Nu ra Pablo bin juąn zɛhɛ bʉ ꞌbʉh ra Félix
24
Nɛ nuꞌbʉ mi juaꞌa cʉtꞌa pa, bi mba bʉ ra Ananías, ra hmumbäją, nɛ ꞌda yʉ dącꞌyɛi, nɛ ra Tértulo ran hocpate. Nɛ bi xiꞌa ra tsꞌʉtꞌabi ꞌbɛꞌa í mba ma yąpi ra Pablo. 2 Nuꞌbʉ mí tsꞌonh ra Pablo, bi dʉꞌmi bin yąpate a ra Tértulo. Nuꞌa bi xiꞌa ra Félix:―Nugähe dí pąhmbe ngue nangueꞌe i ja ran johya ua ra häi dí ꞌbʉhmbe. 3 Nɛ gäthogähe manꞌda dí ꞌbʉhmbe xʉn ho nangue ꞌbɛꞌa guí øtꞌe. Nɛ gätho yʉ pa dí xiꞌahe ra jamadi nangueꞌe. 4 Nuya hingui ngu ꞌbɛꞌa ga xiꞌaꞌi, pɛ gui ꞌyørca ra mate gui ꞌyøde ꞌbɛꞌa dí xi ahe. 5 Nuna ran ꞌyohʉ, ɛ̨mmɛ ra tsꞌomꞌbäi na, nɛ ɛ̨mmɛ di parba yʉ judío hønbʉ go hapʉ ꞌbʉi ngue gätho ra ximhäi. Nɛ nuna, rá ngʉrpi ꞌdaꞌʉ yʉ jąꞌi tꞌɛ̨mbi yʉ nazareno. 6 Nuꞌa mí nde xtí tsꞌon ra dąniją bʉ Jerusalén, pɛ nugähe dá bɛnthe, nɛ dí ɛ̨mhbe xcá juąnbahe tengu im mam bʉ ja man tꞌɛ̨dihe. 7 Pɛ nu ra hmudofʉi, ra Lisias a, con rá tsꞌɛdi bá jʉcpʉ mi ꞌbʉhmbe. 8 Nɛ bi xije dan yąfe ua. Nuya, nuꞌbʉ gui ꞌyän zɛhɛ a, gui pądi gue majuąni ꞌbɛꞌa gätho ní mba ma yąpi, bi ꞌyɛ̨mpꞌa ra tsꞌʉtꞌabi a ra Tértulo.
9 Nɛ nuꞌʉ yʉ judío min ꞌyohʉ, ꞌdaꞌangu bi manꞌʉ. 10 Nɛ nu ra tsꞌʉtꞌabi bi un ran tꞌɛ̨di ra Pablo gue din yą bʉya. Nu ra Pablo bi ma, bi ꞌyɛ̨na:
―Nugä i hu ma mbʉi ngue sä dan juąndä ua, nguetho guí pądi ꞌbɛꞌa nám ꞌbʉhmbe dyʉ judíohe, gue xʉn ngu yʉ jɛya guín tsꞌʉtꞌabi ua. 11 Nuꞌbʉ guí nde gui pądi, sä gui pądi, ja mán ꞌdɛꞌmayo ma pa ya gue dá mba bʉ Jerusalén, dá thąnde Oją bʉ. 12 Nɛ nuꞌʉ ma mijudíohe him bi nu ꞌbʉ ꞌboꞌo xcán junthe, xím bi nu ꞌbʉ ꞌboꞌo xcá parbi, xínga guepʉ ja ma dąnijąhe, xínga guepʉ ja ma tꞌʉnijąhe, xínga guepʉ gätho ra hnini. 13 Nuya hingui sä din juąnni xʉn ho nguetho him majuąni ꞌbɛꞌa ní yącpä ya. 14 Pɛ nuya dadín juąndä gue dí tɛndä ra ꞌyu maꞌdaꞌyo, nɛ gueꞌa ɛ̨mbi him majuąni ʉ. Pɛ guetꞌa ra ꞌyu mí tɛnꞌdʉ ma ngʉrpa bøtahe, gue mí numansu Oją nguetho dí ɛ̨cꞌyɛi ꞌbɛꞌa gätho mán tꞌoꞌtꞌi bʉ ja rá søcuą yʉ́n tꞌɛ̨di ra Moisés nɛ yʉ́ søcuą yʉ pøngahyą. 15 Nɛ nugä dí tøꞌmi ꞌbɛꞌa nín ho da ꞌyøtꞌ Oją, tengu i tømpꞌ ya i ꞌbäcua. Nugähe dí ɛ̨cꞌyɛihe ngue gätho xʉn du da ndantsꞌi, nɛꞌʉ bi ꞌyøtꞌ ran ho, nɛꞌʉ bi ꞌyøtꞌ ran tsꞌo. 16 Janangueꞌa gätho dí øtꞌä ꞌbɛꞌa di bɛ̨ngä Oją nꞌdahma hin hapʉ da thįnga ma tsꞌoqui, xínga guepʉ ꞌbʉ Oją xínga guepʉ ꞌbʉh yʉ jąꞌi, bi ꞌyɛ̨na.
