ꞌDa ʉ yʉ israel bim pøh ya
11
Pɛ ga änꞌnahʉ mahønꞌa, ha gätho bi hyɛ ʉ yʉ́ tꞌʉhni Oją, gue nu ʉ yʉ́m bomꞌbɛto ra Israel. Pɛ hinꞌna. Nguetho gueczɛhɛgä drá mɛꞌisrael, ngue mam bombøtagä ra Abraham, nɛ ra Benjamín. 2 Pɛ Oją hingui hɛ ʉ njuąntho yʉ́ tꞌʉhni ngueꞌʉ bi huan ꞌbʉ mamꞌbɛtꞌo. Ha hin guím bɛ̨mhbʉ ꞌbɛꞌa bi man rá tꞌohni Oją, gue bi sih ra Elías ꞌbʉ mí yąpꞌʉ yʉ́ mi israelhʉ. Nɛ bi ꞌyɛ̨na: 3 “Ma Hmu i, bi hyo ni pøngahyą ʉ yʉ israel, nɛ bi xotꞌa bʉ ja ni mɛxa mí pa mꞌbøtsꞌe ni ꞌbøtsꞌe, nɛ høngdä dá pongä, nɛqui nde da hyogui,” sä bi ꞌyɛ̨n a ra Elías. 4 Pɛ ha hin guím bɛ̨mhbʉ ꞌbɛꞌa í dą Oją bʉya ngue bi tꞌɛ̨mb ra Elías. “Pɛ hinꞌna, hin guí ꞌdasɛ,” bi ꞌyɛ̨mbi. “Pɛ dá jamansup yʉ́ mbʉi ʉ yoto mahuąhi yʉn ꞌyohʉ israel, gueꞌʉ him bin dąnyahmu bʉ ꞌbäh ra pøte ra Baal,” ngue mi tꞌɛ̨mbi oją. 5 Nɛ ngutho ya, ꞌbʉ i ꞌda yʉ israel him bi ꞌuegue nangue Oją, ngue gueꞌʉ to bi huand Oją nangue rá mate thoho. 6 Nɛ gam bɛ̨mhbʉ nuꞌbʉ rá matethoho Oją bi huanꞌndʉ, ga pąhmbʉ bʉya hin nangue yʉn tꞌøtꞌe i øtꞌa nꞌda ní huanꞌna nꞌda. Nguetho nuꞌbʉ xtá hnumanho nangue yʉn tꞌøtꞌe bi sifi, hin xtín ja rá mate tho Oją ꞌbʉ, nɛ nte nam bønꞌa rá mate Oją ꞌbʉ. 7 Xiya, ꞌbɛꞌa gam bɛ̨mhbʉ nangue yʉ israel, nɛ hinguin ngu ʉ bi dįni ꞌbɛꞌa mí honi, gue da tꞌɛ̨mbi xʉn ho. Pɛ høntꞌʉ nthahni bi dįni, nɛ bim pøhø. Pɛ nuꞌʉ miꞌda bi mɛp yʉ́ mbʉi ʉ. 8 Nɛ gueꞌa mán tꞌoꞌtꞌi: “Oją bi pumbɛ̨nip yʉ́ mbʉi, tenguꞌbʉ bin ąha. Nɛ bi japi him bi zä bi nu nɛ him bi zä bi ꞌyøhnahyą. Nɛ guexta ʉ yʉ pa i jabʉ ya,” bi ꞌyɛ̨n rá tꞌohni Oją. 9 Nɛ ngutho bi man ra David:Da mbøspa Oją, pɛ hin da bɛ̨ni ꞌbɛꞌa nam bøn ʉ yʉ ꞌbøtsꞌe da ꞌyøtꞌʉ,
nɛ gueꞌa dán ʉnba ʉ.
