Bi mba bʉ Jerusalén ra Pablo
21
Nɛ nuꞌbʉ mán hyɛhmbe yʉ ꞌyɛ̨cꞌ yɛi, dá huhe ra barco, nɛ njuąntho ꞌbex dá sømhbe bʉ ja ra tꞌʉhäi Cos ngue i ja bʉ made ra deją. Nɛ manꞌda pa bʉya dá thohmbe bʉ ja ra hnini Pátara. 2 Nubʉ, dá tįmhbe nꞌda ra barco ní mba bʉ ra häi Fenicia, dá huhe bʉya dá mbähmbe. 3 Nɛ nuꞌbʉ má thohmbe nthandi thoho ra tꞌʉhäi Chipre i ja bʉ made ra deją, ngąha dá mbähmbe dá sømhbe bʉ ra häi Siria nubʉ ra hnini Tiro, guepʉ da zoh rá ꞌbɛni ra barco. Nɛ dá cąhmbe bʉya, dá mbähmbe bʉ ja ra hnini. 4 Nuꞌbʉ má tįmhbe bʉ yʉ ꞌyɛ̨cꞌyɛi bʉya, dám ꞌbʉhmbe nyoto pa. Nɛ nu rá Hogandąhi Oją bi bɛ̨nba yʉ ꞌyɛ̨cꞌyɛi ꞌbɛꞌa da thoh ra Pablo ꞌbʉ da mba bʉ Jerusalén. Janangueꞌa bi xifi hin da mba. 5 Nɛ nuꞌbʉ mí guaꞌa nyoto pa, dá pømhbe bʉ. Nɛ gätho yʉ ꞌyɛ̨cꞌyɛi , yʉn ꞌyohʉ nɛ yʉ xisu nɛ yʉ tꞌʉhni, dá mbähmbe asta gue dá pømhbe bʉ ja ra hnini. Dán dąnyahmuhe bʉ ja ra ndendeją bʉya, nɛ dán yąhe Oją. 6 Nubʉya dán ꞌyɛ̨hmbe nɛ nugähe dá huhe ra barco, pɛ nuꞌʉ bi mbeng bʉ ja yʉ́ ngu.7 Bá nɛxhe bʉ Tiro, dá mbähmbe nɛ dá cąhmbe ꞌbʉ má sømhbe bʉ Tolemaida. Nuꞌbʉ má zɛnguahe yʉ cu, dán tehe bʉ nꞌda pa. 8 Nuꞌbʉ mi hyatsꞌi, gätho gahe ngue dín ꞌyohe ra Pablo dá thohmbe bʉ ra dąhnini Cesarea. Nɛ dán säyahe bʉ ja rá ngu ra Felipe. Nuꞌa ra Felipe ząi mi mam bʉ rán ho maꞌdaꞌyo Oją. Nuꞌa, nꞌda gueꞌʉ yoto má ꞌyohʉ nthahni mín ꞌyohʉ ra Esteban. 9 Nɛ nu ra Felipe mi ꞌbʉi goho yʉ́ tꞌįxu him bin thąti, nɛ nuꞌʉ, yʉ pøngahyą ʉ, bi man rám Hman Oją. 10 Nɛ nuꞌbʉ mám ꞌbʉhmbe bʉ ꞌda yʉ pa bi zøꞌa nꞌda rá pøngahyą Oją í Agabo, bá nɛxpʉ ra häi Judea. 11 Nuꞌbʉ mi zøm bʉ dí ꞌbʉhmbe a, bi gąspa a rá ngʉtꞌi ra Pablo nɛ bi duzɛhɛ yʉ́ gua nɛ yʉ́ ꞌyɛ ra Agabo, nɛ bi ma:
―Nu rá Hogandąhi Oją bi bɛ̨ngä ngue ngubʉ da ꞌyørpa yʉ judío a rá mbɛti na ra ngʉtꞌi bʉ Jerusalén, nɛ din dä bʉ ꞌbʉh yʉ jąꞌi ngue hing yʉ judío.
