3
Nuꞌbʉ ꞌboꞌo da ꞌyɛ̨ngui: “Pɛ hanja bi huand Oją ʉ yʉ israel thą, nɛ ꞌbɛꞌa nam bønꞌa ra hmɛpya bi si ʉ,” gueꞌbʉ ꞌboꞌo da ꞌyɛ̨ngui. 2 Pɛ xʉn ngu ꞌbɛꞌa í huand Oją ʉ. Mꞌbɛtꞌo thoho gam bɛ̨mhbʉ bin tꞌun rám hman Oją mayaꞌbʉ ʉ ndu mam bombøtahʉ. Nɛ gueꞌa ga xi ʉ toꞌo da ꞌyängui. 3 Pɛ xʉn ngu ʉ him bi nde. Pɛ ha gam bɛ̨mhbʉ bi zɛpʉ a mí ɛ̨na xtá ꞌyørpa Oją yʉ jąꞌi ꞌbʉ. 4 Hinꞌna maha, pɛ guehma guesɛ Oją di jąꞌtsꞌa rám hma, madagueꞌbʉ gätho xtín hɛ̨tho yʉ jąꞌi nangue rá ꞌbɛfi. Nɛ tengu bi man rá tꞌohni Oją, gätho di jąꞌtsꞌa bi ma, nɛ hin hapʉ ga tįmhbʉ ngue him bi ꞌyøtꞌ Oją a mí ma, ꞌbʉ ga änhdʉ. 5 Pɛ sä ɛ̨n ʉ ꞌda hingui øh rám hman Oją: “Hingui ho ꞌbʉ di ʉngahʉ Oją nangue ma tsꞌoquihʉ, nguetho manꞌda di nɛcmanho rán ho Oją ꞌbʉ gätho xʉn tsꞌotho ga øthʉ,” ɛ̨nꞌʉ yʉ jąꞌi. 6 Pɛ hingui sähma ngubʉ ga mamhbʉ, nɛ xʉn ho ꞌbʉ di ʉngahʉ Oją nangue ma tsꞌoquihʉ, nguetho jatho da ꞌyøtꞌ ran tsꞌʉtꞌabi nangue gätho ra ximhäi. 7 Nɛ sä ɛ̨n ʉ ꞌda: “Manꞌda dí ɛ̨spahʉ Oją nangue ma fɛhnihʉ dí mamhbʉ. Pɛ hanja di ʉngahʉ ꞌbʉ, tenguꞌbʉ dyʉ ꞌyøtꞌa tsꞌoquihʉ, nɛ manꞌda dí uhmbʉ ngue njąmꞌbʉ dim fɛhni Oją,” sä ɛ̨n ʉ ꞌda. 8 “Nɛ mbähä ga øthʉ ran tsꞌo, nꞌdahma di nɛqui a ran ho,” i ɛ̨njʉ dí ɛ̨mhbʉ ʉ ꞌda ꞌbʉ dí ɛ̨na hin ní yąnjʉ Oją ʉ yʉ́n tꞌɛ̨di, gueꞌʉ to i sanjʉ. Pɛgue da tsꞌɛmba ʉ nangue yʉ́m hman ʉ. Gätho dín dupatehʉ yʉ tsꞌoqui
9 Pɛ ha gam bɛ̨mhbʉ manꞌda xʉn hojʉ dyʉ israelhʉ. Pɛ hinꞌna, tengu thoho dá xi ahʉ ꞌbʉ rá mbʉdi, nguetho ꞌdaꞌangu dyʉ ꞌyøtꞌa tsꞌoquihʉ, nɛꞌʉ yʉ israel nɛꞌʉ hin yʉ israel. 10 Nɛ mán tꞌoꞌtꞌi:
Njoꞌo nꞌda xʉn ho, xinga nꞌda.
11 Njoꞌo nꞌda i ja rán ꞌyomfɛ̨ni,
nɛ njoꞌo i hon Oją ngue nde da dɛnni.
12 Gätho gahʉ dá ꞌuethohʉ, nɛ ꞌda án tsꞌontho ꞌbɛꞌa dá øthʉ.
Xínga nꞌdajʉ dí øthʉ ran hocjąꞌi.
13 Ɛ̨mmɛ xʉn tsꞌo ma ndehʉ, tenguꞌbʉ nꞌda ra hyąhäi bʉ ja ran ꞌyägui ngue hingan joꞌmi, xʉn xą, in jabʉ ma ndehʉ.
Nguetho ɛ̨mmɛ dí mamhbʉ yʉ fɛhni,
nɛ ran dąte i pøm ma ndehʉ, tenguꞌbʉ dyʉ pozʉhʉ.