10 Nɛ din xädä, hin da nu ran nɛqui.
Nɛ nu yʉ́ xʉtha dim mboqui ma zä, nangue yʉ́ tsꞌoqui xʉn ngu i tutsꞌi, bi ꞌyɛ̨n a ra David.
Nɛꞌʉ ꞌda hing yʉ israel bim pøh ya
11 Pɛ dí änꞌnahʉ mahønꞌa, nuꞌbʉ mí ꞌueꞌʉ yʉ israel, ha bi bɛ̨n Oją him manꞌdandį da ꞌyɛnspa rán jąpi ʉ ꞌbʉ. Pɛ hinꞌna. Pɛ nangueꞌa bi zan rá mate Oją ʉ yʉ israel, nɛ gueꞌa í zä bim pø ʉ hing yʉ israel bʉya. Pɛ gueꞌa bi ꞌyøtꞌ Oją, nꞌdahma din sɛya yʉ israel ꞌbʉ bi nu ʉ bi hyąn rá mate Oją, nɛ da hyon Oją mahønꞌa. 12 Nu Oją bi zä bi jąpꞌʉ ꞌda yʉ jąꞌi hing yʉ israel gätho ná ndoho ra ximhäi, nangue bi ꞌueꞌʉ yʉ israel. Nɛ bi dįn rá mate Oją ʉ hin yʉ israel ꞌbʉ mi thącpa rán jąpi Oją ʉ yʉ israel. Janangueꞌa manꞌda xʉn ngu ran jąpi da nu ʉ hing yʉ israel ꞌbʉ bá peng bʉ ꞌbʉ Oją ʉ yʉ israel mahønꞌa. 13 Guehna dí xi ahʉ na ya, ngue hin gyʉ israel ahʉ, nguetho drám ꞌbɛhnigä nangue ahʉ. Nɛ dín nde ga ja ahʉ gui pømanhohʉ nangue ra Cristo, 14 nꞌdahma din ꞌyomfɛ̨ni ʉ ma mijudíohe yʉ israel ꞌbʉ bi nu a ran ho gá tįmhbʉ, janangueꞌa manꞌda xtá ngu dim pø ʉ bʉya. 15 Nɛ nuꞌbʉ mí hyɛ Oją ʉ yʉ judío, bi zä bi hocpa ʉ hing yʉ judío ꞌbʉcua gätho ua ja ra ximhäi. Pɛ ɛ̨mmɛ manꞌda xʉn ho din ja ua gätho ra ximhäi ꞌbʉ bi tsꞌim mahønꞌa xʉn ngu ʉ yʉ judío. Nɛ din ja tenguꞌbʉ ya bi ndantsꞌʉ yʉ du. 16 Nu mam bombøtahe mí yąhʉ Oją mayaꞌbʉ, yʉ́ mbɛti Oją ʉ, tenguꞌbʉ yʉ́ ꞌbøtsꞌe Oją ʉ. Nɛ tenguꞌbʉ mí ꞌbøspa Oją ra mbʉdi thuhmɛ ꞌbʉ øt ra thuhmɛ, janangue gätho a ra jʉni rá mbɛti Oją bʉya. Nɛ nuꞌbʉ mí huand Oją a ra Abraham, nɛ gueꞌa í thanꞌndʉ yʉ́ ꞌyʉ a bʉya, tenguꞌbʉ nꞌda ra za xʉn zaqui rán dʉi, nɛꞌʉ yʉ́ ꞌyɛ xʉn zaqui ʉ. 17 Pɛ bi tsꞌɛcpa ꞌda ʉ yʉ́ ꞌyɛsɛ a ra hogaza. Nɛ nu ahʉ hing yʉ israel ahʉ nɛ tenguꞌbʉ bá tsꞌɛcꞌahʉ bʉ gmí tøhmbʉ tengu nꞌda ra za hingui ho. Nɛ bi tꞌɛ̨sꞌahʉ bʉ bi tsꞌɛcpa ʉ ꞌda yʉ́ ꞌyɛ ra hogaza. Nɛ gá comhbʉ rán zaqui a ra za, gue bá nɛxpʉ rán dʉi, ngue nu ra Abraham bi huand Oją mayaꞌbʉ. 