Høntꞌa rá Hogandąhi Oją nám ꞌbʉhmbʉ ya
8
Janangueꞌa, nuya, hin te da gʉgbahʉ a rá muui a ma tsꞌoquihʉ, nguetho dí ꞌbʉhmbʉ ra Cristo Jesús, nɛ hin dím bɛ̨mhbʉ man ꞌyomfɛ̨nisɛhʉ ya, pɛ dím bɛ̨mhbʉ rá Hogandąhi Oją. 2 Dí comhbʉ ra ꞌdaꞌyote ra Cristo Jesús nangue rá tsꞌɛdi rá Hogandąhi Oją. Nɛ gueꞌa í thøgahʉ bʉ ja rá tsꞌɛdi ra tsꞌoqui, ngue mí ɛ̨na xtí ꞌdajʉ ran ʉnbi maząi. 3 Nu yʉ́n tꞌɛ̨di Oją hin dá hätꞌi dá øthʉ, janangueꞌa him bi zä bi ꞌdajʉ ra hogambʉi ʉ guepʉ xtá numanhojʉ Oją. Pɛgue bi ꞌdactahʉ ra hogambʉi Oją ꞌbʉ mam bá pɛnhua rá Tsꞌʉntꞌʉ zɛhɛ, ngue bin jąꞌi a, tenguꞌbʉ nꞌda ma mi tsꞌomꞌbäihʉ, bin däsɛ, bi nu ran ʉnbi nangue ma tsꞌoquihʉ. Nɛ gueꞌa í yąnjʉ nangue ra tsꞌoqui midí mandagahʉ. 4 Nɛ gueꞌa í zä bi ꞌdajʉ ra hogambʉi tenguthoho ꞌbʉ dá jąsꞌhʉ yʉ́n tꞌɛ̨di bʉ án nujʉ Oją. Janangueꞌa hin dím bɛ̨mhbʉ man ꞌyomfɛ̨nisɛhʉ ya, pɛ nuya høntꞌa rá Hogandąhi Oją dím bɛ̨mhbʉ ya. 5 Pɛ nuꞌa toꞌo ꞌbʉi nangue rán ꞌyomfɛ̨nisɛ, im bɛ̨ni da ꞌyøtꞌe ꞌbɛꞌa i numanhosɛ, pɛ nuꞌa toꞌo i ꞌbʉi nangue rá Hogandąhi Oją, im bɛ̨n a rán ꞌyomfɛ̨ni Oją di unꞌna rá Hogandąhi. 6 Nɛ nuꞌa toꞌo i tɛnꞌna rán ꞌyomfɛ̨nisɛ, ra dumbʉi a ngue gätho yʉ pa nɛ ran ʉnbi maząi. Pɛ nuꞌa to i tɛn rá Hogandąhi Oją, ra te a nɛ ran johya gätho yʉ pa maząi. 7 Nguetho nu man ꞌyomfɛ̨nisɛhʉ rán sʉiui Oją a, nɛ hin jąmꞌbʉ da hyätꞌi da ꞌyøtꞌʉ yʉ́n tꞌɛ̨di Oją, nɛ hingui nde da ꞌyøtꞌʉ. 