Bi ꞌbɛrca man ꞌyomfɛ̨nisɛhʉ a rán dąte ra Cristo
6
ꞌBɛꞌa maha gam bɛ̨mhbʉ bʉya, ha ga thoqui ga øthʉ yʉ tsꞌoqui ꞌbʉ, nꞌdahma manꞌda xtán ndoho rán huɛ̨cate Oją di pungahʉ. 2 Pɛ hingui sähma ngubʉ gam bɛ̨mhbʉ, ngue xø ga thoqui ga øthʉ yʉ tsꞌoqui. Pɛgue dín jahʉ tengu nꞌda ra du hingui ø ꞌbʉ sifi da ꞌyøtꞌ yʉ tsꞌoqui. Hague dán zä ga thoqui ga øthʉ yʉ tsꞌoqui ꞌbʉ. 3 Ha hin dím bɛ̨mhbʉ ꞌbɛꞌa nám bønꞌa ran xixyą dí øthʉ. Nám bøni bi ꞌbɛrca ma tsꞌon ꞌyomfɛ̨nihʉ ꞌbʉ mí du ra Cristo. 4 Nɛ nuꞌa ran xixyą nam bøni bi tꞌä a ma tsꞌon ꞌyomfɛ̨nihʉ ꞌbʉ mí tꞌä a ra Cristo. Nɛ bi ꞌdajʉ ran ꞌyomfɛ̨ni maꞌdaꞌyo ꞌbʉ mi xoxa rá Ta nangue rá tsꞌɛdi mixte. Janangueꞌa bi zä ꞌdarbʉ dí ꞌbʉhmbʉ bʉ ja ra ꞌdaꞌyote nɛ dí øthʉ yʉ́n thɛhʉ a. 5 Nuꞌbʉ mí du ra Cristo, nɛꞌa ma tsꞌon ꞌyomfɛ̨nihʉ bi du bʉya. Janangueꞌa nuꞌbʉ mi xox Oją a ra Cristo, dám ꞌbʉhmbʉ maꞌdaꞌyo nɛ maꞌdaꞌyo dím bɛ̨mhbʉ ya. 6 Nɛ dí pąhmbʉ tenguꞌbʉ mi mba ma cuati ma tsꞌon ꞌyomfɛ̨nihʉ bʉ ja ra pontꞌi ꞌbʉ mi du bʉ ra Cristo. Janangueꞌa bi thącpa rá tsꞌɛdi man ꞌyomfɛ̨nisɛhʉ, ngue hin di mandagahʉ yʉ tsꞌoqui. 7 Nguetho tenguꞌbʉ nꞌda ra du, ya him ma ꞌyøtꞌ ra tsꞌoqui, pɛ ya bi mba ma thøgue bʉ ja rá tsꞌɛdi ra tsꞌoqui. 8 Bi du ma tsꞌon ꞌyomfɛ̨nihʉ nangue bi du ra Cristo, janangueꞌa dí pąhmbʉ ꞌdarbʉ dí ꞌbʉhmbʉ ra Cristo ya. 9 Nɛ dí pąhmbʉ ngue bi ndantsꞌ mahønꞌa ra Cristo ꞌbʉ mi du, nɛ him manꞌdandį da du mahønꞌa, him man ja rá tsꞌɛdi ran dąte mahønꞌa nangue ra Cristo. 10 Nguetho má zätꞌa nꞌdandį bi du ra Cristo nangue ma tsꞌoquihʉ, nɛ nuya nám ꞌbʉi di japi da fąh rá tsꞌɛdi Oją ya. 11 Janangueꞌa i jatho ga pąhmbʉ tenguꞌbʉ dá tuhʉ nguetho bi thągahʉ rá tsꞌɛdi ra tsꞌoqui nanguejʉ, nɛ hin dín nde ga øhmbʉ yʉ tsꞌoqui ya. Nɛ nuya nám ꞌbʉhmbʉ dí jafʉ da fąh rá tsꞌɛdi Oją, nangue ra Cristo Jesús dí ꞌbʉhmbʉ. 12 Janangueꞌa hingui sä dan hyɛhmbʉ ngue di mandagahʉ ra tsꞌoqui mahønꞌa, ngue di ꞌbɛcpahʉ ga øthʉ ꞌbɛꞌa im mam man ꞌyomfɛ̨nisɛhʉ. 