18 Pɛ hingui sä gdá yąthʉ a ngue bi tꞌɛ̨sꞌahʉ bʉ bi tsꞌɛc ʉ ꞌda yʉ́ ꞌyɛ ra za. Dami bɛ̨mhbʉ ngue hinga gue ahʉ guidí unhdʉ rán zaqui a rán dʉi ra za, pɛ gueꞌa rán dʉi ra za i øtꞌahʉ rán ho Oją bʉ guí tøhmbʉ. 19 “Pɛ manꞌda xʉn hoje, nguetho bi tsꞌɛcꞌʉ ꞌda yʉ ꞌyɛ, nɛ go bi tꞌɛ̨scähe ua,” masque guí ɛ̨mhbʉ. 20 Majuąni bi tsꞌɛcꞌʉ ꞌda yʉ israel nguetho him bi nde rá mate Oją. Bi bɛ̨ni xʉn hosɛ. Nɛ guí tøhmbʉ bʉ ꞌda ahʉ ngue hing yʉ israel ahʉ, nguetho guí pąhmbʉ høntꞌa rá mate Oją nán ho ahʉ. Pɛ o guím bɛ̨mhbʉ gán tøsɛhʉ bʉ, pɛ gan jamansuhʉ. 21 Damí bɛ̨mhbʉ him bi yąn Oją ʉ ꞌda yʉ́ ꞌyɛsɛ ra za. Ha má gueꞌadahʉ da yąn ahʉ ꞌbʉ guím bɛ̨mhbʉ xʉn hosɛ ahʉ. 22 Pɛ nuꞌbʉ ꞌboꞌo hinguin nde rá mate Oją, pɛ da nusɛ a rán säui a toꞌo da ꞌuepʉ ja rá mate. Pɛ nu ahʉ gui nuhʉ rá mate Oją ꞌbʉ gui thoqui guim bɛ̨mhbʉ a. Pɛ nuꞌbʉ hinꞌna, nɛ ahʉ da tsꞌɛcꞌahʉ mahønꞌa bʉ ja ra za ꞌbʉ. 23 Nɛ nuꞌʉ yʉ́ ꞌyɛsɛ a ra hogaza, ngue yʉ israel, nuꞌbʉ da ꞌyɛ̨cꞌyɛi rá mate Oją, da tꞌɛ̨sꞌ mahønꞌa bʉ ja yʉ́ zasɛ. Nguetho ja rá tsꞌɛdi Oją da ꞌyɛ̨sꞌ mahønꞌa bʉ bi zɛqui. 24 Nuꞌbʉ mam bá tsꞌɛcꞌahʉ bʉ gmi tøhmbʉ ja nꞌda ra za hingui ho, nɛ bi tꞌɛ̨sꞌahʉ bʉ ja manꞌda ra za ngue hin ni zasɛhʉ, pɛ manꞌda hingui hɛ̨i da ndøpʉ mahønꞌa ʉ yʉ́ ꞌyɛsɛ nguetho rá zasɛ.
Da zøni nꞌdatꞌa dim pøhø xʉn ngu yʉ israel
25 Ma zi cu ahʉ, dín nde ahʉ gui pąhmbʉ a ja bi tꞌuhya, nꞌdahma hin gan ꞌyɛ̨zɛhɛhʉ hing yʉ judío ahʉ. Dín nde gui pąhmbʉ, ꞌda yʉ patho bi mɛh yʉ́ mbʉi ʉ ꞌda ʉ yʉ israel, ja gueꞌbʉ bi zøn ra pa xtí cʉthʉ xʉn ngu ahʉ høntꞌa go toꞌo hing yʉ judío ahʉ. 26 Nɛ mꞌbɛjua bʉya, xʉn ngu dim pø ʉ yʉ israel. Nɛ gueꞌa bi man rá tꞌohni Oją, bi ꞌyɛ̨na:
Di nɛqui nꞌda yʉ́ yąnte ngue yʉ́ miꞌisraelhʉ bʉ Sión,
da yąnꞌa ra Jacob nangue yʉ́ tsꞌoqui. Ngue ra Israel a ra Jacob.
