22
―Nꞌyohʉ ahʉ, gyʉ ta ahʉ, gui ꞌyøhmbʉ ꞌbɛꞌa ga xi ahʉ ya, bi ꞌyɛ̨nꞌa ra Pablo ꞌbʉ mi dʉꞌmi bin yą.2 Nɛ nuꞌbʉ mi ꞌyøꞌʉ ngue bi tsꞌofo nangue yʉ́ ndesɛ ra hebreo, manꞌda bin hɛ̨. Nu ra Pablo bi ꞌyɛ̨m bʉya:
3 ―Nugä dra judíogä, dám ꞌbʉcä bʉ Tarso, nubʉ ra häi Cilicia, nɛ bi mba ma tedegä ua Jerusalén. Nɛ dán xäcä rán xädi ra Gamaliel, nɛ dán xäcä xʉn ho yʉ́n tꞌɛ̨di ʉ ma ngʉrpa bøtahʉ. Nɛ ɛ̨mmɛ mi ɛ̨hyagä nangue rá ꞌbɛfi Oją ngue gätho ma mbʉi, tengutho ahʉ ya. 4 Nɛ madí undä ran ʉnbi toꞌo gätho mi ɛ̨cꞌyɛi ra Jesús, nɛ ꞌdaꞌʉ dá ho nɛꞌʉ miꞌda, yʉn ꞌyohʉ nɛꞌʉ yʉ xisu dá sixpʉ fädi. 5 Nu ra hmumbäją nɛ yʉ dącꞌyɛi da zä din juąnni ꞌbɛꞌa xtá øtꞌä, nguetho dá cąnba yʉ́ søcuą bi ꞌdacä, gue mí ɛ̨na xcá un yʉ ngʉrpi bʉ ja yʉ́ niją ma mijudíohʉ bʉ Damasco. Nɛ dá hąx ra ꞌyu dá mba bʉ Damasco. Nu ra søcuą dá jʉcä ngueꞌa ran tꞌɛ̨di ga cotꞌa fädi yʉ ꞌyɛ̨cꞌyɛi, nɛ dí ɛ̨na xcuá si ua Jerusalén, ngue xtá nu ua ran ʉnbi.
Nu ra Pablo bi ma ha bin jabʉ í ꞌyɛ̨cꞌyɛi
6 Nɛ nuꞌbʉ mán ꞌyogä bʉ ꞌyu hänbʉ Damasco, tenguꞌbʉ mbɛ huxyadi, bá cą nꞌda ra nyotꞌi mahɛ̨tsꞌi, ngue ntsꞌɛdi bi hyärpʉ dí ꞌbäi. 7 Nugä dá tąng bʉ häi, nɛ dá øꞌa nꞌda ra nde bi xiqui: “Saulo, Saulo, hanja gní ʉngagui,” bi ꞌyɛ̨ngui. 8 Nɛ dá thąti: “Toꞌo i ma Hmu.” Nɛ nuꞌa bi xiqui: “Nugä dra Jesús, dra mɛngu nazaret, guecä gadí ʉngagui.” 9 Nɛ nuꞌʉ ꞌda min ꞌyogähe bi nuꞌa ra nyotꞌi, pɛ him bi ꞌyøꞌa ra nde ngue bi zocä. 10 Nɛ dá änni: “Ma Hmu ꞌbɛꞌa sä ga øtꞌä.” Nɛ nu ra Hmu bi ꞌyɛ̨ngui: “Dami ndantsꞌi ní mba bʉ Damasco, nubʉ, da siꞌa bʉ ꞌbɛꞌa gätho dá sänꞌniꞌi gui ꞌyøtꞌe.” 11 Nɛ nugä ꞌbex dán xädä nangueꞌa ra nyotꞌi, nɛ nuꞌʉ mín ꞌyogähe bi gʉrca ma ꞌyɛ, nɛ dá sømhbe bʉ ja ra hnini Damasco.
12 Nɛ mi ꞌbʉpʉ nꞌda ra hocjąꞌi í Ananías, ngue mi tɛnni xʉn ho yʉ́n tꞌɛ̨di ra Moisés. Nɛ gätho yʉ judío mi ꞌbʉpʉ mi numanho a. 13 Nu ra Ananías bi zøpʉ dám ꞌbʉcä, nɛ bi xiqui: “Ma cuꞌi Saulo, dami hyand ran nɛqui ni dä ya.” Nɛ ꞌbex bi zø ma dä, nɛ bi zä dá nu a ran ꞌyohʉ bʉya. 14 Nɛ bi xiqui: “Nuꞌa Oją mi thąnde ma ngʉrpa bøtahʉ bi huahnꞌnaꞌi ngue gui pądi ꞌbɛꞌa rá pähä a. Nɛ bi jaꞌaꞌi gá nu rá Hoga Tsꞌʉntꞌʉ, nɛ bi jaꞌaꞌi ngue gá ꞌyørpa rá nde a. 15 Nuya gui mam bʉ ꞌbʉh yʉ jąꞌi ꞌbɛꞌa gá nu nɛ ꞌbɛꞌa gá ꞌyøde. 16 Nɛ hinꞌyʉ ꞌbɛꞌa manꞌda gui tøꞌmi, dami ndantsꞌi gan xixyą, gui ꞌyɛ̨cꞌyɛi majuąni a ra Hmu ngue di ꞌuecꞌaꞌʉ ni tsꞌoqui nangue rá thuhu a ra Hmu,” bi ꞌyɛ̨ngä ra Ananías, bi ꞌyɛ̨nꞌa ra Pablo.
