Nu ra Pablo din juąn bʉ ꞌbʉh ra Festo
25
Nu ra Festo bi mba bʉ ra häi guepʉ din tsꞌʉtꞌabi, nɛ hyupa bim ꞌbʉpʉ ra hnini Cesarea, bi mba bʉ ra hnini Jerusalén bʉya. 2 Nubʉ Jerusalén, yʉ hmumbäją nɛ yʉ́ ngʉrpi yʉ judío bi xiꞌa ra Festo, bi nyąpi nangue ra Pablo. 3 Nɛ bi ꞌyørpa tsꞌɛdi bi ꞌyäp ra mate ngue da zohna ra Pablo ngue da zøm bʉ Jerusalén, nguetho im bɛ̨nꞌʉ da gorpa bʉ ꞌyu, gue nde da hyo. 4 Pɛ nu ra Festo bi xifi ngue ofädi bʉ Cesarea ra Pablo, nɛ “mi tsꞌʉtho ga mbagä ya,” bi ꞌyɛ̨mbi.5 Nɛ bi xifi:
―Ndeꞌbʉ ga mbähä ꞌda ahʉ gue ja ni tsꞌɛdihʉ, nɛ nuꞌbʉ ja mán tsꞌo bi ꞌyøtꞌa, sä gui yąfʉ.
6 Nu ra Festo, masque mbɛ man ꞌdɛtꞌa pa bim ꞌbʉpʉ Jerusalén, bi mba bʉ Cesarea bʉya. Nuꞌbʉ mí hyax bʉya, bi mba bʉ ja rán juąnbate, nɛ bi manda ba tsꞌi ra Pablo. 7 Nɛ nuꞌbʉ mi zøm bʉ ra Pablo, nu yʉ judío ngue bá nɛxpʉ Jerusalén bi mbäꞌtsꞌi. Nɛ ɛ̨mmɛ xʉn ngu ꞌbɛꞌa xʉn tsꞌo í yąpi. Pɛ hingui sä da bøm majuąni ꞌbɛꞌa bi manꞌʉ. 8 Nu ra Pablo bi ma nanguesɛ bʉya:
―Nte dá øtꞌä ngue hingui ho nangue man tꞌɛ̨dihe dyʉ judíohe, xínga gueꞌa ra dąniją, xínga gueꞌa rán tꞌɛ̨di ra hmutsꞌʉtꞌabi bʉ Roma, bi ꞌyɛ̨nꞌa ra Pablo.
9 Nu ra Festo nde da ꞌyøtꞌa dí numanho ʉ yʉ judío, janangueꞌa bi ꞌyänꞌna ra Pablo:
―Ha guí nde gui mba bʉ Jerusalén, guepʉ ba øtꞌa ran juąnbi bʉ, nangue ꞌbɛꞌa í yąpꞌa yʉ judío.
10 Nu ra Pablo bi dądi:
―Hinꞌna, guecua rán säui da tꞌørcä ran juąnbi ua, nguetho bi ꞌdaꞌa ran tꞌɛ̨di ra hmutsꞌʉtꞌabi ꞌbʉpʉ Roma gue gui ꞌyørcä ran juąnbi ua. Nɛ nte mán tsꞌo xtá ørpa yʉ judío, gue gui sixcä bʉ. Nuꞌi guí pądi xʉn ho ngue te dá øtꞌä. 11 Pɛ nuꞌbʉ xtá øtꞌä nꞌda ran tsꞌo gue i man nin tꞌɛ̨di gui hyogui, jatho ga tu ꞌbʉ, hin ga ꞌdagui nangue man dąte. Pɛ nuꞌbʉ him majuąni ꞌbɛꞌa ní yącpä ʉ, njoꞌo nꞌda i ja rán tꞌɛ̨di di dägä bʉ ja yʉ́ ꞌyɛ ʉ. Nugä dí äꞌa ran tꞌɛ̨di gui thocä bʉ ꞌbʉh ra hmutsꞌʉtꞌabi bʉ Roma, bi ꞌyɛ̨nꞌa ra Pablo.
12 Nuꞌbʉ min yąhʉ yʉ́m fätsꞌihʉ a ra Festo, bi xiꞌa ra Pablo:
―Nuꞌbʉ guí ɛ̨na ga dä ahe bʉ Roma, da zä ꞌbʉ, bi ꞌyɛ̨mbi.