27 Nɛ ja gueꞌbʉ ga jąꞌtsꞌa dá xifi,
ga punba yʉ́ tsꞌoqui, bi ꞌyɛ̨m bʉ ja rá tꞌohni Oją mayaꞌbʉ.
28 Nuꞌʉ yʉ israel i øtꞌe ngue yʉ́n sʉihʉ Oją ya, ngueꞌa hingui ɛ̨cꞌyɛi ra hogamhma. Pɛ gueꞌa í zä bi zin ahʉ Oją a. Pɛ guehma di huɛ̨c Oją ʉ yʉ israel, nguetho bi than ꞌbʉ mayaꞌbʉ ʉ yʉ́ ngʉrpa bombøta. 29 Nguetho njąmꞌbʉ da goh rá mbʉi Oją nangue ʉ to xí zohni, pɛ majuąni di unꞌna bi ma, tenguꞌbʉ ya xí um ꞌbʉ mí ma ꞌbɛꞌa di unni. 30 Nɛ nu ahʉ hin gyʉ israel ahʉ gmí øthʉ ram fɛꞌtsꞌi nangue Oją mamꞌbɛtꞌo. Nɛ mꞌbɛjua nɛ ʉ yʉ israel bi mbɛsthoho Oją. Janangueꞌa bi zä gá tįmhbʉ rá mate Oją. 31 Nɛ gueꞌa in ja ya, ngue i fɛsta a rá mate Oją ʉ yʉ israel, nɛ guí tįmhbʉ rá mate Oją ya. Pɛ gueꞌa dí dįn rá mate Oją mahønꞌa ʉ yʉ israel. 32 Oją bi ma, njoꞌo nꞌda ra jąꞌi bi ꞌyɛ̨cꞌyɛi a nguetho ja yʉ́ tsꞌoqui. Nɛ bi ꞌyøtꞌ Oją bʉya gue njon da hyätꞌi din hoc zɛhɛ, nguetho in nde gätho di un rá mate di hoqui toꞌo gätho in nde dim pøhø. 33 Ɛ̨mmɛ xʉn ngu rá mate Oją, nɛ ɛ̨mmɛ xʉn ndoho rán ꞌyomfɛ̨ni. Nɛ hinꞌyʉ ngue hingui pą Oją. Njoꞌo nꞌda ra jąꞌi da bądi ꞌbɛꞌa nam bønꞌa i øtꞌ Oją, nɛ njongui sä da bądi ꞌbɛꞌa gätho i sänd Oją da ꞌyøtꞌe. 34 Njoꞌo nꞌda ra jąꞌi da bądi da ꞌyøtꞌe tengu rán tꞌøtꞌe Oją, nɛ njon da ꞌyut Oją ꞌbɛꞌa da ꞌyøtꞌe. 35 Nɛ njoꞌo nꞌda ra jąꞌi da hyoni ꞌbɛꞌa di un Oją nɛ ngueꞌa dí ꞌyɛ̨mbi dín dupate Oją a. 36 Nguetho gätho bí ꞌyɛ̨pʉ ꞌbʉ Oją, nɛ gätho di ꞌyonsɛ Oją ʉ, nɛ gätho bi ꞌyøtꞌʉ gue di pɛpzɛhɛ ʉ. Janangueꞌa ndeꞌbʉ ga ɛ̨spahʉ Oją gätho yʉ pa maząi. Nɛ høntꞌa gam bɛ̨mhbʉ a ya.