Bi huand Oją yʉ israel mayaꞌbʉ
9
Nu ra Cristo dí ꞌbʉꞌbe, i pądi majuąni dí xi ahʉ ya, ngue ɛ̨mmɛ dadí huɛ̨cmahagä ma mijudíohe yʉ israel. Pɛ nɛꞌa rá Hogandąhi Oją i xicpa ma mbʉi ngue majuąni dím mangä. 2 Nɛ thocpa thoho dín nu ran ʉnbi ngue ma mbʉi nɛ ɛ̨mmɛ tu ma mbʉi nangue ma mijudíohe. 3 ꞌBɛꞌa sä ga øtꞌä ngue xtím pøꞌʉ ma miꞌisraelhe. Ha ga xi Oją di ꞌbɛrca ma te ngue njąmꞌbʉ ga nu ra Cristo. Ngue gueꞌa ga øtꞌä ꞌbʉ gueꞌa dí pø ʉ. 4 Nguetho nuje dyʉ israelhe bi thahn ma ngʉrpa bøtahe ngue bi nde dyʉ tꞌʉhni Ojąje, nɛ bi nu rá Thai Oją ma bøtahe nɛ bi bąh pʉya ngue Oją mí ꞌbʉhmbʉ. Nɛ gueꞌʉ bi ꞌyøthʉ ran hoqui a Oją ʉ, nɛ gueꞌʉ bin tꞌun yʉ́n tꞌɛ̨di Oją nangue ꞌbɛpʉ dám ꞌbʉmanhohe. Nɛ bi sih yʉn tꞌøtꞌe dí dąnde Oją. Nɛ bi sih majuąni nangue ꞌbɛꞌa gä da ꞌyørpe. 5 Nɛ nuꞌʉ ma miꞌisraelhe i ꞌbʉh ya, yʉ́ tꞌʉhni ndu ma ngʉrpa bombøtahe ngue bin yąui Oją mayaꞌbʉ. Nɛ guetꞌʉ yʉ israel bʉ ám ꞌbʉꞌa ra Cristo ꞌbʉ min jąꞌi ua ja ra ximhäi. Pɛgue Oją a, rá Hmu ngue gätho ꞌbɛꞌa i ja, janangueꞌa gätho yʉ pa maząi ga numansuhʉ a. Nɛ høntꞌa gam bɛ̨mhbʉ a ya. 6 Pɛ xʉn ngu hingui ɛ̨cꞌyɛi ʉ ma mijudíohe yʉ israel. Pɛ hin gam bɛ̨mhbʉ ngue bi zɛpʉ a bi man Oją, ngue hin di jąꞌtsꞌa ran hoqui bi ma. Pɛgue gam bɛ̨mhbʉ ngueꞌa hinga gätho majuąni yʉ israel ʉ yʉ́ tꞌʉhni ra Israel bʉ nam bɛ̨n Oją, gueꞌbʉ mí ma di jąp yʉ israel. 7 Nɛ hinga gätho yʉ́ tꞌʉhni ra Abraham bʉ nam bɛ̨n Oją ʉ bim ꞌbʉi, pɛ høntꞌa bi xi a Oją ngue dim ꞌbʉi. Tengu bi man Oją: “Pɛ høntꞌʉ di xąntꞌa ra Isaac, ngue ni tsꞌʉntꞌʉ, ga ɛ̨mbi ni tꞌʉhni,” bi ꞌyɛ̨mp Oją a. 8 Nuꞌa in nde da ꞌyurcahʉ ngue njoꞌo nꞌda rá tꞌʉhni Oją bim ꞌbʉi nangue rá ta o gue rá mbe. Pɛ høntꞌʉ bim ꞌbʉi nangueꞌa bi man Oją, da ꞌyɛ̨mbi yʉ́ tꞌʉhni. 9 Nɛ guehna bi xi a Oją a ra Abraham: “Ni jɛya, tengu ya, ga utꞌaui ma tsꞌɛdi nɛ din ja a dí xi i, gue dim ꞌbʉ a nꞌda rá tsꞌʉntꞌʉ ra Sara,” bi ꞌyɛ̨mp Oją a. 10 Nɛ ngutho nangue yʉ́ tsꞌʉntꞌʉ ra Isaac, Oją bi ma ndaꞌa da numanho. Bin ja ngue bim ꞌbʉ i yoho yʉ́ tsꞌʉntꞌʉ ra Rebeca, nangue a ra Isaac a rá ta ʉ. 11 Pɛ nuꞌbʉ hin ním ꞌbʉ ʉ yoho, hin ní ꞌyøtꞌ ran ho, nɛ xín ni ꞌyøtꞌ ran tsꞌo, pɛ Oją mí sänni ꞌbɛꞌa din japꞌʉ. Janangueꞌa bi zä bi jąpi ndaꞌa bi nde di jąpi, nangue bi ndesɛ, nɛ hin nangue yʉ́n tꞌøtꞌe bi ꞌyøtꞌʉ. 