13 Nɛ hingui sä ga un ma jąꞌihʉ da ꞌyøtꞌ yʉ́m pɛfi ra zįthu, ngue ga øthʉ yʉ tsꞌoqui. Pɛgue dan unsɛhʉ bʉ ꞌbʉ Oją ngue bi ꞌdajʉ ra ꞌdaꞌyote ꞌbʉ mí du man ꞌyomfɛ̨nisɛhʉ. Nɛ ga un ma jąꞌihʉ da ꞌyøtꞌ yʉ́m pɛfi Oją, ngue ga øthʉ ran ho. 14 Nɛ hin man sähʉ di mandagahʉ ra tsꞌoqui ya, nguetho dín ꞌyohʉ a rá mate Oją ngue di zɛrca ma mbʉihʉ. Nɛ hin di mandagahʉ yʉ́n tꞌɛ̨di Oją, nuꞌʉ hingui sä di zɛrca ma mbʉihʉ ʉ.Hin ga ɛ̨cꞌyɛihʉ yʉ tsꞌoqui, pɛ ga ɛ̨cꞌyɛihʉ Oją
15 Pɛ nuꞌbʉ rá mate thoho Oją dín ꞌyohʉ ya, nɛ hin di mandagahʉ yʉ́n tꞌɛ̨di Oją, ha da zä ga øthʉ yʉ tsꞌoqui ꞌbʉ. Pɛ hingui sä ngubʉ gam bɛ̨mhbʉ. 16 Ha hin dí pąhmbʉ nuꞌbʉ dadí däp ma mbʉihʉ a nꞌda ra hmu ngue ga ørpahʉ rá ꞌbɛfi, ma hmuhʉ a ꞌbʉ, nɛ dí tɛnhdʉ a bʉya. Nuꞌbʉ gueꞌa ra tsꞌoqui ma hmuhʉ, høntꞌa ran ʉnbi maząi di ꞌdajʉ a. Pɛ nuꞌbʉ da gueꞌa Oją ma hmuhʉ, dí øthʉ a i xijʉ, nɛ di ꞌdajʉ ra hogambʉi, nɛ dam ꞌbʉmanhohʉ a Oją gätho yʉ pa bʉya. 17 Pɛ jamadi Oją nangue ahʉ. Nɛ madagueꞌbʉ gá pɛp ni hmuhʉ ra tsꞌoqui mámꞌbɛtꞌo, pɛ nuya i ja ni pähä gui thoctahʉ ꞌbɛꞌa bi ꞌyutꞌahʉ ꞌbʉ gmín dähʉ bʉ ja rán xädi Oją. 18 Nɛ bi mba njʉcꞌi ahʉ nangue rá tsꞌɛdi ra tsꞌoqui, janangueꞌa guín ꞌyɛ̨hɛhʉ rá tsꞌɛdi ran ho ya. 19 Dí xi ahʉ yʉn tꞌuti, nꞌdahma hingui hɛ̨i bʉ dí pąhmbʉ. Ngue tengu bʉ dán dähʉ bʉ ja yʉ tsꞌoqui, gue dá øthʉ gätho yʉn tsꞌo dím bɛ̨mhbʉ. Pɛ ngutho ya, mbähä dan dähʉ bʉ ja ran ho, gue dam ꞌbʉhmbʉ ga øthʉ gätho rá hogaꞌbɛfi Oją. 20 Pɛ nu mámꞌbɛtꞌo xíngui tsꞌʉ mí ndehʉ ran ho ꞌbʉ mín ꞌyɛ̨hɛhʉ yʉ tsꞌoqui. 21 Pɛ nte mán ho bi bønꞌa ma ꞌbɛfi dá øthʉ. Nɛ nuya dí pɛsꞌ ma sähʉ ꞌbʉ dím bɛ̨mhbʉ ꞌbɛꞌa dá øthʉ mamꞌbɛtꞌo, nɛ gueꞌʉ mí sixcahʉ bʉ ja ran ʉnbi maząi ʉ. 22 Nɛ nuya bi mba njʉguigahʉ nangue rá tsꞌɛdi ra tsꞌoqui, nɛ dín ꞌyɛ̨hɛhʉ bʉ ꞌbʉ Oją ya. Janangueꞌa manꞌda da hnurca ma hoga ꞌbɛfihʉ bʉ. Nɛ i tsꞌixcahʉ bʉ dan ząmhbʉ bʉ, gätho yʉ pa maząi. 23 Nuꞌa rán zäbi da dą ʉ toꞌo øtꞌ yʉ tsꞌoqui, ran ʉnbi maząi a. Pɛ nuꞌʉ toꞌo i ꞌbʉhmbʉ ra Cristo Jesús ma Hmuhʉ, di unda Oją ra te maząi ʉ, nɛ hingui jutꞌʉ.