ꞌDahma ꞌdanꞌyo bʉ na ɛ̨cꞌyɛihʉ
14
Nuꞌbʉ ꞌbʉ a nꞌda ra ꞌyɛ̨cꞌyɛi gue hin ɛ pądi xʉn ho, pɛ ga simanhohʉ bʉ ja mam pɛtihʉ ʉ. Nɛ hin dan junthʉ nangue ꞌbɛꞌa im bɛ̨ni ngue xʉn ho da ꞌyøtꞌe. 2 Nguetho ꞌdahma ꞌdanꞌyo im bɛ̨nsɛ ꞌbɛpʉ ní ꞌyɛ̨cꞌyɛi Oją. Nuꞌʉ ꞌda im bɛ̨ni xʉn ho da zi gätho ꞌbɛꞌa i tsꞌi. Pɛ nu miꞌda im bɛ̨ni hingui ho ꞌbʉ da za ʉ ꞌda yʉ ngø. 3 Nɛ nu ra ꞌyɛ̨cꞌyɛi gue i si nɛ i sa gätho ꞌbɛꞌa i ja, pɛ hin da zanꞌa nꞌda toꞌo mbɛ̨ni hingui tsꞌi. Nɛ ximangutho a nꞌda toꞌo hingui si, pɛ hin da ꞌyɛ̨mbi hingui ho øtꞌa i si gätho ꞌbɛꞌa i tsꞌi. Nguetho Oją ꞌda nan zintho. 4 Nuꞌi, toꞌo e, gue guí ɛ̨mbi hingui ho øtꞌ ni miꞌyɛ̨hɛhʉ. Nu rá hmusɛ nꞌda da mam ꞌbʉ xʉn ho ꞌbɛꞌa øtꞌa nꞌda rá ꞌyɛ̨hɛ, o hinꞌna. Pɛ guehma da bømanho nꞌda ngu nꞌda ra ꞌyɛ̨cꞌyɛi, nguetho i ja rá tsꞌɛdi ra Hmu di japi da bømanho. 5 Nɛ i ꞌbʉ i ꞌda yʉ ꞌyɛ̨cꞌyɛi im bɛ̨ni din säya ꞌda yʉ pa. Nɛ nu miꞌda bʉya im bɛ̨ni xʉn ho ꞌbʉ hin din säya ꞌda yʉ pa. Pɛgue nꞌda ngu nꞌda da bɛ̨nsɛ ꞌbɛꞌa xʉn ho da ꞌyøzɛhɛ. 6 Nguetho nu to din säya ꞌda yʉ pa, din säya nangue da bɛ̨n Oją. Nɛ ngutho ꞌbʉ hinga gä i si yʉn tsꞌihmɛ ʉ ꞌda, njabʉ øtꞌe nguetho im bɛ̨n Oją, nɛ i xifi jamadi Oją nangue ʉ ꞌda i si. Ximangutho a to gätho i si, njabʉ i øtꞌe nguetho im bɛ̨ni Oją bi unꞌna, nɛ di un ra jamadi Oją. 7 Njoꞌo gahʉ gue gam bɛ̨mhbʉ dyʉ́ hmusɛhʉ. Pɛ yʉ́ mbɛtigahʉ a ma Hmuhʉ. Nɛ ngutho ꞌbʉ dí ꞌbʉhmbʉ nɛ ngutho ꞌbʉ dá tuhʉ. 8 Nguetho dán däsɛhʉ bʉ ꞌbʉ Oją gätho yʉ pa dí ꞌbʉhmbʉ. Nɛ ngutho ꞌbʉ dá tuhʉ, dan dähʉ bʉ ꞌbʉh ma Hmuhʉ nɛ guextaꞌa yʉ́ mbɛtigahʉ a. 9 Nɛ gueꞌa í du nɛ í ndantsꞌa ra Cristo mahønꞌa, ngue dim hmu nangue ʉ xʉn du nɛꞌʉ i ꞌbʉi. 10 Pɛ ꞌda ahʉ hanja gní numanꞌʉ a ni cuhʉ ngue guí xihmbʉ hingui ho ꞌbɛꞌa i si. Nɛ nu miꞌda ahʉ guí pąhmbʉ xʉn ho ꞌbɛꞌa gätho i tsꞌi, pɛ hanja gní numanꞌʉ ꞌda ni cuhʉ guí ɛ̨mfʉ nte di muui ꞌbʉ hingui nde da zi ꞌda yʉn tsꞌihmɛ. Nguetho gätho gahʉ dam ꞌbähmbʉ bʉ ja rá hmi ra zɛꞌmi ngueꞌa ra Cristo. 11 Nguetho ntꞌoꞌtꞌi ꞌbɛꞌa bi man Oją gueꞌbʉ mí ꞌyɛ̨na:Guehma majuąni din ja a dím ma, ngue gätho yʉ jąꞌi din dąnyahmu bʉ dí ꞌbʉi,
nɛ gätho din juąn bʉ ja ma hmi ngue guecä drá Oją, bi ꞌyɛ̨n Oją.
