Tenguꞌbʉ dán thąthʉ ra Cristo
7
Ma zi cu ahʉ, ga xi ahʉ nꞌda ran tꞌuti ya. Guim bɛ̨mhbʉ hague in ja ʉ yʉn tꞌɛ̨di, di manda nꞌda ꞌbʉ i ꞌbʉi, pɛ nuꞌbʉ bi du, ya ma hinꞌna. 2 Tenguꞌbʉ nꞌda ran ꞌyohʉ i ꞌbʉh rá xisu. Nɛ nu rá xisu i jatho din ząmmi a rá ndø gätho yʉ pa i ꞌbʉi. Pɛ nuꞌbʉ bi du rá ndø, him man zä di manda a rá xisu. 3 Pɛ nuꞌbʉ hinga na tu rá ndø, nɛ nuꞌbʉ dim ꞌbʉhmi manꞌda ran ꞌyohʉ ra xisu, da tꞌɛ̨mbi ra ꞌyomtꞌɛ̨ni ꞌbʉ. Pɛ nuꞌbʉ bi du rá ndø, bi mba ma thøgue bʉ mi ꞌbʉhmi rá ndø. Nuya da zä dim ꞌbʉhmi a manꞌda ran ꞌyohʉ, nɛ hin da tꞌɛ̨mbi ra ꞌyomtꞌɛ̨ni bʉya. 4 Nꞌda ran tꞌuti nanguejʉ, ngue bi mba ma thøguegahʉ nangue ma hmuhʉ mí ꞌbʉhmbʉ, ngue yʉ́n tꞌɛ̨di Oją, nguetho tenguꞌbʉ dá tuhʉ ꞌbʉ mi du ra Cristo. Nɛ gueꞌa ma hmuhʉ dán thąthʉ ꞌbʉ mí xox Oją a ya. Nɛ ꞌdarbʉ dí ꞌbʉhmbʉ a ya, pɛ gueꞌa ní zä ga øthʉ xʉn ho rá ꞌbɛfi Oją ya. 5 Pɛ nuꞌbʉ mi ꞌbʉthohʉ a man ꞌyomfɛ̨nisɛhʉ ɛ̨mmɛ xøt yʉ tsꞌoqui midí hohʉ. Janangueꞌa nuꞌbʉ mi xijʉ ʉ yʉ́n tꞌɛ̨di Oją ngue hin ga øthʉ ʉ dí numanhosɛhʉ, manꞌda dá øthʉ ʉ bʉya. Nɛ nuꞌʉ bin ja ma ꞌbɛfihʉ, ran dąte nɛ ran ʉnbi a bʉya. 6 Pɛ nuya ma thøguegahʉ nangue ʉ yʉ́n tꞌɛ̨di Oją nguetho bi du man ꞌyomfɛ̨nisɛhʉ mi pa ma hɛcpi. Janangueꞌa dí ørpahʉ rá ꞌbɛfi Oją ya, nangue maꞌdaꞌyo ra tsꞌɛdi, nɛ gueꞌa rá Hogandąhi Oją a. Nɛ hin dí tɛnthohohʉ ʉ mayaꞌbʉ ntꞌoꞌtꞌi nangue yʉ́n tꞌɛ̨di Oją.Nán cꞌą ma tsꞌoquihʉ ʉ yʉ́n tꞌɛ̨di Oją
7 ꞌBɛꞌa gam bɛ̨mhbʉ bʉya, ha ga ɛ̨mfʉ hingui ho ʉ yʉ́n tꞌɛ̨di Oją. Hinꞌna maha, xʉn ho yʉ́n tꞌɛ̨di Oją, nguetho gueꞌa dá pącä ngue i ja ma tsꞌoquigä. Nugä hin jąmꞌbʉ xcá pącä gue dí øtꞌ ra tsꞌoqui ngue ran tsꞌɛya. Pɛ nuꞌbʉ má bɛ̨ngä a ran tꞌɛ̨di ngue i ɛ̨na: “O gadí sɛyaba ni mijąꞌiui,” ja dá pącä i ja ma tsꞌoqui. 8 Pɛ nuꞌbʉ má bɛ̨ngä ꞌbɛꞌa man na rán tꞌɛ̨di Oją, manꞌda dá øtꞌä ran tsꞌɛya mí o ma mbʉigä bʉya. Pɛ nuꞌbʉ hin xcá cʉꞌtꞌ ma mbʉi a ran tꞌɛ̨di, hin xtí nɛqui xʉn ho yʉ tsꞌoqui o ma mbʉigä ꞌbʉ. 9 Janangueꞌa nuꞌbʉ him ma ná bɛ̨ngä nangue rán tꞌɛ̨di Oją, him mi pącä ngue drá tsꞌomꞌbäigä. Xø mi ꞌbʉtho, dá bɛ̨nsɛ ngue xʉn hogä. Pɛ nuꞌbʉ má bɛ̨ngä nangueꞌa ran ho xcá øtꞌä, dá fɛstä a. Nɛ ja dá pącä bʉya ngue ran dąte maząi a man zäbi. 10 Janangueꞌa nu yʉ́ hogantꞌɛ̨di Oją, ngue xtí ꞌdac ra te ꞌbʉ xcá