Dí yąmanhohʉ Oją nguetho bi pungahʉ rá Tsꞌʉntꞌʉ
5
Bi hogahʉ Oją ꞌbʉ má hąmhbʉ rán hoqui bi ma. Midín sʉhmbʉ Oją, pɛ nuya dí yąmanhohʉ, ngue bi hogahʉ ma Hmuhʉ ra Jesucristo. 2 Nɛ bi zixcahʉ ra Jesucristo bʉ i ja rá mate Oją, nguetho dá hąmhbʉ rán hoqui, nɛ dí ꞌbʉhmbʉ bʉ. Nɛ dadín johyahʉ gue dí tømhbʉ a ran ho tąte thoho da ꞌyørcahʉ. 3 Nɛ hinga høntꞌa ran ho dí tømhbʉ nán johyahʉ ya, pɛ nɛ ʉ yʉn ʉnbi dín nuhʉ ya, guextaꞌa dadín johyahʉ. Nguetho nuꞌʉ yʉn ʉnbi ní jajʉ ga häthʉ xʉn ho ʉ. 4 Nɛ nuꞌbʉ dí häthʉ xʉn ho, gueꞌa dín te ma mbʉihʉ a. Nɛ nuꞌbʉ bin te ma mbʉihʉ, gueꞌa ná tømhbʉ a ran ho di ꞌdajʉ Oją bʉya. 5 Nɛ dí pąhmbʉ hin da hyäjʉ Oją nangue ran ho dí tømhbʉ, nguetho di huɛ̨gahʉ. Nɛ nuꞌa rá Hogandąhi bi ꞌdajʉ, di jajʉ dí sähʉ rán huɛ̨cate Oją ɛ̨mmɛ xʉn ngu. 6 Nɛ him mí sä xcán yąnsɛ ma tesɛhʉ, nguetho bi güendga ma mbʉihʉ nangue ma tsꞌoquihʉ. Pɛ bi du ra Cristo ꞌbʉ mi zøn ra pa bi man Oją, ngue bi yąnjʉ dyʉ tsꞌomꞌbäihʉ. 7 Pɛ hinga ngubʉ rán huɛ̨cate nꞌda ra jąꞌi, høntꞌbʉ ra hocjąꞌi rá amigo, da nde di ꞌbɛh rá te ngue xtán yąn a, pɛ nuꞌbʉ ra tsꞌomꞌbäi, hin da nde di ꞌbɛh rá te ꞌbʉ. 8 Pɛ nu Oją i urcahʉ tąte thoho xʉn ho rán huɛ̨cate, nguetho hin dyʉ hocjąꞌihʉ, pɛ bi du ra Cristo bi yąnjʉ ꞌbʉ man dyʉ́ tsꞌomꞌbäihʉ. 9 Nuya bi hoga ma tsꞌoquihʉ nangue rá ji ra Jesucristo, nɛ bi zimanhojʉ Oją. Janangueꞌa dí pąhmbʉ majuąni da yąnjʉ ra Jesucristo nangue rá cuɛ Oją ꞌbʉ rán zɛgui. 10 Nɛ nuꞌbʉ midín sʉhmbʉ Oją, pɛ bi hogahʉ rá Tsꞌʉntꞌʉ zɛhɛ ꞌbʉ mi du. Nɛ i ꞌbʉh ya, janangueꞌa bi zä di thoqui di ꞌdajʉ ra hogambʉi ya, nɛ da xoxcahʉ ꞌbʉ rán zɛgui. 11 Pɛ nɛ a i ørcahʉ ya dadín johyahʉ nangue dadín amigohʉ Oją ya. Nguetho bi ꞌuegahʉ ꞌbɛꞌa midín sʉhmbʉ Oją a ma Hmuhʉ ra Jesucristo.Ra Adán bim pommi ra Jesucristo
