23
Nu ra Pablo ɛ̨mmɛ madín hyɛ̨thʉ bʉ, nɛ bi xifi: ―Nꞌyohʉ ahʉ, nugä ząi dí øtꞌäꞌa i xicpa ma mbʉi Oją, asta gue ra pa jabʉya, bi ꞌyɛ̨m ꞌbʉ mí dʉꞌmi din yą.
2 Pɛ nu ra Ananías, ra dąmbäją, bi xiꞌʉ gue ꞌdarpʉ mi ꞌbähmbʉ ra Pablo, da mbɛrpa rá nde. 3 Nu ra Pablo bi xiꞌa ra Ananías bʉya:
―Oją da mbɛpꞌaꞌi nguetho yoho ni mbʉi. Sä guí ɛ̨mhbʉ hin dá øtꞌ yʉn tꞌɛ̨di, pɛ go gueꞌahʉ hin guí øthʉ yʉn tꞌɛ̨di, ngue gadí manda da ꞌbɛrca ma nde.
4 Nɛ nuꞌʉ ꞌdarpʉ mi ꞌbähmi bi ꞌyɛ̨mbi:
―Hanja gní thątꞌa ra dąmbäją ngue bi huahnꞌna Oją.
5 Ra Pablo bi dądi:
―Cu ahʉ, hin dí pącä ngue ra dąmbäją a, nuꞌbʉ xcá pącä hin xcá thątä ꞌbʉ, nguetho ntꞌoꞌtꞌi gue hin ga cꞌąmanꞌʉ ma ngʉrpihʉ, bi ꞌyɛ̨mbi.
6 Nɛ nuꞌa ra Pablo ꞌbʉ mí nuꞌʉ ꞌda gue hupʉ ja ra junta, bi bądi hinga ꞌdaꞌingu yʉ́ tꞌɛ̨cꞌyɛi ʉ, nguetho ꞌdaꞌʉ bi dɛnꞌdʉ i man yʉ saduceo nɛ nu miꞌda bi dɛnꞌdʉ i man yʉ fariseo. Janangueꞌa nu ra Pablo bi ꞌyɛ̨mpꞌʉ ꞌbʉpʉ ja ra junta:
―Nꞌyohʉ ahʉ, nugä dra fariseogä, nɛ xin rá tsꞌʉntꞌʉgä nꞌda ra fariseo. Nugä dí ꞌbäcua nɛ guí ørcahʉ ran juąnbi nguetho dí ɛ̨cꞌyɛi gue i ndantsꞌ mahønꞌa ʉ i tu, bi ꞌyɛ̨nꞌa ra Pablo.
7 Nɛ nangueꞌa xí man na ra Pablo bin junthʉ yʉ fariseo ʉ yʉ saduceo, nɛ gätho bin hecpʉ ja ra junta. 8 Nguetho i manꞌʉ yʉ saduceo gue hingui ndantsꞌ mahønꞌa ʉ i tu, nɛ i ma ngue njoꞌo yʉ́m ꞌbɛhni Oją mahɛ̨tsꞌi, nɛ i ma ngue njoꞌo yʉn dąhi. Pɛ nu yʉ fariseo gätho i ɛ̨cꞌyɛi. 9 Bin ja nꞌda ra mbahni, nɛ nubʉya bin ndantsꞌi ꞌdaꞌʉ yʉ́ xänbate ʉ yʉ fariseo, bi ꞌyɛ̨nꞌʉ:
―Nuna ran ꞌyohʉ ꞌbäcua, nte mán tsꞌo bi ꞌyøtꞌe. Xiꞌbʉ majuąni nꞌda ran dąhi o gue nꞌda rám ꞌbɛhni Oją mahɛ̨tsꞌi bin yąui, ndeꞌbʉ hin ga sʉhmbʉ Oją, bi ꞌyɛ̨na.
10 Pɛ nuꞌʉ ꞌbʉpʉ ja ra junta, ɛ̨mmɛ bin sʉꞌʉ, asta gueꞌbʉ mí zu ra hmudofʉi da sɛnꞌinde ra Pablo. Bi xih yʉ́ dofʉi bʉya gue ba jʉcpʉ ꞌbʉh yʉ jąꞌi, nɛ da zix mahønꞌa bʉ ja ra ngundofʉi.