Bi man ra Pablo hanja bi mba bʉ ꞌbʉꞌʉ hing yʉ judío
17 Nɛ xø bi ꞌyɛ̨na:
―Nɛ nuꞌbʉ jąmbá pengä ua Jerusalén, dán yąꞌbe Oją bʉ mbo ra dąniją, nɛ nu Oją bi jacä dá nu tengu nꞌda ra tꞌį. 18 Nɛ dá nugä ra Hmu, bi ꞌyɛ̨ngui: “ꞌDahmantho dami pøngua Jerusalén, nguetho hin da tꞌørpamasu ꞌbɛꞌa gui ma nanguecä.” 19 Nɛ dá xiꞌa: “Ma Hmu, nuꞌʉ ma mɛnguhe ua gätho i pądi ꞌbɛꞌa gätho dá øtꞌä, dá mba bʉ gätho ma nijąhe, nɛ dá ʉnba ʉ gätho bi ꞌyɛ̨cꞌyɛi i, nɛ dá cotꞌa fädi ʉ. 20 Nɛ nuꞌbʉ mi mba ntho ra Esteban mi ꞌbäcä bʉ, nɛ ꞌdaꞌangu dá bɛ̨mhbe ʉ bin hote, nɛ dá jamansup yʉ́ pahni ʉ.” 21 Pɛ nu ra Hmu bi xiqui: “Ní mba, nguetho ga pɛnhꞌna bʉ yabʉ guepʉ ꞌbʉh yʉ jąꞌi ngue hing yʉ judío,” ngubʉ bi xiqui, bi ꞌyɛ̨nꞌa ra Pablo.
Nu ra Pablo bi mba ma dä bʉ ꞌbʉh yʉ hmudofʉi
22 Nuꞌʉ bi ꞌyømanho ꞌbɛꞌa bi manꞌa ra Pablo, asta gueꞌbʉ mí ma da mba bʉ ꞌbʉh yʉ jąꞌi hing yʉ judío. Nubʉya bin cuɛꞌʉ yʉ judío i ꞌbäpʉ gue hing yʉ ꞌyɛ̨cꞌyɛi, bi mbafi nɛ bi ꞌyɛ̨na:
―Dá tho na ran ꞌyohʉ, manꞌda xʉn ho ꞌbʉ hin di thoqui dim ꞌbʉi, bi ꞌyɛ̨nꞌʉ.
23 Manꞌda bi mbafi bi huąꞌtꞌ yʉ́ pahni nɛ bi ꞌyɛntsꞌ yʉ fonthäi. 24 Nu ra hmudofʉi bi manda da tsꞌixpʉ mbo ra Pablo, nɛ bi manda da mba mꞌbɛi, ngue ndepꞌa dín juąnꞌna ra Pablo hanja ná mbaꞌʉ yʉ jąꞌi. 25 Nɛ nuꞌbʉ i pa nthątꞌi ra Pablo ngue ra xifani, bi ꞌyänꞌna ra dofʉi ngue mi ꞌbäpʉ:
―Ha i ja nin tꞌɛ̨ dihʉ gui fɛꞌa nꞌda ra romano nuꞌbʉ hin ní tꞌørpa ran juąnbi, bi ꞌyɛ̨nꞌa ra Pablo.
26 Nɛ nuꞌbʉ mi ꞌyøꞌa ra dofʉi a bi man ra Pablo, bi mba bá xiꞌa rá hmu nɛ bi ꞌyɛ̨mbi:
―Dami jamansu ꞌbɛꞌa guí ørpa na ran ꞌyohʉ, nꞌda ra romano na.
27 Nɛ bá ɛ̨ꞌa ra hmudofʉi bʉya, bi ꞌyänꞌna ra Pablo:
―Ha majuąni gueꞌe gra romano.
Nu ra Pablo bi dądi:
―Hąha, bi ꞌyɛ̨na.
28 Nu ra hmudofʉi bi ꞌyɛ̨mpꞌa:
―Xʉn ngu ra mbɛti dá jutꞌä ngue dán romanogä.
Nu ra Pablo bi xiꞌa:
―Pɛ nugä mbʉdi thoho ma ta bin tꞌun ran tꞌɛ̨di gue din romano, janangueꞌa manꞌda dra romanogä.
29 Nɛ nuꞌa ra hmudofʉi bin su nguetho ya xí duꞌtꞌi nɛ nuꞌa ra Pablo ra romano na. Janangueꞌa nuꞌʉ nte bi ꞌyørpa ra Pablo, ɛ̨na xtá mbɛi.
Nu ra Pablo mi ꞌbäpʉ ja rá junta ʉ yʉ́ hmumbäją yʉ judío
30 Nɛ nuꞌbʉ mi hyatsꞌi, nu ra hmudofʉi nde da bądi hanja í yąpꞌʉ yʉ judío, bi xoctaꞌa ra Pablo mán thuꞌtꞌi, nɛ bi manda dim pɛti yʉ hmumbäją nɛ yʉ́ ngʉrpi yʉ judío. Nɛ bi zixꞌa ra Pablo bʉ dim pɛti.