Ga homhbʉ ꞌbɛpʉ dí zac yʉ́ mbʉi ma cuhʉ
15
Pɛ nujʉ ꞌbʉ dí pąhmbʉ xʉn ho ꞌbɛꞌa da zä da ꞌyøtꞌa nꞌda, pɛ ndeꞌbʉ manꞌda gam bɛ̨mhbʉ ga fäxhʉ ʉ hin ɛ pądi xʉn ho, xinda gueꞌbʉ ga øthʉ ꞌbɛꞌa gätho dím bɛ̨nsɛhʉ xʉn ho. 2 Pɛ nꞌda ngu nꞌdajʉ ga øthʉ ꞌbɛꞌa i numanho ma mi ꞌyɛ̨cꞌyɛihʉ gue ꞌbɛꞌa dín te yʉ́ mbʉi ʉ. 3 Tengu ra Cristo, him bi ꞌyøtꞌe ꞌbɛꞌa di hosɛ pɛ bi ꞌyøtꞌe ꞌbɛꞌa bi numanho Oją. Janangueꞌa bi ꞌyɛ̨mpꞌa rá Ta: “Go dá tuxä yʉn tsꞌante bi si i,” bi ꞌyɛ̨n a ra Cristo. 4 Nɛ ꞌbɛꞌa gätho bi tꞌoꞌtꞌ mayaꞌbʉ bʉ ja rám hman Oją, bi tꞌoꞌtꞌi ngue da xängahʉ, nɛ di zɛrca ma mbʉihʉ, di jajʉ ga tømhbʉ rám fätsꞌi Oją, hin dan xømbʉihʉ. 5 Oją di jajʉ dan ząmhbʉ bʉ, nɛ di zɛrca ma mbʉihʉ. Nɛ dí äp rá mate di ja ahʉ ꞌdaꞌangu guim bɛ̨mhbʉ nꞌda ngu nꞌda ahʉ, nguetho ꞌdarbʉ guí ꞌbʉhmbʉ ra Cristo Jesús. 6 Nɛ janangueꞌa da zä nꞌdatꞌa guim bɛ̨mhbʉ ꞌbʉ guí thąndehʉ Oją, ngue nu rá Oją nɛ rá Ta ma Hmuhʉ ra Jesucristo.Gä da sih ra hogamhman ʉ hing yʉ judío
7 Janangueꞌa nꞌda ngu nꞌda ahʉ gan numanhohʉ, nɛ ʉ yʉ judío nɛ ʉ hing yʉ judío, tengu thoho ra Cristo ꞌda nan zimanhogdahʉ nꞌda ngu nꞌdajʉ. Nɛ gueꞌa ná ɛ̨spahʉ Oją a. 8 Nguetho bí ꞌyɛ̨h ra Cristo ngue din ꞌyɛ̨hɛ nangue yʉ judío. Nɛ bi jąꞌtsꞌa mi man Oją mayaꞌbʉ ngue bi sih yʉ́m bombøta yʉ judío ba ɛ̨h ma yąntehʉ. Janangueꞌa bi fądi majuąni bi man Oją. 9 Pɛ nɛ ʉ hing yʉ judío nɛ ʉ yʉ judío bi jap ra Cristo ꞌdarbʉ bi ꞌyɛ̨spa Oją ʉ nangue rá mate. Tengu mán tꞌoꞌtꞌi ꞌbɛꞌa bi xih rá Ta ra Cristo:
Ga xi ʉ hing yʉ judío nangue ni mate,
nɛ ga xifi ɛ̨mmɛ xʉn ho i, bi ꞌyɛ̨mb rá Ta a ra Cristo.
10 Nɛ manꞌda bi man ra tꞌohni:
Gan johyahʉ ya gyʉ jąꞌi gue hin gyʉ judío ahʉ, gan ꞌyohʉ ʉ bi huand Oją ngue yʉ judío.
11 Nɛ manꞌda bi mam bʉ:
Dami ꞌyɛ̨spahʉ ra Hmu Oją gyʉ jąꞌihʉ ngue ꞌdahma ꞌdanꞌyo bʉ gná yąhʉ gätho ná ngʉni ra ximhäi,
gätho gui numansuhʉ Oją.