12 Janangueꞌa dí pąhmbʉ, gätho gahʉ ga däfʉ ra güɛnda Oją nangue man tꞌøtꞌe zɛhɛhʉ.
Hin ga jafʉ da dąng bʉ ja ra tsꞌoqui nꞌda ma cuhʉ
13 Him ma numanꞌʉhʉ nꞌda ngu nꞌdajʉ. Pɛ høntꞌa gam bɛ̨mhbʉ hin ga jafʉ nꞌda ma cuhʉ di fet rá gua bʉ ja yʉ tsꞌoqui. 14 Dí pącä nangue ran ꞌyomfɛ̨ni bi ꞌdac ma Hmuhʉ ra Jesús, gue hinꞌyʉ ꞌbɛꞌa da tsꞌi ngue hingui ho. Pɛ nuꞌbʉ mbɛ̨nsɛ nꞌda hingui ho da tsꞌi, ra tsꞌoqui a ꞌbʉ da zi ꞌbʉ. 15 Pɛ nuꞌbʉ ꞌda ni cuhʉ hingui numanho nin tsꞌihmɛ zɛhɛhʉ, ndeꞌbʉ hin gui thoqui gui sihʉ, nguetho hin guí ørpahʉ ran huɛ̨cate ꞌbʉ guidí thoqui gui sihʉ. Pɛ o guí øthʉ nangue ran tsꞌihmɛ dí ꞌue ʉ ꞌda ni cuhʉ bi pøh ra Cristo ꞌbʉ mi du. 16 Pɛ gui ꞌyɛsꞌhʉ a ní jafʉ da tsꞌanꞌa guí pąhmbʉ xʉn ho. 17 Nɛ hin gam bɛ̨mhbʉ nangue ran tsꞌihmɛ ná øthʉ rá ꞌbɛfi Oją. Pɛ nu rá ꞌbɛfi Oją, ga øthʉ ran hocjąꞌi, nɛ ꞌdatꞌa gam bɛ̨mhbʉ, nɛ dan johyahʉ nangue rá Hogandąhi Oją dí ꞌbʉhmbʉ. Gueꞌa nam bøni gue rá ꞌbɛfi Oją a. 18 Nɛ nuꞌbʉ njabʉ i øtꞌa nꞌda, majuąni i ørpa rá ꞌbɛfi ra Cristo a ꞌbʉ. Nɛ Oją da numanho a, nɛꞌʉ yʉ́ mijąꞌihʉ da numanho a. 19 Mbähä dan ɛ̨hyahʉ dan hocpa ma mbʉihʉ nꞌda ngu nꞌdajʉ, nɛ ꞌda dám fäxtahʉ din te ma mbʉihʉ nꞌda ngu nꞌdajʉ. 20 Nɛ hin ga tsꞌonbahʉ rá ꞌbɛfi Oją nangue man tsꞌihmɛhʉ. Mfądi gue gätho xʉn ho da tsꞌi. Pɛ hingui ho ꞌbʉ dadí ʉnbahʉ rá mbʉi nꞌda ma cuhʉ nangue ꞌbɛꞌa dí sihʉ. 21 Manꞌda xʉn ho ꞌbʉ ga ɛsꞌhʉ a na ʉnbahʉ yʉ́ mbʉi ꞌda ma cuhʉ nangue ra ngø dí sahʉ, o ra vino o ꞌbɛꞌa gä ní dehe dí sihʉ. 22 Nuꞌbʉ bi bɛ̨nꞌnahʉ Oją nɛ guí pąhmbʉ gue xʉn ho ꞌbɛꞌa guí sihʉ, xʉn ho a ꞌbʉ. Nɛꞌa Oją in numanho. Pɛ hin dá yąthʉ a. Nɛ di johya nꞌda ꞌbʉ xisɛ rá mbʉi xʉn ho ꞌbɛꞌa gätho i øtꞌe, nɛ hin te mbɛ̨m bʉya. 23 Pɛ nuꞌbʉ nꞌda im bɛ̨ni hingui ho da tsꞌi ꞌbɛꞌa gätho i ja, pɛ nuꞌbʉ bi zi bʉya, ya ra tsꞌoqui a bi ꞌyøtꞌ ꞌbʉ. Nguetho ꞌbexque bi bɛ̨ni bi mbɛstaꞌa rá pähä Oją ꞌbʉ mi zi. Nɛꞌʉ ꞌbɛꞌa gätho dí øthʉ, nuꞌbʉ hin dí pąhmbʉ majuąni rá pähä Oją a, ra tsꞌoqui ꞌbʉ dí øthʉ a ꞌbʉ.