Nu ra Pablo bi mba bʉ ra häi Macedonia nɛpʉ ra häi Grecia
20
Nɛ nuꞌbʉ min hɛ̨ nín ꞌyoꞌtsꞌmahyą bʉ ra hnini Éfeso, nu ra Pablo bi zonhꞌdʉ yʉ ꞌyɛ̨cꞌyɛi. Nɛ nuꞌbʉ mí un ran zofo, bin ꞌyɛ̨te bʉya, bi mba bʉ Macedonia. 2 Nɛ gätho bi zɛngua yʉꞌyɛ̨cꞌyɛi gätho ra häi Macedonia, bi hąt ra tsꞌɛdi yʉ́ mbʉi nangue rám hman Oją bi xiꞌʉ. Nɛ mꞌbɛjua bi zøm bʉ ja ra häi Grecia mahønꞌa. 3 Hyuzna bim ꞌbʉpʉ, ɛ̨na xtá hyu ra barco, gue xtá mba bʉ ra häi Siria, pɛ nuꞌʉ ꞌda yʉ judío ɛ̨na xtán däqui. Nɛ nuꞌbʉ mí bądi ꞌbɛꞌa nde xtá tꞌørpe, bin ꞌyomfɛ̨ni nɛ bá peng bʉ ja ra häi Macedonia. 4 Nɛ min ꞌyohʉ ra Pablo ra Sópater ra mɛngu berea a, nɛꞌa ra Aristarco nɛ ra Segundo, yʉ mɛngu tesalónica ʉ, nɛ nu ra Gayo ra mɛngu derbe a, nɛ nuꞌa ra Timoteo nɛ ra Tíquico nɛ ra Trófimo, yʉ mɛngu asia ʉ. 5 Nuꞌʉ bim ꞌbɛtꞌo bi mba ní tøguahe bʉ ra hnini Troas, nɛ nugä dra Lucascä, dí oꞌtꞌ ra søcuą jaua, dín hyʉnbahe ʉ. 6 Nuꞌbʉ mí guah yʉm pɛti nangue ran dąbaxjua, dá huhe ra barco dá nɛxhe bʉ ra hnini Filipos, ncʉtꞌa pa dán ꞌyohe dá sømhbe bʉ Troas guepʉ i tøguahe ʉ miꞌda. Nɛ nyoto pa dám ꞌbʉhmbe bʉ.Nu ra Pablo i ꞌbʉpʉ Troas
7 Nuꞌa ra pa domingo dám pɛtihe yʉ ꞌyɛ̨cꞌyɛi bʉ ja ra hnini Troas, dá sihe ra xɛcahmɛ, gue dá bɛ̨mhbe rán dąte ra Hmu. Nɛ nuꞌa ra Pablo bi man rám Hman Oją. Nɛ nyaꞌathoho bin yą gueꞌbʉ go mi zøm made ra xui, nguetho da mba ꞌbʉ bi hyatsꞌi. 8 Nɛ ɛ̨mmɛ xʉn ngu ra sibi mí zø bʉ ja ra cuarto magątsꞌi guepʉ bim pɛti yʉ jąꞌi. 9 Nɛ huxpʉ ja nꞌda ra ventana nꞌda ra tsꞌʉntꞌʉ í Eutico, nɛ ɛ̨mmɛ bi ndetꞌąha, nguetho ra Pablo nyaꞌa bin yą. Nu ra tsꞌʉntꞌʉ bi dop ra tꞌąha, bi dägui, ná hyu tøque ra ngu bʉ bi dägui. Ya xí du ꞌbʉ mi thątsꞌi. 10 Nɛ bi gąh ra Pablo, ní nyexpʉ ꞌbɛnꞌa ra tsꞌʉntꞌʉ nɛ bi hyʉfi, nɛ bi xiꞌʉ bʉya:
―O di tu ni mbʉihʉ, ya bi dąmbɛ̨ni na.
