Ran tꞌuti nangue ra Abraham
4
Xi a mam bombøtahʉ ra Abraham ngue dyʉ israelhʉ, ꞌbɛꞌa í hocpa yʉ́ tsꞌoqui Oją a thą, nɛ ꞌbɛꞌa í ꞌyɛ̨mbi xʉn ho a. 2 Pɛ hinga gueꞌʉ ꞌbɛꞌa gätho bi ꞌyøtꞌe í tꞌɛ̨mbi xʉn ho a, nguetho nuꞌbʉ da gue ʉ, ya mí ja ꞌbɛꞌa xtín ꞌyɛ̨zɛhɛ ꞌbʉ. Pɛ hin te ín ꞌyɛ̨xꞌa ra Abraham bʉ án nu Oją a. 3 Pɛ tengu man rá tꞌohni Oją, nu ra Abraham bi ꞌyɛ̨cꞌyɛi tho a ram hma ꞌbʉ mí xifi ꞌbɛꞌa da ꞌyørpa Oją. Nɛ gueꞌa í ꞌyɛ̨mbi xʉn ho a bʉya. 4 Nuꞌbʉ xtá xijʉ Oją ngue gueꞌa rá ꞌbɛfi ga øthʉ dí ꞌyɛ̨njʉ xʉn hojʉ a, pɛ hing ra mate thoho a dí ꞌyɛ̨njʉ xʉn hojʉ ꞌbʉ, pɛ tenguꞌbʉ man zäbithohʉ a ꞌbʉ. 5 Pɛ nu Oją hingui xijʉ nꞌda ra ꞌbɛfi dí ꞌyɛ̨njʉ xʉn hojʉ, nguetho hinguin zaqui ma mbʉihʉ nangue ma tsꞌoquihʉ. Janangueꞌa i xijʉ ga hąnthohʉ a rá mate di hoga ma tsꞌoquihʉ, nɛ gueꞌa dí ꞌyɛ̨njʉ xʉn hojʉ a bʉya. 6 Nɛꞌa ra David ngubʉ bi ꞌyorpʉ ja rá tꞌohni Oją mayaꞌbʉ ngue:Ɛ̨mmɛ di johya nꞌda ra jąꞌi ngue da ꞌyɛ̨mp Oją xʉn ho, nɛ hin da ꞌyʉrpa ra güɛnda ꞌbʉ xʉn ho xtá ꞌyøtꞌe o hinꞌna.
7 Nguetho bi mba ma punbi yʉ́ tsꞌoqui, nɛ him man din cꞌą, bi ꞌyɛ̨na.
8 Nɛ ɛ̨na:
Di johya ʉ toꞌo bi mba ma hoqui yʉ́ tsꞌoqui nɛ nte da thįnba ꞌbʉ bi mba ma juąnbi,
bi ꞌyɛ̨nꞌa ra David. 9 Pɛ ha guím bɛ̨mhbʉ ngue høntꞌʉ am hmɛpya yʉ́ jąꞌi da nu na ran johya i hmangua. Ha hin guím bɛ̨mhbʉ ngue nɛ ʉ hin gam hmɛpya, da zin Oją, ngueꞌbʉ ꞌdaꞌangu im bɛ̨mhbʉ a ra Abraham ꞌbʉ mi hyąntho a ra mate bi man Oją, nɛ gueꞌa í tꞌɛ̨mbi xʉn ho a bʉya. 10 Pɛ ga änꞌnahʉ, ha mꞌbɛjua bi tꞌɛ̨mbi xʉn ho a ra Abraham, ꞌbʉ mi hmɛpya rá jąꞌi. Uague mꞌbɛtꞌo thoho bi tꞌɛ̨mbi xʉn ho. Pɛ hinga mꞌbɛjua maha, pɛ ꞌbexque bi tꞌɛ̨mbi xʉn ho ꞌbʉ hin ní hyɛc rá jąꞌi. 11 Nɛ mꞌbɛjua bi sifi da hyɛc rá jąꞌi, ngue ra hmɛpya ya xí ꞌyɛ̨mp Oją xʉn ho a. Pɛ bi ꞌyɛ̨mbi xʉn ho ꞌbʉ mi hyąntho a ram hma ꞌbʉ hin ní hyɛc rá jąꞌi. Janangueꞌa i ɛ̨mbi rá ta ra Abraham ʉ toꞌo gätho i ɛ̨cꞌyɛi tho a bi man Oją. Nɛꞌʉ hing yʉ israel, ngue him bi mba nthɛqui yʉ́ jąꞌi, nɛꞌʉ da tꞌɛ̨mbi xʉn ho ʉ. 12 Nɛjʉ dyʉ israelhʉ gue dá hɛc ma jąꞌihʉ, daꞌigu bʉ na ꞌyɛ̨njʉ xʉn hojʉ Oją a ra Abraham, ꞌbʉ ꞌdaꞌangu dím bɛ̨mhbʉ ra Abraham ꞌbʉ hin ní hyɛc rá jąꞌi.
