Dam ꞌbʉhmbʉ ngue høntꞌa Oją gam bɛ̨mhbʉ
12
Ma zi cu ahʉ, tsꞌɛdi dí xiꞌahʉ, nuꞌbʉ dí pąhmbʉ rá mate Oją, pɛ ndeꞌbʉ gätho ma jąꞌihʉ dan umhbʉ bʉ ꞌbʉ Oją gue ga ørpahʉ rá ꞌbɛfi. Nɛ gueꞌa majuąni ná thąndehʉ Oją a, nɛ gueꞌa ra ꞌbøtsꞌe in numanho Oją a. 2 Nɛ hin gam bɛ̨mhbʉ ga homhbʉ ꞌbɛꞌa gätho xʉn ho nangue yʉ pa i jabʉ ya, tengu i øtꞌʉ ꞌbʉcua ja ra ximhäi. Pɛgue thocpa thoho ga päh man ꞌyomfɛ̨nihʉ gam bɛ̨mhbʉ maꞌdaꞌyo. Janangueꞌa thocpa thoho ga homhbʉ ga pąhmbʉ ndaꞌa rá pähä Oją, ngue ndaꞌa xʉn ho ga øthʉ, nɛ ndaꞌa numanho Oją bʉya. 3 Bi ꞌdacä rá tsꞌɛdi Oją ga ørpa rá ꞌbɛfi nangue rá mate. Janangueꞌa dí xi ahʉ, ngue ꞌnɛ ahʉ gätho nꞌda ngu nꞌda ahʉ bin tatꞌahʉ rá mate Oją nangue rá ꞌbɛfi. Janangueꞌa hin gan ꞌyɛ̨xhʉ, pɛgue gui pąsɛhʉ ndaꞌa ní ꞌbɛfi bi zänꞌnahʉ nꞌda ngu nꞌda ahʉ, nangue rám fätsꞌi Oją. 4 Tengu ní jąꞌi nꞌda, ngue an tsꞌänni xʉn ngu yʉ́ xɛqui. Nɛ hinga gätho ꞌdatꞌa ra ꞌbɛfi øtꞌe, pɛ ꞌdahma ꞌdanꞌyo yʉ́ ꞌbɛfi ʉ yʉ xɛqui. Ngutho dí øthʉ. 5 Nɛ madagueꞌbʉ xʉn ngujʉ, pɛ tenguꞌbʉ nꞌdanjąꞌitho ma jąꞌi dí comhbʉ ra Cristo. Nɛ tengu ní jąꞌi nꞌda, ꞌda nam fäxta nꞌda ngu nꞌda yʉ xɛqui, ngutho dí øthʉ ngue dí comhbʉ rá ꞌbɛfi ra Cristo. 6 Bi ꞌdajʉ ra tsꞌɛdi Oją gue ga øthʉ rá ꞌbɛfi ꞌdahma ꞌdanꞌyo, nangue rá mate zɛhɛ. Pɛ ndeꞌbʉ ga øthʉ xʉn ho. O nuꞌbʉ nꞌda dim pøngahyą da hyoni ꞌbɛpʉ dí ma xʉn ho a di bɛ̨nba Oją, nangue rám fätsꞌi. 7 O nuꞌbʉ nꞌda bin tꞌun ra ꞌbɛfi dim fäxte ꞌbɛꞌa di ꞌbɛ a nꞌda, pɛ di jąꞌtsꞌi xʉn ho, ngue da mbäx yʉ́ cu. O nuꞌbʉ nꞌda bin tꞌun ra ꞌbɛfi din xänbate, din xänbate ꞌbɛꞌa nam bønꞌa rám hman Oją. 8 O nuꞌbʉ nꞌda ra zote, pɛgue da xifi ndaꞌa xʉn ho da ꞌyøtꞌʉ yʉ́ cu. O nuꞌbʉ nꞌda bin tꞌun ra ꞌbɛfi di un rá mbɛti, pɛ hin da bɛ̨ni da hnumanhosɛ. O nuꞌbʉ yʉ ngʉrpi ngue di manda rá ꞌbɛfi Oją, di jąꞌtsꞌi xʉn ho nangue ra tsꞌɛdi bin tꞌunni. O nuꞌbʉ nꞌda bin tꞌun ra ꞌbɛfi da mbäx ʉ yʉ hyoya nɛ yʉn zämanꞌʉ, mpähä thoho da mbätsꞌi.Gam bɛ̨mhbʉ ndaꞌa xʉn ho dá tɛnhdʉ Oją
9 Nɛ hingui yoho gam bɛ̨mhbʉ ꞌbʉ ga huɛ̨jʉ nꞌda, pɛ majuąni ga øthʉ ran huɛ̨cate. Nɛ xingui tsꞌʉ gam bɛ̨mhbʉ ga øthʉ a hingui ho, pɛ dan ɛ̨hyahʉ ga øthʉ a ꞌbɛꞌa gätho xʉn ho, nɛ nząi ga øthʉ a. 10 Dan huɛ̨jʉ nꞌda ngu nꞌdajʉ nguetho dadín cuhʉ. Nɛ nꞌda ngu nꞌda manꞌda da bɛ̨ni da ꞌyɛ̨spa rá mijąꞌiui, xinda gueꞌbʉ da tꞌɛ̨spa zɛhɛ. 11 Nɛ hin ga cʉthʉ ran dąnhyɛ̨i ma mbʉihʉ, pɛ dan ɛ̨hya ga ørpahʉ rá ꞌbɛfi ma Hmuhʉ. 12 Dan johyahʉ nangueꞌa ran ho dí tømhbʉ, nɛ hin dan xømbʉihʉ nangue yʉn ʉnbi. Nɛ thocpa thoho yʉ ora thoho dan yąhʉ Oją. 13 Ga fäxhʉ yʉ ꞌyɛ̨cꞌyɛi ꞌbʉ ja ꞌbɛꞌa di ꞌbɛdi. Nɛ mpähä thoho ga säyabahʉ yʉ jąꞌi bʉ ja ma ngumhbʉ. 14 Pɛ ga äfʉ ran jąpi nangue ʉ to di ʉgahʉ, nɛ hin ga äfʉ ra ꞌyąnthį. 15 Nɛ ꞌdatꞌa dan johyahʉ toꞌo di johya, o nuꞌbʉ ꞌboꞌo tu rá mbʉi, ꞌda dán du ma mbʉihʉ bʉya. 16 Nɛ gätho ꞌdatꞌa gam bɛ̨mhbʉ. Nɛ hin da bɛ̨nꞌa nꞌda manꞌda xʉn ho xinda gue rá mijąꞌiui, pɛ din amigohʉ ʉ yʉ jąꞌi hinꞌyʉ yʉ́ tsꞌɛdi. Nɛ hin gam bɛ̨mhbʉ ngue jasɛ man ꞌyomfɛ̨nihʉ. 17 Nuꞌbʉ ꞌboꞌo ørcahʉ ran tsꞌo, hin ga cospahʉ ran tsꞌo. Pɛ gam bɛ̨mhbʉ ndaꞌa xʉn ho ga ørpahʉ, ngue ꞌbɛꞌa gätho i hnumanho. Nɛ nubʉya da nu gätho yʉ jąꞌi ngue xʉn ho ma mbʉihʉ. 18 Nɛ dam ꞌbʉmanhohʉ ʉ gätho yʉ jąꞌi ꞌbʉ da zä. 19 Ma zi cu ahʉ, hin ga cosꞌhʉ ra pengui ꞌbʉ jaꞌa da tꞌørcahʉ. Pɛ ꞌbɛ ga tømhbʉ tsꞌʉ di ʉnba Oją ꞌbʉ gueꞌa in nde di ʉnba ʉ. Nguetho ntꞌoꞌtꞌi: “Ma ꞌbɛfi zɛhɛgä ngue ga ʉnba nꞌda nɛ ga un rán thɛui a bi ꞌyøtꞌe,” bi ꞌyɛ̨n Oją. 20 Janangueꞌa nuꞌbʉ tumanthuhu man sʉihʉ, ga ꞌuįmhbʉ. Nɛ nuꞌbʉ tuthe, ga sithebahʉ. Nguetho nuꞌbʉ njabʉ dí ørpa man sʉihʉ, xʉn ʉ da bɛ̨ni ngueꞌa midí ʉgahʉ, nɛ xøhma thoho da goh yʉ́ mbʉi bʉya. 21 Hin ga cosꞌhʉ ran tsꞌo pɛ ga ørpahʉ ran ho, gueꞌa dá tąfʉ a ran tsꞌo a bʉya.