12 Nɛ bi ꞌyɛ̨n a ra pøngahyą Isaías:
Dim ꞌbʉ a nꞌda rám bomꞌbɛto ra Isaí gue nɛꞌʉ hing yʉ judío da ꞌyɛ̨mbi rá Hmu,
ngue da døꞌbʉ rám fätsꞌi a, bi ꞌyɛ̨na.
13 Nuꞌa Oją di jajʉ dí tømhbʉ ran ho bi xijʉ. Janangueꞌa dí äp Oją da hyutꞌa ni mbʉihʉ nangue guí ɛ̨cꞌyɛihʉ a. Nɛ xíngui tsꞌʉ nte guim bɛ̨mhbʉ, pɛ thocpa thoho gui tømhbʉ da mbäx ahʉ rá Hogandąhi Oją nangue rá tsꞌɛdi.
I man ra Pablo hanja bi ꞌyoꞌtꞌ na ran zofo
14 Ma zi cu ahʉ, dí pącä gue xʉn ngu ni hogambʉihʉ, nɛ i ja nin ꞌyomfɛ̨nihʉ xʉn ho, nɛ guí pąhmbʉ ꞌda gdín xänba thohohʉ nꞌda ngu nꞌda ahʉ. 15 Pɛ guehma dá hutꞌanzambʉi dá otꞌahʉ na, ngue dadí bɛ̨nꞌnahʉ ꞌbɛꞌa gá pąhmbʉ. Nguetho gueꞌa ran tꞌɛ̨di bi ꞌdacä Oją nangue rá mate. 16 Nguetho rá mbɛfigä ra Cristo Jesús bʉ ꞌbʉ ʉ hing yʉ judío, dím mangä ran ho maꞌdaꞌyo. Nɛ tenguꞌbʉ drá mbäją dadí hocpa rá ꞌbøtsꞌe Oją, nuꞌa nám bøni dadí hocꞌa ni mbʉihʉ ngue hing yʉ judío ahʉ nꞌdahma da numanho ahʉ Oją. Nɛ mahoqui ahʉ nangue rá Hogandąhi Oją guín ꞌyohʉ. 17 Janangueꞌa ɛ̨mmɛ i hu ma mbʉigä nangue ꞌbɛꞌa gätho bi ꞌyørpa ʉ hing yʉ judío a ra Jesucristo, bi jaqui bi bømanho rá ꞌbɛfi Oją dá øtꞌä bʉ i ꞌbʉ ʉ. 18 Pɛ hingui sä gam mangä ꞌbɛꞌa bi ꞌyøtꞌa ra Cristo nangue ʉ miꞌda yʉ́ mbɛfi. Pɛ høntꞌa da zä gam mangä ꞌbɛꞌa bi ꞌyørpʉ dám pɛcä. Nɛ bi jap ʉ hing yʉ judío da dɛnꞌna ra Cristo nangue ram hma dá xifi nɛ nangue yʉn tꞌøtꞌe bi ꞌyuti. 19 Nguetho bi ꞌyøtꞌ yʉ hmɛpya, nɛ yʉn tꞌøtꞌe mixte nangue rá tsꞌɛdi rá Hogandąhi Oją. Nɛ dá jąꞌtsꞌä ma ꞌbɛfi dá mangä ran ho maꞌdaꞌyo nangue ma yąntehʉ ra Cristo. Dá dʉꞌmi dá mangä bʉ Jerusalén, nɛ dá mangä gätho yʉ xɛqui nán zantꞌi ra häi gueꞌbʉ go má søm bʉ Ilírico, gätho dá mangä bʉ ram hma. 20 Nɛ guehna dá nde ga øtꞌe, gue dá mba dá mampꞌa ram hma guepʉ him mi fąrpa rá thuhu ra Cristo. Ngue hin dá nde dá mba bʉ ja yʉ́ ꞌbɛfi ʉ miꞌda bi mbɛnꞌna ra Cristo. 21 Pɛ dá øtꞌä tengu bi mam bʉ ja rá tꞌohni, ngue i ɛ̨na:
Nuꞌʉ ꞌda gue njąmꞌbʉ mi sifi pɛ nuya da bąh ya.
