Di ʉnba Oją ʉ toꞌo di ho yʉ tsꞌoqui
2
Janangueꞌa hingui sä ga ɛ̨mhbʉ him man sähʉ a ran ʉnbi høntꞌa go toꞌo gahʉ. Nguetho nuꞌbʉ dí numanꞌʉhʉ ʉ ꞌda nangue yʉ́ tsꞌoqui, nɛ dí ɛ̨mhbʉ go yʉ́n sähʉ da nu ran ʉnbi ʉ, pɛ gueꞌa nán juąnba zɛhɛhʉ a ꞌbʉ gue nꞌdatꞌa dí øthʉ. 2 Pɛ dí pąhmbʉ gue yʉ́n sähʉ ꞌbʉ di ʉnba Oją ʉ øtꞌ yʉ tsꞌoqui. 3 Pɛ sä dí ɛ̨mhbʉ ngue go ga ponjʉ rán juąnbi Oją, ngue go dí ɛ̨mfʉ hingui ho øtꞌʉ ꞌda, nɛ ya ꞌdaꞌangu dí øthʉ ʉ. 4 Ha hin dí pąhmbʉ hanja him ꞌbexque di ʉngahʉ Oją nangue ma tsꞌoquihʉ. Pɛ gueꞌa ní jajʉ ga päh ma mbʉihʉ xʉn ho a. Pɛ nujʉ dí fɛstahʉ rá yembʉi i ørcahʉ. 5 Pɛ nuꞌbʉ xʉm mɛ ní mbʉi nꞌda, nɛ xíngui tsꞌʉ coh rá mbʉi nangue yʉ́ tsꞌoqui, pɛ ɛ̨mmɛ di pɛt yʉn ʉnbi da tꞌørpa ꞌbʉ bi zøn ra pa, ngue rá muui a bi ꞌyøtꞌe, nɛ da zɛmp Oją a. 6 Nɛ nꞌda ngu nꞌda din tꞌunꞌna rán thɛui ꞌbɛꞌa bi ꞌyøtꞌe. 7 Nu Oją di untꞌa ra temaząi ꞌbʉ ꞌboꞌo ząi øtꞌa ran ho, nguetho honi dim ꞌbʉhmi Oją, nɛ i honi da ꞌyøtꞌa i numanho Oją, nɛ i honi da tꞌørpa ran ho njąmꞌbʉ din thegue. 8 Pɛ nuꞌbʉ dadín sʉhmbʉ Oją, nɛ hin dí numanhohʉ a ra ꞌyu majuąni pɛ høntꞌ yʉ tsꞌoqui go dí numanhohʉ, pɛ gueꞌa dí ꞌdajʉ ra cuɛ Oją a ꞌbʉ, ngue ɛ̨mmɛ ntsꞌutho. 9 Ntsꞌɛdi yʉn ʉnbi nɛ ꞌbɛꞌa gätho má dumbʉi da nuꞌʉ nꞌda ngu nꞌda toꞌo gätho nząi øtꞌ yʉ tsꞌoqui, nɛje dyʉ israelhe, nɛ ahʉ hin gyʉ israelhʉ. 10-11 Pɛ høntꞌa go toꞌo da hyoni da ꞌyøtꞌ ran ho, di japi ꞌdarpʉ dim ꞌbʉhmi Oją nɛ da numanho Oją a, nɛ da hyurpa rá mbʉi thocpa thoho, nɛcähe dyʉ israelgähe, nɛ ahʉ hing yʉ israelhʉ. Nguetho gätho ꞌdaꞌangujʉ bʉ na nujʉ Oją. 12 Nɛ nuꞌʉ hing yʉ israel him bi sih yʉ́n tꞌɛ̨di Oją. Nɛ madagueꞌbʉ him bi sifi, pɛ guehma da nu yʉn ʉnbi toꞌo di thocta yʉ tsꞌoqui. Nɛ ngutho ʉ yʉ israel ngue bi sih yʉ́n tꞌɛ̨di Oją, nɛ gueꞌʉ yʉ́n tꞌɛ̨di Oją dí juąnba ʉ toꞌo di thocta yʉ tsꞌoqui. 13 Nguetho nuꞌbʉ da bątho yʉ́n tꞌɛ̨di Oją nꞌda, hin da numanho Oją a ꞌbʉ, hinda høntꞌbʉ da ꞌyøtꞌa hmam bʉ. 14 Nuꞌʉ hing yʉ israel, him bin tꞌun yʉ́n tꞌɛ̨di Oją ngue ran hocjąꞌi xtá ꞌyøtꞌe. Pɛ guehma i pąsɛ mbo yʉ́ mbʉi ndaꞌa xʉn ho, nguetho jaꞌbʉ i øtꞌa rán thɛui ʉ yʉ́n tꞌɛ̨di Oją ngue ran hocjąꞌi. 15 Nɛ madagueꞌbʉ him bi sih yʉ́n tꞌɛ̨di Oją ʉ ꞌda, pɛ tengu ꞌbʉ mán tꞌoꞌtꞌi bʉ ja yʉ́ mbʉi ʉ yʉ́n tꞌɛ̨di Oją, nɛ guesɛ yʉ́ mbʉi i xifi ngue hingui ho a bi ꞌyøtꞌe, o jaꞌbʉ xʉn ho. 16 Nɛ gueꞌa dí juąnba Oją ʉ gätho yʉ jąꞌi, nangue ra Jesucristo ꞌbʉ bi zøn ra pa. Nɛ di juąnba ʉ nangue ʉ i ąsɛ mbo yʉ́ mbʉi ʉ. Nɛ gueꞌa i mam bʉ ja ran ho maꞌdaꞌyo ngue dím mangä.Sä ín ꞌyɛ̨xꞌʉ ꞌda yʉ israel ʉ yʉ́n tꞌɛ̨di Oją