Ga hąmhbʉ rám hma Oją nangue ran jąpi i xijʉ
13 Nɛ nu Oją bi mam majuąni a da ꞌyørpa ra Abraham, ngue bi ꞌyɛ̨mbi: “Ga ꞌdaꞌa ran jąpi nɛꞌʉ nim bomꞌbɛto gätho ná ndoho ra ximhäi, nɛ ga ꞌda ahʉ ra ꞌdaꞌyo häi,” bi ꞌyɛ̨mp Oją a ra Abraham. Pɛ hin nangue nꞌda ra ꞌbɛfi nín tꞌun na ran jąpi na, pɛ nangue bi tꞌɛ̨mbi xʉn ho ꞌbʉ mí hyąntho na ram hma bi sifi. 14 Pɛ nuꞌbʉ dím bɛ̨mhbʉ gue gueꞌʉ yʉ́n tꞌɛ̨di dí jąp Oją nꞌda, pɛ dím bɛ̨mhbʉ nte ní mba tho a manꞌda ran hogui ꞌbʉ, ngue ga hąnthohʉ a rám hma, nɛ hin da zä di jącpahʉ Oją ꞌbʉ. 15 Nguetho nuꞌbʉ dí ɛ̨na gue gueꞌʉ yʉ́n tꞌɛ̨di Oją ga homhbʉ, o gueꞌʉ dí pąsɛhʉ xcá øthʉ, pɛ dí fɛstahʉ ʉ, nɛ høntꞌa ran ʉnbi ga nuhʉ ꞌbʉ. Pɛ nuꞌbʉ hin xtín ja yʉn tꞌɛ̨di, o gueꞌbʉ hin xcá pąsɛhʉ mbo ma mbʉihʉ, hin xtí nɛqui yʉ tsꞌoqui ꞌbʉ. 16 Pɛ hingui ma nangue yʉ́n tꞌɛ̨di dí jącpahʉ o gueꞌʉ dí pąsɛhʉ, nguetho hin xcá nuhʉ ran ho ꞌbʉ. Pɛ i ma ga hąnthohʉ rám hma nangue rá mate, nɛ nubʉya da zä majuąni gätho gahʉ ga nuhʉ ran ho bi sih ra Abraham da nu yʉ́m bomꞌbɛto. Nɛ madagueꞌbʉ njuąntho dyʉm bomꞌbɛtojʉ ra Abraham o hinꞌna, pɛ ꞌdaꞌangu dím bɛ̨mhbʉ ra Abraham. Janangueꞌa ma tahʉ ra Abraham bʉ nam bɛ̨n Oją. 17 Nɛ gueꞌa nam bønꞌa mí xi Oją ra Abraham ꞌbʉ mí ꞌyɛ̨mbi: “Nuꞌi grá Abraham, ga øtꞌeꞌe ngue grá ta xʉn ngu nim bomꞌbɛto gätho nan ndoho ra ximhäi.” Nɛ nuꞌa ra Abraham bi hyąnꞌa ram hma bi sifi, nguetho bi bądi jasɛ rá tsꞌɛdi Oją, gue da zä di un ra tsꞌɛdi ʉ xʉn dącꞌyɛi nɛ ʉ xʉn du. Nɛ tenguꞌbʉ ya bin ja ꞌbʉ mí ma Oją, nguetho majuąni da ꞌyøtꞌe. Nɛ gueꞌa bi bɛ̨nꞌa ra Abraham. 18 Nɛ nu ra Abraham him mi sä xtín ta nangue ʉ yʉ́m bomꞌbɛto dim ꞌbʉi. Pɛ bi hyąn a ram hma ꞌbʉ mi sifi: “Xʉn ngu nim bomꞌbɛto dim ꞌbʉi gätho nan ndoho ra ximhäi.” Nɛ bi døꞌmi din ja, janangueꞌa bin ja bʉya. 19 Nɛ madagueꞌbʉ xí thoh yʉ pa i ꞌbʉi ngue xtím ꞌbʉh yʉ́ tꞌʉhni, nguetho ya xí ndø, xí mbɛꞌtsꞌa nꞌda ciɛnto njɛya, nɛ ꞌdaꞌangu xín dącꞌyɛiui a rá xisu ra Sara, him mí sä xtím ꞌbʉh yʉ́ tꞌʉhni, pɛ him bi ꞌbɛh rá tsꞌɛdi rá tꞌɛ̨cꞌyɛi, bi bądi majuąni dim ꞌbʉh rá tꞌʉhni. 20 Nɛ xingui tsꞌʉ bi bɛ̨ni ngue hin da ꞌyøtꞌ Oją a bi ma, nguetho bi bądi hingui hɛ̨mpꞌa da ꞌyøtꞌ Oją. Janangueꞌa bi hyąn rá tsꞌɛdi Oją a bʉya, nɛ gueꞌa í ꞌyɛ̨spa Oją a. 21 Nɛ nꞌdatꞌa mim bɛ̨ni ngue jasɛ rá tsꞌɛdi Oją di jąꞌtsꞌa bi ma. 22 Nɛ nuꞌa bi hyąntho a ram hma ꞌbʉ mí sifi ꞌbɛꞌa da ꞌyørpa Oją, nɛ gueꞌa í hocpa Oją a, nɛ bi ꞌyɛ̨mbi xʉn ho, i ɛ̨m bʉ ja rám hman Oją. 23 Pɛ hinga høntꞌa ra Abraham bi tꞌɛ̨mbi xʉn ho ꞌbʉ mi hyąntho a ram hma bi man Oją. 24 Pɛ nɛjʉ, bi hogahʉ Oją nɛ bi ꞌyɛ̨njʉ xʉn hojʉ ꞌbʉ má hąnthohʉ a ram hma bi xijʉ Oją, ngue bi xoxꞌa ma Hmuhʉ ra Jesús ꞌbʉ mi du. 25 Nuꞌa bi un rá te bi gurca ma tsꞌoquihʉ, nɛ bi tꞌägui. Nɛ bi xox Oją a, janangueꞌa dí pąhmbʉ majuąni bi dąha bi xogahʉ.