11 Nu ra Pablo bi ndex mahønꞌa bʉ ja ra cuarto bʉya, nɛ dán sihmɛhe. Nɛ nyaꞌa thoho bin yą ra Pablo mahønꞌa, gueꞌbʉ go mi bøx ra hyadi, ja bi mba bʉya. 12 Nɛ nuꞌbʉ mí tsꞌixꞌa ra tsꞌʉntꞌʉ gue bi dägui, nɛ i te ꞌbʉ mí zøm bʉ rá ngu, gätho bin johya ʉ.
Bi mba bʉ Mileto ra Pablo
13 Nugähe dá hugähe ra barco nɛ dá mbähmbe bʉ ra hnini Asón nguetho nubʉ dan cꞌathe ra Pablo, ngubʉ bi xije mamꞌbɛtꞌo, gue xí ꞌyɛ̨n ra Pablo din ꞌyogua thoho. 14 Nɛ nuꞌbʉ mán tįmhbe bʉ Asón a ra Pablo, dá sixhe dá huhe ra barco nɛ dá sømhbe bʉ ja ra hnini Mitilene. 15 Nɛ dá nɛxhe bʉ, nɛ manꞌda pa dá sømhbe bʉ ní hɛ̨ꞌtꞌa ra tꞌʉhäi Quío gue i jabʉ made ra deją. Nɛ manꞌda pa bʉya dá sømhbe bʉ ra tꞌʉhäi Samos gue i jabʉ made ra deją. Nɛ dán säyahe tsꞌʉ bʉ ra hnini Trogilio, nɛ manꞌda pa bʉya dá sømhbe bʉ ra hnini Mileto. 16 Nguetho nu ra Pablo bi nde bi thoctho bʉ ra hnini Éfeso, hingui nde din säya bʉ ra häi Asia. Nguetho di xøni da zønꞌa nꞌdihi bʉ Jerusalén, ya dí ꞌbʉpʉ ꞌbʉ ra pa ra dąmpɛti tꞌɛ̨mbi Pentecostés.
Nu ra Pablo bi zonhꞌdʉ yʉ́ ngʉrpi yʉ ꞌyɛ̨cꞌyɛi bʉ Éfeso
17 Nɛ nuꞌbʉ má sømhbe bʉ Mileto, ra Pablo bi ma dín zonhꞌdʉ yʉ dącꞌyɛi, ngue yʉ́ ngʉrpi yʉ ꞌyɛ̨cꞌyɛi dim pɛti bʉ ra hnini Éfeso. 18 Nɛ nuꞌbʉ mi zøpʉ ʉ, bi ꞌyɛ̨mpꞌa ra Pablo:
―Nuꞌehʉ guí pąhmbʉ ꞌbɛꞌa gätho mam ꞌbʉi dá øtꞌä ua ra häi Asia, asta gueꞌbʉ go rá mbʉdi dá søcä ua. 19 Gätho yʉ pa dám ꞌbʉcä ua dá ørpa rá ꞌbɛfi ra Hmu mahɛ̨tsꞌi, nɛ hin dadín ꞌyɛ̨tsꞌi. Nɛ xʉn ngu ma guidä dá fäni gueꞌbʉ má hąh ma mbʉi dá äp Oją nangue ahʉ. Nɛ xʉn ngu ran ʉnbi dá nu ngue bi ꞌyørcä yʉ judío. 20 Pɛ nugä hin te dá cønꞌnahʉ pɛ dá xi ahʉ gätho ꞌbɛꞌa da mbäx ahʉ. Nɛ dá xänꞌnahʉ bʉ dim pɛti yʉ jąꞌi, nɛ dá xänꞌnahʉ bʉ ja ni ngumhbʉ. 21 Nɛ dá xifi xʉn ho yʉ judío nɛꞌʉ hing yʉ judío, ngue di päh yʉ́n ꞌyomfɛ̨ni nangue Oją, gue da ꞌyɛ̨cꞌyɛi ma Hmuhʉ ra Jesucristo. 22 Pɛ nuya, rá Hogandąhi Oją i ørca ra tsꞌɛdi ga mbagä bʉ Jerusalén, nɛ hin dí pądi ꞌbɛꞌa gua thocä bʉ. 23 Pɛ høntꞌa dí pącä gue dan ofädi bʉ Jerusalén, nɛ ga nugä xʉn ngu yʉn ʉnbi, nguetho guesɛ rá Hogandąhi Oją bi xiqui hønbʉ go hapʉ dá thocä bʉ ja yʉ hnini. 24 Pɛ hinga guetꞌa dím bɛ̨nꞌa, hin te di muui ma tesɛgä nanguec zɛhɛgui. Høntꞌa ran johya dí nde ga nu ꞌbʉ dá juah ra ꞌbɛfi bi ꞌdacä ma Hmuhʉ ra Jesús, gueꞌa ga mangä ran ho maꞌdaꞌyo nangue rá mate Oją.
