10
Ma zi cu ahʉ, ɛ̨mmɛ dí hąh ma mbʉi dí äp rá mate Oją di pø ʉ ma miꞌisraelhe. 2 Nɛ dí pądi ngue majuąni ɛ̨mmɛ ɛ̨hya ʉ nangue Oją, pɛgue hingui pądi ndana majuąni rá ꞌyu Oją ʉ. 3 Nguetho hingui nde da bądi ꞌbɛpʉ dí ꞌyɛ̨mpꞌa Oją ngue xtán ho. Im bɛ̨ni din hoc zɛhɛ nangue yʉ́n hosɛ, nguetho im bɛ̨ni dí numanho Oją ꞌbɛꞌa øtꞌʉ. Janangueꞌa hingui nde din uni xtí hoc Oją ʉ, nangue ran hoqui bi zänd Oją. 4 Pɛ gätho toꞌo bi ꞌyɛ̨cꞌyɛi ngue gueꞌa ra Cristo bi hoqui, bi ꞌyɛꞌtsꞌa ní hyoni ngue xtín hoqui nangue yʉn tꞌɛ̨di. Toꞌo gätho da ꞌyäp rám fätsꞌi ra Hmu, da yąn ʉ
5 Nu ra Moisés bi ꞌyoꞌtꞌi ꞌbɛꞌa da ꞌyøtꞌa nꞌda nangue yʉn tꞌɛ̨di nguepʉ xtán zøni xtá numanho Oją nꞌda. Ngue bi ꞌyɛ̨na: “Nuꞌʉ yʉ jąꞌi ꞌbʉ di jąꞌtsꞌʉ yʉn tꞌɛ̨di, gueꞌʉ dí japi dim ꞌbʉꞌʉ,” bi ꞌyɛ̨na. 6 Pɛ nuꞌa ran hoqui ga hąmhbʉ rá mate Oją, o guí ɛ̨mhbʉ xʉn hɛ̨i bʉ dá tįmhbʉ a, gue ba sønsɛhʉ bʉ mahɛ̨tsꞌi ba sisɛhʉ ua ra Cristo. 7 Nɛ o guí ɛ̨mhbʉ ga mbähä bʉ ꞌbʉ ʉ xʉn du ngue ba sisɛhʉ bʉ a ra Cristo. 8 Pɛ ꞌbɛꞌa i manꞌa ran hoqui ꞌbʉ. Pɛ hingui hɛ̨i bʉ dá tįmhbʉ a. Nɛ ɛ̨na: “Gui hyąnthohʉ rá mate Oją, nɛ da zä da ꞌyo ni mbʉihʉ bʉya, nɛ da zä da ꞌyo ni ndehʉ bʉya.” Nɛ gueꞌa ram hma dím mamhbe a. 9 Ngue nuꞌbʉ ga ɛ̨mhbʉ ma Hmuhʉ ra Jesús, nɛ ga ɛ̨cꞌyɛihʉ mbo ma mbʉihʉ ngue bi xox Oją a ꞌbʉ mi du, da yąnjʉ Oją ꞌbʉ. 10 Nguetho gueꞌa ní ꞌyɛ̨njʉ xʉn hojʉ Oją a ga ɛ̨cꞌyɛihʉ mbo ma mbʉihʉ, nɛ gueꞌa ní pøjʉ Oją a gam mamhbʉ nangue ma ndehʉ. 11 Nɛ mí ɛ̨n rá tꞌohni Oją: “Toꞌo gätho da ꞌyɛ̨cꞌyɛi a bá pɛnh Oją, hin da thäda ʉ,” bi ꞌyɛ̨na. 12 Nɛ hin gam bɛ̨mhbʉ ngue nꞌdanꞌyo yʉ́ hmu i ꞌbʉ ʉ yʉ judío nɛ ʉ hing yʉ judío. Pɛ nꞌdatꞌa yʉ́ hmu ngue gätho yʉ jąꞌi i ꞌbʉi, nɛ ꞌda dí unthoho xʉn ngu toꞌo gätho da ꞌyäp rám fätsꞌi. 13 Nguetho nuꞌʉ toꞌo gätho da ꞌyäp rám fätsꞌi ra Hmu, di pø ʉ, mi ɛ̨n ra tꞌohni mayaꞌbʉ. 14 Pɛ hague dán zä da ꞌyäp rám fätsꞌi ra Hmu ꞌbʉ him bi bą a rá mate bʉ ja rá mbʉi. Nɛ hague dán zä da hyąn rá mate ꞌbʉ him bi ꞌyøde. Nɛ hague dán zä da ꞌyøde ꞌbʉ njon da xifi nangue ra Cristo. 15 Nɛ hague dán zä da mba nꞌda da xifi ꞌbʉ hingam ꞌbɛhni. Janangueꞌa i ɛ̨n rám hman Oją: “Mahotho i øtꞌa nꞌda ꞌbʉ i man ran ho maꞌdaꞌyo di ꞌdajʉ ran johya, hapʉ i ꞌyo,” bi ꞌyɛ̨na. 16 Pɛ hinga gätho i ømanho ʉ i sih ran ho maꞌdaꞌyo. Tengu bi man ra Isaías, bi ꞌyɛ̨na: “Ma Hmu i, ndaꞌa ʉ bi ꞌyømanho a dá mamhbe ya.” 17 Pɛ nuꞌbʉ ꞌbʉi toꞌo da sih ram hma nangue ra Cristo, da zä da hyąn rá mate Oją ꞌbʉ. 18 Pɛ dí än ꞌbʉ hin xtamá ꞌyø ʉ yʉ judío. Pɛ haguen ja ngue him bi ꞌyɛ̨cꞌyɛi ra Cristo. Bi ꞌyøhma, nguetho hønbʉ go hapʉ bi mba rám hman Oją, bin ꞌyo gätho ná ngʉni ra ximhäi. 19 Nɛ xø dí änꞌnahʉ, ha him mí pą ʉ yʉ israel ngue manꞌda da tꞌɛ̨mbi yʉ́ tꞌʉhni Oją ʉ hing yʉ israel. Bi bąhma, nguetho nubʉ ja rá søcuą ra Moisés mí ɛ̨n Oją:
Ga ja ahʉ gan sɛyahʉ ꞌbʉ ga simanho ꞌda yʉ jąꞌi him mí ɛ̨mbä ma tꞌʉhni.
Nɛ ga ja ahʉ gan cuɛhʉ ꞌbʉ ga simanho ꞌda yʉ ꞌyąmbʉi jąꞌi, bi ꞌyɛ̨mp Oją ʉ yʉ israel.