12 Nuꞌbʉ má øhmbe ꞌbɛꞌa bi man ra Agabo, gätho gahe nɛ yʉ mɛngu bʉ, dá ørpahe ra tsꞌɛdi hin xtá mba ra Pablo bʉ Jerusalén. 13 Nu ra Pablo bi ꞌyɛ̨m bʉya:
―ꞌBɛꞌa guí øthʉ guí zomhbʉ. O gadí ʉngahʉ ma mbʉi. Nugä dadín sägä høntꞌa go ꞌbɛꞌa da tꞌørcagui, o gue da thurqui o gue da thog bʉ Jerusalén nangue ra Jesús, ma Hmu.
14 Nɛ him bi zä dá sąmhbe, dá hɛthe bʉya nɛ dá ɛ̨mhbe:
―Nuꞌa rá pähä Oją da tꞌøtꞌe.
15 Nɛ mꞌbɛjua bʉya dán sähe nɛ dá mbähmbe ra Pablo bʉ Jerusalén. 16 Nɛ ꞌdaꞌʉ yʉ ꞌyɛ̨cꞌyɛi bʉ Cesarea dá mbähmbe. Nɛ nuꞌbʉ má sømhbe bʉ Jerusalén, nuꞌʉ bi zixcähe bʉ rá ngu ra Mnasón, ra mɛngu chipre. Nɛ mayaꞌbʉ thoho mí ɛ̨cꞌyɛi ra Mnasón. Guepʉ rá ngu dán säyahe.
Bi zɛngua ra Jacobo ra Pablo bʉ Jerusalén
17 Nuꞌbʉ má sømhbe bʉ Jerusalén, nu yʉ cu nangue ra Cristo bʉ, bi hyu yʉ́ mbʉi ꞌbʉ mi nuje, nɛ bi zimanhoje. 18 Manꞌda pa bʉya dá mbähmbe ra Pablo dá nuhe ra Jacobo Santiago, nɛꞌʉ gätho mí ꞌbʉpʉ, yʉ́ mingʉrpihʉ, yʉ dącꞌyɛi. 19 Nu ra Pablo bi zɛngua ʉ nɛ ꞌbex bi dʉꞌmi ꞌdahmiꞌdatho bi ma ꞌbɛꞌa gätho bi ꞌyøtꞌ Oją nangue rá ꞌbɛfi ra Pablo, nubʉ ꞌbʉh yʉ jąꞌi ngue hing yʉ judío. 20 Nɛ nuꞌbʉ mi ꞌyøꞌʉ ꞌbɛꞌa bi man ra Pablo gue bi ꞌyømanho ꞌbʉ mí sih rám Hman Oją, ɛ̨mmɛ bin johya nɛ bi ꞌyɛ̨spa Oją. Pɛ nuꞌʉ, bi ꞌyɛ̨mbi:
―Pɛ guí pądi, ma zʉ cuꞌi Pablo gue yʉ mahuąhi thoho yʉ judío i ɛ̨cꞌyɛi ya, nɛ gätho i ɛ̨na jatho da ꞌyøtꞌ yʉ́n tꞌɛ̨di ra Moisés. 21 Nɛ nuꞌʉ bi sifi ꞌbɛꞌa gätho gá ꞌyøtꞌe. Nɛ sä ɛ̨nꞌʉ gá xänbi gue gätho da hyɛh yʉ́n tꞌɛ̨di ra Moisés ʉ yʉ judío gue ꞌbʉpʉ ꞌbʉh yʉ jąꞌi hing yʉ judío, nɛ gá xifi ngue hin da mba nthɛqui yʉ́ xifani, nɛ hin da ꞌyøtꞌ yʉ́n tꞌøtꞌe yʉ judío, ɛ̨nꞌʉ. 22 Nuya ꞌbɛꞌa sä ga øthʉ ya, guehma dim pɛti ʉ ma mi ꞌyɛ̨cꞌyɛihʉ yʉ judío, gue da gohmahyąꞌaꞌi, nguetho da ꞌyøde ya gá søhø, bi ꞌyɛ̨mbi. 23 Nuya ndeꞌbʉ gui ꞌyøtꞌe ꞌbɛꞌa ga xi ahe. Nuya ꞌbʉcua goho yʉn ꞌyohʉ ngue bi ma da ꞌyøtꞌa nꞌda ran hogui nangue Oją, nɛ jatho da ꞌyøtꞌe. Nuya gui ꞌyøtꞌe ꞌbɛꞌa da ꞌyøtꞌʉ. 