12 Pɛ nꞌdatho maha ran ꞌyohʉ bi dʉmpꞌ ra tsꞌoqui ua ja ra ximhäi, gue nu ra Adán. Nɛ bi dʉmpꞌ ran dąte nangue rá tsꞌoqui a bʉya. Nɛ gueꞌa gätho ran dąte bi thocꞌʉ yʉ jąꞌi a bʉya. Nguetho tenguꞌbʉ ꞌdatꞌa dá øthʉ ra tsꞌoqui ra Adán. 13-14 Nɛ ngutho bin ja ʉ bi xąnd ra Adán, guehma bi du nangue yʉ́ tsꞌoqui, madagueꞌbʉ him bi siꞌa nꞌda ran tꞌɛ̨di tengu bi sih ra Adán. Gue gätho yʉ jąꞌi mi ꞌbʉ ꞌbʉ him mi hman yʉ́n tꞌɛ̨di Oją, gue hin nám ꞌbʉh ra Moisés, pɛ bi du, nguetho yʉ́ hmu a ra Adán. Pɛ bi zøh manꞌda ra hmu ngue rám poniui ra Adán, nuꞌa ra Jesucristo a, gue mí hma ba ɛ̨hɛ. 15 Pɛ nꞌdanꞌyo thoho bi ꞌyøtꞌ ra Adán nɛ ra Jesucristo. Nuꞌa ra Adán, bi un ran dąte gätho yʉ jąꞌi, nangue rá tsꞌoqui a. Pɛ nu ra Jesucristo ɛ̨mmɛ manꞌda xʉn ngu rá tsꞌɛdi, nguetho rá mate zɛhɛ bi punga ma tsꞌoquihʉ høntꞌa go toꞌo da hyąn a. Nɛ gueꞌa rán tꞌunni Oją bi ꞌdajʉ. 16 Nꞌdatꞌa rá tsꞌoqui ra Adán, ín ʉnba yʉ jąꞌi. Pɛ nu ra Cristo bi gutꞌi xʉn ngu yʉ tsꞌoqui nangue rá mate zɛhɛ, janangueꞌa da zä da xocpa yʉ jąꞌi. 17 Nɛ nangue ra tsꞌoqui bi ꞌyøtꞌa nꞌda ra jąꞌi ngue ra Adán, gueꞌa án ja rá tsꞌɛdi ran dąte a nangue gätho yʉ jąꞌi a bʉya. Pɛ nu toꞌo gätho da hyąn rá mate Oją, da mba ma hoqui yʉ́ mbʉi, ꞌdarpʉ dim hmuhʉ a ra Jesucristo, nɛ din ja bʉ dim ꞌbʉhmbʉ gätho yʉ pa maząi. 18 Nuꞌʉ bi xąntꞌa ra Adán gätho bi tsꞌänba ran ʉnbi nangue rá tsꞌoqui ra Adán. Pɛ nu ran ho bi ꞌyøtꞌa ra Jesucristo, da zä da xocpa yʉ jąꞌi, nɛ di un ra temaząi. 19 Nuꞌa ra Adán bi mbɛstaꞌa rám hman Oją, gueꞌa ín tsꞌomꞌbäi gätho ʉ bi xąndi. Pɛ nu ra Jesucristo ꞌbʉ mi ꞌyøtꞌa bi man Oją, gueꞌa ín hocjąꞌi ʉ toꞌo gätho bi xąntꞌa. 20 Nu Oją bi un yʉ́n tꞌɛ̨di, da fądi ɛ̨mmɛ xʉn ngu yʉ tsꞌoqui i ja. Nguetho nuꞌbʉ dí pąhmbʉ ngue ɛ̨mmɛ xʉn ngu yʉ tsꞌoqui i jajʉ, ga pąhmbʉ bʉya, ɛ̨mmɛ manꞌda xʉn ndoho rán huɛ̨cate Oją ngue di pungahʉ. 21 Tengu thoho a ra tsꞌoqui bim hmu, nɛ mí nde xtí ꞌdajʉ ran dąte. Nɛ ngutho a rá mate Oją, bim hmu nɛ gueꞌa bi pungahʉ, nɛ bi ꞌyɛ̨njʉ xʉn hojʉ, nɛ di ꞌdajʉ ra te maząi nangue ma Hmuhʉ ra Jesucristo.