jąꞌtsꞌä ʉ, pɛ nangue hin dá jąꞌtsꞌä ʉ, mí ja xtí ꞌdac ran dąte. 11 Nɛ mí ɛ̨ngä xcám ꞌbʉmanho nangue yʉ́n tꞌɛ̨di Oją. Pɛ bi muꞌtꞌʉ yʉn tꞌɛ̨di a ma tsꞌoqui, janangueꞌa mí ja xtí ʉngä ʉ yʉ́n tꞌɛ̨di Oją bʉya. 12 Pɛ xʉn hohma ʉ yʉ́n tꞌɛ̨di Oją, nɛ nꞌda ngu nꞌda ran tꞌɛ̨di gätho xʉn hotho ʉ, nɛ i ma nangue rá pähä Oją ʉ, nɛ hin hapʉ di ꞌbɛdi. 13 Pɛ ha gueꞌa rá hogantꞌɛ̨di Oją í zixcä bʉ ja ran dąte ꞌbʉ. Hinꞌna. Pɛ nuꞌʉ yʉn tꞌɛ̨di nán cꞌą ma tsꞌoqui i o ma mbʉigä, ngue nꞌdanꞌyo thoho dí øtꞌä. Nɛ mí ja xtí ꞌdac ran ʉnbi nangue a. Da zä ga pąhmbʉ bʉya ngue majuąni xʉn tsꞌo ʉ ma tsꞌoquihʉ, nguetho di japꞌa rá hogantꞌɛ̨di Oją da ꞌyørcahʉ ran ʉnbi.
I ørcahʉ ran sʉi a man ꞌyomfɛ̨nisɛhʉ
14 Dí pąhmbʉ bi man yʉ́n tꞌɛ̨di Oją a rá Hogandąhi. Pɛ nꞌdanꞌyo thoho dím bɛ̨mhbʉ. Nugä dán däsɛ bʉ ja ra tsꞌoqui, nɛ dá øtꞌ ma hmu a. 15 Pɛ xíngui tsꞌʉ dí pącä ꞌbɛꞌa dí øtꞌä, nguetho hin dí øtꞌä a majuąni dín nde. Pɛ nuꞌa xíngui tsꞌʉ dí numanho, go dí øtꞌä a. 16 Nɛ dín juąn zɛhɛgä ꞌbʉ hin dí øtꞌä yʉ́n tꞌɛ̨di Oją, pɛ nuꞌa nán juąn zɛhɛgä gueꞌa ná pącä xʉn ho yʉ́n tꞌɛ̨di Oją a bʉya. 17 Pɛ hinga guecä dí øtꞌä ꞌbʉ dí øtꞌa xʉn tsꞌo, pɛgue ma nyon ꞌyomfɛ̨nigä i ꞌbʉpʉ mbo ma mbʉigä gueꞌa di ꞌbɛcpi ga øtꞌä a. 18 Nɛ dí pącä ngue nu ma nyon ꞌyomfɛ̨nigä, hin te manho i ja. Dín ndehma thocpa thoho ga øtꞌran ho, pɛ jaꞌbʉ hingui sä. 19 Dín nde ga øtꞌä ran ho, pɛ hin dí øtꞌä a, nɛ hin dín nde ga øtꞌ ran tsꞌo, pɛ go dí øtꞌä a. 20 Nubʉya, dí pądi ngue hinga guecä dá øtꞌä a him ma pähä ꞌbʉ dí øtꞌe, pɛgue gueꞌʉ yʉ tsꞌoqui o ma mbʉigä. 21 Nɛ njabʉ dí øtꞌä, ngue nuꞌbʉ dín nde ga øtꞌä ran ho, pɛ manꞌda hingui hɛ̨i ga øtꞌä yʉ tsꞌoqui. 22 Nɛ nuꞌa ɛ ma mbʉigä, gue ɛ̨mmɛ dadí hohma a rán tꞌɛ̨di Oją. 23 Pɛ dín nugä manꞌda ran tꞌɛ̨di gue rán tꞌɛ̨di ra tsꞌoqui i o ma jąꞌigä, ngue din sʉhmi a rá hogantꞌɛ̨di Oją ngue dí numanhogä. Nguetho nɛꞌa xø in nde da xiqui ga ørpa rá pähä. 24 Pɛ í huɛ̨hi mahagä nangue ma nyon ꞌyomfɛ̨nisɛgä, i ørca ran sʉi, in nde da zixcä bʉ ja ran dąte, ngue gätho yʉ dumbʉi gätho yʉ pa maząi. Toꞌo maha da zä da yąngui. 25 Pɛ jamadi Oją, da yąngui nangue ma Hmuhʉ ra Jesucristo. Nɛ nuya dí ørpa rán tꞌɛ̨di Oją nangue ma ꞌdaꞌyon ꞌyomfɛ̨nigä, madagueꞌbʉ numanho ra tsꞌoqui a ma nyon ꞌyomfɛ̨nigä.