11 Nɛ nuꞌbʉ min xui, ra Hmu mahɛ̨tsꞌi bim ꞌbähmi ra Pablo nɛ bi ꞌyɛ̨mbi:
―O di tu ni mbʉi Pablo, nguetho ngutho gui ma bʉ ja ra dąhnini Roma nanguecä, tengutho gá mangua Jerusalén.
Mi ɛ̨na xtá tho ra Pablo
12 Nuꞌbʉ mi hyatsꞌi, ꞌdaꞌʉ yʉ judío ꞌdaꞌingu bi bɛ̨nꞌʉ da hyo ra Pablo, nɛ bi ma jatho di jąꞌtsꞌa bi manꞌʉ. Nɛ bi ꞌyɛ̨nꞌʉ ngue hin din sihmɛ, xíng ra dehe da zi, asta gueꞌbʉ go bi hyo. 13 Nɛ mi pongui yote má ꞌyohʉ ʉ ꞌdaꞌangu bi ma ngue da hyo ra Pablo. 14 Nuꞌʉ bi mba bʉ ꞌbʉh yʉ hmumbäją nɛ yʉ dącꞌyɛi, nɛ bi xifi:
―Nugähe dá mamhbe majuąni ꞌbɛꞌa ga øthe, nɛ hin dan sihmɛhe asta gueꞌbʉ go dá hohe ra Pablo. 15 Janangueꞌa nu ahʉ nɛꞌʉ miꞌda guín ꞌyohʉ bʉ ja ra junta, nuꞌbʉ nixudi gui xihmbʉ ra hmudofʉi ba siꞌa ra Pablo, gui ꞌyɛ̨mbi gue gui ꞌyänhdʉ miꞌda yʉn tꞌänni. Janangueꞌa nugähe bʉya, dan sähe gua täcuahe bʉ ja ra ꞌyu, ga hohe, bi ꞌyɛ̨nꞌʉ.
16 Pɛ nu rá ꞌbɛꞌue ra Pablo bi ꞌyøde ꞌbɛꞌa nde da ꞌyørpa yʉn ꞌyohʉ. Bi mba bʉ ja ra ngundofʉi nɛ bi xiꞌa ra Pablo. 17 Nu ra Pablo bi zonhꞌna nꞌda ra dofʉi bʉya, bi ꞌyɛ̨mbi:
―Dami six na ra tsꞌʉntꞌʉ bʉ bí ꞌbʉh ra hmudofʉi, nguetho i ja ꞌbɛꞌa da xifi.
18 Nu ra dofʉi bi zixpʉ ꞌbʉꞌa rá hmu, nɛ bi xifi:
―Nuꞌa ra Pablo ngue i ofädi, bi zoncagui nɛ bi ꞌyäc ra mate gua siua na ra tsꞌʉntꞌʉ, nguetho ja ꞌbɛꞌa da xiꞌi.
19 Nu ra hmudofʉi bi bɛntpa rá ꞌyɛ ra tsꞌʉntꞌʉ, nꞌdanni bá änni:
―ꞌBɛꞌa guín nde gui xiqui.
20 Nuꞌa ra tsꞌʉntꞌʉ bi xiꞌa ra hmudofʉi bʉya:
―Nuꞌʉ ꞌda yʉ judío bin yąsɛꞌʉ, bi ma da ꞌyäꞌa ra mate ꞌbʉ nixudi, ngue gui sixpʉ mahønꞌa bʉ ja ra junta ra Pablo, nguetho da ꞌyɛ̨nꞌi, da ꞌyän miꞌda yʉn tꞌänni. 21 Pɛ ꞌyo guí øtꞌe ꞌbɛꞌa da xiꞌi, nguetho i pongui yote má ꞌyohʉ yʉ judío ngue xʉn jotꞌ ra ꞌyu, i täcua bʉ ra Pablo. Nuꞌʉ, ꞌdaꞌangu xʉm ma ngue xín din sithe xín din sihmɛ asta gueꞌbʉ go bi hyo ra Pablo. Nɛ i tøpꞌa thoho ꞌbɛꞌa go gui ma, bi tꞌɛ̨mpꞌa ra hmudofʉi.
