌʉtꞌabi Agripa
26
Nuꞌa ra Agripa bi xiꞌa ra Pablo:―Da zä gui mansɛ nangueꞌa zɛhɛ, bi ꞌyɛ̨mbi.
Nu ra Pablo bi uąn rá ꞌyɛ nɛ bi ma nanguesɛ. Bi ꞌyɛ̨na:
2 ―I jagä ran johya, nguetho sä dam ꞌbäcä ua ja ni hmi, gra tsꞌʉtꞌabi Agripa, nɛ sä gam mangä nangue ꞌbɛꞌa í yącpä ma mijudíohe. 3 Nguetho guí pądi xʉn ho ꞌbɛꞌa gätho yʉ́n tꞌøtꞌe yʉ judío, nɛ guí pądi ꞌdahma ꞌdanꞌyo ma tꞌɛ̨cꞌyɛihe dyʉ judíohe. Janangueꞌa dí äꞌa ra mate, gui ꞌyøꞌi tsꞌʉ xʉn ho ꞌbɛꞌa gam mangä.
Rám ꞌbʉi ra Pablo ꞌbʉ hin ní ꞌyɛ̨cꞌyɛi
4 Nuꞌʉ gätho ma mijudíohe i pądi ꞌbɛꞌa ním ꞌbʉi dá øtꞌä bʉ ꞌbʉh ma mɛnguhe, ꞌbʉ mán tꞌʉhnigä nɛꞌbʉ mám ꞌbʉcä bʉ Jerusalén, asta guehya. 5 Nuꞌʉ hinꞌyʉ ra pähä da ma, pɛ mayaꞌbʉ mi pądi ngue nyaꞌa thoho dá tɛnni xʉn ho tengu man yʉ fariseo. Nu yʉ fariseo manꞌda ɛ̨hya da ꞌyøtꞌ man tꞌɛ̨dihe dyʉ judíohe xinda gueꞌʉ miꞌda. 6 Nuya dí ꞌbäcua ja ran juąnbate, nangueꞌa ꞌbɛꞌa dí ɛ̨cꞌyɛi. Nugä dí ɛ̨cꞌyɛi ꞌbɛꞌa bi xiꞌa Oją ma ngʉrpa bombøtahe, ngue da xoxꞌʉ xʉn du. 7 Nugähe yʉ́m bomꞌbɛto ʉ ꞌdɛꞌmayoho yʉ́ tsꞌʉntꞌʉ ma ngʉrpa bombøtahe ra Jacob, dí ɛ̨hyahe ma pa nɛ ra xui nangue rá ꞌbɛfi Oją. Nɛ nugähe dí tømhbe ꞌbɛꞌa bi man Oją, gue da xoxꞌʉ xʉn du. Nugä dí ɛ̨cꞌyɛi gue majuąni bi dʉꞌmi bi ꞌyøtꞌa, nɛ gueꞌa ní yącpä ya ma mijudíohe, ma tsꞌʉtꞌabi Agripa i. 8 Hanja gní bɛ̨mhbʉ ngue hingui sä Oją da xoxꞌʉ xʉn du, bi ꞌyɛ̨nꞌa ra Pablo.
Bi man ra Pablo madí ʉnba yʉ ꞌyɛ̨cꞌyɛi
9 Nɛ xø bi ꞌyɛ̨m mahønꞌa:
―Guec zɛhɛgä, nyaꞌa thoho dá bɛ̨ngä ngue mi ɛ̨ngä xʉn ho ꞌbʉ ga sʉcä ra Jesús, ra mɛngu Nazaret. 10 Nubʉ Jerusalén xʉn ngu yʉ ꞌyɛ̨cꞌyɛi dá cotꞌa fädi, nguetho bi ꞌdacä ran tꞌɛ̨di yʉ hmumbäją. Nɛ nuꞌbʉ mi tꞌɛ̨na da mba ntho, ꞌdaꞌangu dá bɛ̨mhbe. 11 Nɛ xʉn ngu yʉ nidį dá ʉnba ʉ yʉ ꞌyɛ̨cꞌyɛi bʉ ja ma nijąhe dyʉ judíohe. Nɛ dá säpi dá sɛrpa yʉ́ tꞌɛ̨cꞌyɛi. Nɛ nugä ɛ̨mmɛ min cuɛgä nangueꞌʉ, nɛpʉ ja yʉ hnini yatho dá mbagä, dá un ran ʉnbi ʉ, bi ꞌyɛ̨na.