17 Nɛ xø bi ꞌyɛ̨na:
―Nɛ nuꞌbʉ mi thogui xʉn ngu yʉ jɛya, bá pengä bʉ Jerusalén ngue ga un yʉn tꞌunni ma mɛnguhe, nɛ ga un yʉn tꞌunni bʉ ja ma dąnijąhe. 18 Nɛ ngubʉ dá øtꞌä bʉ dąniją, dá thąnde Oją. ꞌDaꞌʉ yʉ judío, yʉ mɛngu bʉ ra häi Asia dán tįmhbe bʉ bʉya. Nɛ njom mí ꞌbʉpʉ xʉn ngu yʉ jąꞌi, xíng ra sʉi mi ja bʉ. 19 Nuꞌʉ gue dán tįngähe bʉ, ndeꞌbʉ gueꞌʉ xtambá ꞌyɛ̨cua ʉ, xtá mangua ꞌbʉ ja ꞌbɛꞌa dá øtꞌä bʉ. 20 O gue guehya yʉn ꞌyohʉ ꞌbäcua da ma ꞌbʉ ja ꞌbɛꞌa bi nurcä ꞌbʉ má mbagä bʉ ja ra junta. 21 Høntꞌa ntsꞌɛdi dá mangä bʉ, nɛ dá ɛ̨mbä ʉ: “Nu ahʉ guí ørcä ran tsꞌɛmbi nam pa ya nguetho dí ɛ̨cꞌyɛi ngue i ndantsꞌʉ i tu,” dá ɛ̨ngä, bi ꞌyɛ̨nꞌa ra Pablo.
22 Nɛ nuꞌbʉ mi ꞌyøꞌa ra Félix ꞌbɛꞌa bi man ra Pablo, ꞌbex bi ma da guah ra junta, nguetho xʉn ngu tsꞌʉ mi pąꞌa ra Félix nangue rá ꞌyu Oją. Nɛ bi xiꞌʉ:
―Nuꞌbʉ dambá ɛ̨cua ra hmudofʉi, ra Lisias, sä ga pącä ꞌbɛꞌa gätho bin ja.
23 Nɛ nuꞌa ra Félix bi manda da thoqui da mba mꞌbädi ra Pablo. Nɛ bi manda ngue da tꞌørpa ran ho nangueꞌa, nɛ nuꞌʉ yʉ́ amigo sä da mba bʉ nɛ di unni ꞌbɛꞌa gätho da hyoni.
24 Nuꞌbʉ mí thoꞌi tsꞌʉ ꞌda yʉ pa, nu ra Félix bá peng bʉ ja ra hnini Cesarea, bán ꞌyoui rá xisu í Drusila, nuꞌa ra judío a. Nɛ bi zonꞌna ra Pablo, ndepe da ma hague dán zä nꞌda da ꞌyɛ̨cꞌyɛi ra Jesucristo. 25 Nɛ nuꞌbʉ mi man ra Pablo nangue ram ꞌbʉi njuąntho, nɛ bi ma ngue di jamansu ꞌbɛꞌa da ꞌyøtꞌa nꞌda, nɛ bi ma din ja ran tꞌänni ꞌbʉ ran zɛgui nangue yʉ tsꞌoqui, nu ra Félix bin su bʉya, nɛ bi xifi:
―Høntꞌa gá xic ya, ꞌbɛ ním ꞌbähma bʉ ja ra fädi mahønꞌa, nɛ nuꞌbʉ da bongui ga zonꞌnaꞌi mahønꞌa, bi tꞌɛ̨mpꞌa ra Pablo.
26 Nu ra Félix mí ɛ̨na xtán guꞌtꞌi tsꞌʉ, nꞌdahma xtí thøꞌa ra Pablo. Janangueꞌa njąntꞌa thoho min zohni nɛ min yąui. 27 Nɛ nuꞌbʉ mi guaꞌa nyojɛya bi mba ma poni a ra Félix, nɛ bi hyuꞌa ra Porcio Festo. Nu ra Félix ꞌbʉ mí bøm bʉya, bi zopʉ ra Pablo bʉ ja ra fädi, nguetho mí su da numanꞌʉ yʉ judío ꞌbʉ xtí hocpi.