8 Janangueꞌa nuꞌʉ toꞌo i tɛn thoho yʉ́n ꞌyomfɛ̨nisɛ, hingui hätꞌi da ꞌyøtꞌa i numanho Oją ʉ. 9 Pɛ nujʉ hin dím bɛ̨mhbʉ a man ꞌyomfɛ̨nisɛhʉ ya, nguetho ꞌbʉpʉ mbo ma mbʉihʉ a rá Hogandąhi Oją. Pɛ nuꞌbʉ ꞌbʉ a nꞌda hingui ꞌbʉhmi rá Hogandąhi ra Cristo, hin te rán jaui ra Cristo a ꞌbʉ. 10 Nɛ madagueꞌbʉ o tho ran ʉ nɛ ran dąte ma jąꞌihʉ nangue ma tsꞌoquihʉ, pɛ nangue ra Cristo i ꞌbʉpʉ mbo ma mbʉihʉ, dí ꞌbʉmanhohʉ ngue ya bi hogahʉ Oją. 11 Nɛ nuꞌbʉ ꞌbʉpʉ mbo ma mbʉihʉ rá Hogandąhi Oją, gue nꞌdatꞌa rá Hogandąhi bi xoxꞌa ra Cristo Jesús ꞌbʉ mi du, janangueꞌa nɛꞌa ma jąꞌihʉ di un ra ꞌdaꞌyote ꞌbʉ bi xoxcahʉ. 12 Janangueꞌa ma zi cu ahʉ, hinꞌyʉ ran tꞌɛ̨di ga tɛnhdʉ a man ꞌyomfɛ̨nisɛhʉ ngue rá pähä ma ngøcꞌyɛihʉ. 13 Nguetho nuꞌbʉ dí øthʉ rá pähä man ꞌyomfɛ̨nisɛhʉ, ga tuhʉ ꞌbʉ. Pɛ nuꞌbʉ thocpa thoho dan sąmzɛhɛhʉ nangue rá Hogandąhi Oją, tenguꞌbʉ ga hosɛhʉ man ꞌyomfɛ̨nisɛhʉ, nɛ dam ꞌbʉhmbʉ ꞌbʉ. 14 Nguetho nuꞌʉ din uni di manda rá Hogandąhi Oją, høntꞌʉ yʉ́ tꞌʉhni Oją ʉ. 15 Nɛ nu rá Hogandąhi Oją dá hąmhbʉ hin di jajʉ dan suhʉ mahønꞌa. Nɛ hinga ngu ꞌbʉ min ꞌyɛ̨hɛhʉ bʉ ja yʉ tsꞌoqui min suhʉ bʉ. Pɛ bi zinjʉ yʉ́ tꞌʉhnigahʉ a, nangue rá Hogandąhi. Janangueꞌa, “ma zi Ta ahe,” dí ɛ̨mfʉ Oją ya. 16 Nɛ nu rá Hogandąhi Oją di bɛ̨nga ma mbʉihʉ, gue majuąni yʉ́ tꞌʉhnigahʉ Oją. 17 Nɛ nangue yʉ́ tꞌʉhnigahʉ Oją, ga comhbʉ rá herencia Oją bin tꞌun ra Cristo. Nguetho nuꞌbʉ ga comhbʉ rán ʉnbi ra Cristo, nɛ ga comhbʉ rá herencia bʉ bí ja rá tsꞌɛdi bʉya. Nɛꞌa ma ngøcꞌyɛ̨ihʉ di pärcahʉ Oją
18 Pɛ gam bɛ̨mhbʉ ɛ̨mmɛ zi tsꞌʉtho ran ʉnbi dín nuhʉ ya, pɛ nuꞌʉ yʉn ho gan nuhʉ mꞌbɛjua ɛ̨mmɛ mixte thoho. 