12 Nɛ nuꞌbʉ hin ním ꞌbʉh yʉ́ tꞌʉhni, bi xi Oją a ra Rebeca: “Nuꞌa mꞌbɛtꞌo dim ꞌbʉi, din ꞌyɛ̨hɛ nangueꞌa mꞌbɛjua dim ꞌbʉi.” 13 Nɛ tengu ntꞌoꞌtꞌi, manꞌda ram hma i ɛ̨na: “Dá numanho a ra Jacob ngue ra Israel, pɛ nu ra Esaú hin dá numanho,” bi ꞌyɛ̨n Oją. 14 Xiya, ha gam bɛ̨mhbʉ hingui ho ꞌbɛꞌa bi ꞌyøtꞌ Oją, ngue bi huahna nꞌda, nɛ hinꞌna a manꞌda. Pɛ hingui sä ga ɛ̨mhbʉ hingui ho øtꞌ Oją. 15 Pɛ tengu bi xi Oją a ra Moisés: “Ga un ra mate toꞌo dín nde ga unni, nɛ ga huɛ̨qui toꞌo dín nde ga huɛ̨qui,” bi ꞌyɛ̨n Oją. 16 Dí pąhmbʉ ya, nangue in ndesɛ Oją di un rá mate nɛ hin nangue bi ndesɛ nꞌda, o gue bi ꞌyøtꞌ yʉn tꞌøtꞌe ngue bi bɛ̨ni dí dąh rán jąpi Oją. 17 Nɛ tengu bi man ra tꞌohni, bi sih ra tsꞌʉtꞌabi bʉ Egipto, ngue ra Faraón: “Dá sänꞌni i ngue gan tsꞌʉtꞌabi, nɛ ga mɛpꞌa ni mbʉi ngue hin gui ꞌyøtꞌa ga xi i. Nꞌdahma da zä ga utꞌa ma tsꞌɛdi ꞌbʉ ga pɛnh yʉ ꞌyąnthį bʉ ja ni häi. Nɛ da fąrca ma tsꞌɛdigä gätho na ngʉni ra ximhäi bʉya,” bi ꞌyɛ̨n Oją. 18 Janangueꞌa ga pąhmbʉ ya, Oją di un rá mate toꞌo in ndesɛ di unni, nɛ guesɛ Oją di mɛp rá mbʉi nꞌda toꞌo in nde di mɛp rá mbʉi, tengu thoho bi ꞌyørpa a ra Faraón. 19 Pɛ ha ꞌboꞌo da ꞌyängä bʉya: “Nuꞌbʉ in jabʉ i øtꞌ Oją, hague dán zä da ꞌyɛ̨na i ja rá tsꞌoqui nꞌda ꞌbʉ, nɛ njon da zä da zɛrpa a in nde Oją gue xtám bɛ̨ni ꞌbɛꞌa xʉn ho xtá ꞌyøtꞌe.” 20 Pɛ hingui sä ngubʉ gui mamhbʉ, gyʉ jąꞌihʉ, toꞌo ahʉ ngue guí xihmbʉ hingui ho øtꞌ Oją. Xiꞌbʉ nꞌda ra tsꞌøe ngue ra jąhäi, ha da zä da ꞌyänni toꞌo bi ꞌyøtꞌe: “Hanja ngubʉ gá ꞌyørque,” ha da zä da ꞌyɛ̨na. 21 Ha hinꞌyʉ rá tsꞌɛdi a to i øtꞌ ra tsꞌøe, ha hingui sä da zän zɛhɛ ꞌbɛꞌa da ꞌyørpa nꞌda ra bøhäi ꞌbʉ, ngue da zänꞌna nꞌda mahotho, nɛꞌa manꞌda him mahotho, nɛ nꞌdatꞌa ra bøhäi ní ꞌyøtꞌe. 22 Nguetho in ndesɛ Oją da ꞌyuh rá cuɛ nangue ʉ to yʉ́n sähʉ di ʉnbi. Nɛ madagueꞌbʉ i hätꞌi sɛt rá mbʉi nangue ʉ to di ʉnbi. Pɛ nuꞌbʉ hinguim bɛ̨ni ꞌbɛpʉ nan døꞌma Oją, gueꞌa manꞌda dí nɛqui xʉn ho rá cuɛ Oją nɛ rá tsꞌɛdi ꞌbʉ bi ʉnba ʉ bʉya. 23 Janangueꞌa da fądi tąte xʉn ho rá mbʉi Oją ꞌbʉ bi un rá mate ʉ miꞌda yʉ jąꞌi, madagueꞌbʉ nɛꞌʉ yʉ́n sähʉ xtí ʉnbi, tengu thohogahʉ. Nɛ nuya mꞌbɛtꞌo thoho di hogahʉ Oją, ngue da zä ga comhbʉ rán ho. 24 Ngue guejʉ bi zongahʉ Oją, nangue ma ꞌyʉhʉ ꞌdahma ꞌdanꞌyo, nɛ ʉ yʉ judío, nɛ ʉ hin yʉ judío, pɛ høntꞌʉ bi numanhosɛ bá si. 25 Nɛ gueꞌa bi mam bʉ ja rá søcuą ra Oseas, bi ꞌyɛ̨na:Nuꞌʉ him mi ɛ̨mbä ma tꞌʉhni, gueꞌʉ ga ɛ̨mbi ma tꞌʉhni ʉ ya.