14 Nu ma ndehʉ ɛ̨mmɛ yupʉ ran tsꞌante ngue xʉn ju.
15 Nu ma guahʉ, ɛ̨mmɛ i ɛ̨hya na ꞌdihi ngue dan hotehʉ.
16 Pɛ í huɛ̨hi thoho ʉ ꞌbʉpʉ hapʉ dí ꞌyohʉ, ngue xʉn tsꞌo ꞌbɛꞌa dí ørpahʉ ʉ.
17 Nɛ hin dadí hocpahʉ yʉ́ mbʉi ma mijąꞌihʉ, xínga gueꞌa ma mbʉi zɛhɛhʉ.
18 Nɛ xíngui tsꞌʉ dím bɛ̨mhbʉ ngue ga numansuhʉ Oją.
Nɛ gueꞌa bi man rá tꞌohni Oją ꞌbʉ mayaꞌbʉ a. 19 Nɛ nuꞌa mí hmam bʉ ja ram hma mayaꞌbʉ ngue bi xije Oją dyʉ israelgähe, ga pąhmbʉ gätho i ja ma tsꞌoquihʉ bʉ na nujʉ Oją. Janangueꞌa gätho ra ximhäi din hɛ̨tho ꞌbʉ bi ꞌyørpa ran juąnbi Oją. 20 Nɛ nuꞌʉ yʉ́n tꞌɛ̨di Oją, xínga nꞌda ra jąꞌi dí ꞌyɛ̨mbi xʉn ho ʉ ngue bi xijʉ ran hocjąꞌi xcá øthʉ. Pɛ nuꞌʉ yʉn tꞌɛ̨di, ja ga tįmhbʉ bʉ ꞌbɛꞌa dá øthʉ.
Da yąnjʉ Oją ꞌbʉ ga hąmhbʉ rán hoqui
21 Janangueꞌa nuya bi tꞌurcahʉ manꞌda ran hoqui ngue dí ꞌyɛ̨njʉ xʉn hojʉ Oją, nɛ hin nangue ʉ yʉ́n tꞌɛ̨di ngue bi xijʉ xcá øthʉ ran ho, madagueꞌbʉ midí nɛqui tsꞌʉ bʉ ja ram hma mayaꞌbʉ a ran hoqui dí xi ahʉ ya. 22 Gue ga hąnthohʉ a rán hoqui Oją nangue ra Jesucristo di hoga ma tsꞌoquihʉ høntꞌa go toꞌo gahʉ. 23 Nguetho njoꞌo gahʉ dá jąsꞌhʉ gätho ran ho nguepʉ xtá numanhojʉ Oją, pɛ gätho dá øthʉ yʉ tsꞌoqui bʉ án nujʉ. 24 Janangueꞌa bi zänni di hogazɛhɛhʉ Oją ngue rán tꞌunni thoho, nguetho bi gurca ma tsꞌoquihʉ ra Cristo Jesús. 25 Nguetho bi zän Oją a ra Cristo ngue bim ꞌbøtsꞌe zɛhɛ, bi gurca ma tsꞌoquihʉ nangue rá ji. Nɛ gueꞌa ní yąn ʉ toꞌo da hyąnꞌa bi ꞌyørpe.
Nɛ ngutho nangue ʉ mí ꞌbʉh mayaꞌbʉ, nuꞌbʉ mi du ra Cristo, ja bi nɛqui a í punba yʉ́ tsꞌoqui ʉ toꞌo mí nde rá punbi Oją. Nɛ ja bi ꞌyu Oją bʉya ꞌbɛꞌa í thøtho ʉ. 26 Nɛ ja bi ꞌyu Oją a rán jutꞌi ma tsꞌoquihʉ, janangueꞌa da zä di hogahʉ ya, nɛ da zimanhojʉ ngue guejʉ dá ɛ̨cꞌyɛihʉ rá mate ra Jesús. 27 Pɛ xiya, hapʉ bi goꞌa man ꞌyɛ̨tsꞌihʉ. Bi mba ma ꞌbɛrquigahʉ. Pɛ hague nja. Nguetho hin dá jąsꞌhʉ yʉ́n tꞌɛ̨di Oją, pɛ bin ꞌdactahʉ rá mate ꞌbʉ má ɛ̨cꞌyɛihʉ a. 28 Nɛ dí pąhmbʉ ngue bi hogahʉ Oją ꞌbʉ má hąnthohʉ rám hma nangue rán hoqui. Nɛ hin da ꞌyängahʉ ꞌbʉ xcá jąsꞌhʉ, o hinꞌna. 29 Pɛ sä dí ɛ̨mhbʉ dyʉ israelhʉ høngdahʉ i numanhojʉ Oją. Pɛ i jatho ga pąhmbʉ ngue nɛꞌʉ hin yʉ israel in nde da numanho Oją. 30 Nguetho nꞌdatho a Oją, nɛ gätho toꞌo da hyąn rá mate gätho ꞌda ni hocpada Oją ʉ nɛ da zimanho, nɛ ʉ yʉ israel, nɛ ʉ hing yʉ israel. 31 Pɛ ha dí ɛ̨n ahʉ nte di muui yʉ́n tꞌɛ̨di Oją ngue dí ɛ̨n ahʉ ga hąnthohʉ rá mate. Pɛ hinꞌna, pɛ manꞌda dí jąsꞌhʉ yʉ́n tꞌɛ̨di Oją ya, nangue ra Cristo rá mate Oją i fäxcahʉ.