19 Nɛ gätho ꞌbɛꞌa bi ꞌyøtꞌ Oją ɛ̨mmɛ i tøꞌmi ꞌbɛꞌa da tꞌørpa ʉ ꞌbʉ bi zøn ra pa din tꞌun yʉn ho mixte thoho ʉ yʉ́ tꞌʉhni Oją. 20 Nguetho nu ꞌbɛꞌa gätho bi ꞌyøtꞌ Oją, gätho him bi gohi xʉn ho, pɛ hin yʉ́ tsꞌoquizɛhɛ ʉ, pɛ nangue rá tsꞌoqui ra Adán. Pɛ bi zänd Oją gue hin da gohi xʉn ho ra ximhäi, nguetho ndepꞌʉ yʉ jąꞌi da hyonꞌa ran ho da ꞌyørpa ꞌbʉ mꞌbɛjua. 21 Nguetho nu yʉ ximhäi bi ꞌyøtꞌ Oją, gätho da mba ma hoqui nangueꞌa ran tsꞌoni bin ja, ngue him man ja yʉ ꞌyąnthį nɛ yʉn ʉnbi, nɛ ꞌbɛꞌa gä i ja. Nɛ gätho ʉ ꞌdatꞌa da mba ma hoquigahʉ yʉ́ tꞌʉhnigahʉ Oją, ꞌbʉ bi pärca ma jąꞌihʉ. 22 Nguetho dí pąhmbʉ gätho ꞌbɛꞌa bi ꞌyøtꞌ Oją, tenguꞌbʉ gätho ꞌda na mbahni thoho gueꞌbʉ go mayaꞌbʉ nɛ asta guehya, tenguꞌbʉ xʉn ʉ, nɛ tu yʉ́ mbʉi, tenguꞌbʉ in nde dim ꞌbʉh rá ꞌuɛre nꞌda ra xisu. 23 Nɛsɛgahʉ tengu thoho ꞌbʉ ꞌda na mbahni thohohʉ gätho ꞌbɛꞌa i ja, madagueꞌbʉ bi dʉꞌmi bi tsꞌinjʉ ya, gue dí ꞌbʉhmbʉ rá Hogandąhi Oją, gueꞌa rá mbʉdi a ran ho da ꞌyørcahʉ Oją. Pɛ dí sähʉ ran ʉ nangue ma mbʉihʉ gätho yʉ pa dín døꞌmatehʉ ua, gueꞌbʉ go nɛꞌa ma ngøcꞌyɛ̨ihʉ da yąngahʉ. 24 Nɛ gueꞌa dá pąhmbʉ ꞌbʉ mí zinjʉ, ngue him ꞌbex da mba mahoqui gätho ma ngøcꞌyɛihʉ. Janangueꞌa dí tømhbʉ ya. Pɛ nuꞌbʉ ꞌbexque xcá nuhʉ a dí tømhbʉ, ya hin di tømhbʉ a ya ꞌbʉ, nɛ hingui jatho ga tømhbʉ a ya bin ja. 25 Pɛ nuya dí tømhbʉ a hinga nan ja, nɛ dí häthʉ yʉn ʉnbi, gueꞌbʉ go bi päjʉ xʉn ho Oją. 26 Nɛ gätho yʉ pa dín dømthohohʉ, di zɛjʉ rá Hogandąhi Oją, nguetho xʉn güentꞌigahʉ, gue hin dí pąhmbʉ dan yąhʉ Oją xʉn ho, jaꞌbʉ dí cąstahʉ bʉ nam bɛ̨n Oją. Pɛ guesɛ rá Hogandąhi i yąui a Oją bʉ ja ma mbʉihʉ ꞌbʉ dí yąhʉ a. 27 Nɛ nu Oją di ąsca ma mbʉihʉ ꞌbʉ dí yąhʉ a. Nɛ i pądi ꞌbɛꞌa dí äfʉ, nguetho din thɛui rá pähä zɛhɛ a bi bɛ̨ngahʉ rá Hogandąhi Oją.