25 Nɛ gätho ahʉ dá xi ahʉ rám Hman Oją gue ꞌbɛpʉ ní mandagahʉ Oją, nɛ dí pącä xínga nꞌda ahʉ gui nurcahʉ ma hmi mahønꞌa. 26 Nuya nam pa ya dí xi ahʉ, hingui pa ma güɛndagä ꞌbʉ gui ꞌbɛhmbʉ rán ho Oją ya. 27 Nguetho hin te dá cønꞌnahʉ, gätho dá xi ahʉ ꞌbɛꞌa nde Oją gui pąhmbʉ. 28 Nuya gui jamansu ꞌbɛꞌa gui ꞌyøthʉ, nɛ da zä bʉ gui jamansufʉ yʉ́ mbʉi ni mi ꞌyɛ̨cꞌyɛihʉ bʉya. Nɛ gueꞌa ra ꞌbɛfi bi ꞌda ahʉ rá Hogandąhi Oją, gue gui jamansufʉ yʉ́ ꞌyɛ̨cꞌyɛi ra Hmu, gätho ná nguꞌʉ i ꞌbʉhmbʉ ra Cristo, nguetho rá jisɛ ra Cristo í gurpa yʉ́ tsꞌoqui ꞌbʉ mí du. 29 Pɛ nuꞌbʉ dá mbagä, dí pącä mꞌbɛjua ba ɛ̨ꞌi ꞌda tengu yʉ zate, nde da zaꞌʉ yʉ dɛꞌyo, din jabʉ da ꞌyøtꞌahʉ gue di ʉnꞌna ni mbʉihʉ gyʉ ꞌyɛ̨cꞌyɛihʉ. 30 Nɛ ꞌdaꞌʉ gue guesɛ ahʉ da ndantsꞌi, nɛ hinga njuąntho da man rám Hman Oją, gue da ndepꞌa dí tɛnꞌdʉ miꞌda. 31 Janangueꞌa gui jamansu ni mbʉihʉ ngue hin da hyä ahʉ ʉ. Nɛ guim bɛ̨mhbʉ gue nhyu jɛya, ma pa nɛ ra xui, dá xänꞌnahʉ nꞌda ngu nꞌda ahʉ, nɛ ɛ̨mmɛ dán zoni nangue ahʉ.
32 Nuya dadí dä ahʉ Oją. Nɛ ga socꞌahʉ rám Hman Oją, nuꞌa i ma nangue rá mate Oją, gueꞌa ram hma di zɛtꞌa ni mbʉihʉ, nɛ gueꞌa dín ja ahʉ gätho i ja Oją, tengu tho ʉ gätho miꞌda i pa nthahni. 33 Nugä hin dá nde a ni mbɛtihʉ, xínga gue ni pahnihʉ. 34 Pɛ guí pąhmbʉ dám pɛpzɛhɛ nɛ dá undä ꞌbɛꞌa gätho mí honꞌʉ dán ꞌyogähe. 35 Dá øtꞌä gue dá honsɛ man tsꞌihmɛ, dá utꞌahʉ gue dam pɛhmbʉ nɛ ga fäxhʉ ʉ hin ꞌyʉ ꞌbɛꞌa da hyoni. Nɛ gam bɛ̨mhbʉ ꞌbɛꞌa bi ma ma Hmuhʉ ra Jesús ꞌbʉ mí ꞌyɛ̨na: “Manꞌda di johya ní mbʉi nꞌda ꞌbʉ di uni, xinda gueꞌbʉ din tꞌunna nꞌda,” ngubʉ bi man ra Hmu, bi ꞌyɛ̨nꞌa ra Pablo.