22 Nu ra hmudofʉi bi hɛcua ra tsꞌʉntꞌʉ ngue njon da xifi, ngue ya xí xiꞌa ra hmudofʉi. Nɛ nubʉya bi xifi da mba.
Nu ra Pablo bi mba mꞌbɛhni bʉ ꞌbʉh ra Félix
23 Nubʉya nu ra hmudofʉi bi zohnꞌdʉ yoho yʉ ngʉrpa dofʉi, bi xifi din sä yociɛnto ndofʉi da mba bʉ ra hnini Cesarea ꞌbʉ gʉto nxui. Nɛ da mbähä mi hyąte ma ꞌdɛtꞌa yʉ dofʉi ngue din tøgue, nɛ da mbähä mi yociɛnto yʉ dofʉi ngue i cʉ yʉn tsꞌątꞌɛgui. 24 Nɛ bi manda da thøspa yʉ fani ngue da hyux a ra Pablo. Nɛ bi xifi di jamansu xʉn ho bʉ ꞌyu, asta gueꞌbʉ go bi dä bʉ ꞌbʉh ra tsꞌʉtꞌabi Félix. 25 Nɛ bi ꞌyoꞌtꞌa nꞌda ra søcuą ra hmudofʉi, bi mbɛnpa ra tsꞌʉtꞌabi Félix.
26 Nɛ bi ꞌyɛ̨nꞌa ra søcuą:
“Nugä dra Claudio Lisias, dadí zɛnguaꞌi, gra Félix, gra hoga tsꞌʉtꞌabi. 27 Nuna ran ꞌyohʉ na, nuꞌbʉ mi bɛntꞌ yʉ judío, nde xtá hyo. Pɛ dá yąmhbe nangue xʉn ngu yʉ dofʉi, nguetho dá øcä ngue ra romano na. 28 Nugä him mí pądi hanja bi mba ma yąpi, dá sixpʉ ja rá junta yʉ judío. 29 Pɛ nubʉya dá øde ngue høntꞌʉ yʉ́n tꞌɛ̨di zɛhɛ yʉ judío ngue í mba ma yąpi, nɛ hinꞌyʉ ꞌbɛꞌa dí tho, o gue dín ofädi. 30 Nɛ nuꞌbʉ mi sicä ꞌbɛꞌa nde da ꞌyøtꞌ yʉ judío, ngue nde da hyo, ꞌbex dá pɛnhꞌna bʉ guí ꞌbʉi. Nɛ dá xiꞌʉ yʉ nyąpate gue da xiꞌi ꞌbɛꞌa ní mbɛspa ra hnumanꞌʉ. Nɛ høntꞌa dá xiꞌa ya,” bi ꞌyɛ̨nꞌa rá søcuą ra hmudofʉi.
31 Nu yʉ dofʉi bʉya bi ꞌyøtꞌe tengu bi xiꞌʉ yʉ́ hmu. Nuꞌʉ bi zixꞌa ra Pablo ꞌbʉ min xui, asta gueꞌbʉ mí zøm bʉ Antípatris. 32 Nuꞌbʉ mí hyax bʉya, bá peng bʉ yʉ dofʉi gue him madín tøgue. Pɛ nuꞌʉ gätho madín tøgue bi thoqui bi zixꞌa ra Pablo ʉ. 33 Nuꞌbʉ mí zøm bʉ ra hnini Cesarea, bin däp ra søcuą ra tsꞌʉtꞌabi, nɛ bi mba ma dä bʉ ra Pablo. 34 Nɛ nuꞌbʉ mi nuꞌa ra tsꞌʉtꞌabi a ra søcuą, bi ꞌyänꞌna ra Pablo:
―Hapʉ ni häi.
―Nugä ga øcä ꞌbɛꞌa gui mam ꞌbʉ bi zøꞌʉ di yąpꞌiꞌi.
Nɛ bi manda da mba mꞌbädi bʉ ja rá ngutsꞌʉtꞌabi ndudąn Herodes.