Nɛ nuꞌʉ him madí huɛ̨cä, pɛ nuya ga huɛ̨cä ʉ ya, bi ꞌyɛ̨n Oją.
26 Nɛ mi ɛ̨n ra tꞌohni:
Nubʉ hapʉ bi tꞌɛ̨n ahʉ: “Him ma tꞌʉhni ahʉ,”
guepʉ da tꞌɛ̨n ahʉ bʉya ngue yʉ́ tꞌʉhni ahʉ Oją i ꞌbʉi.
27 Pɛ nangue yʉ israel bi man ra Isaías: “Madagueꞌbʉ ɛ̨mmɛ xtá ngu ʉ yʉ́m bomꞌbɛto ra Israel, tengu yʉ ꞌbomu bʉ ja ra deją, pɛ høntꞌʉ zi yoho dim pøhø,” bi ꞌyɛ̨na. 28 Nguetho Oją di juąnba ra ximhäi, nɛ di juaꞌa nꞌdihi rán tsꞌɛmbi bi ma. 29 Nɛ tengutho mi ma mamꞌbɛtꞌo ra Isaías, bi ꞌyɛ̨na:
Nuꞌbʉ hin xtá ꞌyɛ Oją ꞌda yʉ hmudä nanguejʉ, dyʉ israelhʉ,
gätho xtí juajʉ ꞌbʉ, tengu ra hnini Sodoma, nɛ ra hnini Gomorra, ngue bi jua Oją, bi ꞌyɛ̨na.
Xʉn ngu yʉ israel him bi nde bi hyąn rá mate Oją
30 Pɛ xiya, hague bin ja nangue yʉ jąꞌi hin yʉ judío. Bi tꞌɛ̨mbi xʉn ho nguetho bi hyąntho rá mate Oją ngue bi hocpa yʉ́ tsꞌoqui, madagueꞌbʉ him mím bɛ̨ni xtá ꞌyøtꞌ ran hocjąꞌi i mam bʉ ja yʉ́n tꞌɛ̨di Oją. 31 Pɛ nu yʉ israel gue mí honi xtá ꞌyøtꞌ ran hocjąꞌi i mam bʉ ja yʉ́n tꞌɛ̨di Oją, pɛ him bi zøni ngue xtá tꞌɛ̨mbi xʉn ho ʉ. 32 Pɛ hanja him bi tꞌɛ̨mbi xʉn ho ʉ yʉ israel. Nguetho him bi nde bi hyąntho rá mate Oją nguepʉ xtá tꞌɛ̨mbi xʉn ho ʉ. Pɛ bi bɛ̨ni xtá hnumanho ꞌbʉ mi ꞌyøzɛhɛ yʉ́n tꞌɛ̨di Oją ʉ. Nɛ nu ra Cristo bʉya tenguꞌbʉ nꞌda ra do ꞌbɛm bʉ ja ra ꞌyu, guepʉ di fet rá gua nꞌda, nɛ bi dąng bʉ yʉ israel ꞌbʉ mi ꞌyɛ̨na xtán dąh ra ꞌdihi. 33 Nɛ gueꞌa mán tꞌoꞌtꞌi bʉ rám hman Oją, i ɛ̨na:
Dami bɛ̨mhbʉ, dí høpʉ nꞌda ra do bʉ Sión, nguepʉ da dąng bʉ nꞌda, nɛ dim ꞌbɛdi.
Pɛ nuꞌa toꞌo da ꞌyɛ̨cꞌyɛi a, hin da mbɛsꞌ yʉ́ sä, pɛ guehma da hnumanho.