Bi mam mahønꞌa ha bin jabʉ bi ꞌyɛ̨cꞌyɛi
12 Nɛ xø bi ꞌyɛ̨m mahønꞌa:
―Nɛ dá cąxä ra søcuą, ngue rán tꞌɛ̨di yʉ hmumbäją, ngue ga ʉnba yʉ ꞌyɛ̨cꞌyɛi. Dá hą ra ꞌyu ná mba bʉ ra hnini Damasco. 13 Nuꞌi ma tsꞌʉtꞌabi Agripa i, nuꞌbʉ mbɛ huxyadi dá nu bʉ ꞌyu nꞌda ra nyotꞌi bí ꞌyɛ̨h mahɛ̨tsꞌi, nɛ manꞌda madí hyätꞌi xínda gue ra hyadi. Nɛ nuꞌa bi hyärpʉ dí ꞌbähmbe. 14 Nɛ nuꞌbʉ gätho má tąnje bʉ häi, dá øcä nꞌda ra nde ngue ma ndesɛ í tsꞌoqui, ra hebreo, i ɛ̨na: “Saulo, Saulo, hanja gní ʉngui. Xʉn hɛ̨i guí øtꞌe, tengu nꞌda ra mbʉndąni i pa ma sʉni ra tꞌo hndepe dim pɛfi xʉn ho, nɛ i nɛte thoho,” bi ꞌyɛ̨ngui. 15 Nɛ nugä dá änni: “Toꞌo i, ma Hmu.” Nu ra Hmu bi dądi: “Nugä dra Jesús, guecä gadí ʉngui. 16 Nuya dami ndantsꞌi, gui ꞌbäi. Nuya dán ꞌyusɛgä ua nꞌdahma gui ma nɛ gan juąnni nangue gätho ꞌbɛꞌa gá nu ya, nɛ gätho ꞌbɛꞌa ga utꞌa mꞌbɛjua.” 17 Nɛ bi ꞌyɛ̨ngui: “Nuya ga pɛhnꞌnaꞌi bʉ ꞌbʉh yʉ jąꞌi hing yʉ judío, nɛ ga jamansu i nangue ꞌbɛꞌa da nde da ꞌyøtꞌaꞌi yʉ judío, nɛ yʉ jąꞌi ngue hing yʉ judío. 18 Nɛ nangue nim hma, ga japi da xoc yʉ́ mbʉi yʉ jąꞌi nɛ him man din ꞌyo bʉ ja ra ꞌbɛxui, pɛ din ja ran nɛqui yʉ́ mbʉi. Nɛ ga japi da ꞌuepʉ ja rá tsꞌɛdi ra zįthu, nɛ din ꞌyo bʉ ja rá tsꞌɛdi Oją ma Ta. Nɛ din ja ra punbi yʉ́ tsꞌoqui. Nɛ da nu ra te maząi ʉ, nɛ gätho ran jąpi ga unni, tengu miꞌda dá ꞌuecä,” bi ꞌyɛ̨ngä ra Jesús, bi ꞌyɛ̨nꞌa ra Pablo.
Ra Pablo him bi mbɛsta a bi man ra Hmu ꞌbʉ mín ꞌyusɛ
19 Nɛ nu ra Pablo bi thoqui bi xiꞌa ra tsꞌʉtꞌabi Agripa:
―Nugä hin dá fɛsthoho ꞌbɛꞌa bi xicä ra nde gue bá ɛ̨h mahɛ̨tsꞌi. 20 Rá mbʉdi dá xiꞌʉ ꞌbʉpʉ Damasco, gue di päh yʉ́n ꞌyomfɛ̨ni nɛ din ꞌyo bʉ rá ꞌyu Oją. Nɛ dá xifi da ꞌyøtꞌ ra ꞌbɛfi xʉn ho nguepʉ da fądi xʉ päh yʉ́n ꞌyomfɛ̨ni. Ngutho dá mangä bʉ Jerusalén, nɛpʉ gätho ra häi Judea, nɛ dá xicä yʉ jąꞌi ngue hing yʉ judío. 21 Pɛ nangueꞌa ꞌbɛꞌa dá mangä, nuꞌʉ ꞌda yʉ judío bi bɛntcä bʉ ja ra dąniją, mi nde xta hyogui. 22 Pɛ asta gue yʉ pa jabʉya i fäxcä Oją. Nɛ dí xiꞌʉ ja yʉ́ tsꞌɛdi, nɛ dí xiꞌʉ hinꞌyʉ yʉ́ tsꞌɛdi. Nɛ høntꞌa dí xänbi ꞌbɛꞌa bi man ra Moisés nɛ ꞌbɛꞌa bi man yʉ pøngahyą, ngue bin ja. 23 Nuꞌʉ, bi ma ngue jatho da nu ran ʉnbi ra Cristo, nɛ gueꞌa ra mbʉdi da mba nsotsꞌi bʉ ꞌbʉꞌʉ xʉn du. Da mba nsotsꞌi guepʉ da zä di un ran nɛqui yʉ́ mbʉi ʉ yʉ judío, nɛꞌʉ hing yʉ judío, bi ꞌyɛ̨nꞌa ra Pablo.