Pɛ dí tąfʉ xʉn ho yʉn ʉnbi nangue ra Cristo
28 Nɛ dí pąhmbʉ di jap Oją dí ꞌyørcahʉ ran ho a ꞌbɛꞌa gä dí thohmbʉ ua, ngue nujʉ ɛ̨mmɛ dí numanhohʉ a Oją. Nguetho ya bi zänni ꞌbɛpʉ dá cohmbʉ mꞌbɛjua. 29 Ngue nuꞌʉ toꞌo bi huanh Oją mamꞌbɛtꞌo, guetꞌʉ bi zänni da gohi tengu rá Tsꞌʉntꞌʉ zɛhɛ. Janangueꞌa dim ꞌbɛtꞌo rá Tsꞌʉntꞌʉ zɛhɛ ngue xʉn ngu yʉ́ cu dim ꞌbɛjua. 30 Nɛ nuꞌʉ bi zänd Oją mámꞌbɛtꞌo, nɛ guetꞌʉ in zonh Oją ʉ ya ngue da yʉrpʉ bí ꞌbʉi. Nɛ nuꞌʉ in zonh Oją, gueꞌʉ i ɛ̨mbi xʉn ho ʉ ya, ngue bi hocpa yʉ́ tsꞌoqui. Nɛ guetꞌʉ da gohi tengu rá Tsꞌʉntꞌʉ zɛhɛ. 31 ꞌBɛꞌa gam bɛ̨mhbʉ bʉya, nguetho guesɛ Oją i numanhojʉ. Toꞌo maha da zä da ꞌyørcahʉ ran tsꞌo. 32 Nu Oją xínga gue rá Tsꞌʉntꞌʉ zɛhɛ bi huɛ̨qui, pɛ bi däp ran dąte nanguejʉ. Janangueꞌa gätho di ꞌdajʉ ꞌbɛꞌa i ja, nte da gøngahʉ. 33 Pɛ nujʉ toꞌo maha a da xi Oją ngue hingui ho dí øthʉ, ngue yʉ́ thahnigahʉ Oją. Nguetho guesɛ Oją thocpa thoho di hoga ma tsꞌoquihʉ. 34 Toꞌo gue da zä da xi Oją ngue dan ʉnbahʉ nangue ma tsꞌoquihʉ, nguetho guesɛ ra Cristo bi du, bi nu ran ʉnbi nanguejʉ, nɛ xø bi xox Oja bʉya, nɛ bí ꞌbʉpʉ guepʉ i conhui rá tsꞌɛdi Oją. Nɛ thocpa thoho i äp rá mate Oją nanguejʉ. 35 ꞌBɛꞌa maha da zä di ꞌuegahʉ, gue hin gan nuhʉ a rán huɛ̨cate ra Cristo. Ha gueꞌʉ yʉn ʉnbi, uague yʉ dumbʉi, uague yʉn ʉcpi, uague ra thuhu, uague ra ꞌyąhe, ua gueꞌbʉ ntsꞌutho hapʉ dí ꞌyohʉ, uague da thojʉ nangue ra juai. Ha gam bɛ̨mhbʉ ngue hin di huɛ̨gahʉ ra Cristo ꞌbʉ dín nuhʉ ʉ. 36 Pɛ hinꞌna, nguetho ya ntꞌoꞌtꞌi:
Thocpa thoho tꞌɛ̨na da thojʉ nangue Oją dí ɛ̨cꞌyɛihʉ,
nɛ im bɛ̨ni tenguꞌbʉ dyʉ dɛꞌyohʉ gue ntsꞌänni da tho.
37 Pɛ nu gätho yʉn ʉnbi, dí tąfʉ xʉn ho, nangue ra Cristo di huɛ̨gahʉ. 38 Nɛ dí pąhmbʉ majuąni hinꞌyʉ nꞌda ra tsꞌɛdi da zä di ꞌuegahʉ gue hin ga nuhʉ a rán huɛ̨cate ra Cristo. Xínga guehya gue dí ꞌbʉhmbʉ, nɛ xínga gueꞌbʉ dá tuhʉ. Nɛ xínga gueꞌa nꞌda rám ꞌbɛhni Oją mahɛ̨tsꞌi, nɛ xínga gueꞌa nꞌda rám ꞌbɛhni ra zįthu, xínga gue manꞌda ra tsꞌɛdi. Nɛ xínga gueꞌa ꞌbɛꞌa gätho i ja ya, o din ja nixudi o nimani, da zä di ꞌuegahʉ. 39 Nɛ xínga gueꞌʉ ꞌbʉpʉ mahɛ̨tsꞌi, nɛ xínga gueꞌʉ ꞌbʉcua ja ra häi, nɛ hinꞌyʉ ꞌbɛꞌa gätho i ja ngue da zä di ꞌuegahʉ gue hin ga nuhʉ rán huɛ̨cate Oją i ørcahʉ ra Cristo Jesús ma Hmuhʉ, nguetho gätho bi ꞌyøzɛhɛ Oją ʉ.