24 Nuꞌi gueꞌe gui six bʉya yʉn ꞌyohʉ, nɛ gui ꞌyøtꞌe tengu jatho da ꞌyøtꞌʉ, ngue mí ma nꞌda ran hogui nangue Oją. Nɛ gätho gui jurpa yʉ́ gasto ʉ, gui tämb yʉ dɛꞌyo ngue da mbøtsꞌe. Nɛ nubʉya sä gui ꞌyąx ni yąhʉ tengu i øtꞌ yʉ jąꞌi nuꞌbʉ xʉn guah yʉ pa yʉn hogui. Nɛ gätho yʉ jąꞌi sä da bądi ngue him majuąniꞌbɛꞌa bi manꞌʉ ꞌda nangueꞌe. Nɛ da bąh pʉya nɛꞌe guí tɛnꞌna rán tꞌɛ̨di ra Moisés. 25 Pɛ nangue yʉ jąꞌi hing yʉ judío ngue bi ꞌyɛ̨cꞌyɛi, ya dá pɛnpahe nꞌda ra søcuą, nɛ dá xihmbe hin da zi ꞌbɛꞌa bi ꞌbøspa yʉ hmite, xín da zaꞌa ra ngø ngue him bi bøn rá ji, xín da zi ra ji. Nɛ hin da ꞌyøtꞌ yʉn ꞌyomtꞌɛ̨ni, bi ꞌyɛ̨nꞌa ra Jacobo Santiago.
Bi mba mfɛntꞌi ra Pablo bʉ dąniją Jerusalén
26 Nu ra Pablo bi zixꞌʉ yʉn ꞌyohʉ bʉya, nɛ bi ꞌyøtꞌe tengu bi ꞌyøtꞌʉ. Nɛ bi mbähä bʉ mbo yʉ́ dąniją yʉ judío, ngue da ma ndaꞌa ní pa da guah yʉ́ pa ran hogui. Nɛ bi ma ndaꞌa ní pa di un yʉ ꞌbøtsꞌe.
27 Hin ɛ ní zønꞌa yoto pa mi juah ran hogui, nu yʉ judío gue hing yʉ ꞌyɛ̨cꞌyɛi, yʉ mɛngu ra häi Asia, bi nu bʉ mbo ra dąniją ra Pablo. Nuꞌʉ bi parba yʉ jąꞌi nɛ bi bɛntꞌ ra Pablo. 28 Bi mbafi:
―Nꞌyohʉ ahʉ dyʉ israelhʉ, dami zɛje gam bɛnthʉ na ran ꞌyohʉ ꞌbäcua, i xänba yʉ jąꞌi hønbʉ go hapʉ i pa ngue hingui hojʉ, nɛ ɛ̨na nte di muui yʉ́n tꞌɛ̨di ra Moisés nɛ nte di muui ma dąnijąhʉ. Nɛ hinga høntꞌa bi ꞌyøtꞌe, pɛ manꞌda, bá si ua mbo ra dąniją yʉ jąꞌi ngue hing yʉ judío. Janangueꞌa bi tsꞌonꞌa ra hoganiją ngue mająpi, sä ɛ̨nꞌʉ.
29 Nguetho mi nu min ꞌyoui ra Pablo bʉ ja ra hnini nꞌda ra mɛngu éfeso í Trófimo. Nɛ mi mansɛ ngue ɛ̨mbi bi zixpʉ mbo ra dąniją.