17 Pɛ nu ahʉ ma miꞌisrael ahʉ, guidín ꞌyɛ̨xhʉ nguetho gyʉ mɛngu israelhʉ, nɛ, “hønsɛgahʉ i numanhojʉ Oją, nguetho bi ꞌdajʉ ʉ yʉ́n tꞌɛ̨di,” sä guí ɛ̨mhbʉ. 18 Nɛ gá pąhmbʉ rá pähä Oją, nguetho gán xähmbʉ yʉ́n tꞌɛ̨di, nɛ gá pąhmbʉ ndaꞌa xʉn ho da zä da ꞌyøtꞌa nꞌda. 19 Nɛ guím bɛ̨nsɛhʉ guí uthʉ ra ꞌyu ʉ yʉ xädä, guím bɛ̨mhbʉ yʉ́ nyotꞌi ahʉ ʉ i ꞌyo bʉ ja ra ꞌbɛxui. 20 Nɛ sä guí ɛ̨mhbʉ ja nin tꞌɛ̨di gui xänbahʉ yʉ ꞌyąmbʉi, nguetho guí pąhmbʉ ʉ yʉ́n tꞌɛ̨di Oją ngue majuąni, ngue di un ran ꞌyomfɛ̨ni nꞌda. 21 Pɛ nuꞌbʉ gueꞌa guí øthʉ ma miꞌisrael ahʉ guí xänbahʉ miꞌda, hanja hin gán xäsɛhʉ thą. Guí xihmbʉ miꞌda ngue hin dim pɛ̨, pɛ hanja go guím pɛ̨sɛhʉ thą. 22 Guí xihmbʉ miꞌda ngue hin din ꞌyomtꞌɛ̨ni, pɛ hanja go guí ꞌyomtꞌɛ̨ni zɛhɛhʉ. Guí xihmbʉ miꞌda hin da ꞌyɛ̨spa ʉ yʉ hyäte oją, pɛ ha hin guím bɛ̨mhbʉ ngue go guí cʉzɛhɛhʉ bʉ i thąnde yʉ́ ojąsɛ ʉ, nɛ guí pɛ̨fʉ ꞌbɛꞌa guí numanhohʉ bʉ. 23 Gná yąthʉ a ngueꞌa guí ɛ̨mhbʉ guí pąhmbʉ yʉ́n tꞌɛ̨di Oją. Pɛ manꞌda gadí jafʉ hin da numansu Oją ʉ miꞌda, nguetho guí fɛstahʉ ʉ yʉ́n tꞌɛ̨di bi ma. 24 Janangueꞌa bin ja tengu mán tꞌoꞌtꞌi, ngue di cꞌąmanꞌʉ Oją ʉ hing yʉ israel ꞌbʉ i nu a ran tsꞌo guí øthʉ, gyʉ israelhʉ. 25 Pɛ nuꞌbʉ xcá øthʉ yʉ́n tꞌɛ̨di Oją bi man ra Moisés, xʉn ho ngue am hmɛpya ma jąꞌihʉ, ngue dyʉ israelhʉ. Pɛ nuꞌbʉ hin dí tɛnhdʉ ʉ, säti thoho am hmɛpyagahʉ ꞌbʉ, nɛ nte ja bʉ a uh ma hmɛpyahʉ. 26 Nɛ nuꞌʉ hing yʉ israel ngue him bi mba ma hmɛpyabi yʉ́ jąꞌi, nuꞌbʉ øtꞌ yʉ́n thɛhʉ ʉ yʉ́n tꞌɛ̨di Oją, nuꞌʉ i numanho Oją ʉ, tenguꞌbʉ xtá hmɛpya bʉ na nu Oją ʉ. 27 Nɛ nuꞌʉ hing yʉ israel ngue nte ma hmɛpya i ja, pɛ nuꞌbʉ i øtꞌ yʉ́n tꞌɛ̨di Oją, gueꞌʉ dí jajʉ din cꞌą ma tsꞌoquihʉ ʉ, dyʉ israelhʉ. Nguetho sä dá mɛpya ma jąꞌihʉ, tengu manꞌa ran tꞌɛ̨di, nɛ hin dá øthʉ a rán säui ma hmɛpyahʉ. 28 Nɛ madagueꞌbʉ nꞌdatꞌa mam bombøtahʉ ra Abraham, pɛ hinga gueꞌa ní ꞌyøtꞌe rá tꞌʉhni Oją nꞌda a. Nɛ xín nangueꞌa am hmɛpya maxøtsꞌe rá jąꞌi nꞌda. 29 Pɛ hinda høntꞌbʉ hmɛpya ma mbʉihʉ nangue rá Hogandąhi Oją, nuꞌa njuąntho ra hmɛpya i nu Oją a. Nɛ nuꞌbʉ njabʉ ma mbʉihʉ, hin gam bɛ̨mhbʉ ngue da numanhojʉ ma mijąꞌihʉ, pɛ høntꞌa Oją gam bɛ̨mhbʉ da numanhojʉ.