Nɛ nuꞌʉ ꞌda njąmꞌbʉ mi øde da zøni da bądi nangue rá ꞌyu Oją.
Im bɛ̨ni da mba bʉ Roma a ra Pablo
22 Nɛ janangueꞌa him ꞌbexque bi zä dá mba bʉ guí ꞌbʉhmbʉ. Nguetho guextaꞌa mi ja ma ꞌbɛfi ua bí ja ra xɛqui ua nán jongua. 23 Pɛ nuya ya nte mi ja ua ma ꞌbɛfi ya. Nɛ xʉn ngu yʉ nidi mín nde xcá mba bʉ guí ꞌbʉhmbʉ bʉ Roma. 24 Nɛ mí tsꞌʉtho ya ga mbabʉ ga zɛngua ahʉ nɛ dam ꞌbʉhmbʉ bʉ ꞌda yʉ pa. Nɛ nuꞌbʉ dá thopʉ España, da zä dan hyʉmhbʉ tsꞌʉ bʉ ja ra ꞌyu ní mba bʉ. 25 Pɛ ꞌbɛ ga mba bʉ Jerusalén, nɛ ga dä bʉ a ra mbɛti dí mbäx ʉ yʉ ꞌyɛ̨cꞌyɛi bí ꞌbʉpʉ. 26 Nguetho bi bɛ̨n ʉ yʉ cu bí ꞌbʉpʉ Macedonia nɛpʉ Acaya ngue da mbäxꞌi tsꞌʉ yʉ hyoya ꞌyɛ̨cꞌyɛi bí ꞌbʉpʉ Jerusalén, ngue ga hąx ꞌbʉ dá mba bʉ. 27 Nɛ gueꞌa bi zänni da ꞌyøtꞌʉ hing yʉ judío, nguetho in nde di coꞌtsꞌa ra mate bi tꞌørpe. Nguetho bi gomhbʉ rán jąpi Oją ʉ hing yʉ judío ʉ yʉ judío gue yʉ́ mi ꞌyɛ̨cꞌyɛihʉ ꞌbʉpʉ Jerusalén. Janangueꞌa nde da mbɛnbi tsꞌʉ ra mbɛti ʉ. 28 Nɛ nuꞌbʉ ya dá dä a ꞌbɛꞌa bi ꞌbɛhni, ja ga mba bʉ Roma ga nu ahʉ bʉ, nɛ ga thocä bʉ España bʉya. 29 Nɛ nuꞌbʉ dá søngä bʉ guí ꞌbʉhmbʉ, dí pącä da ꞌyɛnscahʉ rán jąpi xʉn ngu a ra Cristo nangue dí pąhmbʉ rám hma. 30 Ma zi cu ahʉ ꞌyørcahʉ tsꞌʉ ra mate ɛ̨mmɛ gui ꞌyäfʉ rám fätsꞌi Oją nanguecä, nangue ꞌdatꞌa ma Hmuhʉ ra Jesucristo nɛ nangue rá Hogandąhi Oją bi jajʉ dan huɛ̨jʉ. 31 Dami xihmbʉ Oją da yąngui nangue ʉ hing yʉ ꞌyɛ̨cꞌyɛi bʉ ra häi Judea, guetꞌa ra xɛqui bʉ Jerusalén. Nɛ dami ꞌyäfʉ rá mate Oją nangue ʉ yʉ cu bí ꞌbʉpʉ Jerusalén, ngue da hyąmanho a ra mbɛti ga hąx bʉ ga unni, ngue bi mbɛnꞌndʉ hing yʉ judío bʉ Macedonia nɛpʉ Acaya, ngueꞌʉ yʉ́ cu. 32 Nɛ nuꞌbʉ da nde Oją dan johyagä ꞌbʉ dá mbagä bʉ, dan säya tsꞌʉ bʉ guí ꞌbʉhmbʉ. 33 Nɛ nu Oją nząi i hurpa rá mbʉi nꞌda, pɛ nɛ ahʉ da hyutꞌa ni mbʉihʉ. Nɛ høntꞌa gam bɛ̨mhbʉ a ya.