30 Nɛ nubʉya gätho ra hnini bin ja nꞌda ran ꞌyoꞌtsꞌi, nɛ gätho ní muxpʉ ꞌbäh ra Pablo, bi bɛntꞌi, bi gʉcpʉ thi ra dąniją. Nɛ ꞌbex bi gutꞌ yʉ́ niją. 31 Nɛ nuꞌbʉ mí zäpi ɛ̨na xtá hyo ra Pablo, nu ra hmudofʉi mí øde ngue gätho ra hnini Jerusalén bin ꞌyoꞌtsꞌi. 32 Nuꞌa ꞌbex bi zixꞌʉ yʉ dofʉi nɛ gätho yʉ hmudofʉi, nɛ bi mba nꞌdihi bʉ ꞌbʉh yʉ jąꞌi. Nɛ nuꞌbʉ mi nu yʉ jąꞌi gue mba bʉ yʉ dofʉi nɛ yʉ hmudofʉi, ꞌbex bin hɛ̨ ním ꞌbɛnza ra Pablo. 33 Nɛ nuꞌa ra hmudofʉi bʉya bi bɛntꞌ ra Pablo ɛ̨na da gotꞌi, nɛ bi manda ngue da mba nthątꞌi yoho yʉ cadena. Mꞌbɛjua bi tꞌänꞌdʉ, nɛ bi tꞌɛ̨mpꞌʉ:
―Toꞌo na, ꞌbɛꞌa bi ꞌyøtꞌna.
34 Pɛ nu yʉ jąꞌi ɛ̨mmɛ madí mbahni nɛ gätho ꞌdahma ꞌdanꞌyo bi ma. Janangueꞌa nu ra hmudofʉi him mi sä da bądi hanja bin ꞌyoꞌtsꞌi. Bi manda ngue da zixpʉ ja ra ngundofʉi a bʉya. 35 Nɛ nuꞌbʉ mí zøm bʉ ja rá ꞌdede ra ngu, bi duxꞌʉ yʉ dofʉi a ra Pablo, nguetho nu yʉ jąꞌi manꞌda nde da bɛntꞌi mahønꞌa. 36 Nguetho xʉn ngu yʉ jąꞌi bi dɛnni bi mbafi:
―Dami hyohʉ, ɛ̨nꞌʉ.
Nu ra Pablo bin juąn zɛhɛ bʉ ja yʉ́ hmi yʉ jąꞌi
37 Nɛ nuꞌbʉ manguepʉ da zixpʉ mbo ja rá ngu ra Pablo bi ꞌyänꞌna ra hmudofʉi:
―Dami ꞌyørqui tsꞌʉ ra mate dan yąui tsꞌʉ, bi ꞌyɛ̨na.
Nu ra dofʉi bi dądi:
―Ha guí pąꞌa rá nde yʉ griego.
―Hąha, bi yɛ̨nꞌa ra Pablo.
38 ―Oh, ha hinga gueꞌe gra mɛngu Egipto, ngue gá dʉpꞌa nꞌda ran ꞌyoꞌtsꞌi nɛ gá sixpʉ maꞌueni goho mahuąhi yʉn ꞌyohʉ ngue yʉ hyodu, bi ꞌyɛ̨mbi.
39 Nu ra Pablo bi dądi:
―Hinꞌna, hinga guecä. Nugä dra judíogä nɛ dra mɛngu Tarso, nꞌda ra dąhnini ngue ja rá tsꞌɛdi bʉ ja ra häi Cilicia. Nuya dí äꞌa nꞌda ra mate ngue ga xicä tsꞌʉ yʉ jąꞌi.
40 Nu ra hmudofʉi bi un ran tꞌɛ̨di. Nubʉya, nu ra Pablo bí ꞌbäpʉ ja ra ꞌdede, nɛ bi uąꞌtsꞌ rá ꞌyɛ ndepe din hɛ̨ yʉ jąꞌi. Nɛ nuꞌbʉ min hɛ̨, bi zofo nangue yʉ́ ndesɛ ʉ, gue yʉ́ nde ra hebreo, bi ꞌyɛ̨na: