Ga øthʉ yʉ́n tꞌɛ̨di yʉ tsꞌʉtꞌabi
13
Gätho gahʉ ga ɛ̨cꞌyɛihʉ ra tsꞌʉtꞌabi ua ma häihʉ. Nguetho njoꞌo nꞌda ra tsꞌʉtꞌabi ua ja ra häi ngue bi zän zɛhɛ yʉ́n tꞌɛ̨di. Pɛ Oją bi zänni ngue din ja yʉ́ tsꞌɛdi. 2 Janangueꞌa nu to din sʉhmi ra tsꞌʉtꞌabi, din sʉhmi a to bi zänba rá tsꞌɛdi a, nɛ i honsɛ rán ʉsɛ. 3 Nguetho nuꞌʉ yʉ tsꞌʉtꞌabi ua ma häihʉ, hin ga suhʉ ꞌbʉ dí øthʉ ran ho, hinda høntꞌbʉ ga øthʉ ran tsꞌo ga suhʉ ꞌbʉ. Pɛ nuꞌbʉ dín nde hin ga suhʉ ra tsꞌʉtꞌabi, pɛ ga øthʉ ran ho, nɛ da numanhojʉ bʉya. 4 Nguetho nuꞌʉ yʉ tsꞌʉtꞌabi, Oją bi zänni da mbäxcahʉ. Pɛ nuꞌbʉ dí øthʉ ra tsꞌoqui, ga suhʉ ꞌbʉ, nguetho i ja rán tꞌɛ̨di di ʉnba nꞌda. Nɛ Oją bi un yʉ́n tꞌɛ̨di di ʉnba ʉ toꞌo øtꞌ ra tsꞌoqui. 5 Janangueꞌa i jatho ga ɛ̨cꞌyɛihʉ yʉ́n tꞌɛ̨di ʉ yʉ tsꞌʉtꞌabi, nꞌdahma hin di ʉngahʉ. Nɛ gueꞌa di bɛ̨ngahʉ Oją ꞌbʉ in zoc ma mbʉihʉ. 6 Nɛ janangueꞌa ga juthʉ ꞌbɛꞌa gätho i äjʉ yʉ tsꞌʉtꞌabi, nꞌdahma di thoqui da ꞌyøtꞌ yʉ́ ꞌbɛfi ngue bi zänba Oją, nɛ i tąh yʉ́n zäbi ʉ. 7 Mpähä thoho ga juthʉ xʉn ho toꞌo gä i ja yʉ́n tꞌɛ̨di da ꞌyädi ꞌbɛꞌa gä da ꞌyäjʉ. Ga jutꞌa ma häihʉ, nɛ ga juthʉ yʉ puesto, nɛ miꞌda yʉ cota i äh ra tsꞌʉtꞌabi. Nɛ ga numansuhʉ yʉ́n tꞌɛ̨di ʉ toꞌo gätho i ja yʉ́n tꞌɛ̨di.Ga ørpahʉ ran ho ma mijąꞌihʉ
8 Nɛ ga juthʉ ꞌbɛꞌa gätho dín dupatehʉ, nɛ hin te gam bɛ̨mhbʉ ngue dín dupatehʉ bʉya. Pɛ gam bɛ̨mhbʉ ngue dan huɛ̨jʉ nꞌda ngu nꞌdajʉ. Nguetho nu to gätho ja yʉ́n huɛ̨cate bi jąꞌtsꞌi gätho yʉ́n tꞌɛ̨di Oją ʉ. 9 Nguetho gueꞌa bi manꞌʉ yʉ́n tꞌɛ̨di Oją bi ꞌyɛ̨na: “O guí ꞌyomtꞌɛ̨nihʉ, nɛ o guí hącpahʉ rá te ni mijąꞌihʉ, nɛ o guím pɛ̨hʉ, nɛ o guidí sɛyabahʉ ꞌbɛꞌa pɛꞌtsꞌ ni mijąꞌihʉ.” Nɛ nu ꞌbɛꞌa gätho miꞌda yʉn tꞌɛ̨di i man yʉn tꞌɛ̨di, nuꞌʉ gätho nꞌdatꞌa i ma: “Gui huɛ̨c ni mijąꞌihʉ tengu bʉ gní huɛ̨czɛhɛ ni jąꞌihʉ.” 10 Nuꞌa øtꞌ ran huɛ̨cate, hingui ørpa ran tsꞌo rá mijąꞌiui a. Janangueꞌa di jąꞌtsꞌʉ yʉ́n tꞌɛ̨di Oją a ran huɛ̨cate i øtꞌa nꞌda. 11 Nɛ manꞌda ga humbi ga øthʉ na, nguetho dí pąhmbʉ ya bin de, ya bi thoh yʉ pa. Damin ꞌyomfɛ̨nihʉ xʉn ho ya ngue daná hämhbʉ yʉ pa gan nuhʉ ra Hmu, xinda gueꞌa dá øthʉ ꞌbʉ ja má dʉꞌmi dá ɛ̨cꞌyɛihʉ. 12 Ya bi thoh ra xui, ya maguepʉ da hyatsꞌi. Mbähä ga bʉnthʉ yʉ́n tꞌøtꞌe ra ꞌbɛxui, ga he man thäquihʉ, ngue dan sąmzɛhɛhʉ janangueꞌa da dąh ran nɛqui. 13 Mbähä ga øthʉ a rán säui ran nɛqui, hin dan įtihʉ, nɛ hin dam munsꞌhʉ bʉ ja yʉ́n johya zɛhɛ yʉ jąꞌi. Nɛ xín dan ꞌyomtꞌɛ̨nihʉ, xínga gueꞌa ma pähä zɛhɛhʉ ga øthʉ, xín ga øthʉ yʉ sʉi, xín ga øthʉ yʉn tsꞌɛya. 14 Pɛ jatho gam bɛ̨mhbʉ ga hąmhbʉ rá tsꞌɛdi a ma Hmuhʉ ra Jesucristo, ngue ga øthʉ tengu bi ꞌyøtꞌe, nɛ him ma gam bɛ̨mhbʉ ga øthʉ rá pähä ma ngøcꞌyɛ̨ihʉ.