Ra Pablo ndepe da ꞌyɛ̨cꞌyɛi ra tsꞌʉtꞌabi Agripa
24 Nɛ nuꞌbʉ ngubʉ mi man ra Pablo, nu ra Festo ntsꞌɛdi bi mbafi:
―Nuꞌi gra Pablo, guín gątꞌi, ɛ̨mmɛ xʉn ngu guí pąh ra søcuą janangueꞌa guín gątꞌi.
25 Bi dąꞌa ra Pablo bʉya:
―Hin dí jątꞌä, gra hoga tsꞌʉtꞌabi gra Festo. Pɛ gätho dí mangä majuąni a. 26 Nu ra Agripa in tsꞌʉtꞌabi bʉ ꞌbʉh yʉ judío, i ꞌbʉcua, i pądi nangue ꞌbɛꞌa gätho dím mangä. Janangueꞌa hin dí su ga mangua ja rá hmi. Nɛ dí hąxa njuąni ngue i pądi, nguetho him bi tꞌągui ꞌbɛꞌa bin ja, bi ꞌyɛ̨nꞌa ra Pablo.
27 Nɛ xø bi xih ra tsꞌʉtꞌabi Agripa:
―Ma tsꞌʉtꞌabi Agripa i, ha guí ɛ̨cꞌyɛi ꞌbɛꞌa bi man yʉ́ pøngahyą Oją. Nugä dí pącä gue guí ɛ̨cꞌyɛi, bi ꞌyɛ̨mbi.
28 Nu ra Agripa bʉya bi dątꞌa ra Pablo:
―Nuꞌi, guí nde ꞌbex ga päcä man ꞌyomfɛ̨ni, ngue ga ɛ̨cꞌyɛi ra Cristo.
29 Nu ra Pablo bi ꞌyɛ̨mpꞌa:
―ꞌBexgue guehya, ogue niyaꞌbʉ tsꞌʉ, Oją i pądi ꞌbɛꞌa dín ndegä. Dín nde gue gui ꞌyɛ̨cꞌyɛi, nɛ ahʉ gätho guí ꞌbʉhmbʉ ua guí øhmbʉ ꞌbɛꞌa dím mangä ya. Nɛ dín nde gui cohmbʉ tengugä, pɛ høntꞌʉ yʉ cadena hinꞌna ʉ, bi ꞌyɛ̨mbi.
30 Nɛ nuꞌbʉ ngubʉ mi man ra Pablo, ra Festo nɛ ra Agripa bim ꞌbäi, nɛꞌa ra Berenice nɛꞌʉ miꞌda mi hupʉ. 31 Nɛ nuꞌbʉ mi mba bʉ thi, nꞌda ngu nꞌda bin yąsɛ ʉ:
―Nuꞌa ran ꞌyohʉ ra Pablo, nte bi ꞌyøtꞌa ngue da du, xínga gueꞌa din ofädi, bin ꞌyɛ̨mzɛhɛ ʉ.
32 Nu ra Agripa bi ꞌyɛ̨mpꞌa ra Festo:
―Nuꞌbʉ hin xtá ma din dä bʉ ꞌbʉh ra hmutsꞌʉtꞌabi bʉ Roma, sä da mba nsoꞌtsꞌi ꞌbʉ, bi ꞌyɛ̨mbi.