Nu ra Festo i yąui ra tsꞌʉtꞌabi Agripa
13 Nuꞌbʉ mi thoꞌi ꞌda yʉ pa, nꞌda rá tsꞌʉtꞌabi yʉ judío, ra Agripa na, nɛꞌa rán ju, Berenice, bi zøm bʉ Cesarea di zɛngua a ra tsꞌʉtꞌabi Festo. 14 Nɛ nuꞌbʉ mi ꞌbʉpʉ ꞌda yʉ pa, nu ra Festo bi xiꞌa ra Agripa nangue ra Pablo, bi ꞌyɛ̨mbi:
―O bʉ nꞌda ran ꞌyohʉ, i ofädi, ngue bi zocua ra Félix, í Pablo a. 15 Nɛ nuꞌbʉ má mbagä bʉ Jerusalén, nu yʉ hmumbäją nɛ yʉ dącꞌyɛi ngue yʉ judío bi xicä nangue ra Pablo. Nuꞌʉ mi äp ran ʉnbi nangueꞌa. 16 Nɛ nugä dá xiꞌʉ: “Pɛ nugähe dyʉ romanogähe hingui sä ga hohe nꞌda ꞌbʉ hinda nadí juąnbähe ʉ, nɛ dim ꞌbäpʉ ja yʉ́ hmi toꞌo di yąpi, din yąsɛ.” Ngubʉ dá xifi. 17 Nɛ nuꞌbʉ mi zøcua yʉn yąpate, nuꞌbʉ mi hyatsꞌi, ꞌbex dá mba bʉ ja man juąnbate nɛ dá manda da tsꞌixpʉ a ra Pablo. 18 Nuꞌbʉ mí ꞌbähmbe bʉ ʉ yʉn yąpate, pɛ xínga nꞌdare bi ma gue yʉ tsꞌoqui tengu mím bɛ̨ngä ngue xtá ma. 19 Pɛ høntꞌa nꞌda ram hma madín junthʉ nangue ꞌbɛꞌa mi ɛ̨cꞌyɛi zɛhɛ ʉ yʉ judío. Nɛ nangue nꞌda ran ꞌyohʉ í Jesús nín juntꞌʉ, ngue bi du, pɛ nu ra Pablo ntsꞌɛdi bi ma ngue i ꞌbʉi, bi ꞌyɛ̨na.
20 Nu ra Festo bi thoqui bi ma:
―Nɛ nugä hin dí pącä ga øtꞌä ran juąnbi nangue ꞌbɛꞌa ɛ̨cꞌyɛi yʉ judío. Janangueꞌa dá änꞌna ra Pablo ꞌbʉ nde da mba bʉ Jerusalén, da mba ma juąnbi bʉ. 21 Pɛ nu ra Pablo bi ꞌyäc ran tꞌɛ̨di, nde ga dä bʉ ꞌbʉh ra hmutsꞌʉtꞌabi Augusto bʉ Roma. Dá manda bʉya da ꞌbädi asta gueꞌbʉ bi zä ga pɛhndä bʉ ꞌbʉh ra hmutsꞌʉtꞌabi, ɛ̨nꞌa ra Festo.
22 Nu ra tsꞌʉtꞌabi Agripa bʉya, bi xiꞌa ra Festo:
―Nugä dín nde ga øde ꞌbɛꞌa da manꞌa ran ꞌyohʉ.
Bi dąꞌa ra Festo bʉya:
―Nixudi da zä gui ꞌyøde.
23 Manꞌda pa bʉya bi mba bʉ ja rá ngu ran juąnbate ra Agripa nɛ ra Berenice. Nɛ bi mba bʉ mbo gätho ja yʉ́ tsꞌɛdi, min ꞌyohʉ yʉ hmudofʉi nɛ yʉ ngʉrpi bʉ ja ra hnini Cesarea. Nɛ bi tsꞌini xʉn ho nguetho i ja yʉ́tsꞌɛdi. Nɛ nuꞌa ra Festo bi manda da tsꞌixpʉ ra Pablo. 24 Nɛ nubʉya bi ꞌyɛ̨nꞌa ra Festo:
―Nuꞌi gra tsꞌʉtꞌabi Agripa, nɛ ahʉ gyʉn ꞌyohʉhʉ gätho guí ꞌbʉhmbʉ ua ya, guí nuhʉ na ran ꞌyohʉ. Nɛ gätho yʉ judío ꞌbʉpʉ Jerusalén nɛꞌʉ ꞌbʉcua Cesarea madín yąpi nanguehna. Nuꞌʉ njąmꞌbʉ mi ɛꞌtꞌa mi xiqui ngue mi ädi da mba ntho. 25 Pɛ nuꞌbʉ má pącä ngue nte bi ꞌyøtꞌa rán säui dí tho, dá ɛ̨ngä ga pɛnpʉ ꞌbʉh ra hmutsꞌʉtꞌabi bʉ Roma, nguetho mí mansɛ da mba ma dä bʉ. 26 Pɛ hinꞌyʉ ꞌbɛꞌa sä ga oꞌtꞌä a xʉ ꞌyøtꞌe ngue ga pɛnpa ma hmu. Janangueꞌa dá zonhdä na ran ꞌyohʉ, gui ꞌyøhmbʉ tsꞌʉ ꞌbɛꞌa da man ya, ma tsꞌʉtꞌabi Agripa i. Nɛ nuꞌbʉ gá ꞌyøhmbʉ, masque da zä gui xijʉ bʉya ꞌbɛꞌa da zä ga oꞌtꞌä nangue ran yąpi. 27 Nguetho dí ɛ̨na hingui ho ga pɛnpʉ nꞌda ra ofädi, nɛ nte má søcuą da jątsꞌi ngue da mam bʉ hanja i ofädi, bi ꞌyɛ̨nꞌa ra Festo bʉya.